بسم الله الرحمن الرحيم
من سنين طويلة و أنا أمتلك عضويتي في هالمنتدى الشامخ و الصرح المميز لأهالي الخفجي
أجي و أتابعكم و أقرأ أشياء كثيرة منها اللي يعجبني و منها اللي مايعجبني
الرائدية هذي الأيام كبرت و صارت محل أهتمام كل الناس بالخفجي حتى اللي يسوّون فيها ثقل تلقاهم يتابعونها
بس يكابرون و يسوون فيها مادرينا عن الرائدية
ماهو هذا موضوعنا
موضوعنا ثانوية البنات الثالثة
ومدري ليه صايرة مشاكل هالبنات هاليومين أكثر من العيال
هل تغيـّـروا بنات هالجيل ؟؟ أو أن الطاقم الإداري ماعاده زيّ الجيل الذهبي اللي كان موجود من أول ؟؟
وماعاد فيه متابعة ولا إهتمام و لآ أمانة ؟؟
والله الواحد ماعاد يدري
اليوم رحت آخذ بنتي من الثانوية الثالثة
طبعآ بنتي آخر سنة بالكلية و مرسلينها تطبّق في الثانوية الثالثة اللي بالغربية
و من أول ماركبت معاي قامت تسولف لي سالفة صايرة للبنات اللي يطبـّـقن من الكلية بالثانوية اليوم الصباح
تقول لي:
أن في الثانوية غرفتين للمدرّسات وحدة في الدور اللي تحت و الثانية في الدور العلوي من المدرسة
اللي تحت مخصص للمدرسات القديمات بالمدرسة
واللي فوق مخصص للمدرّسات اللي جدد و توّهن مكملات السنة و السنتين بالتدريس رسميآ
تم تقسيم الطالبات اللي من الكلية ( مدرّسات المستقبل ) إن شاء الله إلى قسمين
قسم يصير مع المدرّسات اللي تحت و القسم الثاني يصير مع المدرّسات الجدد اللي فوق
طبعآ بنتي مع القسم اللي حطّوه فوق مع ( مدرّسات أم سنة و سنتين )
تقول يوم البنات طلعوا للفسحة اللي هم طالبات الثانوية رحنا نبي نريّح في غرفة المعلمات اللي حطّونا فيها
شوي و تجينا وحدة من المدرّسات الرسمية بالمدرسة و كانت من الأساس جايّة زعلانة : أطلعوا برّآ أنتم ( مو رسميات )
و قامت ترددها بصوت عالي لين سمعتها كل المدرسات اللي بالدور العلوي من المدرسة
طيب وش المشكلة وش اللي صاير ؟؟ محد يدري !
اللهم أنها تبينا نطلع برآ
قالت طبعآ بنتي
قالت لهم وحدة من خويّـاتنا فيه وحدة من زميلاتنا مريضة و نخاف عليها من البرد و الجوّ اللي زيّ ماتشوفون مع الصبح
و ماهو على كيفك تطردين المدرّسات اللي جايّـات يطبـّـقن و لكن مامن فايدة
الأكيد أنها صارت لجة و صجة و تم طرد بنات الكلية ومن ضمنهن بنتي إلى خارج الغرفة
قلت لها طيّب مافيه مديرة ؟؟
قالت المديرة اليوم ماداومت
قلت بنفسي هلا هلا هذا موضوع ثاني
طيّب مافيه أحد يحلّ محلها ؟؟
قالت فيه بس قالت أنا مالي دخل و غرفة المدرّسات و بكيفهن يطردون اللي يبون و يتركون اللي يبون !
طبعآ سألتها ببراءة طيّب وش سوّيتوا ؟
قالت جتنا مدرسة كبيرة و قديمة بالمدرسة قالت تعالوا لغرفتنا اللي تحت و اجلسوا
قلت ياسبحان الله فعلآ ماينتعوّض الجيل الأول ولو يصير اللي يصير
وقالت لي أسم المدرّسة اللي قالت لهم تعالوا عندنا تحت ( ح . ز )
قلت الله يخليها لعيالها بس
أنتهت سالفة بنتي
و بدت سالفتي أنا
مثل هالتصرّفات وش الحل معها ؟؟ أو وش دوافعها ؟؟ أو وش نسوّي معها ؟؟
يعني بناتنا يروحن للثانوية عشان يطبّقن ماتعلـّـمنه في الكلية و يواجهونهن بالأسلوب هذا
و من من ؟؟ من مدرّسات مالهن أكثر من سنتين بالتعليم ؟؟
أحب أشكر الأستاذة ( ح . ز )
و بالمرّة اشكر مديرة المتوسطة السادسة ( ف . ش ) على تعاملها اللي تسولف فيه كل بنات الخفجي من روعته
قلت يابنتي شوفي
دايم الشتا لآ قرب يدخل تنتشر الأمراض
فيه أمراض نفسية و فيه أمراض جسدية و فيه أمراض حيوانية محشومين
يعني مالي إلا الله ثم منتدى الرائدية أنقل كلامك و كلام خويّاتك من خلاله وإن شاء الله يلقون لنا حلّ
و تذكرت الشاعر اللي يقول
كل شيّ يمكن علاجه ** حتى لو جن البقر
لكن احنا مشكلتنا ** أصلها جنون البشر
نشوفكم على خير ,,
المواضيع المتشابهه
ثانوية البنات الثالثة و بنات الكلية من المسئول ؟
العرض العادي
