~. غصب أسافر .~
ما يهم إن طاح دمعِك مـن جفـاي
المهم إني .. من اعْيونـك مطيـح
وش عليه إن رحت و انت ِ مو معاي
الطريق احيان بالوحـدة .. مريـح
اتركيـنـي ودي أشـعـر إن وراي
فـي مكانـي روح بغيابـي تصيـح
غصب أسافر عن عيونك يا غـلاي
اللقا دايـم مـع اشباهـي شحيـح
ميـر لا جـاك اللقـا بيديـه نـاي
علميه إن له بدينـي عـرق شيـح
كان أخضر يشبه اقلـوب اصدقـاي
صار زي لون الظما أشهـب قبيـح
للوصال اطـراف متحـسّ إبدفـاي
و للفراق أوجيه متْعَـرْف الصحيـح
يا كثر مـَ الوقت يطعن فـي قفـاي
ويا كثر مـَ انفاسي إبصدري تطيـح
وين ما يممـت بـي ألقـى عنـاي
في طريقـي ينتظرنـي لـه فحيـح
غربتي مـا عـاد ياسعهـا مـداي
و السنين إتحـد صـدري للضريـح
الخطا ماهو خطاك أنت ِ .. خطـاي
جيـت متعافـي و فارقتـك جريـح
تحياتي
المواضيع المتشابهه
العرض الشجري