أكبر قهر لاجيت تعشق لك انسان
واللي تودّه ساهي ٍ ما درى بك
وأكبر قهر تحلم وتحلم لك ازمان
ويطيح حلمك ميت ٍ عند بابك
وأكبر قهر تبني من سنين بنيان
وتشوف بنّيك ما تعدّى ترابك
وأكبر قهر تسقي من الورد بستان
وتموت بين يديك زهرة شبابك
وأكبر قهر تارد على البير ضميان
وتشوف بعض الطين حايس شرابك
وأكبر قهر لاحطوا الناس نيشان
كل ٍ يزهب وانت ضايع زهابك
وأكبر قهر ترهي على حصان خسران
يوم السبق لا طحت كل ٍ حكى بك
وأكبر قهر يوم انت ضايع وعطشان
ونفس الطريق اللي يوديك جابك
وأكبر قهر صاحبك لا جاك خوان
لا بحت له بالسر راح ووشى بك
وأكبر قهر تعطي وتعطي على شان
تاخذ عقب كل العطايا حسابك
كل ما سبق ذكره على الشوف ما كان
حفنة حروفٍ مع بعضها تشابك
ماهوب هرج ٍ يِعجَنْ بذهن ولسان
ولاهوب عود ٍ يكسره حد نابك
إن كنت فيما قلت تحتاج برهان
ناظر وتلقى في قصيدي جوابك
وإن كنت فيما قلت مخطي وغلطان
أترك خطانا وانت عطنا صوابك
المواضيع المتشابهه
العرض الشجري