|~ ديوان الشاعر احمد الصانع|~متجدد

[الدووووخي]

:

جديدهـ [ لعبتك ] هذي ..
رجُوعك , ليه أبي أفهم ؟!
ترى ما جيت في وقتِك / أنا مُو حاسِب حسابك

نسيتك أو تناسيتك .. ( دخيل اللـه ) لا تهتم
وأبشرك .. وجه أحزاني ضحك لي , وإنقفل بابك

وبسيطه جات مِن صالح حياتي .. طعنتك , للعلم
قريتك , وإستفد قلبي مِن المضمون .. بكتابك

تَعَلَّم قلبي مِنْ إيدك على كِل ما مضى [ يندم ]
زرعتِك شُوق .. أتحرى حضورك , وأثمر غيابك

تِحَمَّلتِك / ولكنه .. جُبرني الجرح : أتكلم
خيانه شِفتها مِنِّك .. عِطِرهَا , تارس ثيابك

[ بنيتِك ] حُب في قلبي وإنتَ .. حضرتِك .. تهدم
كرهتِك حيل صدقني .. وكِل هذا مِن أسبابك

تقول : آسف ..؟! يا خلف الله !!
بقى بـ ( وجه ) التسامح / دم ...؟
أسامح كِل شي إلا الخيانه , ونشوة إعجابك

أنا .. يا لِكْ أجي واحد يساوي في عيونك كم
وإلا . . . . ما أجي عندك وأغيِّر , ناتِج أحبابك

تجيني .. والندم واضح ولا أقدر أقولك : سم
لأن الجرح من شافك تضايق قال : وش جابك

وإذا تحسبني برجع لِك .. بلاش تفكِّر وتحلم
لأني مُو مثل أوَّل . . . أحقق , رغبة أهدابك

قديمه لعبتك هذي .. وكفايه .. ما أبي أفهم
[ رجاءاً ] ..
إبتعِد عنَّي أنا مُو ناقص ألعابك
:

[الدووووخي]

:
يا ( سيِّدة شعري ) أنا .. قومي إرقصي بين السطور
في داخلي شوق / وعذر .. والله يعين المبتلي ..!

زعلانه مني ! وتنهدم فيني ملايين القصور
لأنك طموحي .. ورغبتي .. وتخطيطي لـ مستقبلي !

" بركان " شعري .. ما هدى وخايف مع المُده يثور !
في غيبتك .. شفتي الشعر وشلون فيني ينغلي ؟

زعلانه أدري .. وضيقتك في داخلك أربع شهور !
وتأكدي إنَّ إزْعَلِك .. هو يُعتَبَر نفس إزعَلي

يا زهرةٍ وسط العمر مو مثلَهَا , باقي الزهور
يطاوعك قلبك كذا ؟ - عن زارعك ما تسألي !

ما كني إلا لك سما .. وفي هـ الفضا إنتي طيور !
يعني وجودك زينتي .. ولزوم فيني [ تمتلي ] ..!

من يوم ما غبتي وأنا : ضايع بلا قلب وشعور !
تايه ولا عندي أمل .. في آخري وفي أولي

يا أطهر اللي قابَلَت عيني على مر العصور
تعالي عندي وإسكني فيني .. كفى لا ترحلي !

يرضيك أقابل هـ البحر وأرمي من الضيقه صخور ؟
وأذكر سوالفنا بـ وَلَه .. وش قلتلك / وش قلتِلي !

في غيبتك حالي تَعَب ..وصرت ما أحب الظهور
ما غير أتمتم في نِدَم : يا وَيْلَ لي يا وَيْلَ لي !

إيه أعترف خنتك , ولكني رغم هذا غيور
أرفض تخونيني .. وأدري فيك ما ترضي علي !

شاعر .. وأكتب ما أبي وأقولها في كل غرور
إنك تحبيني غصب وسِمْعي الكلام اللي يلي :

كان القصايد مطلبك ؟ وهي اللي بتحل الأمور
بكتب قصيده أحلى من .. " صَوتُ صفير البُلبُلي "

:

[الدووووخي]

قالوا ( بلادك ) قلت قلبه : بلادي
يعني أحبه ومن دواعي سروري

قالوا الركاده قلت مجنون : غادي
عقلي يحبه , ورايكم مو ضروري

قالو تبيه ..؟ وقلت حتَّى : فؤادي
طاريه دهن العود .. وطيفه بخوري

آنا بـ وادي وهـ الخلايق بـ وادي
أغيب عن هـ الناس أخفي حضوري

جيتك .. رغم طبعي وكل المبادي
عنِّك نهيت القلب ما طاع شوري !!

فيني سجنتك .. والسجن إنفرادي
وغيرك عجز ويَّاي يرضي غروري

يا مزعج أفكاري ترى البال هادي
طوَّلت لك بالي .. ورتَّبت أموري

إنتَ الوحيد اللي , خضع له عنادي
من كثر ما أحبك وفت لك سطوري

وينك ..؟ تعال الحين .. ملِّيت أنادي
إن ما سمعت الصوت إسمَع شعوري

كل الأصايدفي عيونك .. [ تمادي ]
إهداء منِّي بـ صوت : مروان خوري

أسأل متى بتروح وأقول : عادي !!
وإنتَ وجودك في حياتي ضروري ,

:

[الدووووخي]

:


قبل أبتدي عندي طلب ركِّز طلب ماهو " رجاء " !
ما أبي تجاوبني .. ولا تستغرب إني أسألك

لا تنصدم من عزلتي , حالي كما : أبو العلاء
عندي سبب : ما تستحق إنِّي أجيك و أوصلك

لا تعتبر جمر الحكي من شاعرك يعني " هجاء "
لو كنت بهجي حضرتك ما خفت منِّك .. قلت لك !

هذي القصيده صُنِّفة في دفتري قصة " رثاء "
حبٍ يموت وتنولد .. وحبٍ يعيش ويقتلك !

ناديت لك ياما .. ولا لبِّيت لي , وضاع النداء !
إنبَح صوتي والصدى من كثر ما ناديت لك !

أقرب من ثيابي علي وأبعد من نجوم السماء
ورغم إبتعادك والتعب ..أرسم طموح وأمهلك ..

ما كنت لي الداء وأنا ما كنت لـ جروحك " دواء " ..
ما عشت في دنياي لي !!عايش ولكن عشت " لك " !

علمتك القلب الوفي .., ما يخذلك فيه " إنتماء " !
وعلمتني كيف العشم في من تحبه .. يخذلك !!

علمتك إن أصل الهوى يرجع لـ كلمة " إحتواء " !
وعلمتني إن الهوى , ما عاش يوم بـ داخلك !

علمتك إنِّي لك بحر [ مدَّه وجزره ] لك وفاء !
وعلمتني كيف أنصدم وأغرق أنا في ..ساحلك !

ما تستحي ,, ودامك كذا ؟ - إفعل حبيبي ما تشاء !
توِّي عرفت إنِّي كثر ما أعْرِفِك .. كنت أجهلك !

ما كان قلبي بس لك ؟ يا لاعب أدوار الدهاء !
وما كنت لك أقرب من أنفاسك وأقرب من هلك ؟!

ما عاد تفرق غيبتك أو رجعتك .. عندي سواء !
كنت إهتمامي ورغبتي .., والحين دوري أهملك !

لا صار قلبي لك وطن .. أبسألك وين الولاء ..؟
وشلون حال المملكه ؟ - دام الخيانه من ( ملك ) !

إن كنت جاهل ..! " لعبتك قلبي " وما فيها ذكاء
حتى الطفل إن جبت له [ لعبه ].. - ولاءه صار لك !

قبل أنتهي عندي - أمر ما هو طلب وإلا - رجاء ..
لا يشغلك ماضي إنتهى .. ركِّز علـى " مستقبلك " !

:

[الدووووخي]

:

قلت:
" أحبك " .
من بعييد و ...... / ضعت !
شوف , لو هي من قريب ؟؟

ماتغيب
أحلام ( قلبي ) في وجودك
لك - أسلِّم نفسي
- أربطني بـ قيودك

...... جابك الله
مدري لي جابك : نصيب :
المُهم أسمع " أحبك " .

,

من لسانك . . .
غير [ صح الله لسانك ]
هو { مكانك .!
ليه يبكي ؟؟
كل ماتترك مكانك ؟!
إحتملت . . . وقلت / ما أسمَع :
قوووول من ثاني , " أحبك ..!"

رحت ساعتها من الدنيـ يـ يـ يـا
إلى ......... ساحل عيونك .
و
ما رجعت !

( الوطن ) , حضنك ,
وأنا .. من غير أحضانك – غريب

يعني من صجِّك ؟
......... سكوت ..!
ما أبي أكثر ألجِّك ,

قول بسمعها : " أحبك "
وبعدَهَا يمكن ... أموت

.

قلت : ساهي
قلت : لاهي
وآنا ساكت ..!

عاجز / أستوعب كلامك
وماهو ( تقليل إحترامك ) !
بس - عيونك
من عيونك -
[ ما قدر أي شي ياخذني مِنْهَا ]
^ الملاهي , رمش عينك
والطفل ..
كان ^ إنتباهي !

ايه داخل في عيونك : ما طلعت :
الله لا يبعدني عَنْهَا . . .
جاع شوقي ,
لكن بشوفك , شبعت !

منجرح صبعي وإذا " ودِّك " يطيب ؟؟
بطلبك بس شي واحد ما ( طمعت )
قول
:
" أحبك " .

بصوت عـاااااالي
ما سمعت ..!

:

[الدووووخي]

:


إيه { ضامي } وقلت أرجع في شظَايا : أرتوي ..
من سما الزرقا أبشرب .. دام أنا قلبي " شظَاوي " !

لأني أفهم بالمواقع . . . ولأن لي : عقلٍ سوي ,
أدري إنْ بس الشظَايا راح يظلمها التساوي !

ما طَعَنِّي شخص عادي الغدر جا من ( خوي ) !
صرت مَـ أسْتغرب تجي الطعنات من كف المداوي !

الضعيف : اللي يسولف من ورى ظهر القوي !
قال : آسف ..
قلت : يكفي " ما أبي أسمع رجاوي " !

صفحه سوده في حياتي ،
وصار لازم تنطوي !
معرفة بعض الأوادم ..
ما وراها ..
إلا البلاوي !

إيه أنا واضح ولا لي . . . . بالطريق الملتوي ..
و " الخبيث " اللي بدربي راح تتعِبْه الخطاوي !

ايه أنا فكري حضاري ،
بس لي قلب " بدوي " !
حيل مرتاح بحياتي ..
بس لي حظٍ شقاوي !

من كثر ما شفت غيري . . . من وجودي / منكوي ..
كنت بكتب هالقصيده حصري في ( قسم الشكاوي ) !!

جيت مو قصدي نصايح ماني مُرْشِد تربوي ..
ما أقول إنِّي مِثالي .. وإسمعوا منِّي الفتاوي !

جيت .. , للي كان ودَّه يلوي ذراعي لوي
مات في عيني وجوده والبقى براس الهقاوي !

لا يسوّي نفسه بارع في جروحي " الفهلوي "
وإن طروا إسمي أمامه لا يزوِّد بـ الحكاوي !!

هذي لك مني رساله رغم إنِّي منطوي
ما أحب أكتب رسايل أو ألَمِّح بـ الغناوي ....

( يا تصير إنسان ناضج وعقلك إنتَ يستوي
وإلا صير إنسان غايب ولو بتتكلَّم حياوي ) ..!


الإسم : الصانع أحمد
الهوايه : فوضوي
العمر : سنتين وأكثر
واللقب : شاعر شظاوي

:

[الدووووخي]

:


شِرَق هذا الفراق اللي كِسَرني حزَّة غروبك
________ بغيتك وإستحَت عيني من الغلطات صدقني !

كتبتك من قبل لا تجرح الكلمات مكتوبك ..
________ إذا عندك عذر باقي على التقصير إعذرني !!

كثير الهَم متعوِّد علي .. وإنت يا دوبك
________ وكافي الحزن لو عنَّه أغيب أيَّام " يفقدني " !

حبيبي ليه متضايق وعلي متغيِّر إسلوبك ..؟
________ يبيِّن لو سِكت قلبك .., بأنْهَا ضيقتك مني

غيابي كان مو بيدي خذاني الحظ من صوبك !
________ وقلبي هذا هو حظه غريبٍ , من صغر سني ..

أبيك وما أبي غيرك .. وتأكد قلب محبوبك
________ جبره الوقت يتناسى لأجل بالخير تذكرني

إذا ردَّت علي أبقى معاك وثوبي من ثوبك
________ ولكن [ الزمن ] .. لمَّا أقرِّب يبعدك عني !

غصب رايح ولا برجع لأني أبرز عيوبك
________ حرام إنَّه يجي واحد يلومك من كثر " حزني " !

ترى ما رحت من كيفي عشان أتحمَّل ذنوبك
________ أنا شفت الزمن ناوي علينا وقلت له : خذني ...!

واذا قالوا : رَحَل عنِّك حبيبك ، فتِّش جيوبك
________ تطمَّن قلبي بـ جيبك حبيبي لا تدوِّرني !

لذلك قلت في نفسي أبي أبعد عن دروبك ..
________ تأكد غيبتي هذي عشانك إنت ... صدّقني !


:

[الدووووخي]

[ 1 ] ..
:

هذا أوَّل يوم من شهر رمضان
وراح أكتب لي قصيده كل يوم

عن مواقف صارت بنفس المكان
عن همومٍ ما تشابه أي " هموم "

عن حياة إنسان عايش من زمان
بين نار , وبين شوق , وبين لوم

عن طفل ما يجذبه ( وادي الأمان )
وعن رَجُل دايم يتابع له رسوم !

يا صديقي صارت الساعه ثمان
إنت وينك مختفي بين الغيوم ؟

إنت لك عندي ترى قدرٍ وشان
شاعرك ما يفضحك طبعه كتوم

ما لقيتك .. رغم إنَّ الجَو زان
شفت كل الناس وهنّوني النجوم

الشهر جانا .. وقد آن الأوان
إنتقرب فيه للـ رب الرحوم

من طلوع الشمس لي وقت الأذان
كل ما فيني عن ذنوبي [ يصوم ]

:

[الدووووخي]

[ 2 ] ..

مدخل :

تدري وش يجرح غيابك ؟
ღ يجرح [ غيابك ] صيامي

هذا " ثاني " يوم عدِّى
كنت نايم ..!
بـ الإسم : إنسان صايم
ليت يومي مثل أمسي
وليت أمسي كان دايم ..!
أعترف إنِّي مقصِّر
يوم ضايع من حياتي
كنت في نفسي أفكِّر
وين سجادة صلاتي ..؟
ليه يا عيني تنامي !
وينجرح منِّك صيامي
أشعر إنِّي بلا وجود
شخص منفي من بلاده
( كلمه ) وبليا قيود
" الله وأعلم في عباده "

مخرج :

كل [ ضيقه ] من دعاءك تنفرج
ومن صلاتك تلقى كل اللي تبيه

شفت رقمه جاني وكان المسج :
جيت قبل الناس أبارك لك عليه

[الدووووخي]

[ 4 ] ..


:

يا رَب , عبدك طلب من عفوك التوبه
[ فقير ] يرجي الغني في يومه الرابع

شخصٍ طلق لحيتة .. ومقصِّرٍ ( ثوبه )
وشخصٍ لهى عن صلاته لأنه متابع !

المرء يخطي وكل غلطاته محسوبه
جوعان يبقى ولو عاش الدهر شابع

واللي مسك رغبته ويحاسب ذنوبه
سماه في وجهه تلقى الخير به نابع

أعوذ منِّك من الشيطان , وإسلوبه
هذا كلامي .. ولك آخر سطر تابع



يا رَب كلِّي خشوع وأطلب التوبه
أستغفرك كل لحظه بيومي الرابع

: