بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته
تحية طيبة للجميع
حديثي اليوم عن ظلم التجار او بعض التجار لافراد المجتمع وبعض الغلمان ...
حبيت اسرد تجربة لي مع التجار وانواعهم وبين قوسين ( اصحاب المال )
فحينما تخالط المجتمع بجميع اطيافه تجد بين جوابنه التجارب والمعاني والفائده الكبيره ..
فلقد عشت حياتي داخل وخارج الوطن بين باحث وبين ضيف وبين عامل وبين زائر
ألتقيت في بشرية لا حصد ولا مدد لها من مسلمين وغير مسلمين بل حتى بعض اليهود التقيت بهم
ولكن لم اجد اغرب من معاملة بعض التجار مع من يصاحبهم
فمثلا هناك نوعيه من التجار يبهرك بالعطايا يعني ممكن تتجاوز مليون دولار من العطايا ومن بعدها يبدأ في استخدام دور الاذلال لك
طبعا انا لست بالشاعر ولا المهايطي ولا القصاص ولا صاحب ديوان ولا من رجال الاعمال بل شخص عادي مهد الله له الطريق الى اعمال هؤلاء بطريقة مباشره او غير مباشره فكان لي اللقاء بهم
فأنا لا تعجبني جلست الشيوخ ولا جلسات الامراء ولا التجار بصراحة اجد نفسي بين خطي النفاق والصمت فأن تحدثت اخشى على نفسي من النفاق وان صمت اجد بنفسي عدم تقبلها البقاء
ولهذا كنت اتجنب هذه الاجتماعات قدر المستطاع
اعود لمحور موضوعنا واقول ان التاجر وليس كل تاجر بل بعضهم يريد اذلال فرد وجد فيه نوع من عدم الاهتمام به او التطبيل يقوم بالسخاء عليه من العطايا حتى تقع بنفس المستقبل فيكون في حرج من هذه العطايا
ولهذا اتذكر موقف حدث معي حينما ارسل لي احد التجار سياره اخر موديل وهي بذاك الوقت ليست بغالية السعر وبصراحة تعجبت من الهدية ووقتها مع اني كنت مجرد موظف لديه بصورة غير مباشره
تقبلت الهديه واتصلت به وشكرته عليها
طبعا من لا يحسب للايام حساب فالايام سوف تلعب به وتذله اشد ذل
ولهذا وضعت السياره الجديده في الكراج واغلقت عليها الابواب واكملت مسيرتي اليوميه
وبعد ايام يتصل بي احد المهايطيه لدى هذا التاجر ويقول لي ابو فلان يدعوك اليوم لمجلسه ..
انا في الخفجي والمجلس في اخر مدينة الخبر واليوم على العشا والساعه الان 5 العصر ...!
وبكرا علي دوام ...!! المهم لم احضر
وبعد كذا يوم يتم الاتصال بي من نفس الشخص ويقول ابوفلان يعزمك على العشا في مجلسه ولازم لازم لازم تحضر او بيزعل
وانظر الى الساعه الا هي السادسه مساءً وايضا غدا علي دوام ....! وبذات المسافة البعيده
وايضا لم احضر ...
بعد ايام اتصل علي نفس الشخص يعاتبني ويقول ليش ماحضرت ابوفلان يعزمك وترفض قلت له انا بكرا ان شاء الله راجع للخبر وراح التقي فيه ان كان موجود
ذهبت للخبر والتقيت بالتاجر وكانت عليه ملامح الغير راضي وكان من حوله بعض المهايطيين وسفهاء وغيرهم من الغلمان
فقام احدهم وقال لي انت ماتقدر ...!! قلت ليش
قال الرجال يعزمك ولا تجي فوق هذا قبل شهرين معطيك سياره ...!!
طبعا لو التاجر غير راضي عن هذا كان اجلس السفيه ولكنه ساكت وكأنه لم يسمع شئ
ففهمت انه راضي وعادي عنده
فرديت على هذا السفيه قائلا: السياره موجوده بالكراج من اول يوم حضرت لي مارحت فيها اي مشوار واذا تبيها خذها انا متنازل عنها لك لاني لا استطيع قيادة سيارتين بوقت واحد
اما عن العزائم فكانت اوقاتها غير مناسبه وثانيا لو كلمني ابوفلان شخصيا كان بالتأكيد حضرت ولكن مدام الامر لم يصل شخصي فأنا بحل من امري ...!
طبعا كلامي لم يعجب التاجر فقال لي يعني يا ابوفلان تبيني اتصل على كل واحد اعزمه ..!!
قلت له لا مو شرط ثلثين الموجودين حولك راح يزرونك سواء بعزيمه او بدون عزيمه يعني عشا غدا حتى لو شاي وقهوه زايرينك زايرينك
اما انا فمالي بك الا يا عمل او زيارة عاديه ...!!
غضب التاجر غضباً شديداً وتدارك احد الشعراء السفهاء الموقف وقال يا ابوفلان ابي اقول قصيده قال تفضل
وانشد السفيه قصيدة عصماء تدور حول مدح وتعظيم التاجر والسب والشتائم علي بطريقة غير مباشره
وبعد نهاية القصيده امر التاجر له بسياره وشيك بالمبلغ الفلاني وتذكره للعمره له ولعائلته
فضحكت وقلت للشاعر شفت اني وجه خير عليك
فشتط غضب التاجر فقال لي يا ابوفلان تراك تزودها بكلامك ...!!
قلت له بصوت منخفض انت تاجر وانا انسان عادي فكيف ازودها معك طال عمرك ..!!
فزاد شموخ التاجر قائلاً صدقت صدقت ..!!
انا حبيت اذكر لكم هذه القصة لغرض حدث بالامس في احد الجلسات حينما قال احد اصحاب الاموال لشخص كان محتاج للمال كلمة اغضبتني ...
فهل يجب على كل تاجر ان تكون له سلطة بشرية ...!!
بصراحة جمال التاجر يكمن في تواضعه للناس ليس باعطاء المال لا والله بل بتواضعه بدون مايدفع هلله هذا كافي
اما من يجد بنفسه نقص ويريد من المال ان يكون معوض له لهذا النقص فهذه مشكلة
صحيح بعض التجار يستطيع احضار مطربة عربيه او خليجية مبلغ 10 ملايين وسياره اخر موديل وذهب وافخم فندق وهو اجرها بالحقيقة لا يتجاوز 170 الف دولار لهذه الحفله
ولكن يغدق عليها بالعطاء على حساب غيره من البشر لغرض ما فهن مكمن المشكلة
جميع تجار السعودية بلا استثناء تجارتهم انطلقت من هذا الوطن فلماذا هذا البخل في بناء المراكز العلميه والمراكز الاجتماعية ...!!
ليش بعض اصحاب المال يعيش حياته في فساد وترف ولما يمرض او يقع في وعكه صحيه تبرع للفقراء وزوج كم شاب وشابة واصبح يطلب ماهو عند الله
ولكن احسب تاريخه بتلاقيه نصب على فلان وعلى فلان واكل مال فلان ونهب فلان وكان سبب في وفاة فلان وطلاق فلان وتشريد فلان الخ الخ الخ سنوات سنوات من الظلم والطغيان وبالاخير بمجرد ما يمرض يزهد في الدنيا ...
تجارنا اليوم يحبون قلم الذهب او القلم المرصع بالالماس وشماغ اخر موديل وسيارة بنتلي اخر موديل ولازم يكون السواق السياره بشرة كذا وكذا او من الجنسيه كذا وكذا
ولازم لما انزل يكون في كم نفر من السفهاء والمهايطيه حولي ولا تنسى سماعة البلوتوث مش فاضي احط الجوال بأذني وارد
في فترة الشتاء الماضية اتصل بي احد رجال الاعمال المشهورين يقول لي يا ابوفلان انا بروح للخفجي انت موجود ..!!
قلت نعم موجود بس عسى ماشر في شئ اقدر اسويه لك بدون حضورك قال لا بس حاب اخذ الاهلي معاي لجوله من الرياض الى الكويت ...!! قلت له ليش ماتاخذ طياره اريح لك قال لا ابي اتجول ..!
المهم كلمت احد الاصدقاء وطلبت منه استئجار استراحة له في البر وهي ماشاء الله عليها موفر فيها كل شئ وفي اعلى مستوى بحكم الشخص القادم مع عائلته من رجال الاعمال
المهم اتصلت به وقلت له يا ابوفلان انا جهزت لك استراحة الجو شتوي وحلو تقضي فيها انت والاهل يوم او جزء من اليوم لو حبيت
قال مشكور المهم التقينا وذهبت به للاستراحة وكانت جاهزه من مجاميعه
وبعد المفطح كما يقال سئلته ليش مكلف على نفسك وجاي بسياره ...
وصار يضحك ويضحك ويضحك ويقول لي وش بلاك اليوم انت ....!!!
كل مره تسئلني يا اخي انا حر بشر حالي من حالك اروح بطياره بسياره بصاروخ اروح بناقة بمشي بكيفي وش فيك كل مره تسئلني وكأني زبده ...!
بصراحة احرجني برده ورجعت لوعيي من جديد فقلت اي والله وش فيني انا عاد اذا هو رجل اعمال لازم يمشي على قطن
فعلا ربما تكون هناك امور يتناساها الفرد فينا في لحظة غفله
ولكن ربما ماجعلني اردد سالفة الطياره هو لان هذا الرجل بالاساس طيب ورجل محترم جدا وفوق هذا وذاك انه رجل فيه من الدين الكثير وهذا مايحببك دائما في الناس حينما يكون فيه دين مو شرط يكون مطوع
على العموم طولت عليكم بهالمقاله ولكن اعتبرها على قولت بعضهم ( سوولافه )
ولكم التحية والتقدير
المواضيع المتشابهه
العرض العادي
