!!..الركــادة .... ثم الركــادة ... ثم الركــادة ..!!

فقدته · 20-09-2010, 02:55 PM

:

" بسم الله الرحمن الرحيم "
.
..
....

[] السلام عليكم ورحمة من الله وبركاتة []

.....
..
.

اسعد الله اوقاتكم بكل خير

"

!!..الركادة .... ثم الركادة ... ثم الركادة ..!!

"

[ اخواني الاعزاء اعضاؤنا الكرام ]
.....
..
.

ارجعوا .... ورا شوي .. وشوفوا .... الامور من بعيد ..شي سهل ... اني اسب كل شي ...
واقول كل شي غلط ... نظام الصياح وكل شي وع ماراح
يوصلنا لحل المشكله ..!!

اذا الاداره غلط والمدرب غلط واللاعبين المحليين غلط والاجانب غلط ..
اجل خلونا نترك النادي ونشوف نادي ثاني ..
ولا نروح للرئاسه نقول بدلو نادينا وعطونا نادي بإسم جديد ..!

نظام [ مارأيت منه خيرا قط ] ياليت نبتعد عنه ... لان اهم خطوات الحل .. هو تحديد المشكله ..!!

شي سهل نقول المشكله هي كل شي ..
لكننا في الاخير ماراح نحل شي .. لاننا ماراح نعرف من وين نبدأ ...

المشجع النصراوي صاير مثل اللي يتشكى من راسه وعظامه ووجع بطنه ورجليه ..
ويبي كل مرض يعالجه دكتور لحاله .. ويبي يعالج كل جزء فيه ... مع ان السبب في الاخير
تلقاه مجرد .... [ جرثومه في المعده ] ..... هي اللي جابت له كل هذا ...!!

المشجع النصراوي .... لازم يتخلص من نظام
[ ان اكثر واحد يصيح ويسب هو المشجع النصراوي الحقيقي ] ..
لانه ....
لازم يكون هو السند لاداره .... النادي في .... توجيهها ....!!

نظام توقع الفشل ترا سهل جدا في النصر .. وقلت لو كل واحد ينتقد في النصر شي .. كلنا في الاخير بيطلع صح علينا ... اللي بيسب الحارثي بيطلع يقول ماقلت لكم .. والسهلاوي
نفس الشي .. والمدرب .. وكحيلان .. والاجانب ..
وحتى الدويش طلع صح عليه مع محمد عيد .. وكلنا طلع صح علينا ...
يعني ترا مهب شي وااو اننا انتقدنا شي في النصر وفشل ....!!

.....
..
.

" النصر تعادل مع التعاون .. والنصر تعادل مع الفيصلي .."

.....
..
.

هل تشوف ان لعيبتهم مثل لعيبتك او احسن مننا ...!؟ .. اداريا وماليا احسن مننا ....!؟

اذا ايه فياليت نسوي حمله مطالبات بالتعاقد مع لاعبين التعاون والفيصلي ..
واذا لا .. فمعناها ان الخلل .... ماهو مجرد لعيبه .. لان غير ....
معقول ان هالفريقين لعيبتهم
افضل مننا ...!؟

.....
..
.

البعض من اللي يسبون كل شي ... يستشهدون بمباراه الاتحاد والاهلي ...

والهلال والغرافه ..

مع ان هالمباراتين هي اكبر ادانه لاصحاب نظريه ان فيه اجنبي خارق يسوي كل شي للفريق !

في مباراه الهلال والغرافه ...
شفنا ... نجوم ... المنتديات ... النصراويه ...
اللاعبين اللي... امتلت بهم صفحات .... المنتديات لما تجي
سيرة الاجانب .....!!

" انهوووو كليبرسون .. ياربااااه يالسفاااح .. اااه جونينهو لقطوه لقطه .. ليت النصر جايبه .. "

في المقابل ...
الهلال يفتقد لنجمين كان النصراويين يقولون هم اللي شايلين الهلال .. رادوي وويلي ..!!

وشفنا مباراه بين فريق اجانبه محرولين ..
مايعرفون يمشون خطوتين بالكوره .. اللي هو الغرافه ..
والهلال طقطق عليهم بدون ويلي وبدون رادوي وجاب ثلاثه وضيع مثلهم ...!!
طيب مهب المفروض ان الهلال يتمسخر بدون اجانبه والغرافه ..
ياكلهم يالاجانب الخارقين ..
حقينه...!؟

اخرتها كل اجانب الغرافه
طالعين يفحون متعودين ... على ملاعب السداسيات في قطر ... ويوم جو هنا انكشفوا ..!!

.....
..
.

وقبل ... مااروح لمباراه الاتحاد والاهلي ..!!

ابي اسجل بس انتقادات النصراويين على المدرب والاجانب ..
واستشهاداتهم بغيرهم ...!!

اول شي انتقاد زينغا وانه مدرب سيرته الذاتيه فاشل وماقد نجح ....
وهذا طبعا تجني كبير .. لان المدرب ماله الا عشر سنوات ودرب ستيوا بوخارست
واخذ معه الدوري الروماني .. ودرب فريق بلغراد الصربي
واخذ معهم الدوري والكأس في سنه وحده ..
ودرب فريق باليرمو في الكالتشيو الايطالي ..
وفي المواقع العالميه حاصل على اشادات من كابيلو ومن مورينهو ..

على فكره
.. انا ماقول انهوووو زينغا ... لكن بس اذكر حقائق ..
لان البعض مع الهزيمه يحب يتغاضى عن هالحقائق علشان تضبط معه السب والانتقاد ..!!
ولعيبة النصر رومانيين واحد منهم دولي سابق وشارك في مباريات التشامبيونز ..
والثاني دولي ولازال وشارك مع المنتخب في يورو ٢٠٠٨ ....
والمدافع استرالي دولي محسوب كآسيوي ..
وجيمعهم اعمارهم بين ٢٦ و ٢٨ سنه....!!!!!!!!!!!!!

.....
..
.

طبعا الاتهامات من الجمهور المعصب ..
هو ان زينغا مدرب سيرته فاشله ومشكلجي.. والاجانب فاشلين وزينغا ( الايطالي )
جايب هـ ( الرومانيين ) سمسره لان زوجته
رومانيه ..!!

.....
..
.

... طيب خلونا نروح لمباراه الاتحاد والاهلي ...

.....
..
.

فاز الاتحاد واللي جاب الاهداف اجانبه البرتغاليين ..
وطبعا نص الموضوع راح مدح في الاتحاد وشوف الاجانب وش يسوون ومن هالسوالف ..
اللي بذكره ان مدرب الاتحاد هو المشكلجي مانويل جوزيه ..
جاي من الدوري المصري .. وقبل مايجي للاهلي المصري ماسبق انه حقق بطوله .....
دوري مع اي نادي دربه ..!!
وانجازاته في بطولات الدوري كلها صنعها في الدوري المصري
اللي مافيه الا فريق ونص ..!!

بالنسبه للاجانب .. فاثنينهم برتغاليين وسيرتهم الذاتيه عاديه جدا ....
واخر سنواتهم كانت مع فرق مغموره .. ولاعب الوسط نونو عمره ٣٢ سنه
والموسم الماضي ماسجل الا خمس اهداف ..!!

ولا اذكر ان اي نصراوي
قد طرح اسمائهم او كان يتمناهم او كان يعرفهم اصلا .....!!
والان صارو بالنسبه له اجانب عالميين ...!!

طبعا احب اذكر ان المدرب جنسيته ( برتغالي ) ..
والاجانب اللي جابهم الاتحاد ( برتغاليين ) باختيار من المدرب ..
هالتصرف اللي يعتبرونه النصراويين خطأ اداري ان المدرب يختار الاجانب وانه سمسمره ..
بينما في الاتحاد صار تصرف صحيح وموفق ...!!
طبعا الاتحاد ابقى على لاعبين اجنبيين من الموسم الماضي اللاعب ( زيايه )
لاعب عربي جزائري ماانضم بمنتخب الجزائر في كاس العالم .. واللاعب احمد حديد .... ( عماني ) ..
وطبعا كان تصرف صحيح ..!!

والنصر ابقى من لعيبته اللاعب فيقاروا الارجنتيني ....!!
اللي صنع معظم الاهداف النصراويه الموسم الماضي وثاني هدافين الفريق ..
وصار تصرف خاطئ من الاداره ...!!

.....
..
.

طبعا لو نروح للاهلي .. بنلقى انه كان يتلقى اشادات نصراويه على لعيبته الاجانب ..
وانه جاب مهاجم اجنبي هداف الدوري السويدي ..
( النصر سبق وجاب رزاق هداف منتخبه والدوري السويدي ووصفت بالمقلب ...!! ) ..
وعنده فيكتور السفاح اللي كان البعض يتمناه ..
وعندهم عماد الحوسني اللي البعض برضو يتمناه .. وكلهم مهاجمين ..!!

واخرتها ... هزايم اهلاويه ... ومنافسه على المراكز الاخيره ..!!

على كذا المفروض
ان ادارتهم لعبت عليهم بفيكتور وهداف الدوري السويدي والمقلب عماد الحوسني ...!!

وطبعا ماننسى المقالب المحليه .. كامل المر وكامل الموسى !

.....
..
.

اللي بأوصله انك تختصر مقياس المنافسه والبطولات ........!!
بسالفه مدرب عالمي واجانب عالميين ... ثم في الاخير تكتشف ان الفرق اللي حولك
" تحقق بطولات "
بمدربين مثل مدربينك .., ولاعبين اجانب مثل لعيبتك ..!!

الهلال قبل ويلهامسون ورادوي ...
كان يحقق الدوري بلاعبين دوري شركات برازيليه .... الاتحاد جاب الدوري بلاعبين
عرب برخص التراب ....!!
ويمكن بعض النصراويين الجدد اللي مالحقو على اخر عشر سنين ...!!
لما يشوف مدح بعض الجماهير وتحسرهم على ايام تونيريو وبوسكاب وخوليو سيزار وكاريوكا وجونيور ...!!
يتصور اننا كنا ماكلين البطولات بتواجدهم !

مع العلم ان اخر بطولاتنا
ماجابها لنا الا ماجد وحسين هادي والهريفي وريان ...!!
اذا بغينا نتكلم عن ابرز لعيبه هذيك البطولات ...!!

تونيريو وبوسكاب
سجلو للنصر ٣٠ هدف في موسم واحد...!!
وتصدرو ترتيب الهدافين ...
لكن في الاخير النصر اخذ الرابع بعد ماطلع من القادسيه في المربع الذهبي ...!!

>> وانتهى الموسم بدون ولا بطوله ..!!

كل اللي صار ان هاللاعبين اضافو لسجلهم الذاتي لقب شخصي ...
لكنهم مااضافو للنصر شي ...
ولا خدموه في المباريات الحاسمه ...
لان الشق كان اكبر من الرقعه .... لكن هذا اللي مايبي يفهمه البعض ....!!!

ابو شروان على قوله واحد من الاصدقاء جانا في عز شبابه من اوروبا
وطلع مننا وهو فاشل وماعنده الا هدفين او ثلاثه .... ولما جاء للاتحاد وهو شايب صار
اسمه ( بوشاااااا ) هداف الدوري ....!!

انتم بس تخيلو لو كحيلان طلع وقال تعاقدنا
مع لاعب برتغالي اسمه نونو اسيس .. عمره ٣٢ سنه مهب دولي وجاي من فريق
غير معروف ومسجل الموسم الماضي خمس .... اهداف وصنع هدفين وشارك في ٢٦ مباراه ..!!

تبون تقنعوني ان الردود بتكون من نوعيه
( يارباااااااه ياكحيلان حققت مطلبنا ) ... ( نعممم هذا هو الاجنبي الخارق ) ..
وبتجلسون تمدحون ....!؟

ولا بتقولون شايب .. مغمور ..
الموسم الماضي ارقامه تخوف .. مهب عالمي .. .الخ ....!؟؟

.
..
....

" يـتـبـع "

.....
..
.

فقدته · 20-09-2010, 02:58 PM

.....
..
.

" اصدقو مع انفسكم ..!!! "

حسين عبدالغني جانا وهو كان مطلوب وكابتن المنتخب
السهلاوي ارجعو للمواضيع .... ايام المفاوضات والصياح علشان نجيبه ..
القحطاني .... كان مطلب جماهيري وجاء ..!!
طيب ليه ماغيرو من النصر ؟ ..

.....
..
.

خصوصا ان نظريه اللاعب الواحد مؤمن فيها كثير من النصراويين .....!!
ليه القحطاني ماشال الفريق .. وحسين ماخلانا نتصدر ...
والسهلاوي ماخلانا نفوز ببطوله ...!

ياسر القحطاني
بشهاده الهلاليين له موسمين وهو منخفض مستواه ....
ليه الهلال ماوقف عن البطولات ..؟؟

محمد نور
الان ماشارك مع الاتحاد وهذا الاتحاد ... متصدر وفاز بالديربي بثلاثه مع الرأفه ..!!

طيب بعد كل هذا ..
تعتقدون ان الخلل في اللاعبين وفي اختيارات معينه .. ولا في النادي نفسه واساسه ...؟؟!

....
..
.

النصر قبل كم موسم في احصائيه خرجت في جريده عكاظ
عن قيمه اللاعبين الاجانب اسام دينيلسون وبلاسيوس .... كان النصر هو اكثر فريق
صرف على اجانبه ..
يليه الهلال ثم الاتحاد .. وكان هذاك الوقت مافيه شركات راعيه بالملايين ..ومع ذلك كان النصر
هو افشل فريق كنتائج والاتحاد هو اللي جاب الدوري ...!!

....
..
.

الهزيمه والفوز دايما مثل الخمر تغطي العقل عن اشياء واضحه وماتخليه يلاحظها ..
الهزيمه تخليك تعصب وتفور وتسب كل شي ..
الزين والشين تسبه ..

والفوز يعميك عن .... عيوب ويخليك تفرح .... وتنتشي وتهايط ....!!

وتنسى عيوب واضحه في الفريق غطى عليها المهاجم اللي
استغل الفرص اللي ...
جت له ..!!

الهزائم وفقدان النقاط وتحطم الامال في النصر في السنوات الماضيه ....!!
خلا الجمهور يتخبط في اسباب هالتدهور ..!!

في احد المواسم كانو يحملونها لشريفي ..... وكل واحد يحط له مجموعه ....
لاعبين لو طلعو من النادي النادي بيفلح ..
وكلهم طلعو ... ولا فلح النادي..!!

في احد المواسم حملو النتايج لحسام الصالح وحركاته وكل واحد حط له
عضو شرف او عضو اداري وانه اذا راح بيفلح النادي .. وكلهم راحو ولا فلح النادي !

.....
..
.

" في موسم الهبوط وصل تخبط المشجع النصراوي "

....
..
.

الى انه اتهم العمده المشجع الاماراتي انه هو السبب .. وانه هو اللي تسبب بالنحس للنصر
ولا النصر كان بيصير مثل تشيلسي ...!!
بس الله يهديه ... العمده جاء ونحسنا .. وانه لو يروح بيفلح النادي ..!!

طبعا راح العمده الي هو مشجع العيناوي بالامارات ..
راح ولا فلح النادي ..!!!!!!

الان طلعت الموضه الجديده واللي هي .....!!
ان التصويت والتشجيع هو اللي دهور اللعيبه والنادي .....
واننا لو ماصوتنا ولاشجعنا ولا هتفنا لكحيلان في الدقيقه ٣٧ .. كان عباس حط كورتينه هدف ...
بس بسبب التصويت والتشجيع مالت
رجله وضيعها ....!!

>> الله يرحم ... والديكم ترا التصويت .... مابدا الا مع بدايه الموسم الماضي .....!!
والبعض يحاول يصور لنا .... ان الحارثي كان في قمه ابداعه بس
جاء هالتصويت وخلاه يتخاذل...!!

عموما ...
اللي بقوله ان الواحد علشان يحل مشكلته .. لازم يعرفها اول ...
وان الصياح وكل شي وع نظام مافي ...
اسهل منه ..!!

.....
..
.

النصر مشكلته الاساسيه هي انه نادي مافيه ورث ....
نادي توقف انتاجه .. كل نادي يملك جينات صنعها في فترات تأسيسه .. وصارو يتوارثونها
جيل بعد جيل اما انها تتطور هالجينات ..
او تضعف ..!!

الخيل الاصيله دايما يحرصون انها تنجب سلالات تحمل جيناتها الوراثيه ..
علشان تستمر قوه هالسلالات ... لذلك مجرد مايقولك ان هالمهر هو من سلاله الخيل الفلاني ... يرتفع سعره بالسوق ... لانهم يعرفون انه يحمل جيناته ...!

النصر صار مثل الخيل الاصيل ....
اللي ... أصبح عقيم .., فجابو له ولد ... ( بـ التبنّي ] ...
وجلسو جنب هالمهر على امل انه يصير...
يحمل جيناته ...!!

في اواخر جيل ماجد والهريفي ومحيسن .....!!!!!!!!
كان المفترض انه يتم صناعه جيل جديد .. يتربى تحت يديهم ....
لاعبين مميزين يجون وهم عارفين ان هالنادي في لاعبين افضل منهم .. لذلك لازم يثبتون نفسهم ويخلون لهم موضع قدم في صناعه تاريخ النصر .....
وياخذون جينات هاللاعبين ويستمرون بنفس النهج .. ومهما تعثرت بداياتهم فماراح
يأثرون على الفريق لان الفريق واقف على رجليه ....
وماراح يوقف عليهم ..!!

.....
..
.

وياخذون وقتهم الكافي لين يقوى عظمهم ويثبتون نفسهم في الفريق .. ويشيلونه ..
لما يجي دورهم ..

لكن جيل ماجد ومحيسن والهريفي انتهى وحنا بدينا في عصر الاحتراف ...
والانديه جابت لاعبين وجهزو للجيل الجديد .. واهتمو بفئاتهم السنيه ...
لانهم عارفين ان هاللاعبين ماراح
يدومون لهم ...!!

بينما النصر لما راحو لعيبتنا ...
اكتشفنا ان مافيه احد ... ولاعبين من طقه
( حليو ..ويجي منه ) ..
ومدربين لايمكن يصنعون لك فريق ...!! ووضع اداري ردئ جدا وخلافات طاحنه ...!!

هنا انقطعت الاجيال النصراويه ....!!
وانقطع النهج وصار فيه نصر قديم ونصر جديد .. ومرت علينا سنوات مافيها احد طلع
وحاول يصلح ويبدأ من جديد ..!!

مافيه احد حط نقطه بدايه ..
وهدف محدد .. كل الادارات جت بدت من الصفر .. وكانت ماتدري وين تمشي ..
واخرتها يرجعون لنقطه الصفر ..
بينما الفرق الثانيه خدمتهم الاجيال اللي صنعوها في فتره سابقه
وشالوهم واستمرت فرقهم زي ماهي .. وصارو يطورونهم
اكثر واكثر ....!!

اللي استمر فقط ..
هو طموح المشجع النصراوي وامله ان النصر ماتغير وانه قادر ينافس ..
وماتقبل فكره ان النصر السابق انتهى .. وانقطع ... واننا الان لازم نبدأ مع نصر جديد ..!!

.....
..
.

ادارة النصر في فترات ماقبل ادارة الوليد ...!!
.حطت جل اهتمامها في اللاعبين الاجانب .... ونست اللعيبه .... المحليين والفئات السنيه ...!!
والنتيجه كانت نجاح لمعظم اللعيبه الاجانب اللي جابهم النصر على الصعيد الشخصي ....
وفشل على الصعيد النصراوي ...!!

لان اللاعبين الاجانب سنه سنتين وبيروحون ...
لكن لعيبتك المحليين اللي صنعتهم هم اللي بيبقون .,. وهم اللي بيصنعون اسلوب الفريق
وبيستمرون عليه .. وبيصنعون مكان هادئ وصحي لأي
قادم جديد انه يبدأ ويفشل ويحاول وينجح ....
بدون مايأثر على مسيره
الفريق ....

والدليل
ان انجح فريق كان مشهور بالاجانب كان النصر ....
ولكن كان هو الفريق المبتعد عن البطولات والانجازات ... في السنوات العشر الاخيره ...

في ادارة الوليد بن بدر ... وانتهاء حقبة النصر السابق ...
واعلان بداية النصر الجديد وعصر البناء ... ارتكبت الاداره اخطاء عنيفه ... وتخبط تخطيطي واضح ... والغت جميع اهدافها وحولت جميع امورها الى شخصنه ...وضاع النصر مابين
حسام وممدوح ... وورطت النصر في قبضه ماسا ... وقلصت موارده الماليه ...
وضاع النصر مابين المدربين ... بدون اي نظره فنيه
واضحه ... او اي هدف منشود ...!!

وبعد نهايه ثلاث سنوات من الصبر ...
كان المفترض انه يتم فيه وضع اساسات للنادي .... تم تسليم النادي لاداره فيصل بن تركي ...
ليبدأ من الصفر .. كالعاده .. في وقت نفذ فيه صبر الجمهور ...
وعلت طموحاته ولم يعد يتقبل
اي اعذار ...!!

كان الأمل ان النصر اصبح يمتلك الماده ....
وارتفعت صفقات .... الثلاث ملايين .... الى ... الثلاثين مليون ..
وان الفريق اصبح يملك مدرب مميز مثل باوزا ....
صاحب توجه فني واضح ويعرف انه بصدد صناعة فريق من جديد ....!!
لكن كل هالامال تحطمت بعد اعتذار باوزا ..
مثل ماتحطمت الامال ببناء جيل نصراوي بعد رحيل فوكي بوي .. بقرار اداري احمق ....!!

.....
..
.

اللي صاير الان .. ان كل صفقه للنصر من مدربين او لاعبين محليين او اجانب ...
يتم النظر اليها كـ ( منقذ ) للفريق ... بينما في الانديه الاخرى تكون
( دعامة ) لمسيرة الفريق ...

ماعاد فينا نصير مثل ايام كينيدي لما جاء وماابدع وخذنا الدوري ...
والموسم اللي بعده ابدع واخذ الهداف وبعد
اخذنا الدوري ...!!

تماما مثل اعضاء الشرف .. في الانديه الاخرى يكونون ( إضافه ) ..
بينما في نادينا ينقلبون لرؤساء فخريين .. ويشوفون نفسهم انهم اصحاب المنه عليك ...
وان نجاح النادي مرتبط بوجودهم ...!!

في الانديه الاخرى اللاعب اول مايبدأ يكون بمستوى غير واضح واحيانا متواضع ..
والنجوم يتعرضون لفترات انخفاض مستوى وعوده ... ولكن مسيره الفريق لا تتأثر ...
. وينعون فرصه واثنين واما ان ينجحون في اخر المطاف ....
او يتم استبدالهم بدون ماترتبط نتائج الفريق فيهم ....
والامثله كثيره ..

لكن في النصر اللاعب والمدرب وكل شخص مطالب من اول دقيقه
انه يغير من تاريخ عشر سنوات من الفشل ...
وانه يحمل لنا الفرج من عنده ..!!

وهذا الشي اللي الحاصل في النصر .. وحتى في الاهلي .. بما ان ظروفهم " شبه " متقاربه ...

.....
..
.

بدأ النصر الموسم الماضي باختيار فني خاطئ لداسيلفا .... اضطرينا بعده اننا نبدأ هالسنه فنيا من الصفر .. وصار المطلوب .. هو اختيار لطاقم فني بنظره خبيره ...
ووضع ركيزة البدايه ليبدأ النصر
مرحلته الجديده ...
لكن اللي صار ان النتائج الاوليه ماكانت مرضيه ...
وهذا اللي اثار غضب الجمهور النصراوي وحس ان مافيه شي تغير ....
فصار يسب وينتقد كل شي ... وكأن فيه شخص واحد
قرر يصنع كل هالامور ...!!

السؤال المحدد اللي لازم نختصر فيه المشكله ...
ونوجهه لاداره النادي ... هل اختياراتهم الفنيه ...
كانت وفق نظره مستقبليه ....!!؟؟؟؟

وفق نظره خبيره ..؟؟ ... لكن الي نقص التوفيق ....؟!؟

احنا مستعدين نمشي في الصحراء .....
علشان نوصل للواحه .. صحيح بنعاني من الغبار والعواصف الرمليه في البدايه والحر والشمس ... لكن راح نتحمل اذا كنا راح نوصل للواحه
ونعيش الراحه ...!!

لكن قمة الغبنه .. والقهر .. اننا نمشي ..ونحدد الجهه ....
ونبدأ مسيره المتاعب والمصاعب .. ونكتشف في الاخير ان بوصلتنا كانت خربانه ....
وان كل مسيرتنا كانت نحو المزيد من الضياع ....

هذا هو السؤال الاهم اللي لازم يوجه لاصحاب القرار ....!!؟

مشكلتنا لا هي في تصويت .... ولا لاعب مالعب زين ... والا جمهور حارثي حارثي .. الخ ..!!

مشكلتنا في أساس ..
هالأساس اللي لازم يجي ويحط له حجر علشان نبدأ منه ....!!

.....
..
.

الايام بتروح .. والهزايم وخساره النقاط بتعدي ...
والليك ان يصيح من داسيلفا الدور الاول ورجع يحبه الدور الثاني ممكن يكرر نفس
الحاله مع زينغا ... لكن السؤال .. هل زينغا قادر انه يمشي لقدام ..؟؟!

.. بحيث اننا مستقبلا نصير فريق مايتأثر هل الحارثي قدم مستوى ولا لا ....
حسين ..... غاب ..... ولا ... رجع ...!!
الاجنبي ادى ولا ماأدى ..!؟؟

الهزيمه او التعادل

اكيد اننا بتخلينا نتجنى علي الجميع ....!!!

ولو ان عباس حط كورته قول وريحنا ...
كان قلنا بكل راحه ان زينغا نظم الوسط واستفاد من اخطاءه لما كان يلعب بثلاث محاور ...!!
وباقي له بس الثبات ع التشكيله وتفعيل دور رازفان وفيقاروا اكثر .. وايضا حل مشكله الهجوم وتغيير قناعته في مكان السهلاوي ....!!

كل ماحصرنا مشاكلنا وحاولنا نحلها وحده وحده كل ماتقدمنا ...
ومشينا في الطريق .. التعميم عمره ماجاب نتيجه .. سهل جدا تسب كل شي ...
لكن ثق ثقه تامه انك ماراح تحل شي ..!!

اللعب تحت الضغط .. ربكة الدقايق الاخيره ... التعامل مع العرضيات ... كلها امور كرويه
من الممكن حلها ... بوجود مدرب يعرف الاخطاء ... ووجود قائد للفريق ...
ينبه اللاعبين ... لان النصر واضح وبشده انه يفقد القائد ..
الثقه داخل الملعب مع احترامي ....
للدوخي والحارثي ....!!

المهم فقط ...!!
اننا نمشي ونصحح علشان نوصل .. وعلشان مايجي الموسم الجاي ...
ونكتشف اننا مضطرين نرجع ونبدأ من الصفر ...!!

فيه هزيمه مباراه .. وفيه هزيمه مضاعفه ... المباراه اللي استفيد منها وتعطيني خطوه للامام ...!! هذي تظل مجرد مباراه خسرت نقاطها ...

لكن لما اكتشف اني لازلت اخسر واخسر وينتهي موسم ويبدا موسم جديد وانا لازلت مااستفدت
ولا صححت .. هنا المصيبه مهب بس الهزيمه ...!!

....
..
.

تقبلوا تحياتي .... اخوكم .... ومحبكم : فقدتهـ ...!!
والله يوفق النصر ويوفقكم
جميعاً ...!!

.
..
.....

عبدالعزيز خلف · 20-09-2010, 03:29 PM

فقدته : احب اشكرك على كلامك الوقعي واللي نراه جميعنا

انا اشوف ان الاعب :

لازم يلعب لأجل الفريق مو لاجل الوناسه فقط

وهذولا لعيبتنا يلعبون وبعد نص ساعه تلقاهم بالاستراحه يعبون ((بلوت))

لو هم مفضين روحهم للكوره فقط ........!!!

كان تلقاهم هم اللي شايلين الفريق وهم المبدعين

بس الشكوى لله

وانا اشوف ان فيه مجاملات للاعبين الكبار

امثال ياسر القحطاني _ سعد الحارثي _ محمد نور _ مالك معاذ

هذولا طاح مستواهم او مشاكل مع الاداره

خلاص اذا طاح مستواه لا تلعبه

وخله على دكه الاحتياط مثل ماصار مع الشلهوب

لين رجع الشلهوب اللي نعرفه

بس حنا عندنا الاعب المشهور والله لو مهو مشتهي يلعب

خلاص الاداره تعطيه اجازه طبيه >>ترقيعه له

اتمنى ان الاعب يلعب لاجل الفريق ((((((((فقط)))))))))

وان يكون فدائي مثل >>هوساوي>>لبا قلبــــــه بس

اشكرك فقدته على الموضوع الذي يستحق النقاش

وهو : مستوى لاعبينا....!!

مشكور فقدته والله لايهينك...........!!!

المونديالي · 20-09-2010, 04:44 PM

الله يعينكم على الناااديكم بس بأذن الله النصر رااااجع بلآ محـاله
بآذن الله أنـآ اشششوف أنـا المـدرب لو يتغيــر كـان أحسسسن
وجمهــور ولآ في الخياااال جمهور الشمس
وشكر لكـ فقدتـه على الكلآم الصريح والرااائع
والله يوفق نصركم انشششاء الله.