[align=center]هذه سلسلة لمواقف حصلت لي في فترة من فترات الزمن فيها شيئ من الطرافة وقد استفدت منها , فأردت أن أنقلها لكم لكن بأسلوب من البساطة في العبارة مبتعدا عن التنمق باللفظ والتكلف في اللفظ . ( ولو أردت ذلك لفعلت لأنه منتهى رغبتي في الكلام , وأنيسي في الكتابة والإعلام ) لكن لكم مني العذر على الكتابة في اللهجة الدارجة واللفظة السارية .[/align]
مواقف من الحياة (1) :
[align=center]على طاري الزواجات هالأيام هذه .. رحت في ليلة من الليالي لعرس واحد من الجماعة , وطبعا البرتكولات عندنا معروفة تنظف , تدهن , تعطر , تكشخ _ ويعني لازم تكون بآخر حلاوة _ ولا تنسون العنية .
المهم كان بجيبي اللي قدام 50 ريال ورقة واحدة , فأخذت 500 ريال ورقة واحدة عنية وانا أحطها بجيبي الأمامي طبعا .
جيت العرس بالقاعة اللي فيها الحفل , سلمت على المعرس وباركتله وقلت شد حيلك يا ابو حميد وعقبال الزوجة الثانية , وبعدها كملت السلام على باقي الموجودين لأن السلام بالنسبة لمحدثكم هو الهواية المفضلة يعني كل من شفته مطقته سلام سلام .
قعدت اسلم على هذا واضحك مع هذا وآخر وناسه وأنا ترى أبي أجيب العيد بعد شوي , وقعدت أتشوف دفتر العنايا منهُ معه والا ذاك الدفتر أشوفه مع السمي أخو المعرس الكبير أبو سعود .
والله وانا اتحيزم وأروح يمه وأجيه واسلم عليه وباركله وأقول : عقبالك يا ابو سعود _ ينقالي أنكت _ وادخل يدي بجيبي وأطلع العنية وبسرعة الضوء ما أبي أحد يشوفني _ أسأل الله الإخلاص _ واحطها بيد مستلم الضرايب آسف قصدي العنايا وأقول سامحني على التقصير _ يعني متواضع _ وانا أمشي من عنده , المهم كان عندي شغل لازم أمشي من العرس واستأذنت من أهل العرس ومشيت .
تراني جبت الطعا ولا هالحين مانتبهت في مصيبة سويتها مع أبو سعود يحسبني أمزح والا استهبل والا مخطي .
لكن وشو اللي خلى أبو سعود يقتنع إني جاد ما أمزح ولا أستهبل ؟؟؟
أخوي الكبير بعد ما مشيت من العرس جا للعرس وطبعا واجه أهل العرس وسلم على أبو سعود مستلم العنايا وقال أخوي لأبو سعود : " سامحنا على القصور " هنا أبو سعود برمجها إن المسألة جد ماهي مزح وقصد ماهي خظأ .
أرجع لنفسي بالقصة : طلعت من العرس أقضي شغل أنا واحد من الزملاء ولما جت الساعة حوالي 11:35 ليلا وقفت أنا وخويي قدام مطعم وجبات سريعه داقنا الجوع , وجانا هندي المطعم وطلبنا طلبيه وجاك خويي يبي يحاسب واحلفلك عليه : ما والله تدفع لوهو ريال , كعادتنا بالمهايط أحيانا .
الوكاد وبسرهه الضوء أطلع من الجيب الفلوس والا فجأه طلعت قدامي 500 ريال وأنا أبغى الـ 50 ريال .
ما صدقت وقمت أطلع الأوراق اللي بجيوبي اللي قدام واللي على جنب _ وعلى فكرة جيبي تقول درج كل شيئ تلقاه فيه أوراق , إعلان , شريط , مسباح , مفتاح , قلم , دفتر تقويم , أو نوته _ المهم مالقيت الـ 50 ريال وفجأة أنا أصيح: أووووه لالالالا وأنا أصقع يدي بجبهتي . شكلي عطيت أبو سعود 50 ريال عنيه .
خويي انهبل : وش فيك ؟؟؟!!!
قلت : أدعس للعرس تكفى , ونحرك مستعجلين والا المعرس فد زفوه , والناس اللي بالعرس قليلين , قلت : أبوك يا الاحراج وش أسوي هالحين ؟!
لقيت بزران قدام بوابة القاعة برا , قلت لهم : هيه يا عيال تعالوا , وهم يجونك كافخين , قلت : أبو سعود هنا ؟
قالوا : إيه . قلت : روحوا نادوه بسرعه قولوا هاك الرجال يبغاك , يالله اعجلوا .
وشوي ويجيك يمشي شير طلوى .
وأنزلك من السيارة يم أبو سعود هلااا أبو سعود وعلى طول أقوله : بسرعه بسرعه جب الـ 50 حقتي وخذ فلوسكم . _ أنا تخربطت شف الأسلوب حتى وشلون _ المهم قال أبو سعود : لا يابن الحلال ماهي بالشكات .
قلت : أقووول والله مانتبهت إني جايب(ن) العيد إلا تو .
قال : أنا توقعتك تمزح أو مخربط بس يوم جاني أخوك الكبير وقالي : سامحنا على القصور , تأكدت إنك قاصد الـ 50 ريال , وقلت : يمكن الربع جاهم ظرف طارئ ولا ودهم يحظرون ولا يمدون شي _ يعني على قولت كولومبس : الجود أبقى من الماجود _ (( عاد خمسين ريال )) يا ابو سعود .
المهم عطيت الرجال عنيتهم 500 ريال ومشيت وقلت : استر على ما واجهت ومع السلامة .
وانا عند ها الموقف ذا استفدت منه كم فايده :
1_ إن الواحد منا لازم يتوقع ويتمهل بهالمواقف ذي ويظبط أموره , ويفرغ جيبه من الأوراق الزايده ويخلي العنيه على شنق لا تخلبط بفلوسه اللي معه , أتوقع إن بعظكم يمكن يقول : حط العنيا بظرف واكتب عليه اسمك .
أقول : أفااا غدي من هالاسلوب والله عيب إن الرجال يسوي كذا , هذي هالطريقة سلوم حريم ما تصلح للرجال .
ياعيب الشوم وانا أخوك .
2_ يا زين البساطه بالاعتذار والترقيع اللي بدون تكلف شف بس جيته قمت أضحك وهو على طول فهم الموضوع , وترى ابليس يحب المواقف مثل ذي ويستغلها ويخليهم يظنون الظنون اللي ماهي زينه وما تصلح , هذا وش يقصد , وليش وش شايفنا ومثل هالخرابيط .
3_ هذي سلوم وعادات إذا كانت ما تعارض الدين والشرع ترى عيب إن الواحد منا يتركها وقريت : إن تركها من خوارم المروءة .
هذا اللي استفدته من هالموقف واللي يبي يزيدنا بالفوايد الله يعطيه العافيه .
وترقبو موقف ثاني بإذن الله قريبا .. فرحان ...r[/align]
المواضيع المتشابهه
عشان بعيد عن الإحراج وأسلمك الإيصال البنكي أضمن لي ولك 
... 
، لا يمكن 1500 الو 2500 ريال 
انتبه 
العرض العادي
