--( زهور متناثرة .. من بساتين الحياة )--

[الدووووخي]

ياحادي الحلم .. .
عندي مانقص [ قدرك ] ،
في البال تبقى /
وهـ النسيان ..
مو حولك !

لازلت واقف بـ وجه الريح ..
و ( أنتظرك ) ،
لو كنت عايش شعوري ؟
طحت ،
من .. . طولك !






إفترقنا ..
وإنقطع حتى السلام !
إنت متغيّر علي من ..
جيتهم ،
أدري مو منّك حبيبي هـ الكلام
[ خرّبوك ] !
الله يخْرِبْ بيتهم :
من يفسر حلم تاليه " الخصام " ؟
ليتني مانمت .. .
وإلا ليتهم !
طيّحوك شلون من عيني ؟
- حرام ..

كل جروحي النايمه /
صحّيتهم !
السما صدري يا أسراب الحمام ..
يا حسافه .. طرت ،
من طرّيتهم !
ألفظ أنفاسي ..
ويخنقني [ ملام ] :
هم هذول !
إللي علي بدّيتهم ؟
السنين عجاف وأيامي ~ سقام ..
________ و الدموع [ تطيح ] ما ردّيتهم ،
كان حلمي .. لابس ثياب الظلام /
________ وأدري مو واقع .. . وما حبّيتهم !

كان حلمي .. طفل في حزة فطام ،
________ وداخلي أشياء لك .. خلّيتهم !
كان حلمي .. إنك تخون الغرام !
________ وإللي أكره [ طبعهم ] ، أغليتهم !
كان حلمي .. يوم عن مليون عام :
________ والثواني < تشِيب > لو / عدّيتهم ..

كان حلمي .. فيك يا عالي المقام ،
________ وقمت أخاف الحلم يخْرِبْ بيتهم !
كل من بـ قلبه شقى الليله ينام ،
________ إلا أنا .. عيوني عليك ~ أبكيتهم .

إنت إيدك " كريمه " ماترد الطعون /
وآنا قلبي يردد ... { المسامح كريم } :
تدري ماكنت أحاتي لاتطيح العيون ،
خوفي لاتطيح منْها إنتْ والله العظيم !

[الدووووخي]

هذي الرساله لك من القلب للقلب
عسى دروبك .. تمتلي ( خير و ورود )
غيّرت إسمك ياحبيبي من : الحب
خلّيته ، غير الناس كلْهُم [ دهن عود ]

:

بخير عايش و أحمد اللـه ~ طيّب ،
__________ من وقت مازارتني أحلامي السود . .

يرعبني < كابوس > الفراق ، ويهيّب . .
__________ أصحى ألتفت . . وأتمنى ألقاك موجود !

إنت [ المدينه ] في عيون الغريّب . .
__________ ولما أشوفك فرحتي مالها حدود !

ليتك مثل ما < غبت عني > تأيّب ،
__________ لأني وعدت القلب - أيام و تعود .

أخاف راسك من غيابك " يشيّب " . .
__________ تعال لي ، وكلّي لك سهود ومهود .

مو كل [ قريّب ] ياحبيبي .. قريّب :
__________ عندي على ماأقول إثبات وشهود !

منت الحبيب الأوّلي يا { حبيّب } ،
__________ لكن ~ أحس القلب ، مجنون بك زود . .

خيّب ظنون " العاذل " | ولا تخيّب
__________ ظنّي | وأنا اللي فيك بالحيل محسود .

حُبك تعتّق داخلي وصار ( طيّب ) . .
__________ وتلومني إن قلت لك يا [ دهن عود ] !

[الدووووخي]

دارت الدنيا وتبيني [ أعذرك ] !
______________ نامت عيوني وعينك > ساهره

إنت لي ماضي ومابي .. أذكرك
______________ و الغلط وياك ... ماني مكرره

قلت لك إحذر غرورك يكسرك
______________ ومن يحبّك واجب إنت تقَدّره

قبل لا تفكّر تهاجر ب أهجرك
______________ وعدّني غيمة حنان .. مهاجره

مثل ماجَمّعتك أقدر أن ث ر ك
______________ يعني راسك لو رفعته أكسره

كنت لك مثل المواني ~ أنطرك
______________ لين طاحت من عيوني الباخره

لا تظن أبكي عليك وأخسرك
______________ إللي مثلك ( لازم ) إني أخسره

يا القليل الباقي طاحوا أكثرك !
______________ في بحر - دمع العيون - الطاهره

أبقى أكبر شخص مر ب ناظرك
______________ وتبقى أصغر <~ من نويت أكبّره

في فراقك ماحزنت آآبشرك :
______________ وكانت الفرحه معاك مسافره !

كيف ألوّح لك وأجبُر خاطرك
______________ وإنت إحساسي مكسّر خاطره

أشكر أعدائي كثير ~ و أشكرك
______________ من سبايبكم .. فقدت الذاكره .

دارت الدنيا وتبيني [ أذكرك ] !!
______________ شفت منّك خير لأجل أتذكره ؟

إكتب الشطر الأخير بـ دفترك ،
______________ القلوب البيض .. جداً نادره !

[الدووووخي]

تدري وشْ حطّم غيابكْ
مرْكَبْ بداخلْ شعوري

منْ نسى قلبكْ .. حضوره
قلبي ما واجَهْ / شعوره
عندي ما بـه شي ضروري
فاقد إحساسْ الأماني
لا مراسي لا مواني

وصارتْ الدنيـا / قسى !!
وصار دوري..
أعشق أنواعْ الأَرَقْ ..
وألفظ أنفاسْ الغَرَقْ
وصوت معناه الخَطَر
وقلبْ ميّتْ / يحتضر

منْ غيابكْ السلامه
فيها قلبي ما رسى
لا صباحي هو صباحي
ولا مسا قلبي / مسا

يا حبيبي في .. غيابكْ
إختلفْ شكلي ولوني
صرتْ أنا إنسان / ثاني
والسَهَر تعّبْ عيوني

والسؤال اللي ذبحني :
- صج اهو فعلاً نسى ؟
راح وأهداني الأسى!
وما وصلتْ إلا لـ حقيقهـ :
الجفـا أسْهَلْ طريقـهـ
للقسى..!

[الدووووخي]

الإهداء إلى الصديق :
- سابح دهام .

من يا صباح الخير عـ الحقد صابح
بعض الوجيه الصبح : ماهي مُريحه

صرت أفقد أعدائي بـ رغم المذابح
هُم في حياتي صاروا أكثر ، شريحه

مثلي .. ليامنه خسر .. تم - رابح
ومثله وهو ربحان : يشعُر بطيحه

ياصاحبي آحس فـ القلب : كابح
راحت على وين الوجيه الفليحه ..؟

أشياء صارت عيب والله يـ " سابح "
في مُجتمع مابه [ أسامي صريحه ] ..

مذبوح ~ وإلاّ - صير غدّار / ذابح
و اللي على النيّه .. يكون الذبيحه

في غيبتي ، لـ كْلاب قامت تنابح
اللــه يبلاهم في ~> أكبر فضيحه

[الدووووخي]

مات قلبك وآنا أبيك تكون ~ حي ،
من كتب فرقاك في الصفحه الأخيره ؟

قصتي المفروض تتركها [ علي ] !
مو على كيف الفراق يكون خيره !

كنت لك مثل الغريب و إنت لي :
الحياة / الناس / يعني كنت ديره !

صرت مثل إللي فقد له كل شي
ضاعت أحلامه عشان عيون غيره

ماعرفتك ! وشفتك مثل : ريم الفلا ،
الكبر شين .. وإلا نور عيني ~ بخيل ؟

إي عرفتك ! حبيبي الأولي { يا هلا } ..
مرحبا فيك من بعد الغياب الطويل ،

فاتك الفوت ولما فات ، صوتك علا ..
لا تنادي المحبه { رجعتي } مستحيل !

ماتفيدك حلاتك .. ما يدوم [ الحلا ] ،
ليت روحك جميله دام وجهك جميل

قلت لك ياتحبْني حيل ~ وإلا - فلا
إللي مثلي ( أناني ) مايحب القليل

إنت هَمٍ { ثقيل } ومن حياتي إنجلا ،
صرت هَمْ بحياتك وأدري همّك ثقيل !

دايم اتقول ~ إنك ( غير كل الملا ) ..
وآنا قايلك إني شخص ماله : مثيل

الدليل : إنه قلبي ~ في غيابك سلا ،
يوم غيري عيونه من فراقك تسيل !

إنت غلطه بحياتي في [ كتاب الغلا ] :
مامحيتك ولكن .. منجبر ع الرحيل

لا هلا ترد { قلبي } لا ولا مسهلا
شفت قاتل بعمرك يرضى عنْه القتيل !

رحت عنك وباقي لي أثر و البلا :
أدري دورت مثلي وما لقيت البديل ..

ماطفت ناري .. من أعذارك ( أبد )
لا تحاول إني أرجع لك ~ وأهدي

فوق شينك / عينك تخون الوعد !
غلطتك في حقي لا يمكن تعدي

ماني ناقص جرح من إيدك بعد
كل شي .. يصير لي ما كان ودي

فيه غيري - وفيه غيرك : فـ البلد
مو معاي تكون يعني إنت ضدي

لو أعد جروحك أخطي بـ العدد
ولو تحس شوي ما بيّحت سدي

روح دور لك .. على غيري .. أحد
دربك إللي جابك لــ عندي يودي

{ خالد } { محمد } وناصرْك وسعد
عندهم قلبك .. مثل ~ ماكان عندي

ما إعجبك ردي ! ومن يزرع حصد
بذمتك ~ وش كنت ؟ تتوقّعْه ردي

منت قدي !! .. روح عني ~ وإبتعد
فكني من جرحك لأنك منت قدي

لا كبرت وشفت نفسك ( مستعد
للمشاكل ) إرجع / ونبدي التحدي

[الدووووخي]

.......... قومي : نامي .
لي متى ! , تقري | كلامي ؟؟

ماتعبتي من " السهر " ؟!
يـ الله
قدامي

وإلا ( لأ )

ما أبي – قدامي !
أبيك { تتغطي } بـ جفني
و / بـ عيوني . . . تنامي

كل شي " فيني " , يهمك
أدري
ودّك ~ كل لحظه ~ آكون : يمّك :
يـ إللي | إسمك |
غير .. عن كل - الأسامي !

تاخذين ( القلب ) منّي ! و تاخذيني !
وإنتِ < فيني >
شلون لو ودّي / ألمك ؟؟
قومي نامي ......... .
إسمعيني ,
مايطوفك " شي " لا نمتي بـ :: عيني

من متى ؟ وعيوني [ عنّك ] .. صايمه
..................... من متى ؟ وإنتِ ( تبين ) و ~ ما تجيني !!

يا " حمامة بيت " فيني , حايمه
..................... أفقدك ... دايم ... وأدري ! - تفقديني

صرت أحس . . . ! إنك ( مشاعر دايمه )
..................... مهما غبتي بـ / المسافه ؟؟ : تسكنيني

لو تجين أجوائي ؟؟ صارت [ غايمه ]
..................... تجمعين << إحساسي فيك >> و ~ تمطريني

إحلمي بـ . . . الحُب . . . | طفله هايمه
..................... و إن صحيتي ؟؟ تسبّحي بـ ( دموع عيني )

موتي فيني .. دام عشتي ! : ضايمه
..................... وعيشي عمرك ... يا حياة ... القلب { فيني }

يـ الله نامي .... . لك ( عيوني ) عايمه
..................... إنعمت , عن [ شوف غيرك ] صدقيني !!

راح ’ أغَمّض ’ طول منتي – نايمه
..................... و " السهر " موضوع بين / العين و / بيني

يا { صباح الخير } و إنتِ :: قايمه ::
..................... هو صباحك ليه يفرق ؟؟ علميني ..!

يا بعد قلبي , و كل من لايمه ,
..................... تصبحين بـ - خير و أكثر " تعشقيني "

النوم | ميّت عليك | و ماخذا ~ ديّه .
و أحلامك ؟ , ليا " سهرتي " تكون ( ولهانه )

{ وجهك } مثل – عيد و البسمات – عيديّه
فديت ! نظرة " عيونك " و إنتِ / نعسانه

أقول ( عاديه ) . لكن منتي : عاديّه !!
ملآك , نازل عليّ في صورة , إنسانه

نامي , , , وتشوفين أحلى أحلام ’ ’ ’ ورديّه
النوم < سلطان > و إنتِ ؟ [ بنت سلطانه ]

[الدووووخي]

تدري وش صار بغيابك..؟
غاب [ شاعر ] أحتريه
الوطن : يبكي عليه
والورق : مسكين ضاق
والقلم : يفقد إيديه
عاجز التفكير فيني
يلقى حلٍ للفراق
الزمن مثله زماني
والدقايق هي دقايق
والسؤال اللي جرحني
وين فايق وين فايق
وين فايق..؟
ليه ما يكتب قصايد
وين فايق..؟
ما نشوفه بالجرايد
وين فايق..؟
نفقده بالحيل / وايد
صج هو راح العراق..؟
وش يسوِّي ليه راح..؟
وين فايق..؟
ما تعب صوتي ينادي
صرت مُزعج صرت هادي
وفجأه قلت: بصوت صارخ
" فاااااااايق "
وأسمع جراح
راح صوتي
والصدى يرجع .. سكات
مَنْ تُنادي ؟؟ لا حياة
كم أسيرٍ جو رفات
مات....
ومات....
مات....
ومات...
لحظه لحظه منهو مات..؟
صرت أحس الإختناق
يعني فايق ما رجع؟
ليه يا حظي وجع
قلبي دقاته سباق
مِن خبر موته فجع
وهذا آخر شي صار
مات
فايق في العراق !!

[الدووووخي]

:

تدري وش ناتج غيابك ؟
زادت بـ قلبي الهموم !
[ الفَرَح ].. عنِّي مسافر
وحزني ضيفي كل يوم
صرت أسأل
صرت " ضايع "
حلم هذا أو حقيقه ؟!
كنت شاري وإنت / بايع
به مثل هـ الضيق ضيقه ؟!
عطني من وقتك / دقايق
شوف وش فيني
و روح !
يا حبيبي حيل ضايق
حس مرَّه بـ الجروح
يعني جرحي ما يهمِّك ..!؟
وعادي عندك لو [ أضيق ]
إنسى إنَّ إسمك .. حبيبي
صير لي عون وصديق
ليه قلبك .. ما يبالي ..؟
وقلبي " محتاجك " يبيك
إنتَ عندي شخص غالي
تكفى لا تصدمني فيك
ما بقى لي شخص / غيرك
وإعتيازي لك .. تعب
إيه محتاجك وشوقي
نار وغيابك " حطبــ " !

:

[الدووووخي]

حقوق إنسان ،
وأطفالٍ نردد داخل الطابور :
[ تحيا الأمة العربية ] .
/
/
[ تحيا الأمة العربية ] :

ولا تحيا سوى الأحزان !
إذا كنا نبي نلعب . .
ركضنا داخل البستان
ونكبر دون ما ندري عن الحرمان !
عن المعنى الحقيقي لكلمة : الأوطان
/
/
نسمّي دون ما ناكل . .
نخاف نموت !
ومن منكم ما يخاف الموت ؟
يموت اللي يروح المسجد يصلّي ،
ونصلّي أحيان :
[ تحيا الأمة العربية ] .
/
/
[ وين الأمة العربية ] !

عن المسجد
نقول اللـه أكبر كل لحظه ،
ونستشهد قبل ما نسجد . .
كان ياما كان في مثل الزمان ،
مدرسه وأطفال ناقصهم حنان !
كثير أموات في غزه ،
وقليل أكفان !
/
/
مثلكم دايم نردد :
[ تحيا الأمة العربية ]
[ تحيا الأمة العربية ]
ومتنا من سبب ( تحيا . .
. . هالأمة ) وأخرس الشيطان .






إيه يا فصل ( الإهانه ) و البرود ،
___________ المطر . . طق المطر من غير حزّه !

تلعَب الأشبال في ساحة أسود . .
___________ يا طهر أرواح تتساقط ~ بـ عزّه

الغضى : يشبه رصاصات الجنود ،
___________ وريحة البارود ، هذا جو { غزّه } !

شفت ساقي الورد في إيده قيود . .
___________ ودمعة الأطفال موقف وإستفزّه

جاه جندي وقال أحس إنك : حقود
___________ ما خذيت من العرب إلا [ المفزّه ] !

لو يغز الشوك شخص من اليهود . .
___________ نحرق { البستان } و كل اللي يعزّه !

( الوجود ) .. إنك تصير : بلا وجود ،
___________ مافهمت الدرس ؟ والساقي يخزّه . .

{ لك حدودك } بس أنا مالي حدود ،
___________ وأي مُسلم يوقف بدربي أهزّه !

من رفعت الراس يا ساقي الورود ،
___________ نزّلوا راس العرب : بــ أطفال غزّه . .
___________ نزّلوا راس العرب : بــ أطفال غزّه . .
___________ نزّلوا راس العرب : بــ أطفال غزّه . .
___________ نزّلوا راس العرب : بــ أطفال غزّه . .

تعليقات الزوار ( 14 )