أجيالنا وأجيالهم في نظر عبرود

[عبرود]

[align=center]

بسم الله الرحمن الرحيم


السلام عليكم ورحمة الله وبركاته


اما بعد


أعتذر على كتابة الموضوع باللغة العامية لأني بصراحه ما اعرف اكتبه باللغة الفصحى


أحداث الموضوع حدثت في شهر رمضان المبارك عام 1428هـ

طلعت في الليل بعد صلاة التراويح وجلست أدور بالليموزين وأترزق مثل العادة ولما جت الساعة 12 أتصل علي واحد من أخوياي
وقال لي : عبرود ترا اليوم بنجلس في المخطط حنّا والشباب إذا بتجي حياك الله
قلت له : إن شاء الله بس أخذ لي كم مشوار وبعدها بجيكم

المهم

لما جيت جلست أنا وأخوياي الثلاثة الله يوفقهم
واحد فيهم موظف في بنك الراجحي والثاني موظف في وزارة الصحه وتابع لمستوصف الملز اللي في شارع جرير والثالث مدرس في احد مدارس الرياض للمرحلة الثانوية والرابع اللي هو أنا سواق ليموزين ولله الحمد يدور في شوارع الرياض

المهم

جلسنا نسولف عن أحوالنا وعن شغل كل واحد فينا وعن دوام رمضان وعن المواقف اللي تصير في رمضان في شغل كل واحد فينا

المهم

لما جا دور خوينا المدرس قلت له ها يفلان كيف التدريس معك
قال لي : والله معليه طيب
وبصراحه يقولها بدون نفس
قلت له : انت في أي مرحلة
قال لي : أنا الحين أدرس في المرحلة الثانوية
قلت له : الله يعينك عسا بس شخصيتك شديدة على الطلاب
ههههههههههههه
قال لي : يالرجال احمد ربي اني ارجع البيت طيب وسالم أنا علي اخلص المنهج وهم عليهم يحلّون ويجاوبون في الاختبار أللي يحل يحل واللي ما يحل لا يحل بالطقاق
قلت له : افاااا ليش ، شكل الطلبه اللي تدرسهم عرابجه
قال لي : القصة مو قصة عرابجه أو محترمين القصة أننا ماعندنا شخصية أو هيبة وكأننا ناخذ رواتب من الطلاب مو من الوزارة
قلت له : وشلون ؟
قال لي : عندنا قوانين تخلي المدرس مثل الصبوره في الفصل ماله كلمه على الطلاب ولا له صلاحيه يهاوشهم أو يأدبهم

قلت له : وش قوانينكم

بصراحه لما قال لي القوانين قسماً بالله تحمدت ربي بأني تخرجت من زمان

قال لي : طبعاً أولاً ممنوع الضرب وثانياً لا تهاوش الطالب إذا أخطأ بشي وثالثاً حاول أنك ما تزعله ووسع صدره إذا جيت تحل له مشكله
هههههههههههههههههه
يااا ساااااتر

قسماً بالله شي يقهر
احمد ربي أني ماتزوجت وجبت عيال عشان ما ادرسهم في مثل هذه القوانين ولا قسماً بالله من بكره بيصير الولد يطقني ويطق امه ويطق أي واحد ما يعجبه تدرون ليش
لأن الأدب معدوم في التدريس
أنا داري في واحد فيكم بيقول الضرب مو هو كل شي في ناس تخرجت بدون ما تنضرب وطلعت محترمه وأنا أقول له صدقت بس إلا من رحم الله أما باقي أجيالنا المحترمه ما صارو محترمين الا بالضرب ولعنة الجدف

وبصراحه لو تشوفون أجيالنا وأجيال هذي الأيام والعياذ بالله قسماً بالله فرق السماء عن الأرض
تشوف أجيالنا طبعاً انا أتكلم على اللي أعمارهم فوق 26 سنة تشوف تعاملهم محترمه وتشوف لباقه في الكلام صح فيه ناس منهم قليلين أدب وغير محترمين بس شف وش كان وضعه أيام الدراسه تلقاه ماعمره راح مدرسة أو تلقاه داشر من صغره

أما الاجيال الجديدة سبحان الله الحين تشوف الواحد يرد على أبوه وعلى أمه والعياذ بالله وتشوفه يرد على اللي اكبر منه وعلى الشايب ولا عنده أي أحترام للشخص اللي قدامه إلا من رحم الله وهذولي اللي أقول عنهم إلا من رحم الله طبعاً أهل المدن النائيه مثل القصيم وحائل والجنوب والشمال وبعض أهل القرى تشوف تربيته ما شاء الله طيبه مرررره
تشوف اللي عمره 9 سنوات مثل اللي عمرة 20 في المدن الكبيره مثل جده والرياض والشرقية
واللي مايصدقني ابيه يسأل أي مدرس تعين جديد في احد القرى أو احد المناطق النائيه ويسأل عن أخلاق الطلاب شف وش يقول لك قسماً بالله يقول لك ان فيهم مرجله وفيهم علوم رجال ماهي في عيالنا وسط المدن الكبيرة

المهم نرجع لموضوعنا

وهو ليش الوزارة تمنع الضرب وليش تحط قوانين بعدم جرح مشاعر الطالب وعدم مخاطبته بقسوه

بصراحه احس أنه قانون يهدف لبناء مستقبل مضمحل ومتدهور والعياذ بالله

لذا اقول في أخر كلامي

الله يستر على أجيالنا ويعينهم على مشاكل الدنيا والأخرى
وإذا بكرة شفتو أي ولد أو شاب من الشباب المراهقين يسوي أي شي فيه قلت أدب فلا تلومنه ولا تقولون له شي فالطاسه خربانه من زمان


هذا والسلام عليكم ورحمة الله وبركاته



مبحكم في الله وسائق الليموزين / عبرود[/align]

[عشق الشمال]

الله يعطيك العااافية ياااابعدي

كلاااااامك صحيح و راااائع جدآ جدآ

المدااارس بااااتت خطرة جدآ على الطلااااااب ( مع الأسف ) !!

قديمآ كان الأب يُدخل ابنه في المدرسة وهو مطمئن البااااال قرير العين ، أما الآن فقد بااااتت

المداااارس تشكل خطرآ كبيرآ على الطااااالب ربما يتعدى الأخطااار التي قد يتعرض لها في الشاااارع !!

الآبااااء _ إلا من رحم الله _ منشغلووون عن أبناااائهم بأمووورهم الخااااصة ، والأمهااات لا حووول

لهن ولااا قوووة إذ ليس بمقدووورهن ملاااحقة الأبناااء في كل مكااان !!

أما هيبة المعلم _ وبصرف النظر عن الوزارة _ فأعتقد بأنه هو المتسبب في ضيااااعها !!

الله يعطيك العاااافية ياااابعدي على كتاباااتك الراااائعة ,,

[حماد التميمي]

اقتباس مثل القصيم وحائل والجنوب والشمال وبعض أهل القرى تشوف تربيته ما شاء الله طيبه مرررره تشوف اللي عمره 9 سنوات مثل اللي عمرة 20 في المدن الكبيره مثل جده والرياض والشرقية

انا اختلف معاك بنقطه اخوي عبرود ,, وهي (( بعيد انني من اهل حائل )) اقولك ان بعض طلاب المدن اللى بجده واللى بالرياض وبالشرقية محترمين اكثر من اهل حائل والقصيم والجنوب ,,

انا سالت مدرسين درسو في هذا الوقت ( فترة التطبيق في حائل ) وقال جــن جــن عيال المدارس وخصوصا اللى بالابتدائية لانهم يعرفون اني اطبق ولا يحترموني ,, والثاني يقول اخذت فترة ادرس في مدرسه خاصه اهلية وهذولاء هم اللى مالي عندهم اي احترام ولا تقدير ,, وفي القرايا ,, المدرس اذا طلع من المدرسه وهم متهاوشين معاه لحقوه ولعنو خامس خامسه وكسرو سيارته ...

يعني لله في خلـــقه شـــوؤن ,, والمدرسه ماهي على القوانين ,, ولكن هي على أولياء الامور اللى شايفين انفسهم ولا يبون عيالهم ينطقون , طبعا بعد النظام الجديد اللى اصبح المعلم فيه طالب والطالب معلم ..

وشكرا لك اخوي عبرود اولا واخييراً

[أبو رائد]

رد عليك مدرس اللي هو عشق الشمال

والرد الثاني

<<< لمدرس آخر


وأنا وجهة نظري تختلف عن الكثير من المعلمين

فأنا ( ضد ) الضرب في المدارس

فهناك طرق كثيرة استطيع أن اجعل هذا الطالب طالب مطيع ومجتهد

منها .. كسب الطالب في الأنشطة .. وفي الرحلات .. وفي جعله طالب

يعتمد عليه في المدرسة .. بأي عمل تحتاجه ..

إضافة إلى تطبيق مبدأ الثواب والعقاب ..

واقصد بالعقاب ( هو حرمان الطالب من الأنشطة التي يحبها إذا لم يتقن عمله ويجتهد بدرسه )

والحديث يطول عن هذا الامر

ولك التحية ،،

[شوق الغلا]

عزيزي عبرود ..

نعود مع حوارك الشيق ..

اسلوب وطرق التدريس تغيرت ..

كان بالامس تقال كلمة ..((لكم الحم ولنا العظم ))

اما الان تغيركل شي ..


اما من ناحية مدن المملكه من شمالها وشرقها وجنوبها وغربها والمنطقه الوسطى ..

فيها الصاالح وفيها الطاالح ..

اصاابع الانساان ماهى سواا ..

التربيه تبدأ من الوالدين والبيت وتنتهي بالمدرسه ..

ننتظرك بمقااله جديده ..

دمت لنا يالغلا ..

[حنين]

تسلم ياعبرود

انا عن من وجهة نظري مع النظام الجديد

والضرب مو لحل الوحيد للمدرس!!!!!!!!

الطالب جاي يدرس مو يضرب او يهان امام الطلاب

الطالب عنده ولي امر هو اللي يعاقبه تبلغ المدرسه ولي الامو وهو يعرف كيف يتعامل مع ولده

اذا الشخص نفسه مايرضى ان ولده او اخوه يضرب بالمدرسه مهما كان شده شقاوة الطالب

الكلام بهالموضوع يطوول


شاكره لك مقالاتك الاكثر من رائعه

[magdy shoaieb]

طبعا زمان احسن لان المدرس كان مثل الوالد تماما يهمه مصلحة الطلاب وكان لاينظر الى الناحيه الماديه رغم قلتها وكان الطلبه يحترمون مدرسيهم . كان زمان

[الجوريه]

كاااااااااااااااااااااااااان زماااااااااااااااااااااااااان
وجـــــــــــــــبــــــــــــــــــــــــــر

واحمد ربك ان ما عندك عيال يختلطون في عيال الناس شغله مهما تعلم وتربي في البيت الا ان
المدرسه واصدقاء المدرسه يأثرووووووووووون
الله المستعان

[عبرود]

[align=center]بسم الله الرحمن الرحيم


السلام عليكم ورحمة الله وبركاته


اما بعد


احب اشكر كل عضو وكل قارء تم مروره على موضوعي المتواضع وإن شاء الله وجدتم فيه بعض الفوائد

الاخ العزيز عشق الشمال : اولاً تشرفت بمرورك
وثانياً بخصوص هيبة المعلم بصراحه قوانين الوزاره هي اللي تسببة بضياعها مع احترامي الشديد لك وللوزارة

الاخ العزيز حماد التميمي : اولاً تشرفت بمرورك
وثانياً مع احترامي الشديد للمدرسين اللي سألتهم شكل شخصياتهم ضعيفه

معزبنا ومديرنا أبورائد : اولاً تشرفت بمرورك
وثانياً مقدر ارد عليك اخاف ارد عليك وتسوي لي حضر ههههههههههههههههههه
امزح معك
اما بخصوص الطرق اللي ذكرتها تعتمد على اسلوب وذكاء المدرس في تعامله مع الطلاب

الاخت شوق الغلا : اولاً تشرفت بمرورك
وثانياً بخصوص الصالح والطالح انا اقصد اكثر الطلاب المحترمين في المدن اللي ذكرتها

الاخ أو الاخت حنين : اولاً تشرفت بمرورك
وثانياً انا وجميع من تراه من أطباء ومن ضباط ومن وزراء كلهم انضربو لما كانو يدرسون بس بعد كم سنه اقصد الموظفين الجدد والمدراء والوزراء الجدد اللي تخرجو بالعهد الجديد والله بيحكموننا ويتعاملون معنا بطريقه غريبه غير لائقه وقول أو قولي عبرود ما قاله

الاخوه مجدي والجوريه : كان زمان ولا يزال بس المشكله في النظام


هذا والسلام عليكم ورحمة الله وبركاته


محبكم في الله وسائق الليموزين / عبرود[/align]

[m!ss=cute]

على قولتهم ماشفت من اذيب الا عيونه


هذا ولا شي اصبر وانتظر شوف الجاي

وماخفي كان أعظـــم



تحياتي لك