يابونايف انا اغتريت في مدحك لبعض الناس
وبعض الناس جيته حسب مدحك واخلف اليمه
ماهو لي جيته لغيري بغيت الاجر والنوماس
بوظف واحدٍ عنده ظروف الوقت ملتمه
زهمني خاله وعمه وهو بالمجتمع حساس
عزيز النفس متحمل عناية والده وامه
كلام الاولين ان الحيا علمه مع العساس
ولايسقي حلال البدو عدٍ فاقد الجمه
توقعت اني القى لي ذهب لكن لقيت نحاس
صدق من قال واقوال العرب بالفعل والذمه
يموت الكرسي اللي فوقه اشباه الصنم جلاس
يدور الوقت واشباه الصنم ماتوصل القمه
هياكل تلبس المشلح ولاتسوى زرار لْباس
تعلت بالوظيفة مير لاشده ولا ضمه
وحنا في بطولات الجمايل ماخذين الكاس
على حزم الامور وصادقين ونخلص الهمه
مواقفنا مانذكرها ولاتحصى ولاتنقاس
علاقتنا ثمينه سعينا بالواجب انتمه
والى منه تردى واحد مافيه طنخة راس
على نفسه رداه وعيب نقفى الرجل ونذمه
العرض المتطور
