ليت الورق // محمد الحويماني ...!!

[~أصداف~]

.
.

ليت الورق يقرأ وش اللي كتب فيه
وليت القلم يدري وش اللي جرى به ..

أن كان ماتمسي بصدري مشاريه
ولا أتضايق لو تضيق الرحابه ..

وصوتي اللي عجزت الناس توحيه
غريب يوم أصوات غيري تشابه ..

البيت بيتك والمواري مورايه
لكن كبرت ولا كبر معك بابه ..

والناي لو نقض جروحك بأغانيه
جروح غيرك نقضتها ربابه ..

ماهو يتيم أن كنت أنا اللي مغنيه
ولا هو فقير أن كان جرحي زهابه ..

والغايب اللي يغري الشعر طاريه
ما قل قدره لو يطول غيابه ..

كم لي وأنا أحث القصايد تخليه
حتى تلاشت رغبتي فالكتابه ..

والشعر لو يفقد حروفه وأساميه
مدري وش اللي بعدها ينبغى به ..

أحترت بين أعتب عليه وأراضيه
أخاف لا يجرح رضاه بعتابه ..

أحيان أقول أبيه وأحيان ما أبيه
إلا أبيه ولو يبي لي عذابه ..

ياللي تجونه دامني مقدر أجيه
وصوا ذهابه لايشح بإيابه ..

وقولوا له أني من كثر ماني أغليه
أشرب سرابه وأرتوي من سرابه ..

وعلى كثر ماأنسى إذا قلت:ناسيه
دار الزمان وجاب عشقه وجابه ..

حنيت لأيامه وضحكة لياليه
قبله وبعده كل وقتي رتابه ..

أن لمت قلبي عاقبتني محانيه
وأن قلت بأرضى عز نفسي رقى به ..

البارحة كنت أكسر الروح وأنهيه
كان الورق أرض وعيوني سحابه ..

زرعت ما أحبه ولاعاد لي فيه
وجنيت أحبه لويطول غيابه ..


المبدع // محمد الحويماني ..