السلام عليكم ورحمة الله وبركاته
اليوم الاحد 14/1/1435هـ اول ايام الاسبوع الدراسية
صحينا من الفجر كالعاده اي واحد عنده بزران بالمدارس لازم يكون مجند وعلى خط النار وفي حالة استنفار
ومايكفي يحط منبه واحد لازم جوال الام والاب من باب انه مايتأخرون ويروح الباص على الاولاد ( اذا جاء الباص اصلا ) 
فعلا اليوم كان كل شي طبيعي وجميل الا مسألة الاتصال الي جاني وانا بالدوام الساعه 9.30 صباحا تعال خذ عيالك ؟؟؟؟؟؟
والله رحت المدرسة وانا افكر واقول ليش وليش وش عندهم وكل شي خطر في بالي الا موضوع تعليق الدراسة بسبب توقع سوء الاحوال الجويه
طبعا هو امر والكل بينفذه ولكن وين اهل القرار من تفنيد الامور وتمحيص القرارات ؟؟
المؤكد انه جاء امر بتعليق الدراسة بالشرقية ... كلام جيد
ولكن انت يالي بالخفجي ماتقدر تطلع وتناظر للسماء كيف الشمس تصقع والجو اروع مايكون وتقولهم من وجهة نظري الشخصية انا اشوف تعليق الدراسة غير ضروري اليوم تحديدا بالخفجي
وبكره لكل حادث حديث
لان الشرقية بشكل عام كبيره ماشاء الله ولكل منطقه مناخ يفرق عن غيرها مثال / ممكن يكون تمطر عندنا من يومين والدمام غبار
او العكس .
المشكله ان القرار جاء بعد بداية الدوام
يعني كل الي باقي على نهاية الدوام بالكثير كم حصه
وبكره علقوا الدوام احسن مايضيع يوم دراسي بدون مبرر
الرياض الي تمطر عليها من يومين ماعلقوا الدراسه الا البارح 11 باليل
اذكر العام نفس الموضوع انهم علقوا الدراسه بيوم كان جدا صحوا
ويوم داوموا من بكره صب المطر 
في الاخير اسأل الله السلامه للجيمع والله يحفظ البلاد والعباد ويلطف بالحال
وكل كلامي مجرد راي شخصي لا اكثر ...
شكرا
المواضيع المتشابهه
العرض الشجري