اوسكار والسعودة ...؟

[اوسكار]

ابارك لكم اخواني واخواتي اعضاء المنتدى الكريم بشهر رمضان المبارك جعلنا الله من قواميه وصواميه وعتقائه

بما أن هالايام كثر الكلام عن السعوده وعن الشباب السعودي وبمناسبة الخطة الخمسية وغازي القصيبي ومطبخه!؟

وبما أني أحد هالشباب ...قربت اصير شايب ........... سأسرد لكم موقف خيالي من هذا المنطلق حبيت فيه تشجيع السعوده

7

7

كان في يوم من الايام عندي مشكله في احدى دورات المياه بالبيت ( تكرمون )

المشكلة هي تسرّب ماء من احدى ( المواسير ).
صلحتها من قبل لكن رجعت ثانية

قلت ما لها الا المتخصصين يحلونها وخلك من السباكين العاديين
فاتصلت على شركة كشف التسربات في دورات المياه .

ويرد علي ذاك الشاب السعودي اللي بدأ يهلي ويرحب كأنه عند باب قصر افراح
وطاش بي من الفرحه الظاهر كان ينتظر صوت انعم من صوتي

قلت له عطوني موعد علشان تجون تشوفون المشكلة اللي عندي بحمام
لاني ما ابي اجيب سباكين يقعدون يشتغلون على ( الهجس )
الظاهر انه هنا او الظاهر انه هناك ..

قال لي حبيبي اذا جيناك بنعرف المشكلة لا محاااااالة
لان عندنا اجهزة تطلع لو فيه نمله في الحمام تروّش نقول لك وش لابسه <<< ينكت مع العملاء يسمع بالتسويق الله يصلحه ..
بكم ؟؟؟ ........ 300 ريال آآخر سعر للكشف فقط غير الاصلاحات
قلت ماشاء الله .. اجل على بركة الله

واعدتهم ووصفت لهم البيت
دق علي جوال يوم وصل وقال حنا تحت
قلت وانا فوق شوي ونكون كلنا نصير فوق في الحمام ..

نزلت وما لقيت احد والتفت والقاهم يطقون باب جيرانا ) اللي باخر الشارع
واوقف بنص الشارع من الفرحه واقول هيه هيه هنا هنا تعالوا تعالوا.

ويجون بسيارتهم اثنين سعوديين وواحد هندي
واحد من السعوديين طاق الثوب ومرسم وهو اللي يسوق والثاني
تكميلة من تكاميل محلات الرياضة ولابس نعال شرقيه تكرمون ويسحّب رجليه <<< جامع بين التراث والحداثة الله لا يضره .
والهندي يقطر بالزيت يمشي وراهم كنهم عمانه .

يوم وصلوا قالوا تصدق؟؟ قلت يعتمد على القصة
يوم قالوا جيرانك مهوب ذا البيت ولا اتصلنا على احد
قلنا اكيد مقلب او انك شفتنا من الكاميرا وعرفت اننا سعوديين وهونت بس الحمد لله طلعت لنا

قلت في نفسي ماشاء الله زين والله سعوديين يشتغلون بالسباكه وارفع راسي واقول ( والله والنعم ابناء بلادي المكافحين ) <<< وطني الله لا يضره.
وشي جميل اننا نرى شباب يشتغلون ولا يتشرطون ويتنعفقون يبغون يصيرون مدراء وإلا هونت.

شفت لهم الطريق ومن الفرحه انهم سعوديين بغيت اقول للوالده هاتي البخور واتصل على مطعم المندي

شكلهم وهم داخلين كأنهم يبون يخطبون منا ..

تفضلوا تفضلوا يا هلا يا هلا بكم
دخلنا وعند كل باب .. لا والله مع اليمين الا تدخل انت الا ادخل انا ..
ادخل .. يا اخي مع اليمين مع اليسار
قلت خلاص ما تلاحظون اننا ممكن نجلس ساعتين لين نوصل الحمام كله بسبب هالتلزيم والمجاملات
يا شباب ممكن نمحط بالعادات والتقاليد شوي خلوكم وراي
وفكونا من ادخل لا تدخل ولا يمين ولا يسار انتم جايين لعمل
قالوا اوكي ما نتعود لها .

اول ما دخلوا بصراحه كانهم بيشترون البيت
روسهم ما غير يديرونها .. ويتلفتون
قلت يالله ماشي هالعادة ودوران هالروس صارت لزمه عند البعض ولا تلومهم

وصلنا الحمام ( تكرمون ) نزلوا العده
واحد لبس سماعات تقول ( طيار اف خمسطعش )
والثاني رفع ثوبه وتحيزم
والهندي وراهم ما غير ينوقل بالاغراض وهم
يا ( كومار) جب المفك .. يا كومار (هات ابو جلمبو ).
شوي ويقولون يا كومار حك ظهري يديني وصخه.

جلست معهم .. وحسيت من اسئلتهم عن المشكلة ان ما عندهم سالفه
بس قلت عطهم فرصة ولا تحكم على الكتاب من عنوانه


انقلبت روسهم ولا عرفوا وين المشكله
داخوا صدعوا .. قلت باقول لهم خلاص يا جماعة
خيرها بغيرها
التفت علي واحد منهم وقال : باطلب منك طلب بس مستحي

قلت وش يبغى ذا ؟؟؟ .. لا يقول ابي سلف قروش
تراني مالن من هالسوالف
واحد يقابلك اول مره يقول سلفني .

قلت سم وش تبي .. بغيت اقول له اشرب فنجالك وطلبك راح نقضية يا شيخ مفوّز
قال طلبي ... ممكن تسمح لي ادخن راسي صدّع ..
قلت : اوكي دخّن كان هذا يبي يساعدكم تحلون المشكله


وياخذ المفك ويبدأ يفكك وهو عاض لسانه ثم يتنهد ثم يعض اللسان .. قلت حشى فلم مرعب مو سباك

جاء أخي الصغير وشافهم .. قال : وش يسون ذولا بيشترون البيت ؟؟
قلت لا .. يبون يصلحون البيت ؟
قال ليش لابس ثوب ؟؟ <<< والله نشبه .
قلت : ممممممممم علشان الثوب ... والله ما ادري يا خوي بس تدري رح للشغاله خلها تصلح قهوة وتمر نقهوي الرجاجيل <<< إلى الآن حاس اني مقلطهم ما تعودت .

تحمس واحد منهم وطب بالبانيو وقعد يحورف ..


طلع من البانيو وحك راسه ودف الطاقية ورا
وقال : ترى بنفك المغسله؟؟؟؟؟ لاننا بنفحص شيء
قلت اوكي .. انا من ايدك دي لايدك دي
فكوها واثناء الفك والمعافر مع المغسله كسروا البلاط اللي ورا كله لانهم ما يدرون شلون يفكونها ..
قلت : أفااا بس ياالله خلني أشوف أخرتها معهم
الحقيقة شغلهم ما كان شغل فيه روح الفريق وفيه رعونه في التهديف مع تسرع وعدم دقة تحديد الهدف <<< مشروع معلق كوره
.. دائما واحد يشتغل واثنين يتفرجون
ضاق صدره واحد منهم .. وشافني واقف جمبه وقال خلني افتح موضوع
الا على فكره سيارتك كم موديلها ؟
قلت في نفسي : ذولا شريطية معارض وإلا سباكين ؟
جاوبته اجابات مختصرة وناديت تحت قلت الشاهي .. كنسلت القهوة
ولو مصخوها باكنسل الشاهي واكتفي بالماء البارد .

قال كم لك ساكن .؟؟
قلت : يا ولد نبي ماء بجيك ؟

وبعد ساعتين من الوقفه معهم
قالوا حمامك ما فيه الا العافيه
ومواصيرك زينه وهالتسريب البسيط عندنا لك حل فيه
وهو انك تقض كل الارضية وترجع تبنيها من جديد

قلت له : يا اخي انا لو ابي اسوي هالحل ما اتصلت عليكم كشركة متخصصة
وانت الله يهديك صرت مثل الاستشاري اللي راح له مريض وقال
رح لفلان يكويك .

ضفوا عفشهم بعد التوصية وشربوا ماء بااااارد وطلعوا ..
وقفنا بالشارع ودي اودعهم
ما دريت الا طلعوا ايصال وقال : وش اسمك ؟ ولو سمحت ( نق لنا 300 ريال ).
قلت بانفعال ( مش خشمك بس عسى ما تكلفت ) .
قلت ليش عسى ما تبغى تاخذ مني شيء على هالزياره اللي ما استفدت منها شيء؟
قال : الا يا اخي احنا زرناك ولازم تعطينا حق الكشف .

قلت : بس الكشف ما نتج عنه شيء الا حلكم اللي ممكن تجيبه جدتي لو اشاورها
اذا انتم ترون انكم طلعتوا فانا ما استفدت من طلعتكم ولا كشفكم شيء
واذا ترون ان وقتكم ثمين يقدر بثمن فانا ايضا وقتي ثمين وللساعه عندي قيمه
وانتم الله يهديكم يوم جيتوا تفكون المغسله كسرتوا البلاط كله
وهالبلاط يبي لي اروح ادوره واجيب ناس يصلحون الجدار عقب ما كسرتوه
ولو انكم محترفين كان ما انكسر شيء .. بس انتم اخذتوا الموضوع عضلات
ولو سألتوني علمتكم شلون تفكونها


قال : اجل شف رح جب شركة اذا قالت لك غير حلنا نرجع لك فلوسك
قلت لهم .. بهالديره ما ترجع الفلوس اللي تطلع ولا تصيرون مثل اللي يعلنون
اذا لم تعجبك البضاعة رجعها ونعطيك فلوسك كامله ..
وقلت لهم :.. ما اظن .. والوجه من الوجه برتقالي وتوكلوا خسرتوني ويمكن اكون خسرتكم شوي وقت بس هذا عملكم .
عموما لو انتم ما اقتنعتوا بادفع ..
قالوا لا ..خلاص خلاص .. ويعطيك العافية ..
ودعتهم كأني مودع اخواني اذا جو يروحون البر ..
انتبهوا لانفسكم

الخلاصة :
اننا نسعد اننا نشوف شبابنا انهم يتجهون للمهن الفنية لكن إلى الآن ما زال ينقصهم مهارات اتصالية واجتماعية عند تنفيذ الخدمات

وما ابي اقول ان كلهم كذا علشان ما اعمم بس يظل فيه حاجز عند بعض الناس تجاه الشباب السعودي
سواء سباكين او سواقين ليموزين او فنيين الكترونيات .. الخ من المهن اللي تتطلب انك تدخلهم بيتك .
وبعض الناس من يوم يشوف انهم سعوديين يهوّن

لماذا لايعمم اللباس الموحد العملي في الادارات والشركات ويمنع اللباس الوطني منعا بات لتكريمه وتخليصنا من الادعاء وتضييع الوقت في التكشخ >>>>تقول رايحين عرس في الدوائر

وبث روح العمل الجاد بديل مطلوب في مفاهيم الطلبة لكي نؤسس للمستقبل >>>> يعني زبدة الهرج ليش مايكون في المدارس ورش مهنية اساسية اذا مااستفاد الطالب على الاقل يقدر يصلح باب بيتهم بدل ابو هناد اللي ياخذ عشرين ريال على اشياء تافهة >>>> اصلح وزير عمل وتربية وتعليم

الا على فكرة ليش مايدمجون وزارة العمل مع التعليم عشان توازي بين مخرجات التعليم والسوق >>>>>>> فعلا مصدق نفسي





سؤال يفرض نفسه :
1 - هل تثق بالسعودي وتدخله بيتك وتشعر بالراحه والفخر ان شبابنا يساهمون في عجلة التنمية والاسراع في التخلص من العمالة الاجنبية ؟؟
2 - وش تفضل اجنبي والا سعودي يسوي لك الخدمة الفنية ؟ وليش؟
3 - ايضا السؤال موجه للبنات لو فيه مهن فنية تفضلين السعودية والا الاجنبية ؟ ( تصميم / خياطه / بيع وتسويق ... ونحو ذلك) ؟؟
4 - اذا ودك تعلق على اي شيء ورد بالموضوع وما سألت عنه وتسوي مداخله تراني انبسط