ياهاجسي غن طـاروق الشعـر غنّـه
الحق على مابقـى..والا العمـر فانـي
وياصدري اصبر مثل صبري على الونّه
ياطول صبـرك عليّ..وشيـن ماجانـي
يلّـج فيـك الحزن..وأخفيه..وأكـنّـه
وإلى بغيـت أشتكي..ماطـاوع لسانـي
وأنا الذي لـو ظـروف الوقـت حدّنـه
يمـوت مايشتكـي لـ/ فـلان وفلانـي
من سبة اللي عشقته من صغـر سنّـه
أتنـاه يكبر..مثـل مـاكـان يتنـانـي
كنّـه خلـق مني..وكنّـي بعـد مـنّـه
والله ماأدري من اللي يعيش في الثاني!!
كنّـه خلـق مني..وكنّـي بعـد مـنّـه
والله ماأدري من اللي يموت في الثاني!!
أبيه..وأقـدّره..وأغـلـيـه..وأحـنّـه
مثل ماهـو يرخـص الدنيـا علشانـي
كم واحد(ن) ماغدت بقعا على ظنـه...!
لو هو علـى الكيف..ماقفّـا وخلانـي
نبغى من الحـظ..والله ماعطـى منـه
يامـا تمنيته..وهـو يـامـا تمنـانـي
يسوقنـي خافـقـي للوصل..وأعـنّـه
ولـولا غـلا صاحبي..ماكـان عنّانـي
امن أوّل..يزورني ماحـد(ن) درا عنّـه
واليوم عـذره: "بلاي..عيـال عمّانـي"
يابو علي..صـار لامـن مرّنـي كنّـه
يستعجل بـ/ خطوته..لأجـل يتعدانـي
واجيه واقدامـي اللـي كـل مـا جنّـه
يردهـا سلـم أبوي..وسلـم جـدانـي
العيـن فــي شوفته..لامرّ..ممتـنـه
ياجعل يسقـى علـي قدامـي يجفانـي
الهجـر طوّل..وقدنـي مبطـيٍ مـنّـه
واخـاف إذا زِيد..جآ..ماعـاد يلقانـي
القلـب يصبـر علـى فرقـاه لكـنّـه
إلى طرالـي وأنـا فـي الليل..سرّانـي
إن كنت أنـا غالـيٍ فـي ناظره..فإنـه
غـلاه يجـري مـع دمـي وشريانـي
لاصار مابه عشم لإبليس في الجنـه..!
أحسن لي أعيش باقي العمـر وحدانـي
ولو سـجّ مني..عسانـي ماخـلا منّـه
والله ماأنساه..كود المـوت ينسانـي..!
المواضيع المتشابهه
العرض العادي
