اليكم تحليل شخصي لشخصيات المعلمين حسب التخصص

[ملكة الاحساس]

اليكم تحليل شخصي لشخصيات المعلمين حسب التخصص

معلم لغة عربية ...انطقت الخبرة قلمه ...فكتب:

السلام عليكم ورحمة الله



سأبدأ بتشخيص ووصف طبيعة المعلمين كل على حسب تخصصه
(تشخيصا عالي الجودة بأحدث الأجهزة التي توصل إليها علماء الميتافيزيقيا )
أبدأ مستعينا بالله بتخصصي

1/اللغة العربية : يحب الشياكة ويهتم بآخر صرعات الجوال,
ويكره أن يسأله أحد عن إعراب جملة ما , كثير الكلام في غرفة المعلمين ,
لا يأتي بدفتر التحضير حتى يعلم بقدوم الموجه ,طبعا كثير التأخرات نتيجة حنقه على نصابه الهائل ,غير محضوض بتوزيع الجدول ,
يتعامل مع المدير بقدر محسوب ( يعني تعطيني أعطيك .. تشد لي أقطع لك ) !
يمازح الطلاب بشكل يومي .. ولايحب تصعيد المشاكل .عنده مواهب أدبية مدفونة يمنع من ظهورها احساسه بعدم جدواها .... وهو أول من يدعم التبرعات المدرسية .

2/ التاريخ : يفضل الصمت ويحب الاستماع بهدوء , نصابه قليل مما يجعله حاط في بطنه بطيخة صيفي , تحتاج لوقت طويل لكي تتفهم تركيبته النفسية , ينسى بسرعة أنك مسكت عنه انتظار , دائما يحضر معه جهاز ( اللاب توب ) ولاعمره افتحه !
يحضر دفتر التحضير باستمرار , الطلاب يشتكون منه دائما لصعوبة أسئلته وعدم وضوح الخط ,
على قدر ماتعطيه يعطيك
بس الشهادة لله مايرسب عنده أحد !

3/ الجغرافيا : مزاجي , مرة تراه معك ومرة ضدك , يحب الشللية ويدعو لإشعال فتيلها !! لو تسأله أين يقع رأس الرجاء الصالح قال لك في اليمن .. يحسبه الجد الرابع لعلى عبدالله صالح ! لايهتم بالشكل الخارجي لهندامه , يجيب الأسئلة بوقتها لتلافي سخط المدير , لو تموت مايمسك عنك حصة انتظار , حصصه قليله وجدوله على كيفه , لأنه متأثر بالتضاريس الصحراوية فيراعي المدير ذلك الجانب !
مواظب على الحضور , يحب التوفير لدرجة أنه يحضر غلايته الخاصة وبيالته الخاصة ولا يرحب بأي قرار يدعو لجمع ( القطيّة ) للفطور ومستلزماته !

4: اللغة الإنجليزية : كثير الاحتجاجات دائم الضجر يعبر عن ضجره بعبارات انجليزية (اتز بورنق) ( نو وي ) ( أو ماي قاد ) لكنه سرعان مايهدأ ويبرد !
أذكر يوما أنه جاءني بالساحة وهو ( يتحلطم ) بكلام لا افهمه فقلت له (أفكورس)
طبعا......
فنظرني بنظرة حانقة وخرج غضبانا, فعرفت أني قلت الكلمة في غير محلها
وفي الغد اتضح لي انه يقول: ياخي المدرسين شكلهم مايرتاحون لي حتى انت مثلهم !!!!!!

تشم رائحة عطره على بعد كيلو ولا تنقطع هذه الرائحة إلا في رمضان والسر لايعلمه إلا الله !
رومانسي حالم في موقع لا وقت فيه للرومنسية ..يبدو أن قرائته للروايات الأجنبية أثرت في مخيخة الأوسط وخصوصا رواية ( بيب ) و ( روميو وجوليت) .
لكنه كريم يحب يجيب معه بسكويت يكفي لأربعة من الزملاء !

لو تسأله عن ترجمة مصطلح انجليزي قال لك أعلمك بكرا !

يجيد فنون اللغة العربية من أدب وإعراب وكثيرا مانستعين به في ذلك , وهذا مايطلق عليه ( علم الأضداد ) .
كثير السهر وهذا مايجعل عيناه جامحتان دائما ,, وياكثر استئذانه , ماندري وين يروح !!!
أما عن دفتر التحضير فالله يعافي التحاضير الجاهزة ( المزركشة) .

5/ الحاسب : يحبه المدير حبا جما وهو يخدم المدير خدمات جما , نظارته الطبية تشبه قاعة بيالة الشاي(قعر) لكثرت جلوسه أمام شاشة الحاسب , وماندري هل الوزارة تصرف بدل نظر أم لا .!!
قليل الضحك وإذا ضحك قلنا ليته ماضحك !!

معصقل من هالبيبسي اللي يطرقعه ( يقحنه ) كل صبح !

بعد الاختبارات تشوف الطلاب لازقين فيه لزقة (جونسون) ,, وهو ماغير يردد لاتخافون كلكم بتنجحون وفي الأخير نصفهم راسب والنصف الآخر مكمل !
بس قلبه رحيم ينجحون بالدور الثاني بعد تدخلات لوجستية !
بعض الأحيان لو تعطيه وجه لا تأمنه انه يجي لك بعد يومين يقول يابو فلان ماعندك سلف الف ريال وأردها لك آخر الشهر أو يطلب سيارتك لأنه جاء مع ليموزين !
تلقاه بالطابور مرتز مع المدير مثل المرتزين بقصور الأفراح عند ( المعرس) اذا شافوا مندوب الجزيرة ولا الرياض جاي يصور !
بس ابو الشباب مانهضم حقه مايقصر بعض الاحيان اذا طلبت منه يضبط جهازك !

6/ علــــم النفس : والله مايدري وين الله حاطه ! مرشد طلابي حبيب ترسل له طالب مشاغب يرجع لك الطالب بخفيّ حنين ! وكل ما تسأله عن سبب مشاغبة الطلاب يقول لك : يا أستاذ فلان الطالب عنده طاقة حركية مزمنة نتيجة للكبت العاطفي المنصب عليه من المحيط الأسري المباشر والغير مباشر من المجتمع لذا يجب علينا نحن كتربويين أن نوفر له المناخ المناسب لتفجير هذه الطاقة وان المكان المناسب لتفجيرها قد يجده الطالب في الفصل لأن العالم النفسي السويدي كوفاتز قال : ان عقدة أوديب يجب ألا تعامل وكأنها عقدة أليكترا. !!

ما أقول إلا فجّر الله راس العدو !

قليل الاحتكاك مع المعلمين منزوي دائما في مكتبه ( المقلط) الممتلئ بصور تعبيرية عن آثار وأضرار المخدرات وصور قلوب تحجرت من آثار التدخين , فتشعر أنك بغرفة دكتور بمستشفى الأمل
( والمفروض أن تكون غرفته كلها ورود وأزهار ومجسمات جمالية ولوحات تفتح النفس !)
يهاب زيارة مشرفه الخاص وتجده يتصبب عرقا اذا سمع بزيارته وتبدو عليه صور الاستنفار الشامل والارتباك الحاد .. هل ياترى هيبة الموجة أم خيبة كوفاتز ؟!!

كثير الهواجيس سارد الفكر يعاني من المثالية المفرطة لايقبلك ولايرتاح لك بسهولة !بعض الأحيان ينسى شماغه بسيارته أو ينسى ( يصك ) يسكر بعض أزرار ثوبه !
لكن فيه خصلة ممتازة لا له ولا عليه ولا يجي منه شر !

7/ التربية الفنية : هو المسؤول عن جمع ( القطيات) وتجهيز المطبخ , سنافي راعي بر , يعاني من شيئ نحن نتمناه وهو حصص خفيفة , نجاح مضمون , لا أسئلة ولا بطيخ , لايشعر بتوزيع الجدول ولا يكترث له .
حصته عند الطلاب فسحة , تسمع جلجلة الطلبة بشده ولو جيته بغرفة الفنية ( المطبخ سابقا) لوجدته غارقا في جواله والطلاب غارقون في( المضاربة)
تقول له يا أستاذ اشغل طلابك بالرسم والنحت فيرد عليك أي رسم وأي نحت طلابنا متعودين على جدران المساجد والبيوت . . . عاد أنا نصحته يجيب جدار بيته غدا !!! .
أكبر همه ( من عليه الفطور اليوم ) ( وترى القطيّة تبي تجديد ) الشاهي خلص والسكر ترى أبي أغيره لأنه حالي مرة !! ما أقول إلا ياحظ زوجته فيه !

8/التربية البدنية : يدربي هالرأس كل صبح بهالطابور .. واح .. إنين .. ثلاث.. بع !
تشوف هالترنق ( الزي الرياضي) من قبل سبع سنين ماغيّره .وإذا خلص الطابور ماتشوفه إلا الظهر .. ماينلام الأخ بذل مجهود خارق في التمرين وراح يأخذ غفوة !
كثير الصراخ .. كلنا نتحاشى مجادلته بما فينا المدير وقد أُرجع السبب لمعاناته في سداد أقساط البنوك الهائلة عليه , مادري وين يودي قروش هالأقساط !
جواله مقطوع وسيارته بالورشة .. ولو تسأل عنه قالولك مسافر للدول الشقيقة !
الله يعينه من الفضاوة عندنا بالمدرسة راح يبحث عن تمرين بالخارج !
بس أملح شيئ فيه طربوشه ( قبعة ) الليي يغطي فيه صلعته البرّاقة !

9/ التربية الدينية : مع إنها منطقة محظورة دوليا سوف اجتاحها .
سياسي مع المدير يعرف من أين تؤكل الكتف .
يحب السوالف بـ( الحريّم ) بعضهم يشتغل (خطّاب )...
بسهولة انه يقول لك : والله يانا خابر لك مسيار !

يحب التعليق على القضايا المعاصرة ويستفسر عن الأسهم ويوجه أيضا المبتدئين ( المستثمرين الصغار )
الحصص تأتي على حسب مايريد .. وياويلك لو تعدّل بالجدول دون إذنه وموافقته .
مع إن نصابه كثير لكنه يتعامل بتقليص الحصص بطريقة مؤدبة !
دائما نغبطه على دهائه في التعامل مع الموجهين ,
الحق يُقال فهو دائما يصطحب معه ( حقيبته المدرسية ) بنيّة اللون مما يُشعرك بحرصه على الإيفاء بلوازم التدريس الناجح .. ونفسها هي الحقيبة التي حلّت لغز ( زمزيات) ( ترامس ) الشاي والقهوة والكيك المنزلي التي طالما حيّرت كبار العلماء والمخبرين عندنا بالمدرسة حول كيفية دخول تلك الأطباق الشهية والترامس في تلك الحقيبة !! يبدو انها حقيبة سحرية ! بس الله يجزاه ألف خير يكفي أنه يعلم شرع الله ورسوله .. ويرضي بعض بطوننا.

10\ معلم الرياضيات: مايهتم بالمظهر العام يوم تلقاه بطاقيه في الفصل ويوم براسه ويوم بشماغ (اذا فيه موجه) وتلقاه جالس على شاهي والثوب مبقع
بس عنده دفتر تحضير نموذجي رسومات والوان وحركات

واهم شئ عنده يتأخر عن الحصه الرابعه

ومايعطي المدير وجه
ولو تقطع راسه مايدخل حصة انتظار
وكاسة الشاهي في يده على طوووووووووووووووووووووووووووووووووووووووووووووووول

مع تحيات:
معلم بدون ضرب
واخرين