السلام عليكم .. هلا منيره ـ رسالتس اللي كزيتي وصلتن وفرحت به
وكثر الله خيركم على المقطع والغدفه اللي كزيتي لي
وابشرتس ان اخبارنا تسرتس.البقرة اضنت والبيض فقش والدجاجه الرقطا راجن
وإن إدحيم العلي أعرس ونوّير مخطوبة وعويش فطمناه وسويرة رفعناه من السقاط
وصويلح شراله دنانة وسليم ختم المصحف وعزيز الصالح طاب من الطنان
وسند ولد مضيوي بدا يحبي والحمد لله طاب الجحام الي بعينه
وأنتي صاتزه حطينا عليه تبنه وحصيصه طابت إقطوفه الي براسه
ومنيره مشطناه بورده وأم سويلم طلعت من الماجب ، وتممنا لسويلم ، والنعال الزنوبا اللي تخبرين عندناهاك السنه رقعناه ، ومقطع الروز خبناه ، والدوشق غيرنا قطاعته ، و السفرة الكبيرة علقناه بالقبة ، وحطينا بيت للرادو ، والمصحف حق عمي غيرنا ثوبه ، والسراج زينا فتيلته .والزبيل مليناه حتات من إنخلتنا ، وشرينا سحارة ولقيناه مكسوره .وبقولس إني مع هالحمولة غاديتن حوسة ، الطاية تخر ، والمثعب منشق ، والقتاله منقلعة ، و باب الروشن منكسر، والتسوله مسنيّه ، وبريتز الغرش الصغير منقشع ، والله يهديتس يأم دحيم.البزار الي كزيتيه شوي الكركم به ، والمسمنه تقل رماد مابه ليمون ، والفتيت مسري ، والكليجا تقل عظامة . وذا بغيتوا تكزون شي : كزوا شي يبل الريق ويواجه عند الحمولة . معكم علم إن حمولتنا ناس نقادة . وخالتي شرّاهة ، وعمتنا حقنة مايجوز لهاشي مثل رقاص الساعة . وحريم عمومتنا صرت إثمنلهن وجذعانهم فرقا عين جدي شيبان كبري يترددون على هالجصه قضوا على النعمة تقل دبا ، ونا ماودي أطول عليتس الحتسي عسا مايخليني منتس ، ولامن جناين قلبتس ، لاخلا ولا عدم وسلميلي على نفستس ومن يعز عليتس .و أخص بالسلام مضيوي وفطوم وقوليلهم والله ماخلان أقصر عنوتي عنكم وأشوفكم إلا إني عجيز ولاصقة على ظهيري وضليعاتي ومارخة كتوفي ورجيلاتي بالفقس .. ومعتس علم هالارياح يعودن بين حين وحين ومع هالبراد صايلات علي يالله حسن الخاتمة والعمل الصالح وسلمي وأنتي سالمة
فك بعض الشفرات :
/
كزيتي : أرسلتي
المقطع : الثوب
والغدفه : الغطاة
اضنت : ولدت
الجحام : نفاخ على العين
صاتزه : صادقة
ومقطع الروز خبناه : والكرته الروز خطناها هههههههه
والدوشق : سليب هاي بس صناعة محليه ههههههههه
والزبيل : مخرف ههههههههه
سحارة : صندوق
البزار : نوع من أنواع التوابل
نقادة : راعين حش
هالجصة : إناء ( حلوه إناء ) لتخزين التمر
دبا : نوع من أنواع الحشرات الصغيرة
ومارخة : مدهنه
/
المواضيع المتشابهه
العرض المتطور
