[RAMS]http://www.qassimy.com/up/users/baz/0494.ra[/RAMS]
الشاعر الكبير والمبدع ابالقوايل يحلق بنا في هذه الملحمة الهزلية عندما تزوج "فتاة سورية"
ترى ماذا حدث له
اترككم مع هذه الصور الابداعية التي لايجيدها الا ابالقوايل صاحب التجارب العاطفية والعلاقات المخملية
[POEM="font="Simplified Arabic,5,darkblue,bold,italic" bkcolor="transparent" bkimage="./images/backgrounds/15.gif" border="double,5,gray" type=2 line=0 align=center use=ex num="0,black""]زواج ابا القوايل من سوريه
ابا القوايل صاح باعلى المقاصير= واحظي اللي ينعثر كل ما ثار
كبدي يشلخها رهاف السواطير= ياكن يشذب ثومة القلب منشار
من اوّلن عندي ضيوف ومسايير= واليوم ِيفزع بالعشا لي والافطار
لاواحريمي كيف راحن مخاسير= عقب الكرم ردَّت على مدَّت الجار
طارن من ايديني سواة العصافير= يابو دحيم الاوله طارت طيار
ويابو دحيم الثانيه مابها خير= عِجزت اعايرها على كل معيار
والثالثه عِلمه يجي لك بتفسير= يابو دحيم اقول لك كل ماصار
اخذت لي غندورتن من هل الدير= سوريتن حوريتن تقل دينار
من هيفن اطوالن اتلاعن مغاتير= مالاحها حرن ولا شافت غبار
اذريِّعاته كنهن الجمامير= وراسن طويل معدّين خمسة اشبار
عيونن دواويرن إنهودن مزابير= خدودن نواويرن بهن حمرة النار
نقيتها من بين كل الغنادير= كما ينقي الطير للقنص صقار
ودفعت ماهمن كثير الدنانير= ونَدّرتها تنقاة خبري وبيطار
وشلته على الددسن وجينا محادير= نمشي نهار ولظْلم الليل نحتار
مابه قزازن والبلا مابها اسبير= وإيلا مشت عشرين يطفن الانوار
والكلبليتر مابقا به مسامير= والا الاديتر باقين فيه مسمار
وكنداسته وطيته من التياسير= طاحت بالاردن قبل ناصل لعمار
وان جت مع البطناج يطلع عصا القير= وبطناجها دايم مع البر والقار
وإيلا ركبت الزفت كني على عير= وإيلا طرقت البر كني على حمار
مع البراري راح نص المشاوير= نبعد عن الرادار ماندخل ديار
نجهم صباح وبالليالي مخامير= نمشي خفا ماشافنا ولا رادار
نبعد عن التفتيش ونتابع السير= من دارهم تسعة عشر يوم للدار
وقعدت انا والبنت عامين ماغير= بس انتلاحق كننا البس والفار
ولا شفت من بنت الاجاويد تقصير= ولا اشتكت لي ماتعاني من مرار
بالبيت تدبيرن ولا فيه تبذير= ولا يفوته من كبيرات وصغار
لبس نظيف وريحة البيت تبخير= إيلا دَخلْت ارياح دكان عطار
وجاب الله وليدن لنا تقل قصدير= ابيض تشوفه لو يطفَّن الانوار
يذرف بياضن مثل صبغ الطباشير= وإلا لقاحن له اسبوعين بصرار
وقالوا اهلها هاتها دون تأخير= نبي نشوف وليدنا نسل الاحرار
ورحنا جميع نبشر اهله تباشير= ياناقلن حتفه على كتفه امرار
قالوا لي والله ماتشيله لو تطير= إلا تحقق مانبي منك واختار
وصكوا عليّه يوم جوني طوابير= وداروا علي بحلقتن دار مادار
امه تبي مطعم وبنته كوافير= واخوانها يبغون دكان جزار
وخاله يبي له موترن ٍللمشاوير= وعمه يبي ددسن او وايت وحفار
يقول انا اول من حفر بالبلد بير= بالنصف انا وياك في حفر الآبار
وعشرين فيزه للابو والمشاهير= ومع كل فيزه فزعتن الف دولار
واللي يبي فيزة مصلح دوافير= واللي يبي فيزة مليس ونجار
امورهم تمشي على دهنة السير= وان ما دهنت السير فالسير ماسار
بديارهم ضاعت على التدابير= صقرن بنجد وعندهم صرت مطيار
آقف واطيح بوسطهم تقل بي طير= مراجلي ضاعت وضاعن الافكار
ضاع الشماغ وقِطعَن الازارير= كلِّن يتلن مابـِِقىَ بي ولا زرار
عشري غدن دمن الارانب مداهير= ومنوّلن عشري يجن دمنة حوار
يقول الاول مامع الفقر تدبير= وانا ان دفعت شروطهم صرت طرار
وجيتك وخليته ودمعي شخاتير= هي والولد غصبن ولا نيب مختار
ويالله ترضينا بقسم المقادير= وتلطف بنا لاجت مقاسيم الاقدار
وتفرج لقلبن صار يكفخ كما الطير= ولولا ضلوعي كان لديارهم طار[/POEM]
[align=center]لنا عوده مع أبالقوايل في مواضيع أخرى صوتيه [/align]
مسروق (منقول ) من عرب(ن) نمون عليهم
يعني ماعليكم بس انبسطوا ووسعوا صدركم
امممم ويستاهل ابو القوايل التشرشح اللي جاااه
بنت عمه وخاله وبنت بلده أولى
يستاهل مااجاه
انتظركم....
لأجل اشتياقي
المواضيع المتشابهه
العرض العادي
