اتحادي: أخذناكم طقطقة وضيعتوه في جدة وتجيبوه من كوريا.. الأهلاوي: بركاتك يا بلوشي وآخرتها تخرجون من المولد بلاحمص
تحدي بالبلدي في المجالس الجداوية
فرفوش
الأربعاء 31/10/2012
المراكيز والمجالس الجداوية شغلها الشاغل القمة الآسيوية بين قطبي الغربية ويشعلها الاتحادي في المجلس الجداوي ويقول ها يا صاحبي ما قلتلك حنطقكم طقطقة وخلصناها وبالرأفه اكتفينا بهدف واحد بس.. ويرد الأهلاوي هادي ما هي طقطقة بس هي هرطقة وجي تصج وترج على واحد هدف وبركاتك يا بلوشي محنا عارفين لعبنا معاكم كورة قدم ولا كرة يد هزازي يسجل بيده وأخوه ينظف بيده والقطري يمشي وحتى الخشونة طنش عنها.. ويضحك الاتحادي خشونة ايه يا أبو الصحب أنت ما شوفت البصاص الصغير عمل ايه في فهد المولد ولاعينك عورة وما شفت كامل المر وهو يمسك بالكورة في 18 وكأنه لاعب سلة وكل هذي مرت عليك مرور الكرام خليك حقاني وقول الي لك واللي عليك وترى الكلام في الماضي نقصان في العقل وخلينا في شغل اليوم طزة وحدة في الشباك وانتوا يا أبو الصحب في الباي باي.. ويعلق الأهلاوي تشوف حلمة ودنك وماتشوف شبكة الأهلي اليوم وترى المباراة الأخيرة شفلك الحظ ولا تشيل شباككم كتير.. ويدخل الاتحادي وحين رجعنا على الحظ أولها حكم وآخرها حظ وبكره حتقولي العارضة والقدة وأنا ما يهمني لو فزنا بالركنية حتى وبعدين العب بعيد عن نهائي آسيا ضيعتوها وهي سهلة وفي جدة وتباني أذكرك بدايو الكوري وإيش عمل فيكم خليكم مستورين وبعيدين ودوروا على المحلية واحنا تخصصنا آسيوية.. ويقول الأهلاوي ترى قمنا في الغلط ويش فايدة الآسيوية وتيتي تيتي زي ما روحتي زي ما جيتي كل سنة صجة وآخرتها يا إتي يا منحوس لا بطولة ولا كؤؤس وصحيح انتوا اكتر فريق يشارك ويخرج من المولد بلا حمص.. وزعل العمده وقال زوتوها اليوم في المركاز يفوز الإتي أو يكسب الأهلي الشطارة مو هنا إلي يروح كوريا يبيض بالوجه ويجيب الكأس للسعودية ويفرح العروس.
المواضيع المتشابهه
العرض الشجري