لقاء رائع مع الفنان الكبير عبدالعزيز الهزاع

[محمد الرويضان]

[align=center]








قدم لكم اليوم لقاء رائع مع الفنان الكبير عبدالعزيز الهزاع

بدايات الفنان عبدالعزيز الهزاع مع موهبة التقليد والتمثيل ؟ وهل صحيح انه تم اكتشاف هالموهبة في الكويت ؟
مهوب على كل حال لكن فيها بدايات كانت في الكويت حيث كنت موظف هناك وكنت اتعاون مع الاعلام الكويتي ولكن حصل لي ظروف ورجعت للسعودية وصرت اقلد الاصوات في الرحلات والنزهات هذا الكلام قبل ما ادخل مجال الاعلام . والموهبة معي منذو الصغر وانا حرصت اني احافظ عليها واطورها
كيف وصل الفنان عبدالعزيز الهزاع للاذاعة ؟
رحت لمبنى الاذاعة في جدة وقابلت واحد ماله داعي ذكر اسمه هو اللي وقف لي ولكن الرجال قال لي خلاص فيه واحد تروح لمه وهو يقيمك وكان هذا اللي يقيمني غير سعودي وماكان يفقه من اللي اقوله شي لانه بالعامية ، اللي صار انه قال اللي يقيمني لمدير الاذاعه ان الرجال ماينفع لنا وهذي الاسباب ، قابلت مدير الاذاعه وقالي ان فنك هذا مايصلح لنا هذا يصلح للعقيلات والكشتات وفنك هذا مابعد نقدر نستفيد منه ،، اللي حدث اني جبت واسطة واو كبيره وهالواسطة ادت مفعولها وقبلت وصرت ماهنا اطيب من عقب الواسطة واستمريت معهم إلى الان ولله الحمد . كم كانوا يعطونك على الحلقة الواحدة ؟

اول مابديت مع الاذاعه قالوا لي بنعطيك عشرة ريال على الحلقة الوحدة قلت لهم ماعندي مانع والله لو تبون بلاش .

ماهي باكورة انتاج الفنان عبدالعزيز الهزاع ؟

اول تمثيلية لي وهي اللي فتحت لي الباب على مصراعيه اللي هي تمثيلية بدوي في طيارة واقدر اقول انها هي شهرة عبدالعزيز الهزاع رغم انه لها اكثر 45 سنه

" بدوي في طيارة " تمثيلية اشتهر بها الفنان عبدالعزيز الهزاع وحصدت نجاح منقطع النظير طوال فترة 45 سنه ،، وهي بداياتك ، كيف استطعت تسجيل هذه الحلقة ؟
محد كتب لي شي من نفسي انا .. تصورت وتوقعت البدوي على بساطته وهو يشوف هالتقدم ويركب الطيارة اول مره ويتعامل مع الوضع على سليقته وطبيعته ويقوم بتصرفات تكون عند الناس تصرفات غير طبيعيه بينما هي عنده عاديه جدا ، وهذي التمثيلية كانت فكاهية وبعدها تحولت إلى مسار معالجة القضايا الاجتماعية باسلوب فكاهي .

من يكتب لك سيناريو الحلقات ؟

محد يكتب لي أي سيناريو ولكن اخذ الافكار الواقع زي ماقلت لك انا اعالج القضايا الاجتماعية ،، والمشاكل الاجتماعية كثيرة وماتخلص ، اخذها من الجرايد ومن الناس ومن حياتي العادية واصوغ الفكره في ذهني وادخل الاستديو واسجل كل الكلام بدون ورق ولا استعدادات اسجل الحلقة ارتجالي والحتسي يجر بعضه .

هل صحيح ماسمعنا ان الفنان عبدالعزيز الهزاع في بداياته كان يسجل حلقات برنامجه الشهير وسع صدرك وطريق المحبة في منزله ؟

ايه نعم ، من اول كنت ساكن في بيت طين بالسويدا ( حي الفوطة الحين ) وكان عندي غرفة بالسطح وكنت مطقق بسط على الجدران علشان الصدى والصوت وكان عندي مسجل كبير الظاهر ان اسمه ( ايكو ) ان كاني مانسيت واجمع فرقة الاذاعة ومعهم طارق عبدالحكيم وغيره من الفنانين الكبار اللي يحضرون التسجيل واحشرهم بالغرفة واقعد اسجل لكن المنلوجات كنت اسجلها في مبنى التلفزيون .

الفنان عبدالعزيز الهزاع ، ظهرت في المنلوج وكذلك التقليد والتمثيل . اين تجد نفسك ؟

في التمثيل والتقليد بدون شك . لان المنلوج يتطلب اداء بعض الحركات والتمثيل لكن التقليد وعن طريق الرادو خاصة مايتطلب أي حركة بقدر مايتطلب اتقان الصوت .

ماعلاقة الفنان عبدالعزيز الهزاع بالتلفزيون ؟

اول مافتح التلفزيون كنت انا وزملائي نقدم بعض الفقرات التمثيلية والوصلات للفنانين ، يعني أي فنان او مطرب نقدم له مقدمة منلوجية علشان يدخل الفنان فيها . وفي نفس الوقت كنا نقدم فقرات منلوجية انا وزملاى مثل التمامي ودرديري والبدنة وغيرهم وهذي بداية مع المنلوج لكن الحين المنلوج طفى وماعاد له أي اهتمام واي قيمة مثل اول وانا اختصرت الطريق وتركت التلفزيون واتجهت للراديو .

ماسبب عدم ظهور الفنان عبدالعزيز الهزاع على شاشات التلفزيون في الاونة الاخيرة ؟

اغلب شغلي على الرادو زي ماقلت لك قبل وعلشان اعطي المستمع احساس بان اللي يتكلمون فرقة كاملة مهوب شخص واحد وبصراحه التلفزيون مايشجع على الظهور . المفروض اني لو ما طلعت في برامج خاصة فيني على الاقل اطلع في برامج ثانيه مثل مستشارك وغيره ، صحيح انهم معهم الشهادات والدكتوراه لكن انا معي الخبرة المفروض اني ما اغيب عن الناس . لاحظت انه اذا غبت فترة طويلة وبعدين ظهرت قالوا الناس من وين طلع الهزاع ، والله حق الرادو فاتحين بابهم لي لكن التلفزيون مقصرين واتمنى انهم ينتبهون .

في الفترة التي ظهر فيها عبدالعزيز الهزاع ظهر معه مجموعة قوية من مقدمي المونولوجست والمقلدين امثال التمامي والبدنة وغيرهم ،، لكن لم يثبت تواجدهم مثل ما اثبت الفنان عبدالعزيز تواجده ؟

هم ادو واجبهم وماقصروا لكن امكانياتهم محدودة ،، انا مسكت النواحي الاجتماعية ،، والمشاكل الاجتماعية كثيرة ماتنتهي ،، بعدين انا املك الموهبة اني اقلد مجموعة اشخاص في وقت واحد لكن هم لا مايقدرون يقلدون اكثر من شخص .

افهم من كلامك انه مالك أي منافس حتى الان ؟

والله اتمني انه يكون لي منافس ، لكن اذكر ذيك الايام كان التمامي الله يذكره بالخير ينافسني لكن هو توقف وماكنت اتمني انه يتوقف علشان نتهاوش انا وياه ومنها يزيد الابداع بسبب التحدي .

عبدالعزيز الهزاع اكثر من 45 سنة من الابداع .. فكم وصل رصيد حلقاتك ؟

حوالي سبعة الاف حلقة ،، ولو تروح لمكتبة الاذاعة ثلثين المكتبة كلها انتاجي من الرولة . واتحدى أي فنان او ممثل انه يوصل انتاجة مثل انتاجي .


ابو حديجان وام حديجان ومريبض وغيره من الشخصيات التي اشتهره بها عبدالعزيز الهزاع ، هل هي شخصيات مستمدة من الواقع ام خيالية ؟
هذي شخصيات وهمية لا تمت للواقع بصلة ، وعلشان مايكون فيه لبس ام حديجان وابو حديجان ومريبض وابو سراج هذي شخصيات ماتظهر الا في رمضان فقط ومن خلال اذاعة السعودية وغيره لا .

يعني هالشخصيات محتكره من قبل اذاعة السعودية والا كيف ؟

هذي شخصيات اعتبرها تراث وطني خاص بالسعودية وماتظهر الا لهم فقط والاحتكار من عندي انا مو من عند غيري ومخصصها في رمضان فقط .

طيب لو طلبت منك احدى المحطات الاذاعية او القنوات الفضائية تمثيل هذه الشخصيات توافق ام لا ؟

لا ماراح اوافق لانها زي ماقلت خاصة بالسعودية ، لكن الا اذا تفاهموا معي ولان راسي يمكن اوافق .

طريق المحبة برنامج اذيع في شهر رمضان الماضي بمحطة اذاعة MBC-FM ماكان بالمستوى اللي معروف عن عبدالعزيز الهزاع ، هل تحدثنا عن هالتجربة ومدى قناعتك بها . و هل كانوا هم يكتبون لك السيناريو ؟

والله ما اعتقد ، يمكن علشان الصوت لكن الافكار هي نفسها الا اني لازم اتابع التطور يعني من اول تلقاني اقول : ياحمد قم هات العلف للبقرة لكن الحين معاد فيه بقرة ولا علف ولازم اتجدد واستخدم عبارات والفاظ جديدة تحاكي الواقع . ومحد يكتب لي السيناريو انا اروح لمكتبهم اللي في الرياض واسجل الحلقة كخام وهم عاد يمنتجونها على كيفهم .


عبدالعزيز الهزاع ، في فترة من الفترات اعلن اعتزاله ثم عاد للفن بعد تكريمه ماهي اسباب رجعتك ؟

انا لي اكثر من 45 سنة امثل وكنت اتوقع ان الناس معاد تتابع اعمالي وملوا مني لكن اللي صار بعد اعتزالي كثير من الناس عاتبوني وطالبوا في بقائي وكانت تجيني اتصالات من الامراء وكبار المسؤولين وعامة الناس وكنت احسبها مجرد مجاملة لكن لمست هذا الحب من خلال كلماتهم لي ومعاتبتهم لذا رجعت بناءا على طلب الجمهور .

كم عدد الجوائز التي حصل عليها عبدالعزيز الهزاع ؟

حوالي 150 جائزة وشهادة تكريم فيها من داخل السعودية وفيها من خارجها .

تم تكريم عبدالعزيز الهزاع في عدة دول أي من هذه الدول لمست منهم الإعجاب بموهبتك ومدى إستعدادهم لدعم هالموهبة ؟

والله كل اللي كرموني ولله الحمد كانوا مبسوطين مني ومستغربين في نفس الوقت كيف اقدر اقلد مجموعة اشخاص في وقت واحد ، لكن هالموهبة عندنا في العالم العربي ما عطيت أي اهتمام .


يعني لو كنت في دولة اجنبية هل كنت تتوقع أن يكون الإنتشارأكثرمن كذا؟

نعم ، انا لو اني ضليع باللغة الانجليزية كان اشتهرت على مستوى العالم وكان غطيت على شارلي شابلن . حتى اذكر كنت مسافر إلى المانيا للعلاج والملحق الصحي بالسفارة السعودية هناك اخبر التلفزيون الالماني عن وجود فنان سعودي في المستشفي وانه يقلد الاصوات . مادريت الا وهم داخلين علي ومسوين معي مقابلة وكان بيننا وسيط مترجم وقلدت عندهم مجموعة اصوات وسألتهم عن موهبتي بدون مجاملة فقالوا : لو انك منتب تقلد قدامنا كان قلنا مهوب صدق .. وسافرت إلى كذا دولة اجنبية ونشرت فني وكلهم مستغربين من موهبتي .

ماعلاقة عبدالعزيز الهزاع بالجيل الجديد ؟

نعم لي علاقة مع الجيل الجديد ومشاكلهم . لانهم من اهم القضايا الاجتماعية في البلد سواء عيال او بنات وانا اخذ المشاكل من الجرايد او من ابنائي والجيران والناس اللي يقابلوني او من الاحداث الواقعية اللي تصير قدامي مثل ظاهرة الغزل والفراغ وكذلك الانترنت ودايم احث الجيل الجديد انه اذا لقى له شغله يحرص عليها ويستمر فيها لين يثبت وجوده الله يهديهم الحين اذا لقي له وظيفة اشتغل فيها زي مايقول تعبر بام شوشة لين تجيك المنفوشة واذا لقي شغله ثانيه راح لها حتى بدون مايقول فمان الله . ولو انه استمر واجتهد في شغله صاحب الشركة بيعطية دبل الرتب علشان يقعد لانه انسان يشتغل .

عبدالعزيز الهزاع ماذا تعرف عن الانترنت ؟

ابد ما عرف عنه شي ولا لي علاقة فيه الا انني اعرف انه سلاح ذو حدين واحث الناس على الاستفادة منه زي ماله جوانب سيئة بعد له جوانب مفيدة والحظيظ اللي يستفيد منه لكن اللي يجلس عليه سبع ساعات جلسة وحدة على غير سنع وبدون هدف هذا المفروض انه ينظم وقته وايضا الانترنت سبب في انقطاع صلة الرحم بين الناس
علشان كذا اقول المفروض اننا مانقصر في حق اهلنا وجماعتنا وجيرانا بسبب الانترنت .

ابو سامي مافكرة في انشاء موقع شخصي يضم جميع اعمالك وتراثك الفني مثل أي فنان اخر ؟

البركة فيكم ،، على يديكم ماعندي مانع .

عبدالعزيز الهزاع ، لماذا لم تنشر اعمالك وتوزع بالاسواق مثل بقية الفنانين ؟

والله مافيه دعم من قبل شركات الانتاج الفنية ، لكن اذا فيه احد من هالشركات ترغب في التعاقد معي على انتاج وتوزيع اعمالي ماعندي مانع رب ارزقني وارزق مني .

برنامج صادوه .. قلت فيه ان اعصابك فولاذية هل هذي حقيقة ام كان هنالك اتفاق مسبق من قبل إدارة البرنامج ؟
لا والله ماكان فيه أي اتفاق ، انا رحت للكويت في ضيافتهم مدة ثلاث ايام على اساس اني ضيف في برنامج اسمه حوار صريح ، لكن الانسان العاقل يتضح له من خلال المقابلة والجلسة انه فيه امر غير طبيعي واكتشفت هالشي يوم سألني وش يقرب لك مايكل جاكسون عرفت ان المسألة يمد رجلة ابو حنيفة ولا يبالي ، بديت انا انكت معهم وانظموا اللي جايين ينرفزوني معي حتى ان فجر السعيد انهبلت وقالت الحين جايبينه ننرفزه يطلع هو ينرفزنا قالوا لها والله انه هبل فينا ولا ندري الحين حنا وين ..


سمعنا عن فتوى الشيخ عبدالعزيز بن باز رحمة الله ضد ماتقوم به من اعمال تقليد وتمثيل خاصة الاصوات النسائية ماصحة هذه الفتوى ؟

اول شي ان الشيخ عبدالعزيز الله يرحمه كان يسمع لتمثيلياتي وما انكر علي شي وعندي اثبات واثباتي موجودين بس مالها داعي ذكر اسماء ولو احتجت لذكرهم راح اذكرهم ، حتى مره كنت في مجلس الشيخ الله يرحمه وكان نسيب الشيخ بن باز موجود وقال : ياشيخ الهزاع عنده تمثيلية تجوز لك ياشيخ اغديك تسمعها قال الشيخ وش هي قال بدوي في طيارة . قال بن باز الله يرحمه عطناها ياعبدالعزيز ، والتمثيلية ماتصلح في مجلس الشيخ لانها كلها فكاهي قلت ياشيخ عندي وحده احسن منها هذي ماتصلح ياشيخ قال لا مانبي الا هذي . والتمثيلية طويله حوالي ساعه الا ربع قال الشيخ للي عنده صكوا الباب لايدخل احد صكوا الباب وانا بديت المهم خلصت وكان الشيخ يضحك ومبسوط حتى يوم انتهيت علق الشيخ على التمثيلية وكيف ان المسكر افقد هالبدو عقولهم بعد مااشربوه وكيف كانت اضرارة على العقل .. وغيره من الكلام .
بعد هالجلسة مجلة اليمامة سوت معي مقابلة وكان من ضمن أسئلتهم : هل احد من المشايخ يعترض عليك ؟
قلت ابد وعلى راسهم الشيخ عبدالعزيز بن باز الله يرحمه كان مبسوط ومرتاح من عملي . من باكر نزلت المقابلة وكاتبين بالبنط العريض (( الشيخ بن باز يشجعني على التمثيل )) انا استغربت هالشي واستنكرته واتصلت على احد المشايخ وقلت له اني برئ من هالكلام ومالي أي علاقة فيه قالي مصدقك لكن ارسل فاكس للشيخ وانا بقراه عليه ارسلت فاكس بالكلام هذا للشيخ والشيخ الله يرحمه صدقني واقتنع بالكلام اللي كتبته له . لكن كان فيه مجموعة عند الشيخ الله يهديهم قالوا لا ياشيخ نبي نرد عليه قال الشيخ أي يرد هذا ، قاموا وكتبوا
(( المفتري المدعو عبدالعزيز الهزاع على الشيخ بن باز )) وهم كبروا الموضوع وحطوا شي من لا شي وانتهت السالفة على خير .

يعني الشيخ بن باز الله يرحمه مقتنع باعمالك التي تقدمها ؟

نعم وان شاء الله انه مقتنع لاني ما جبت شي من عندي او شي يغضب الله وكل المشايخ ما اعترضوا على اعمالي حتى الشيخ عبدالله المطلق جزاه الله الف خير في رمضان قبل العام جاه سؤال عن عبدالعزيز الهزاع فقال الشيخ انا من المستمعين لعبدالعزيز الهزاع وهو يحل ويناقش قضايا اجمتاعية والله يثيبوه . وهذا شرف كبير لي وافتخر انه يكون من بين المستمعين لي هالمشايخ الأفاضل .

يقال ازهد الناس بالرجل اهله فهل ابنائك مقتنعين ومؤيدين لاعمالك ؟

والله فيهم وفيهم .. فيهم من يؤيد وفيهم من لا يؤيد لكن انا ماهمني مادامني عارف طريقي ومطنشهم لكن مع الوقت بدو يتفهمون الوضع ويتقبلونه وباقتناع .

علاقتك بالجمهور ؟

طيبه ولله الحمد لاني اعطي كل ذي حق حقه ، صحيح اني اصادف بعض الاحراجات لكن هذا راجع لمستوي الشخص اللي قدامي لكن منيب ازعل من احد ابد رغم اني اجد مضايقات لكن هذي ضريبة الشهرة .



تحميل من اعمال الفنان عبدالعزيز الهزاع
[motr1]نجتهد برضاكم وشكرا

اخوكم محمد الرويضان[/motr1][/align]

[محمد الرويضان]

وين الردود

[داعــ العين ــج]

هــلا وغــلا


محـمد الرويضــآن




جــهـد يستــحق الشـــكر ..



الله يعـطيك العـآفية

[محمد الرويضان]

مشكور على المرور ياغالي

[أبو رائد]

سلمت يا محمد

والله يعطيك العافية

على هذا اللقاء


مع الفنان الكبير .. عبدالعزيز الهزاع


لك الشكر والتقدير

[الجوووري]

هلا وغلااااااااا

محمد الرويضان


موضوع راااااااااااااااااااااااائع ومميـــــــــز


ولقااااء ممتع مع هذا المبـــــــــــدع .. . .


الف الف الف شكرررررر لك ..