اليك اختي" السحلية " خاص بغير المتزوجات

[][راعي السيكل][]

.
.
.






الموضوع ذا للسحالي بس ...هههههههههه

يعني حبايبي التماسيح يطلعون الله لايهينهم

]...[الى جميع السحالي]...[

السمر منــــــــهم ولا البيض اسمعو كلامي



لكل سحليه ناشبتن

في حلق أهلها وماتصرفت مع انهم

حاطين معها أختها مجانا (لترويج البضاعة المتحرجمة في البيت )

اليك عصارة راسي وبنات أفكاري أضعها بين يديك

كيف تصطادين تمساح دون اللجوء للأساليب المعهودة والسقيمة


(المغازل ،الترقيم،التميلح اللي ماله سنع،الترزز بالاسواق .الخ )


للاجابة على هذا السؤال اليك مايلي :

أهم نقطة :
نشنشي على العجوز اللي حاطتن
عينك على ولدها ثمن نفذي التالي :

1-خليك مع أمك لاتروحين مع البنات وتهيبلين
ماورى ماتهيبلتي اصبري عنهن كم شهر لين تتم العملية


2-امشي وانتي حاطتن راسك بين كتوفك لاترفعينه أبدا
حتى لو يصير كله صعارير
(خلي الفكس دائما في متناول اليد )
علشان يقولون مؤدبة ومب متكبرة



3-كلمة خالة خليها على لسانك وخاصتن لأم التمساح
علشان تحس بنوع من التميز عن بقية العجز .
لامانع تنادين وحدة ثانية بخالة علشان إذا مانجحت الخطة
مع العجوز نمبر ون تنجح مع الثانية
اتبعيها كخطة احتياطية (يعني ستبنة )


4-إذا بدت أمك تتكلم انغزيها بكوعك
علشان تدخلك بالموضوع حتى لو مالك داعي



5-اخوانك الصغار لاحقيهم وطامري وراهم وين مايروحون
حتى لو مب عادتك بس تصرفي معهم كأنك أمهم
لأن هذا يوحي بما لايدعو مجال للشك عند العجوز بأنك
حريصة على ذريتك...


6-مهما أكلت أمك من أكلة زينة خليها تقول :
نفس الاكله اللي تسويها بنتي
(حتى لو الاكل من المطعم الصيني أو المكسيكي )



7-اذا جيتي بتمدين ايدك جعلها الكسر< ==(خربها)
اعبطي خشتك وتويجعي
(مب قوة علشان مايقولون جوارة)
وخلي أمك تقول :
قايلتن لك وأنا أمك لاتنظفين جدران الفلةالخارجية
بس أنتي الله يهديك ذابحتك النظافة



8-دايم ارتزي كأنك بالعتن قصبة
علشان ماينقص من طولك ولا سنتيمتر (للقصيرات)



9-اذا تكلموا الحريم عن أي عرس اكتمي نفسك
لين تحمر خدودك علشان يقولون البنت تستحي
ومالنا حق تكلمنا عندها ...


10-مهما كان موضوع الحوار حماسي لاتبدين رأيك
وخليك مثل الطرما لأن اللقافة تجيب أجل الخطة





11-شعرك افرديه لين يتحسحس وتشمين ريحة حسحسة
و لاتخلينه طاير وشوشة مهما كانت الموضة
لأن العجز مايدورون الا اللي شعورهن ناعمة
والا ياعمري اللي شوشهن طايره ماحد يلتفت يمهن



12-إذا أدلت العجوز (أم التمساح) بأي رأي
سواء كان سياسي أو وطني أو اقتصادي
وافقي عليه حتى لو هو ماسخ وماله داعي
مثلا تقول العجوز:
أمس بوش متقهوي عندنا قولي لها :
وليه ماعلمتينا ياخاله نجي نعاونكم




13-في العروس لاترقصين اربضي واقضبي ارضك
واعتبري الرقص عيب وشق جيب :::3:::

14-اذا جا طاري السوق وطبعا هو لازم يجي الطاري
لأنه ملح الجلسة عند الحريم
خلي أمك تقول :
بناتي مايطلعون للسوق أغراضهم أبوهن يجيبها
(وانتي شكلك مقطعه السوق تقطيع )






احتمال وارد الحدوث
ممكن تكون العجوز منشنة على بنت غيرك
لكن بعد النقاط السابق ذكرها بتصرف نظر عنها
وكذا بتكون العجوز وقعت باالفخ


************************************
نرووووووووح للتمساح الحين :
اهجدي في بيت أهلك ولاعاد تطلعين
واذا جاء المعرس بيشوفك خلي أبوك يقول له :
والله ودي تشوف البنت بدون ماتدري علشان تأخذ راحتك
وانا عمك وبعدين تشوفها على الطبيعة
علشان ماتقول بعدين غشيتوني...

<=== واثق الشايب من حلاوة سحليته





وقبل يجي اليوم اللي بيشوفك فيه
بحوالي اسبوع أو أكثر
(على حسب شين وجهك )
ادهري من مشغل لمشغل
(صبغه ،فرد،تنظيف بشره،معجون,سمكرة ,الخ)
لاتخلين على روحك قاصر




ولما يجي المعرس خلي أخوك ياقف بجنبه عند الشباك
علشان مايطول بالتبحلق ويبان المستخبي
وذلك تطبيقن لنظرية اللمحة ذبحة ..هههه
بعدها عاد كيف بيشوفك.؟؟
هذي عليك مب كل شيء بعلمك اياه دبري عمرك


بس خلي أبوك في نهاية المشاهدة يقول:
العذر والسموحه وأنا عمك
(الأخ ضمن الولد يوم انه يقول وأنا عمك ..؟؟)
ترا البنت حوسة (مع انها طاقتن كل زينك بس يعني اني )


في هاللحظة الولد بينط على راس أبوك وبيمطخه
لين يشفط مخه وبيقول متى العرس ياعم
"اللهم ارحمه فقد كان ولدا بار اً بوالديه"


عاد الله يوفقك وعقبال ما تجيبين عيال



ولاتنسينا من حلاو العرس والكليجا
واياني واياك تعلمين الولد من اللي معلمك
هالعلوم ولا حتى باسم المنتدى لأني أعتقد انه
بيسوى مصيبه وأخاف يحط حرته فيني ..



تحذير
ابعدي عن أمهات العيال اللي متعلمات
راعيات الشنطة مثل لون الجزمة
لأن هذولي يبيلهم خطط بعيدة المدى



نصيحه
رفيقاتك بيلاحظون التغيرات المفاجئة اللي صارت لك
فانتي قولي لهم :
انك خلاص انسانه عرفتي درب السنع والعداله





عاد ادعي لي اني ما اطيح بشباك خطتي
لأني من العطلة الصيفية اللي راحت
وأنا موصين الوالدة اتدورلي بنيتن سنعه

والله يفوفقكن يابنات

واتمنى الافادة لكن...

][==][______ ذي انــد ______][==][

(... منقوليشن مع الخمبقيشن ..)

حقوق الطبع :" لكل من ايدوه لا ايلوه"

تحياتي

راعي السيكل