احزني ياعنك
اذرفي ياعين دمع افراق ماباليد حيله
والفراق امر حاله موجعه للي لقاها
مات رمزٍ من رموز الجود ورموز القبيله
والصدور اضيّق مْن الابره غدى واسع فضاها
من يعرف قنيص في فقده بكى سجات ليله
نادرٍ بـ اسباب موته تكشف العبره خفاها
احزني ياعنك والاحزان في حزة رحيله
كم وكم عينٍ على فرقاه فارقها صفاها
الأصيل اللي فعوله من مزاياه الأصيله
مايعوض لو نفود الارض تطبق في سماها
سيرته من وين ماوجهت تذكر لي جميله
ناصعه وامجاد عرفه في مواجيبه ملاها
تاركٍ صيتٍ سنين الوقت تبطي ماتزيله
عند كل اللي يعرفه قيمته راسخ غلاها
الكرم في ساحة اهل الطيب حِط اسمه وكيله
والسياده والرياده بالمنيفات احتواها
الجزيل اللي مواقيفه معَ ربعه جزيله
كل فزعاته تنومس فيه صدقانه تباها
يمدحه جيلٍ مع جيله وجيلٍ بعد جيله
والجسور اللي ثمينه في علاقاته بناها
جعل نوٍ فوق قبره ينهمر ويسيل سيله
ينهمر لين ارض قبره ترتوي من كثر ماها
يالله المعبود ياللي ماعلى امرك مُستحيله
جعل يوم الحشر بالفردوس تكتب له وجاها
المواضيع المتشابهه
العرض الشجري