سائق اجنبي يحرض البنات

[دانة الكون]

بسم الله الرحمن الرحيم
السلام عليكم ورحمة الله وبركاته
سائق اجنبي من جنسية غير عربيه يحرض البنات وانتم وش رايكم
ابي اذكر لكم قصه صارت
في يوم وانا رايحه مع السواق "ماشاء الله عليه ملتزم"شاف مجموعه شباب "والظاهر تذكر الموقف الي صار"
المهم شوي ويهب فيني انا قلت الحين يكفخني وش السالفه لانه كان منفعل ومعصب "واول مره يسولف ويتكلم معي دايماً مشغل قران ولا حديث"واستغربت وش الي مطلعه من طوره.
(بذكر القصه بلغته زي ما قال لي)
قال انا اول يفكر كله نفر سعودي كويس وكله 100% علشان هنا فيه كعبه وفيه رسول"عاد انا ما ادري وش قصده برسول هل هو مسجد الرسول ولا مكان النبوه"المهم قلت كل الناس فيهم الزين والشين
قال انا يروح كليه حق بنات فيه بنات اتصال وشوي يبكي بسرعه تعال يافلان انا فيه خوف فيه شباب مافيه كويس بعدين انا يروح سرعه سرعه "يبي يفزع" ما فيه يحصل احد وبعدين يشيل بنات ويروح بيت
انا كلام حق بنت انتي ليش ما فيه شيل جزمه"تكرمون"ويضرب هذا ولد ،، هذا ولد كله خرطي انتي يضرب هو خوف ويرح ليش ما فيه يشيل هذا حجر ويضرب سياره كسر قزاز.
قالي انا مافيه يشوف واحد سعودي سيم سيم حرمه انا اول يودي من زمان هي فيه شباب يلحق هي كلام وقف عند بقاله انا ما فيه مشكل يوقف هو يروح يشيل 20 بيبسي ويركب سياره بعدين ولد يجي وراء هي
وبعدين حرمه يطلع بيبسي ويفتح شباك ويضرب سياره حق ولد ويكسر سياره وولد يهرب هذا سعودي 100% ليش ما فيه حرمه كله كذا"وهو يسرد لي القصه كان فرحان بالحرمه والي سوته".
قالي انا كلام كفيل هذا شباب هو كلام خليه يولي ليش انا يخليه يولي انا ما فيه يرضى بنت انا كذا،،

فانتم وش رايكم يسمعن كلامه البنات ويكسرن قزاز السيارات ولا يفلقن واحد منهم "وانا اعتقد هذي جرائه"ويستاهل الي يصير له ،، وتصير بوجه نظر المجتمع ماتستحي ولا تربت.
ولا تطنش ولا ترد عليه وتسوي مثل ما سون البنات .
ولا مثل بعض البنات تطقه سوالف مع الشباب وتسايرهم وتسولف معهم وهي تعتقد ان هذي جرائه منها "وهذي اعتبرها من وجهه نظري وقاحه"وللاسف تكون محط إعجاب صديقاتها من وين لك الجرائه تكلمتي معهم وهي تفتخر بنفسها انها مسويه إنجاز.
انتم وش تقولون؟؟؟

[أبووصال]

الله يهديك يادانه لويتي السنتنا وحنا نقرا موضوعك هذا كل نفر هههههه والله رهيبه من وجهة نظري ان بعض البنات الله يهديهم خربو على الباقي يعني بعض البنات تتجراء وتتلفظ على الشباب لكن لو ان البنت غطت عيونها ولا تكشخت حتى لو هي بنت ناس لازم تعرف شي واحد مهم انها ماتظهر زينتها بالباص صح.... لان الشباب اول مايشوفون البنت وعيونها يطردو وراها عشان يعرفو هي محتشمه والا لاوهنا تصير المشكله ليش تحطي نفسك مكان اختبار .... انا اذكر كنت يوم من الايام في اسواق التميمي اللي على طريق الملك فهد الساعه 2ليلا في الرياض دخلت وتسوقت شوي ويوم طلعت تفاجات ان زحمة شباب قلت اكيد هوشه خلنا نفرق طلعت المفاجاه انهم بنات 2 راكبات في ليموزين ولابسات لثمه والشباب ينطلو الارقام من الشباك ويحاولو يفتحو الباب عموما جو اهل الخير وراحو الشباب تدرون ويش صار بعدها لحقو الليموزين الى شارع الامير سلطان ووقفت سيارتين قدامه وسيارتين وراه وانا امشي وراهم منظر غريب الحين سؤال يطرح نفسه منو المتسبب الشباب او البنات او الاهل او الليموزين او الشارع اول شي طلعت البنت لحالها وطلعتها اخر الليل وركوبها مع سواق وترك اهلها الحبل على الغارب مشكله واللبس بعد مشكله انا متاكد لو انها لبست لثمه وبنطلون وركبت مع سواق وغطت عيونها واذا نزلت عند الناس اللي هي تبغاهم تشيل اللي تبي يعني اذا ركبتي مع سواق احتشمي وصدقيني ماحد يردك ويعارضك ..... ابووصال

[دانة الكون]

انت التوى لسانك اجل انا وش اقول الي احاول اجمع وبعض كلامه ما ادري وش يقول
ومن ناحيه البنات فيهن الزين وفيهن الشين
وزينتها مو ما تظهرها بالباص الا بكل مكان "وَلا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاءِ وَلا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ "
بعدين انا مابي اظلم البنات ما شفتهن ولا شفت وش لابسات علشان اقول هن الغلطانات..
والبنات الي شفت اتوقع هن يدورن الشباب ولا وش مطلعها الساعه2 ومع ليموزين
وبعدين انت وش موديك وراهم تبيني اعلم ام وصال
اما السواق ليش الوحده تركب معه انا اقول لك الله يسلمك"لولا الله ثم السواق كان اكلنا ....احم احم"
الله يسلمك عيالنا متبرين مننا وحتى وحنا نعطيهم بخشيش ما ينفع ونقول لهم نعطيكم الي نعطي السواق ولا فيه امل ،،، نمشي لكم راتب شهري يلتزم يومين وينكبنا باقي الايام.
والبنت لو كانت عبايتها ساتره ونقابها مثل الاوادم"ما يكون نص وجهها طالع"مو لزوم تغطي عيونها فيه بعضهن النظر ضعيف عنهن،،، تلبس الي تبي محد شايف الي تحت العباه مو مثل اليوم استغفر الله بالكرنيش وحده لابسه عباه كتف ومفتوحه ولابسه بنطلون وبلوزه قصيره وتمشي مع زوجها وهو عادي عنده بالله من المخطي فيهم هذولا.

[أبووصال]

يادانه الله يصلحك وش موديك للكورنيش تبيني اعلم ابو دانه لكن مثل ماقلت انا الله يخليني لاهلي مهما نطرح موضوع لابد نلقا من يعارض حتى الانبياء جوهم قومهم وطلبو اشياء عجيبه وعارضو الرسل وبعدين تعالي هنا انتي ليش تناقضي نفسك توك تقولي الله يعيننا ماعندنا عيال ينفعوننا نعطيهم راتب مايودونا صح طيب المسكينات اللي بالتميمي يمكن مثل وضعيتك وبعدين في الرياض الناس ماتنام يمكن كانو جوعانات والا يبغن ينادولوالا ... .. والثعلب فات فات وبذيله سبع لفات اعذروني شطحت تحمست شي عموما انتي ماتتعلمي من مقالاتي ليش انا كنت اكتب واقول ضع نفسك مكان الشخص الذي تريد ان تحكم عليه وانتي حكمتي على ام اللثام الله يهديها وبعدين البنات طايحات بعذر انا ماقدر اغطي عيوني فيني ضعف نظر اجل ابووصال وصل لقاعده الحين ان 75%من بنات السعوديه ضعيفات نظر صح خلو الكلك عنكم عموما البنت المحتشمه تكون حتى باللبس لاحد يصجني ويقول المحتشمه محتشمه اوكي لكن بعد الشريفه اللي تحس ان عيونها لوطلعتهم اربشت الناس تغطيهم صح يعني انا الحين مزيون ماروح اطلع واعذب البنات...... اعقلن يالبنات وخلو الدلع الوحده تبي تلبس على كيفها وماتبي احد يطالعها الله يسامحكم .....

[دانة الكون]

اتمشى الله يصلحك
منهو ابو دانه ،،،،،،،،امين الله يخليك لاهلك
والبنات اقول يامال الجوع والهم المجموع"صرت عجيز"ليه ما تسوي لها شيء بالبيت وتاكله والله من الرفاله وإذا احتدت تتصل على السواق يجيبه للبيت وش مطلعها الساعه2 بالليل "وهذاني حطيت نفسي بمكانهن بسوي بكذا"لو قايل رايحات مستشفى اقول ماعليه مريضات وما لقن احد يوديهن واضطرن يروحن اخر الليل،،، اما نسبه البنات5% نظرهن ضعيف والباقي يتعيمن ،،، واللبس والله من ردى اهله الي طالعه من عندهم بها المنظر وما قالوا شيء.
والسواق مضطرين نروح معه للدوام ولا وش نسوي.

[أبووصال]

ابو دانه وش رايك من يكون جاركم ... وبعدين ابي ارقيك واقولك ياخاله ترا اللي يسون كذا كثير مو قليل فيه بنات يستحو وتلقينها حتى من ضلها تخاف لكن ماتعرف طريقة التحكم بالامور يعني تلبس وتكشخ وتطلع مع سواق ماتدري باضرارها الله يصلحك يعني لازم شوي وعي انتي واضح انك موظفه واعتقد انك بالسلك الدبلوماسيوالله الخفجي دوارين واشاره تكفى يالسلك الدبلوماسي عموما الكل يحتاج السواق ماقول شي لكن اقول ان الوحده تطلع مع السواق لا وتلقينها تلعب بجوالها عند الاشاره والناس عيونها تخرم قزاز السياره الله يعينكم يالحريم والله ماتدرون تلقونها منين والا منين لكن لو تلبسن مثل لبس الافغانيات ماظنيت احد يناظركم.... اخوكم ابووصال

[دانة الكون]

ما عندنا احد من جيراننا بهذا الاسم
وبعدين سؤالي يسمعن البنات شور السواق ولا لا ،،، هو على حق ولا على باطل ،،، عنده سالفه ولا لا.
وبعدين تبينا نلبس مثل الافعانيه ونطلع بدون عبايه الله يهديك بس.

[أبووصال]

لاياحظي مايسمعن الا كلام اهلهن لان السواق ربما يكون عنده فكر مخالف يبي يطمن البنت له يعنني مسيكين واخرتها ماعرف عربي انا مسكين وش رايكم لو الغو السواقين بالمملكه وصارت سعوده انا اشهد الشعب السعودي كله في بطاقته تلقا المهنه سواق الا من رحم الله مثلي عموما يادانه شكلك مقطوعه من شجره الله يصلحك ياخاله والافعانيه اللي انا ماقلتها لوتتهجيها تلقيه افعى نيه انا قلت افغانيه وصدقيني لبسهم ساتر جربي يوم تروحي للسوق كذا..... ابووصال

[لحن الحزن]

هلا فيك اختي الكريمة وشاكر لك طرح هذا الموضوع


موضوع خطير وبصراحة قبل سنوات اتذكر موقف حدث لاحد الاصدقاء كان ذاهب ليحضر ابنته من المدرسة في الابتدائية ويقول كان يشاهد عامل اسيوي سائق لباص صغير كان يضع الباص في مكان بعيد وياخذ زاويه بحيث يكون الباب في الزاوية لا يشاهده احد


يقول صديقي كنت اراقب وانا انتظر ابنتي ذلك السائق وطريقة وضع السياره يقول غريبه يعني توجد مسافات يستطيع ان يقف فيها وتكون مكشوفه

ويقول مع مرور الايام شاهدته بذات الموقف وذات الزاوية وكلما وضعت الطفله قدمها على مدرج الباص قام بوضع يده في اسفل اسفل ظهر الطفله حتى يلامس اعضائها الحساسه ويوهمهم بأنه يساعدها للركوب ...!!

يقول صاحبنا لما شاهدت هذا الحشره انفجرت وخذيت عقالي وضرب وضرب وضرب والناس تجتمع حولي اشفيك اشفيك يقول بلا شعوري لم احسس بنفسي حتى وصلت الشرطة والسائق يغرق بدمائه


وحينما تحدثت عن ما شاهدته وتم اخذ اقوال بعض الطالبات تم التأكد من صحة كلامي والافراج عني مع الشكر والثناء


امر مخيف بصراحة ان يتم ترك الصغار والكبار بيد هؤلاء يجب اختيار الثقه والرجل المناسب سواء سعودي او غير سعودي

ولك التحية

[نايف عايد]

اختي دانه الكون يعطيك العافيه على هذا الطرح..

من الأفضل ان البنت تلتزم الهدوء في السيارة وعدم المشادة والملاسنه مع الشباب لسد ذريعة الفتنه لربما كلمة تخرج من أفواه المعاكسين فتصطاد القلب.

وان تتجنب اللبس الذي يلفت نظر الشباب حتى لاتقع في هذه المشاكل.

فأنا لاأؤيد رمي المعاكسين بالعلب حتى لا يزيدون أو بمريض نفسي .. وأنما التزام والصمت وأخذ رقم السيارة..

لك كل الاحترام والتقدير..