ياراكب اللي وسط درجه ضمانه
من مصنعه ماهو مرهم ومغشوش
قاداتها امريكا تباهو عشانه
تْرامب واوباما ومن قبلهم بوش
جاء بايدُن واكمل ملفه وعانه
واعطاه دعمٍ ماعُطي قبله جيوش
رجّع مراحل هيبته في زمانه
واستانسوا عشاقه اللي له عطوش
ثم اعتمد دعمه وزير الخزانه
والكونقرس عمّد له بنوك وقروش
ومصممه فيه اعتنابه وصانه
خلاه للي ينظره فيه مدهوش
اسمه جعل لموردينه متانه
مثل الجميح اللي تعلا به عروش
جمسٍ خذى من جودة اسمه مكانه
اسمه على وجهه ومن خلف منقوش
اربع ميه وخمسين عزه كيانه
كن اخر قزوزاته الحدب منهوش
فيه الحراره ماتسوي خيانه
ما انشق راديتر ولا انشق خرطوش
لا اقبل يشابه بالتواصيف دانه
وليّا اعترض ذيبٍ مذيّر ومخروش
يلقم تروس القير في كل خانه
ياخذ نمرّه لمسة الكف منتوش
عزمه تغذت قوته من حْصانه
ارضٍ وطاها نبتها منه محشوش
الدعسه الاولى يعيش اريحانه
والثانيه كنه ينوش الفضاء نوش
ممشاه راسي مايخل اتزانه
مع قار والا مع مطانيج وعتوش
والدبلوماسية عطتْه الحصانه
لامر له تفتيش ماهوب منبوش
ماحط في ورشة رويشد صيانه
ولا نويصر طق بالباب شاكوش
مارودم المعجون فيه احتقانه
ماهو مكمخ بالجوانب ومرشوش
لونه كما الشاهي بْوسط استكانه
غمارته بيضا كما خامة دروش
واكسسوراته ساهمن بلمعانه
اجداد مافيهن تعفّاص وخدوش
رفارفه من خلف فيهن بدانه
والحوض خالي من تطعّاج وافلوش
عليه نيكل مسكة الخيزرانه
تخشيبها ماهو ملصق ومنفوش
لفاف سسته واعتنت في ليانه
ستة عشر جنطة با الاطراف مجروش
جذاب واللي مالكه ما استهانه
دايم مْغسّل وهو واقف وممشوش
حافظ على وضعه سوات الامانه
وان راح والا بالطبيله ومخشوش
لادق سلفه يعجبك بدويانه
نغمة كناديسه يرددهن الحوش
واليّا سخن انّسه حضر غاب جانه
والوقت وقت اللي مقانيص وغبوش
زوّد وقوده واستعدالتحانه
عبا التوانك فُل والفايض يْطوش
غادر مْن الخفحي سريع الحقانه
ماله على قريه مهمات وطروش
طاف ابرق الكبرت ماهوب اهانه
حطه على يمناه والمشي منجوش
خلا الصداوي والحفر بفهقانه
عدا مداهيل المريوس وعلوش
واليّا تعدّى لفة الاسطوانه
من دون عرعر ينثني ثنية وُحوش
منصاه روضٍ كاسيٍ قحويانه
با انواع كل العشب زاهي ومفروش
ما الوّث الدخان ساحة مكانه
السيل ناقع فيه ومسوي خفوش
والطير لاقي راحته واحتضانه
له في شرابيك الشجر بيض وعشوش
والشعر هيبة شاعره من لسانه
وادراه مثل العين وابياتي رموش
لاجبت شطر إيداهمني أخوانه
في رسم وصف الجمس والوجه مبشوش
حمد الدليهي
المواضيع المتشابهه
العرض العادي
