القصيده :
الرفيق اللـي ليـا غبـت مايحمـي قفـاي
اجل لامن صرت حاضر ماني فـي حاجتـه
احتمـي دوري ودور القبيلـه مــن وراي
جمـدو هــرج الفـراغـات ياهراجـتـه
كانها بمصامـخ الـروس ولا بـاي بـاي
خلـو الفلـم المدبـلـج عـلـى دبلاجـتـه
طول عمري ماستمع من ضعيف الراي راي
ولاطمعـت بديـك خيـبـر ولا دجاجـتـه
العداوة شـي عـادي تجينـي مـن عـداي
من نسج نسـج العـداوات عرفـت نساجتـه
وإن كلاني مخلب مـن مخاليـب أصدقـاي
قلت ضاعت صيدته فـي طـرف عجاجتـه
وإن ثناهـا مـرة ثانيـة جعـلـه فــداي
لافسـق كلـب الخواجـة كـلا خواجـتـه
الارض ماهي ورث ابي والسماء ماهو سماي
مير الاعوج لاعترض لي عدلـت عواجتـه
أفـردة واذوقـه لمستيـن مـن عـصـاي
وأدبـة تأديـب طفـل عـلـى دراجـتـه
لين ينسى عنـاد راسـه ويذكـر مستـواي
ينتبـه ولا يسـوهـج عـلـى سوهاجـتـه
في نظرة الناس مالون واهـوه هـاي هـاي
والمـدوج مابعـد فـاق مــن دواجـتـه
أبك أنا لو اشرب البحـر مايقطـع ظمـاي
وانت مثل الضب يزحـف تحـت عجاجتـه
المواضيع المتشابهه
العرض الشجري