السلام عليكم جميعا ً
بصراحه عندي قصائد اكثرها قديمه ويمكن البعض من الشباب
هنا قد قروها في منتديات ثانيه ،،، المهم
ماعلانا
اخر ماكتبت رد على قصيدة للشاعر ( عيد السعدوني )
ولكم قصيدة الشاعر عيد السعدوني والرد عليها ،، وآمل ان تنال اعجابكم
----------------------------------------------
للوصل أصل وللقطاعه دلايل
والشعر مايارد على غير سبه
وانا حبيبي ساقني للهوايل
ذوقني اجروحه ولاذقت طبه
مع ان طيفه دايم الدوم صايل
ولاهو بحاجة ريح ذكرى تهبه
الوصل قفا والعذر صرح مايل
لاصار ما للهجر داعي وسبه
ياكيف ابسلا والغلا ماتمايل
ثابت وله بين المعاليق شبه
ضيفانه جروح ٍ تمد النكايل
والعقل ملعون الصلايب لعبه
لاهو الذي وفا بسوق الجمايل
ولاهو الذي خلا الجروح تنبه
لاجابرن كسري وشره حصايل
لاحل في روض الهواوي يشبه
يحرق محاصيل الهوى بالهمايل
حتى يكرّهك الغلا والمحبه
الملم جروحي وفكري واخايل
براق مزنن يروي القاع صبه
ياماجد ابن منيف ويش العمايل
مع الذي روّح ولااعرف مطبه
لا يارفيقي ياوفي الخصايل
يلي بوقت اللازمه سد نبه
خابرك لاضاقت علي الوسايل
عون الرفيق وعون همه وطبه
والشك من بين المناعير زايل
ولا الردي في هامش الوقت كبه
ياكيف هجرانه بليا دلايل
والهجر مايارد على غير سبه
(عيد السعدوني)
=====================
--( الرد --
فاح القصيد وزان بدع المثايل
وغيص البحر يسبح ثمانين غبّه
ومن الأدب والذوق رد الرسايل
إن كان ماهي واجبه مستحبّه
أبشر بعزك ياصدوق الفعايل
نفسي لخدمة صاحبي مشرهبّه
أهل الوفا ياعيد مثلك قلايل
وأنا أحترم من كان مثلك وأحبّه
الله خلق خلقه شعوب وقبايل
والطيب له مع عاشق الطيب هبّه
الطيب يخلق في عيال الحمايل
ولاخير في رجل ٍ يحب التشبّه
أفخر بخوّة كاسبين النفايل
وأشوم عن خوّة خطاة الجلبّه
ودوم أحترم وجهة نظر كل قايل
وإن قلت ما أزوّد على الكيل حبّه
وليا بغيت أفتي ببعض المسايل
يقرع جرس فتواي مثل المنبّه
عرفت سر أسباب قطع الوصايل
بينك وبين اللي سبا العقل حبه
أسبابها ناسٍ تجيد التحايل
يبنون من لاشي ياعيد قبّه
ناسٍ على دربك تحط الحبايل
وتلبس معك من صادق الود جبّه
في هالبشر صفوة وفيهم حثايل
وهاذي نتاج أفكار ناس ٍ مسبّه
لولا تطفّل مشعلين الفتايل
كان القلوب أوضاعها مستتبه
دايم من الفاضل جزاك الفضايل
ومن الردي دايم جزاك المسبّه
صارت معي قبلك ولاني بسايل
كشفت كل أسرارها المستخبّه
ناسٍ مع الفتنة تضيع القوايل
وقلوبهم من زود الأحقاد صبّه
ورغم أنف عبّاد الردى والرذايل
لازال شلال الوفا مع مصبّه
وأهل الحسد والحقد وأهل الغلايل
فحلوقهم علقم وفالعين شبّه
راع الحسد لاجاء كلام الصمايل
في لحيته لعنه وليديه تبّه
والله ما أدور فالحبيب البدايل
يشهد علي الله ربي وربه
حبه سطى بين الضلوع النحايل
يجول في حدب الضلوع وتضبّه
وليا استذار ورد ضبي الخمايل
يلقى له بقلبي من الريف خبّه
له في صميم القلب صرح ونزايل
غذاه من قلبي ودمي شرب به
صادق ولا أسمع فيه هرج الدخايل
لو بستمع فيهم وقعت بمغبّه
خلك سواتي يا عريب السلايل
جاك الفرج ياعيد والريع ذبّه
-( جرح الغدر )-
وسلامـــــــــــــــــــــتكم
المواضيع المتشابهه
العرض الشجري