اصبح ظلام الليل سايد على النور
والعرف في صمت الوجية الفليحه
والوقت وقتٍ فيه لاتبدي الشور
لاعاد تاخذ لك وتعطي نصيحه
سو الجميل ولاتحرى لْمشكور
لاتنتظر لاطبت كلمه مليحه
واجعل لسانك عن قفى الناس محظور
خل الكلام الشين لاتستبيحه
حتى الخبر لاصار شايع ومذكور
لاتنقله في ستر والا فضيحه
الحي خلك مع مباديه بحذور
وان مات قل رب الخلايق يبيحه
الناس ماترضى بظاهر ومستور
ماعاد عادات الأوادم صحيحه
المحترم متهوم في ثقل وغرور
حطوا مزاياياه الجميله قبيحه
لاتندفع مع كل منهي ومامور
لاتنقذ المقروص مع كل صيحه
لاتقول من باب المجامل ومجبور
جنب عن المترديه والنطيحه
ماهو لزوم يصير لك دايم حضور
عوّض غْيابك بالفجوج الفسيحه
هاتفك دقق فيه من راي منظور
احذف بعض الأسماء وغيّر شريحه
المواضيع المتشابهه
العرض العادي
