--( زهور متناثرة .. من بساتين الحياة )--

[الدووووخي]

[ 3 ] ..


:

وهذا اليوم هو ثالث من أيَّام الشهر يا خال
ولا جاني مسج منَّه .. يبارك لي ويهنيني

أنا حالي من غيابه .. قسم بالله ماهو حال
أحبه وما أبي غيره عرفت الحين وش فيني

ترى في غيبته مرَّت على عيني كثير أشكال
ولكن مثله ما شافت رغم , كثر البشر عيني

عساه بخير ..؟
شخباره ..؟
هذاك اللي غيابه طال ..
- نساني ..؟
وإلا ذاكرني ..؟
أبي
بس أسأله ويني ..?

يا خالي تدري شـ تمنَّى إذا مَر التمنِّي وقال :
" تمنَّى لك طلب واحد " أبي أطلب ويعطيني

أبسمع عيدك مبارك من أوَّل ما يهل هلال
أنا ودِّي .. قبل حزَّة صلاة العيد يطريني

:

[الدووووخي]

[ 4 ] ..


:

يا رَب , عبدك طلب من عفوك التوبه
[ فقير ] يرجي الغني في يومه الرابع

شخصٍ طلق لحيتة .. ومقصِّرٍ ( ثوبه )
وشخصٍ لهى عن صلاته لأنه متابع !

المرء يخطي وكل غلطاته محسوبه
جوعان يبقى ولو عاش الدهر شابع

واللي مسك رغبته ويحاسب ذنوبه
سماه في وجهه تلقى الخير به نابع

أعوذ منِّك من الشيطان , وإسلوبه
هذا كلامي .. ولك آخر سطر تابع



يا رَب كلِّي خشوع وأطلب التوبه
أستغفرك كل لحظه بيومي الرابع

:

[الدووووخي]

:

هذا خامس يوم من هذا الشهر
يعني ( + ) يوم من فرقى الخليل

مو على كيفي ترى إخترت السهر
ياللي تسأل .. ليه أنا نومي قليل

حظِّي اللي ما يكسِّر لي " صخر "
والنصيب اللي موريني الرحيل

قلبي عايش , بس ميِّت من قهر
ترمِش جروحي ولا عندي بديل

الحزن : أبرز صفه لي من صغر
كنت أوظِّف لي أماني و تستقيل ..!

الصبر ! هو باقي في عمري صبر ؟
بين جرحي وراحتي , دربٍ طويل

يا خطا .. ما له في قاموسي عذر
كيف يقتلني ..؟ وأنا بليا قتيل !

صاحبي إن كان لي عندك قدر
أدري والله فرحتي شي مستحيل

رغم هذا قول حالي : [ مستقر ]
لا تبيِّن .., إنِّي بـ الفرقى عليل

لو سأل عنِّي أبي تقول : الظهر
كنت أنا ويَّاه نضحك عـ البخيل

جيب طاري بـ أي طريقه للسفر
وقول في غيابه أنا : وقتي جميل

وإن تعجَّب قول له : لا تنبهر
سفرته " لبنان " هي أكبر دليل

:

[الدووووخي]

[ 6 ] ..


:

هذا سادس يوم ماني بالكويت
بس ما حسيت بـ الغربه " هِنا "

ضيف يا لبنان ناديتوا وجيت
ومن كرمكم صرت لبناني أنا ..!

والله يا بيروت في شعبك لقيت
شنهو يعني تضحك وتنسى العنا

كنت ذاكر صدمتي .. لكن نسيت
بدَّل الله حالتي .., وشفت الهَنا

يعني عال العال حالي يوم جيت
والسعاده ما هي لي وحدي .. لنا

بس أمانه حب لي راس الكويت
ولا تحاتيني .. أنا ببقى " أنا "


:

[الدووووخي]

:

هذا سابع يوم , والراحه تعب
المرض جاني وأنا .. هلِّيت فيه

يا حبيبي .. وقتي في قلبي لعب
ورغم هذا قلت يـ الله ما عليه

في غيابك شافت عيوني العجب
حيل محتاجك , وإحساسك أبيه

لك أقول بخير وماليني التعب
الأهم .. قلبك ,, تطمني عليه

[الدووووخي]

:

[ 8 ] ..


:

اليوم ثامن يوم لا يطفي سراج
في شي صاير لي ( معكِّرمزاجي )

قصة حياتي قصه تبحث عن إنتاج
وإسمع نهاية - قصتي و إنزعاجي

يا سيدي , جيتك وآسف عـ الإزعاج
صحيح كنت أغلى البشر يا سراجي

مثل الغريق اللي نجا وقابل أمواج
تشبيه منِّي .. والمفارق .. نتاجي

دام " الوقايه " قالوا خيرٌ من علاج
ببعد .. رغم حبي وزود إحتياجي

أدري مريض وقلبي لك حيل محتاج
وتدري [ أموت ] وما ترجَّى علاجي

:

[الدووووخي]

9 ] ..

:

اليوم هو يومي " التاسع "
ورغم المرض كنت أنا صايم
الفرق .. يا سائلي شاسع
والجو هذا المسا .. " غايم "

[ تعبت ] من حظي الكاسع
صاحي .. وفيني البخت نايم ؟
أصبر على جرحي اللاسع
و ( الجرح ) عاشقني وهايم

القلب , ما عاد لي ياسع
وفي داخله .. الحزن عايم
الكون ما ضاق بي واسع
اللي يضيق ( الصدر ) دايم

:

[الدووووخي]

[ 10 ] ..


:


" عشر" أيَّام مرَّتني سريعه
ولا جاني خبر يروي إنتظاري

شريت الحُب ومو قادر أبيعه
غريبه كيف أنا ضايع قراري !

مثل طيرٍ .. نطر موسم ربيعه
يبيه القلب وما كان إختياري

وقلبي رغم هالدنيا الوسيعه
يشوفه زهر والعالم صحاري

أنا لو هـي عليَّه ما أطيعه
ولا أحبه ولا أبي منْه طاري

عشر أيَّام .. والفرقى فظيعه
بدونه إختلط ليلي بـ نهاري !

:

[الدووووخي]

:

[ 11 ] ..


:

- طنِّش ..
- تعش ..
- تنتعش ..

لا تنقهر
ما على قلبك أمر
ولا تنصدم إن لقيت
أقرب أصحابك يحش !
سافِر " مصر "
وتالي إرجع للـ كويت
..
طنِّش , تعش , تنتعش

لا تناقش من يذمِّك
واللي حاصل - لا يهمِّك
لو يهمِّك شفت قلبك
من [ همومك ] ينفرش !
..
طنِّش , تعش , تنتعش

وقبل كل هذا نسيت
تدري لو تعطي جروحك " وجه "
والله تبتلش !
الغضب باين على إيدك
تكلِّمني وترتعش !
..
طنِّش , تعش , تنتعش

شوف يا قلبي وتعلَّم
دام هـ الدنيا تجارب
هذا كل عمره مسالم
وذاك كل لحظه يحارب !
ربِّي حسن الخاتمه ..
كل هذا صار في يوم ( 11 )
..
طنِّش , تعش , تنتعش

[الدووووخي]

[ 12 ] ..

:

سلِّم عليه .. وقِلَّه إنِّي " مسافر "
وقِلَّه [ فمان الله ] من قلب مجروح

خلَّه يذوق الشُوق , لا رحت باكر
يمكن يحس بـ قيمتي بعد ما أروح

بـ أكون غايب حتَّى لو كنت حاضر
ممنوع يسمع صوتي لو كان مسموح

ماني على بعضي مثل ما هو خابر
من كثر غلطاته إطلعت منِّي الروح

إن قال برجع قول ناوي : أهاجر
قلبي تسكَّر " بابه " ما عاد مفتوح

علَّمته درس الحُب وما كان شاطر
وسافرت يمكن يفتهم بعد ما أروح

: