رجينا الكريم الواحد الباطن الظاهر
عظيم الجلال وكل خلقه يسالونه
يسوق الهبوب ويلتعج بارقه ناحر
نصوب السحاب الدهم وانهل مكنونه
ولا فذ نور الشمس ياخوك من باكر
كلام صحيح وقول من شاف بعيونه
وحب البرد ياكنه اللول متناثر
ويسبي بريقه شوف منهم يشوفونه
أنا بشهد أنها لوحة رسمها باهر
ويصعب على الفنان ياصل بمضمونه
يلوموني في عشقة البر ياظافر
وأنا الهايم وسلواي بالبر مقرونه
لحيث انهم ما جربوا جوه الساحر
وقمراه تقلق داجي الليل وسكونه
ولا بانت نجومه وهي سلوة الشاعر
يروق المزاج ويجذب القاف بلحونه
مرامي وأنا اللي يعشق الجزل والنادر
ومثلي رجال تعشق الجزل وتصونه
ولا جربوا لامن ضرب قاعه الماطر
وغنت فياضه باعذب الوبل ممنونه
وبارك وليه فيه سبحانه القادر
وفزت عشوبه كل نوع مع لونه
وصبحه تنفس وارتعد صيده النافر
تهيا النشامى في قفا الصيد يتلونه
وبيت الشعر في صيهد مفرشه فاخر
وضو السمر ودلالها الصفر مركونه
ولمة رجال شوفهم يبهج الخاطر
صفا والوفا والطيب ياخوك يشرونه
سوالف نقا ماحاشها زيف وكابر
ولا احدٍ بيرضى لصاحبه غبن ومهونه
مخوة شرف والعز لاذكر الذاكر
بقول الله وكل الشياطين ملعونه
علي الحرام انها غذى القلب الناظر
يهون التعب لعيون ذا الشوف يهونه
ترى ذا الطمع والفيد والهرج من قاصر
حميد النبا والدين لاتنقصر دونه
ليا قصرت شبوح الفتى القاصر العاثر
فخلك مع اللي يسعد القلب بفنونه
وعن الهم وزحام البلد ياولد سافر
وفل الحجاج وعانها النفس مرهونه
http://www.youtube.com/watch?feature...&v=Rbt4IcnN1oM
للشاعر علي بن رفده القحطاني ..
المواضيع المتشابهه
عشقة البر
العرض العادي
