دخلت الخفجي من طريق الكويت، ولما جيت دوار الكرنيش اخذت يمين وصار اتجاهي غرب الطريق واسع وعريض ولا هو داخل حواري وماخذ راحتي فيه وفجأة طرت بالسماء أنا وموتري ... والله من شدة الطيحة انفكت المرتبة اللي ورى ، وأنا أنزل واطالع ولا بقدرة قادر مطب صناعي رهيب وحجمه كبير مادري متى حطوه ومنين جابوه واول شي قلته حسبنا الله ونعم الوكيل وياما وصلت البيت وأنا أحسبن على اللي حطه وبعدها بكم يوم مريت من عند نفس المطب ولا صابغينه قال يعني مسوين شي ، والله إن المطبات بالخفجي لعبت بمواترنا لعب وبعدين ودنا يجيبون هذا اللي يحط المطبات بالخفجي ويسائلونه على أي أساس قاعد تحط مطبات بالخفجي يعني مثلا قاعد تمشي بالخفجي ومشغل العداد وكل 10متر تحط مطب ولا كل من جاك بخطاب ومعه ثنين ثلاثة حطيتلهم مطب ولا قاعد تتمشى وكل ماشفت لك تقاطع ما فيه مطب قلت حطوا هنا مطب ولا المطب علاج سحري لكل مشاكل المرور أي شكوى حط مطب أي حادث حط مطب أي تفحيط حط مطب أي سرعة حط مطب أنا شكلي أبي أحد لوحة بمدخل الخفجي أكتب عليها ( مرحبا بكم في مدينة الخفجي مدينة المليون مطب )
المواضيع المتشابهه
العرض الشجري