السلام عليكم ورحمه الله وبركاته
انا طالبه من الثانويه الثانيه
هاذي سالفه حصلت لي بالاختبارات النهائيه
لولا الله وحمايته لي ، كان صرت زي "لمى الروقي"
فيه بمدرستنا شينكو كان مفتوح وداخله مكان زي السيب طويل وموجود بياره - اكرمكم الله
وكانت فوق البياره تراب يعني ماهي مبينه
كنت امشي ومشيت عليها وانكسرت وطحت بس الحمدالله ربي ستر وقدرت اتمسك ورفعت جسمي
انا اللي اعرف ان غطاء البيارات الحديد م ينكسر لو ايش سويت
يعني والله العظيم حرام !!
يعني لمى الروقي كانت طايحه في بير
وانا كنت بصير زيها بس الفرق اني ببياره
الحمدالله ان ربي ستر وماصار شيء بس اخاف ان يصير لبنات غيري ويمكن م يقدرون يرفعون نفسهم
انا ماقلت للاداره باللي صار لاني لو قلت لهم اكيد بيقولون لي وش "مدخلك بالمكان هاذا" ؟ كذا دايم ردهم
يعني مفتوح شيء طبيعي اني بدخل !
تصير اهوال في المدرسه بس مابيدنا شيء
مانعرف وش نسوي ، والاداره م عندهم غير انقلو بمدرسه ثانيه
يعني خلاص تعبنا من هالمدرسه لين متى وحنا نتكلم
كل شيء معدوم من حمامات من فصول من ساحات
اصلن والله لو تشوفون ساحتنا والبنات اللي فيها تقولون ساحه تعذيب على هالحر
والله فيه ناس م يستحملون هالحر وفيه ناس صحتهم ماتستحمل ابد
حسبي الله ونعم الوكيل عليكم !
تخيلو على هالحر احيانا يمنعون الاستئذان
والله مره كنت مقدر استحمل طاقتي خلصت والفصل اللي كنت انا فيه كفايه انه يخلص طاقتي
واجيهم ابغى استأذن يرفضون ، والله واشوف بنات بصحتهم مستأذنين
حتى الاستئذان صار على ناس وناس
والله اشوف ظلم قدامي ! بس مابيدنا شيء
مع احترامي يعني مافيه شيء صالح بهالمدرسه
لامدرسات ولامبنى ولا اداريات
عن ابراء ذمه مو كل المدرسات بس اغلبهم تستغربون انها هي قدوتنا ! والله عقول بزران فيهم
لين متى وحنا نتكلم والله تعبنا
حسبي الله ونعم الوكيل مره ثانيه
المواضيع المتشابهه
العرض العادي
