السلام عليكم ورحمة الله وبركاته.
اسمحوا لي ان اضع بين ايديكم
بعض واجمل ما قيل في رثاء
المرحوم بأذن الله الامير\ (طلال بن عبدالعزبز بن متعب الرشيد)
______________________________ ____________________ ________________________
القلب الابيض
لا الجمعه الجمعه ..ولا أعيادها أعياد
ما كن هذا عيد ولا بجمعه
المجد لو ماتوا هله .. تولد أمجاد
والجراح ما تطفيه صرخه ودمعه
مليون من قبله ومليون به زاد
ذيك الاوادم طبعها غير .. طبعه
واحد يموت وينقلب شكل الأعداد
(طلال) عن مليون بقلوب..ربعه
ماتوا هله قبله جماعات وأفراد
وبقلوبنا حيين شيمه وسمعه
أخوان (نوره يومها ويل وعناد
تباشروا بالموت طيب وفزعه
شمر عمود البيت والبيت ووتاد
الله سقاهم علم غانم ورفعه
طلال يبقى حي وتموت ألاوغاد
بقلوبنا ليل وطواريه..شمعه
القلب الأبيض موتته هزت أجود
تعشق وفاه وطيب ساسه وطلعه
ليت العتب ينفع ونعتب على بلاد
بأحضانها ذاك النهر ..جف نبعه
ليته بقي حي على روس الأشهاد
وليت......راح من غير ..رجعه
يا عيد فارق ما ورا أخبارك أعياد
وسلم على جمعه بلا أي جمعه
الشاعر | فرج صباح
______________________________ ____________________ ________________________
عقبك.. مالي خليل
مارحل غيرك ولاغيرك بقا
هو بقا غيرك عقب هذا الرحيل
ما علي وجهك سوى زود التقا
ولا خذيت من الحياه الآ الجميل
ولا كسبت من النفوس والا النقا
ولا تركت من الصبر غير القليل
كل حزن في وداعك التقا
وكل شي من الالم وده يسيل
طيب النفس بالطيب وارتقي
مايحط الابياض..ولا يشيل
يا طلال ..الحزن تو..انه رقا
واستقر بداخل القلب العليل
كنت أنا وياك والشعر اصدقا
بس من عقبك أنا مالي خليل
كل مااكتب بيت قال: اخر لقا
راح من يكتب على الوزن الثقيل
الشاعر| ناصر المطيري ______________________________ ____________________ ________________________
الموت ...يشتاق
قلنا المصايب أدبرن واثرهن جن
ولا ينحسب فعل المقادير عليله
اثر المنايا عارفات يتنقن
فاتن على ما يخيب نزيله
حتى قسي الموت له قلب ويحن
ويشتاق اكثر للنفوس الجميله
لو يعرفون التافهين ذبحوا من؟
تفاخروا..لابو من انتم حثيله
ولد الشيوخ اللي افعاله تعدن
المرجله. والمعرفه والنفيله
لو النساء من عيونهن زود يلدن
ما ينجبنه ولا يشيلن مثيله
هذاك ابو نواف يا عارفه ثن
هاك الطويل اللي افعاله طويله
والناس ما تكسب غلاها بضحك سن
الناس تفهم بالخطا والفضيله
واليوم ياعيون الشقا لو تباكن
تسعين عام ما نسينا رحيله
يا كبر حزني يوم شفته مكفن
وشلون شيال المصاعب نشيله
واقفيت من ارض على ترابها دفن
ما شفت وحشه قبر كنه خميله
الشاعر\عبدالله محمد الرويلي
______________________________ ____________________ ________________________
فاجعة الشعر والإنسانيه
لو القصايد قولهن رد ابنسان
مامت ياللي مزعل عداك موتك
ولو المنايا تندفع فيها الأثمان
ماغاب عن دنيا المحبين صوتك
ولوتنفدى بالدمع ياكثر الأعيان
اللي جرت مثل البحر في ـ تبوتك
ماكان رمايك ولا كنت نيشان
صابو علم واغضت عليهم بخوتك
من العفاف اللي كسا طهر الأبدان
ثوبك حلف ما ياصل الدم كوتك
ليت القدر عداك يا ذرب الإيمان
ولاوقفت شوي لا ما يفوتك
لو قدرو وش كثرها فيك الأحزان
مالبسو سود الليالي نعوتك
ياللي غيابك حرق قلوب ووجان
ولا أنت ما يحرق زمانك كروتك
وان كان ما جر القلم فيك الأوزان
تشهدعلى درب المراجل بشوتك
ماتنبني اليمنى يسارك بالإحسان
فزاع ما تذخر من الجود قوتك
يسقيك ياقبر(ن)بهالطيب سكان
نبت البختري..والخزامى خبوتك
غيم(ن) حقوق(ن) من مناشيه
هتان بأسماك يارب الخلايق دعوتك
ومن عقبها تلفي على روض وجنان
بأعلى المراتب نرجي الله ثبوتك
وان صار بالدنيا قطاعه ونسيان
من غير فعلك خلدنك بيوتك
عبيد الدبيسي
______________________________ ____________________ ________________________
طود الجبل طود
راكان بن حثلين حينما أطلق سراحه من الأسر في وقت الدوله العثمانيه في تركيا قال قصيدة موجهة إلي الامير محمد بن رشيد في حائل\
(ســـــــــــلام أخو نوره لزوم عليه......)
مات الفقيده والبقاء في عضيده
اللي مثل فعله له الطيب مشهود
متخالط دمــــه بذمــــــة وريده
طلال مات وغير طود الجبل طود
صحيح لا من مات قلنا فقيده
لا شك بيت العز بالعز مشيود
الموت حق ودام ربي يريده
العمر عند الله محدد ومعدود
وانا أشهد انه راح منا وليده
وطلال لا من ملت راكان موجود
البارحه جات القصايد جديده
والسالفه طابت على كل محمود
سوالف رجال تمثنت فريده
في وسط جوفي ياعساهم على الزود
أقول قولي والسجايا حميده
صوب الرجال اللي نخر عظمها الدود
سلام أخونوره أردد وأعيده
للي جناب مشاهده كنه العود
عيني على فرقاه ماهي سعيده
يوم الليالي جرعتني من الكود
يوم الطنايا شوفهم يوم عيده
وقصره كما برزان مبني على الجود
مات الفقيده والعوض في عضيده
عبد العزيز اللي له الطيب مشهود
فالح بن دهمه
______________________________ ____________________ ________________________
ياراس الشرف
مرحوم يا راس الشرف والمروه
يا متعب بالطيب نفسه لغيره
ينعاك غيم سيل القاع نوه
وينعونك رجال الوفا والبصيره
وينعاك حر طال فعلك علوه
ومن هدتك كلن تمنى مطيره
وينعاك سعر عقب موتك تشوه
ولاعاد عقبك كل روح تثيره
رجل حيا بالعز واقتات ضوه
طيبه كبير ولو حياته قصيره
والله لو ان الموت يدفع بقوه
ردوه شمر بالسيوف الشطيره
لاشك حق وفي حديث النبوه
ولادايم إلا اللي يعلم السريره
والقبر غيب..ضم غيرك وتوه
ويضم خلق مثل نفسك كبيره
الله يجيرك من عذابه وسوه
وينجيك من نار الندم والسعيره
قلته يابو نواف لأجل الأخوه
ومن طيب ساسك والبلد والعشيره
زعل الرشيدي ______________________________ ____________________ ________________________
نعي الشعر
الشعر ينعا الي رحل وفتقدناه
طلال راع الطيب راع الحميه
والشعر ينعا الي ليا حل طرياه
تاقف له بيوت الشرف قابليه
من روس شمر أطلعه فعل يمناه
من طلعته عز الرفيق وخويه
ابن الرشيد الي رحل جعل مثواه
في جنت فيها الوجيه الرضيه
عن كم يتيمن تمسح الدمع يمناه
ويشهد على فعله اإلاه البريه
ويشهد على ما قول من لا ذبحماه
مرحوم ياراع اليمين السخيه
آمين جعله فالجنان الضفيه
عوض بن طالع الحربي
______________________________ ____________________ ________________________
كلنا نبكي طلال
المنايا لو تعرف الطيب ماتاخذ عميده
لكن اللي راده الله مالنا عنه وغيره
كلنا نبكي طلال وعزوته تبكي الفقيده
نرفع ايدينا وندعى ياعسى الجنه مصيره
ذاك هو رجل المواقف والمراجل ذاك سيده
ذاك هو كل الوفاء كم يتيم جاه خيره
ملت حروف القصيده ماقوت تكيب قصيده
كل ماتكتب تعيده تصبح بكبره صغيره
كم شيخ في طلال ينثرالدمع ويزيده
كم طفل قام يبكي حزن ودموعه غزيره
ياليال ابكي طلال..سايق الخيروعضيده
ابكي اشعاره ونبكي راعي الشعر وسفيره
يامنايا عقب ما خذيته والدنيا زهيده
دارت الدنيا وسارت واحزنت ناس كثيره
القدر لاجاء من الله يستوي فيها عبيده
حق ما ندري متى؟وربي يوم له مسيره
ابراهيم عبدالله السنيدي
______________________________ ____________________ ________________________
سر الغلا
توي..وليتي توني..ولا احتوتني هالطعون
ياكثر ناس للخبر مستوعبين مكذبين
الموت حق ومن غلاك أعمت عواطفنا الظنون
يقين أقرب لاحتمال الشك رغم إنه يقين
طلال من قال الطنايا بس أوبس المزون
حتى المزايا من بياض الوجه إلين إلين إلين
إلين جينا كلنا(نواف)صابر ومغبون
حار العزا بينه وبين قلوبنا يا المعدمين
طلال والغدر إن تعدى أوتمادى وش يكون
عثمان من قبله عمر راحوا بغدر المارقين
طلال آه..الحزن يحبس فيني الآه ويمون
اصبر إلين الآه تعبث في حشاي وأستكين
طلال يا أسمى من رثاء الشعر ودموع العيون
طيبك شموخك من شمال حسرة ذهولي من يمين
طلال يستسلم قصيدي للمواجع للسكون
كل التعابير إن تلاشت عذرها الطرح الحزين
طلال تسترسل جروحي للموده للشجون
للهاجس اللي من عرفك سنين وأغرته السنين
طلال لو عاش العطا بعدك سنين إلا قرون
ما حاش ما حازت يمينك بالعطايا يا ا لمعين
طلال يالله ما بقى إلا مابقى للسابقون
حقك علينا نرفع يدين الرجاوي صابرين
عبدالرحمن الرشود
______________________________ ____________________ ________________________
رحيل....قمة المجد
للشعر وشعور العباد وفواصل
وإلي القيم في كل معنى وخصله
للمجدوآيات العلا والمحاصل
ننعى الذي ما اغتر بأصله وفصله
مرحوم ياللي لقمة المجد واصل
ومن الرحم يزداد غيثه ووصله
يسعى لغرس الطايله والتواصل
من الطيب ساس ينتسب له وأصله
بالعز له سيف يقص المفصل
يقص من شيطان حقده رقصله
بين الرشيد وبين الأنذال فاصل
والطيب يقرن فيه ياصعب فصله
على المحبه من مباديه حاصل
وبه من سمات الطيب تسعين خصله
عبدالعزيز بن سليمان الفدغوش
مدير تحرير مجلة الشرق
______________________________ ____________________ ________________________
طلال يموت!!!
ياحفار القبور أسالك بالله احفر بصدري
أحن ابن الكرام من التراب يضم جثمانه
دخيلك نزله بين الضلوع العوج أو تدري
تعال نمدده بالقلب جايز تركدأحزانه
وربي مافجعني يوم علم ولاكسر ظهري
مثل علم الشجاع اللي توفي خارج أوطانه
وقفت أتامل الدنيا بدونه وأكل بظفري
شعرت بوقتها كن الخفوق يعض شريانه
طلال يموت!!لا والله أحس العالم تهذري
طلال الشامخ الشاهق يموت!!الناس حلمانه
شقول لعيني إن شافت فواصلهاه؟وش عذري
وقالت\فاصلة بيضاء محمد مالها خانه!
وش أتعذر وأقول لمسمعي لو سيرته تطري؟
وش أتعذر إذاسمعي حضن نبرات ديوانه
ياكيف أنسى كلامه يوم جيته شايل شعري
سمع مني وصفق لي وقال بعضمة لسانه
لو أدري إنك بتتعنا لنا جيناك من بدري
(فواصل)بيتك وعلق قصيدك فوق جدرانه
رفع من معنوياتي وخلا الدم بي يجري
بعدما كنت يا~س والمشاعر جد ضميانه
كتبت وصرت أنافس كل شاعر من بني عصري
وإذا (الملتاع)راهن شي عادي يكسب رهانه
أنا الملتاع والله من فقدته والألم حصري
مثل طفل يتيم فوق ضيمه جاروا إخوانه
وش أذكر من صفاته!فارس وفيه الكرم فطري
يمد ويصبح الطائي صبي من ضمن صبيانه
هدوئه يشعرك بأن الكلام بحظرته مغري
كلامه يشعرك بأن الهدوء إن طال له شانه
إلامنه استقام طويق وإن تكى هرم مصري
بعمره ماظلم إنسان وإلازعل إنسانه
ولكن حكمة الله قد قضت في أمره وأمري
قضاه يموت وأتحسر بأمرالله سبحانه
دخيل الله ياحفار القبور تحطه بصدري
أنا أو لا فيه خلصني ترا الأخلاق تعبانه
محمد عويضة
______________________________ ____________________ ________________________
لكم خااااااااااالص تحياتي............
المواضيع المتشابهه
العرض العادي
