* 29 *
يوم الاحد
وانا في الفصل والاستاذ يشرح اهتز جوالي دليل على قدوم رسالة ,,, طلعت جوالي بحذر عشان الاستاذ ماينتبه علي وفتحت الرسالة وكانت من خالد
( خالد خبر مرضي لا يدري عنه احد
تكفى مابي الخبر يوصل لخالي )
تنهدت ودخلت الجوال بالدرج ,,, يوم يغمى عليه ببيتي عيا يخلينا نوديه المستشفى الحين فهمت ليش كان مايبي احد يعرف عن مرضه ويخاف اذا وديناه نتكشف
الله عليك ياخالد كل هذا خايف على خالك ابو عبد الله ,, صح على طاري ابو عبد الله ,, خالد هالايام ساكن في البيت لحاله
اخذت الجوال وارسلت له رساله
( طيب
بس ترا غداك عندي اليوم
وياويلك اذا قلت لا )
شوي وجتني رسالة منه
( اعذرني والله
مشغول
اليوم حطيت بدر وشلته براسي
وماني فاضي )
صح وشلون نسيت ,,, مرض خالد نساني بدر وراكان والبقية
ارسلت له
( وش قررت عليه )
رفعت راسي للاستاذ وانا كل شوي اهز راسي بأيه يقالي منتبه ... تسليك
انتبهت على اهتزاز جوالي وفتحت الرسالة بلهفة
( اذا طلعت من المدرسة باتصل
على بدر وراكان واتحرش فيهم
واشوف وش يطلع معي )
قطبت حواجبي افكر ,,, يعني وشلون ,,, اخاف يتعرضون له وابو سامي مايدري عنه ,,, لازم أأكد عليه يجيني البيت منها يتغدا ومنها اراقب العملية معه واذكره بأي شي يمكن ينساه
( خلك على اتصال مع ابو سامي
وتتغدا معي اليوم غصب عنك
ومن ورا خشمك )
( يصير خير
اذا ماجا خالي اليوم
مريتك
بس ياجحش قبل شوي كان بيوقفني الاستاذ
والسبة رسايلك بس عدت على خير )
ابتسمت وسكتت عنه
الظهر
رجعت الشقة ومالقيت احد ,, ربع ساعة وجا سالم وبعده خلود وشلتها ( سلمى ومعاذ ) جايبتهم من عند جارتها
اتصلت على خالد الح عليه يجي بعد ماشفته تأخر
انا = الوووو وينك يارجال .؟
خالد = هلا خالد ,,, توني طلعت من المدرسة
استغربت صوته بس سكتت
انا = توكم تطلعون ,,, حنا طالعين من زمان ,,, يله تعال نحتريك
خالد بهمس = يله جاي
وسكرت عنه
ثلث ساعة ووصل خالد للشقة ,,, فتحت له الباب وتفاجأت من شكله
انا بخوف = وش فيك خالد ,,, عسى ماشر
شكله تعبان ,, والشماغ على كتفه وازارير ثوبه مفتوحه ,, ويسحب انفاسه سحب ,, ومتساند على الجدار يحتريني افتحله
خالد بتعب = وش فيني بعد ,, خلني ادخل مالي حيل اوقف
تنهدت بحزن ,, دايم كنت اسمع منه هالكلمة وماكنت افهم منها شي ,,, والحين فاهمها وبوضوح ,,, الله يشفيك ياخالد
ساندته ودخلته المجلس ,, وجلس على اقرب كنب وجلست بجنبه وسألته وانا عارف الجواب
انا = وش فيك .؟
خالد بتعب = صداع عادي
انا = لا تقول عادي ,,, قبل كنت تكذب علي وتقول عادي ,, الحين لا تكذب
حط يده على راسه وجر شعره
خالد بألم = راسي راااااسي ,,, آآآآه بصعوبة سقت ,,, احس راسي ثقيل ( والتفت لي ) على قد ماني مستغرب وشلون عرفت عن مرضي الا اني فرحان
قطبت حواجبي مستغرب
انا مستغرب = فرحان .؟
ابتسم خالد بس بسرعة اختفت ابتسامته بعد ماحس بألم
خالد بتعب = فرحان ,, الحين اقدر اشكي لاحد واتكلم عن مرضي وعن الي احس فيه
انا = انت اللي جبت هذا لنفسك ,,, ليش كاتمه ,,, قل لخالك قل لامك ,,, على الاقل قل لاخواتك
خالد = ماقدر ,,, حاولت بس ماقدر ,,, كل ماشافتني امي ,, قالت هلا بسندي ,, هلا بعزوتي ,, هلا بالغالي ,,, وخالي نفس الشي كل ماشافني قال انا مالي غيرك انت واخواتك ,,, تبيني بعد كل هالترحيب اقول شوفوا تراني مريض مرض يمكن ماقوم منه
نزلت راسي وسكتت
خالد = وشلون عرفت انت .؟
انا بتنهيدة = انت تعبان الحين اقولك وقت ثاني ( وقمت ) اروح اجيبلك ماء
طلعت ورحت للمطبخ وجبتله ماء بعد ماطلبت من سالم وسلمى انهم مايدخلون علينا
ولقيت خالد متمدد على الكنب ولما دخلت جلس واخذ الماء مني وجلست بجنبه
انا = اتصلت على الشلة اللي ماتخاف الله
خالد = لا ,,, بعد ماطلعت من المدرسة كنت تعبان اقولك بصعوبة سقت السيارة ,,, بعد الغدا باتصل
انا = خله بكرة انت تعبان مالك حيل لهم
خالد = لا ,, ابي اتخلص منهم باسرع وقت ,,, انا على اعصابي ياخالد ابي اروح للاستراحة الحين
بعد الغدا
وحنا نشرب الشاي ,,, طلع خالد جواله
خالد = ابتصل على بدر الحين
سكتت ولا رديت
خالد = هم اشوى انهم كانوا يراسلوني بس ماكنت ارد عليهم تصدق اخاف يشكون الحين باتصالي عليهم
انا = لا ماراح يشكون ,, اصلا وش اللي يخليهم يشكون ,, انت بس خلك معصب ويعننك تبي تهاوشهم على اللي سووه فيك
خالد = لا انا ناوي اتحرش فيهم على اساس اني معصب انهم داخلين استراحتي ,,, خلني اتصل واشوف
ضغّط خالد جواله ورفعه لاذنه ,,, شوي وجاه رد
خالد = ايه حي ,,, ليه مستغرب ,,,, اسمع يابدر التبن ,,, تحسبني خايف منك انت واللي معك ,,,, لا لا اعرف وشلون ادبركم ,,, اصلا ماني ساكت لكن شف وبلغ الي وراك ,, ان طبيتوا القصيم مرة ثانية قسم لاسوي فيكم مثل ماسويتوا فيني واشد
( كان يتكلم وهو كل شوي ويعصب اكثر وانفاسه سريعة )
خالد بعصبية = ايه اخوفك ,,,, علمتك عاد خلني اشوفك بالقصيم بس ,,,,, فارق بس فارق ,,, ايه ودي واذا كنت رجال تعال للقصيم وواجهني ,,,, هه قصدك انا اللي بحرقك ,,, اجل تعال واجهني بالقصيم ياجبان والا خايف .؟ ,,,,, اقول اذلف بس
وسكر الجوال بوجهه
انا بتنهيدة = زين سويت
خالد بعصبية = ابتصل براكان الكلب الثاني
انا = لا لا لا تتصل ,,, بيشكون كذا
خالد مستغرب = ليه .؟
انا = اصبر شوي لا تتصل الحين ,,, خلنا نشوف ردة فعل بدير وبعدها يصير خير
طالعني خالد شوي وبعدها هز راسه باية
خالد بتنهيدة = طيب
وتمدد خالد على الكنب
فجأة جاه اتصال
خالد = هه هذا بدر ( ورفع الجوال لاذنه ) وش تبي يالتبن ,,,, راكاااااان مسرع ماعلمك ولد عمك الجبان
تفاجأت توني ادري ان بدر وراكان عيال عم
خالد = ياحليييييييييييييييييك وتحسب اني ابخاف منك ,,,,,,
وطولوا على هالحال
طوال الظهر وانا ماسمع منه الا سب وشتم لهم ,,, يسكر عنهم ويتصلون ويسكر عنهم مرة ثانية ويتصلون وهكذا واذا طولوا ماتصلوا عليه هو اتصل عليهم وطوال المكالمة سب وتحدي وشتم
وعلى هذا الحال لين اذن العصر
وبعد الصلاة عيا خالد يرجع الشقة معي
انا = امش بس امش
خالد = والله خالد لازم ارجع للبيت الحين
انا = وليش ترجع البيت مافيه احد
خالد = ببدل
انا = رجلي على رجلك اليوم ,,, لا يمكن اخليك
خالد مستغرب = ليه .؟
انا بعصبية = وش اللي ليه ,,, اخاف يتعرضون لك
خالد = هم الحين بالرياض ,,, مابعد جو
انا = ولو رجلي على رجلك ,,, اتصلت على ابو سامي .؟
خالد = لا ,,, اليوم مادري عنهم هم بيجون والا لا
انا = استمر بالتحرش فيهم لين يعصبون زيادة
خالد = ايه اكيد
وطوال اليوم وانا مع خالد وجواله اللي ماسكت ابد ,,, يتصل فيه بدر ويشتمون بعض ويسكرون ,,, ويتصل عليه راكان ويشتمون بعض ويسكرون ,, واذا سكتوا عنه رجع خالد يتصل عليهم ,,,
هذا غير اتصالاته مع ابو سامي اللي متابع معه خطوة بخطوة
واذن العشا وانا معه بس ماقدرنا نتكلم عن أي شي بسبب اتصالاته ,, كل ماتكلمنا شوي قطع علينا جواله بين بدر وراكان وعلي ومرة عبد العزيز وبين ابو سامي وخاله اللي عرفنا انه بالطريق وبين اتصالات امه تطمئن عليه وبين رسايل ناصر
يعني خالد كان فعلا مشغول مع الشباب وفوق هذا كان تعبان بسبب المرض
وانا طوال الوقت متوتر مدري ليه خايف
وعلى الساعة عشر في الليل ملّ خالد منهم وقفل جواله وانسدح على سريره بتعب واضح
خالد بتعب = نعسااااااااااااااان ابي انوووووووووم
انا = خلاص ارتاح الحين ,,, راح اليوم وماستفدنا شي
خالد بتعب = بدر وراكان معصبين وحسيت انهم ودهم يجون بس الكلب علي اذب عليه وعادي كأني ماقوله شي
انا = طيب واذا جو وش بتسوي .؟
خالد = اذا جو الديرة اكيد بيتصلون علي
انا = خالد تكفى انت بس استدرجهم بس لا تواجههم وجه لوجه ,, تكفى خالد
خالد بتعب = خلهم يجون الحين ( وزفر بضيق ) لو اعرف متى بيجون بالضبط
فجأة رن جوالي ,,, القيت نظرة عليه
( ض ابو سامي يتصل بك )
انا = الووو
وتفاجأت فيه معصب
ابو سامي بعصبية = خاااااااااالد وينه ,,, ليه مقفل جواله .؟
بسم الله الرحمن الرحيم ,,, توه قفل جواله الولد
انا مرتبك = خالد تعبان الحـ
ابو سامي بعصبية = خله يفتح جواااله ,,, يوم بدا الشغل يقفله ,,, خله يفتح الجوال بسرررررررعه
انا = بس يابو سـ
وصارخ باذني
ابو سامي = اقوووووووول خله يفتح جواله بسرعة ,,, نسيتوا ان اكثر الشباب مايسافرون الا اخر الليل ,,, خله يتابعهم يله
وسكر بوجهي
زفرت بضيق ورفعت راسي لخالد وتفاجأت فيه
ماسك راسه ويئن بصوت واضح
انا بخوف = خالد
خالد يئن = راسي راسي آآآآه ,,, صدااااااااااااااع ,, راسي بينفجر رااااسي
انا = حـ ,, حاول تنام ( وقمت ولحفته ) نام خالد وارتاح
يتقلب بفراشه ويئن ويتألم
خالد بتعب = ابي انوووم ماني قادر
انا بحزن = اكلت علاجك .؟
خالد بصراخ = ماااابي ,,, ابي ارتاح ,, آآآآه راسي راااااسي
وصار يتقلب بفراشه
انا = ابروح اجيبلك ماء صحة من البقالة تاكل علاجك
بس مارد علي
طلعت من البيت ورحت للبقالة وشريت الماء ورجعت بس تفاجأت فيه نايم
او
او
مغمى عليه
مدري
بس والله صعبة اقومه الحين ,,, الولد تعبان وطوال اليوم والتلفون باذنه ومانام
ابخليه ينام شوي ,,, والله مابقلبي رحمة اذا قومته الحين
طلعت من البيت ورحت للشقة وانا منقهر ان اليوم راح وماطلعنا بنتيجة ,,, اتصل علي ابو سامي مرة ثانية وبصعوبة قلت له خالد تعبان ونايم وبعد مد وجزر وصراخ قال قومه بعد ساعة وخله يتصل عليهم
بس انا غلبني النوم ونمت
الفجر
قمت مفزوع وبعد ماستوعبت انقهرت انها راحت علي نومة ,,, لقطت جوالي ولقيت 16 اتصال من المسكين ابو سامي ,,, وانا من التعب ماقومني رنين الجوال
اتصلت بخالد ولقيت جواله مقفل ,,, افففففففف شسوات ,,, اتصل بابو سامي الحين اخاف يهاوشني او يمكن نايم ,,, طيب الشباب وش صار عليهم والأهم خالد وش صار عليه
اتصلت بخالد مرة ثانية ومقفل
قمت وصليت وبعد شوي قومت خلود واخواني وكل واحد طلع من الشقة رايح لمدرسته
اما انا طلعت من الشقة وبدل ماروح للمدرسة عكست طريقي ورحت للحارة بس بطريق ثاني عشان ابراهيم وصالح وماجد مايشوفوني بطريقهم
وصلت بيت ابو عبدالله وضربت الجرس ,, شوي وطلع لي خالد وشكله مبهذل
خالد مستغرب = خالد
انا = زين انك صاحي,,, افتح جوالك ,,, ابو سامي حرق جوالي باتصالاته
خالد = وش صار .؟
انا = تسألني .؟ ,,, اذا قفلت انت جوالك حنا مانقدر نسوي شي ,,, افتح جوالك واتصل على الشباب شف وينهم
خالد = طيب ادخل ( وفسح لي الطريق )
دخلت وانتبهت على سيارة ابو عبد الله بالكراج
انا = ابوعبدالله هنا .؟
خالد = ايه جا ,,, بس الى الحين ماشفته ,, توني قمت
انا = انت نمت امس والا وش قصتك رحت شوي للبقالة ولقيتك ,, آآآ ( وسكتت )
خالد = نمت البارح بس كان نومي متقطع ولا نمت زين
ودخلنا غرفته
خالد = ابروح اصلي
ودخل الحمام توضى وطلع و صلى الفجر وبعدها توجه لجواله وفتحه وانهالت عليه الرسايل
خالد = اووووووووووه الله يعيني على ابو سامي ,, شكل الرجال شاب ضو
انا = المهم فيه رسايل من الشباب .؟
خالد = لا كلها من خدمة موجود
انا = اتصل فيهم الحين شف وينهم
خالد = بيشكون كذا ,, فيه احد يتصل الساعة 7 صاحي انت
انا بتنهيدة = الله يستر والله اني خايف
فجأة دخل علينا ابو عبد الله واستغرب من وجودي
انحرجت منه وسلمت عليه وسلم خالد على خاله ,,, وحاولنا نكون طبيعين ,,, سأل ابو عبد الله سؤاله المعتاد لخالد وبعد ماتطمن عليه طلع وتركنا
انا = يله انا تأخرت عن المدرسة لازم امشي
خالد = اصبر ابوصلك
انا = لا ماله داعي
خالد = الا امش بس
واخذ مفتاحه وجواله ومحفظته وطلعنا وكل واحد راح لمدرسته
وطوال الدوام بالمدرسة وانا اتابع اخبار خالد بالرسايل ,,
لين اخر حصة ومافيه شي جديد ,,, يتصل خالد عليهم ويدخل معهم بالسب والكلام والشتم ويسكرون عن بعض,,, افففف مادري ليه خايف ,, الاوضاع ماشية صح ,,, ابو سامي متابع خالد بكل شي ,, طيب ليش الخوف اللي احس فيه ,, يمكن لأننا الى الحين ماندري وينهم الشباب ووش مخططين عليه ,, ربي سترك
الظهر وانا طالع من المدرسة اتصلت بخالد ولا رد علي ( تنهدت ) يمكن عنده حصة الحين ,,, انا شرعي و خالد طبيعي وحصصنا تصير اقل من حصصهم ,,, ارسلت له رساله نصها
( اذا خلص دوامكم اتصل علي )
وصلت الشقة وهالمرة خلود هي اللي وصلت قبلي ,,,
وفرحانه الاخت انها جت من المدرسة قبل اجي انا
خلود مع اني اعتبرها مثل امي باهتمامها فينا ,,, الا ان عقلها بعض الاحيان يتعطل عن العمل ,,, او يمكن تنساه بمدرستها ,,, الله اعلم لكن الحمد الله على كل حال
دخلت غرفتي وانا بالي مشغول بخالد ,, ماتصل علي معقول مانتهت الحصة عندهم الى الحين
اتصلت فيه مرة ثانية ولا رد
جلست مع خلود واخواني والجوال بيدي احتري خالد يتصل يرسل أي شي
خلود = وش فيك كل شوي تطالع جوالك ,,, فرحان فيه
انا بضيق = افففففف خلود ماني فاضي لـ
وفجأة رن جوالي ,, وبلهفة القيت نظرة
( ض ابو سامي يتصل بك )
تفاجأت ابو سامي متصل علي الحين سترك يارب
انا = الووو
ابو سامي = محتاجينك الحين تعال لمدرسة خالد تركي بسررررعة ولا تبطي
قمت مفزوع
انا بخوف = ليه وش فيه خالد
ابو سامي بعصبية = تعال انت الحين ونعلمك بكل شي ,,, بسرررررعة تعال
وسكر بوجهي
ضربات قلبي سريعة من الخوف ,,, مدرسة خالد الحين ,,, طيب وش جاب ابو سامي لمدرسة خالد بهالوقت وخالد ليه مايرد علي من اليوم ,,, لايكون صاير فيه شي ,,, ربي سترك الولد من اليوم مايرد علي
خلود مستغربة = خالد بسم الله وش فيك .؟
طلعتني خلود من افكاري والخوف مسيطر علي
انا = بعدين خلود بعدين
وطلعت بسرعة من الشقة واتصلت على ابراهيم واخذت سيارته منه وتوجهت لمدرسة خالد
وطوال الطريق وانا اتصل بخالد ولا يرد ,,, الله يستر ليه مايرد علي ,,, طوال الدوام بالمدرسة وهو يرد علي بالرسايل وش معنى الحين .؟ وليه ابو سامي اتصل علي بالوقت اللي مايرد خالد علي فيه
تفاجأت بجوالي يرن والقيت نظرة عليه ( ض ابو سامي يتصل بك )
انا = الووو
ابو سامي = وينك ابطيت .؟
انا = هذا انا على وصول
ابو سامي = المدرسة قبالها دكان تعال تلقانا متخبين فيه
انصدمت ,,, متخبين مرة وحدة
انا مرتبك = ان شـ ,,, ان شاء الله ,,, بس خالد وينه مايرد علي
ابو سامي = مب وقته الحين تعال ونلعمك بكل شي
وسكر بوجهي مرة ثانية ,,, اففففففف ليه مايقول ويريحني
دعست على البنزين اكثر وانا بالي مشغول ومرتبك
شوي ووصلت المدرسة ,,, ولاحظت بالمواقف مافيها الا كم سيارة تقريبا خمس سيارات كل وحدة بعيدة عن الثانية
وشفت من ضمن السيارات سيارة خالد واقفة ويدور حواليها واحد متلثم
حاولت ادقق فيه من بعيد ,,, عجييييب هذا مب زول خالد
انتبهت على جوالي يرن ورفعته من دون ماشوف المتصل
انا = الووو
ابو سامي = انت راعي اللومينا .؟
اللومينا سيارة ابراهيم
انا = ايه
ابو سامي بصراخ = وليش واااااااقف تعااااال ولا يشوفك احد بسرررررعة
بسم الله الرحمن الرحيم ,,,, اللهم سكنهم مساكنهم ,,, توجهت للبقالة حسب اوامر العصبي ابو سامي
دخلت الدكان ولقيت ابوسامي ومعه ثلاث رجال وكلللللهم لابسين مدني ( ثوب وشماغ )
ابو سامي بعصبية = تعااال ,, ( ومسك يدي وجرني عند باب الدكان ) تشوف المرسيدس هذيك ,,, هذي سيارة خالد حسب الوصف ,,, صح .؟
انا = ايه هذي سيارة خالد ,,,, بس هو وينه .؟
ابو سامي = تعرف اللي يدور حوالينها .؟
انا = متلثم وشلون اعرفه .؟
ابو سامي = طيب شف هناك ( وأشر على سيارة كامري واقفة برا المواقف )
دققت النظر فيها وبالشخص اللي جالس على كبوتها ,,, وشهقت
انا بخوف = هذا ,,, هذا راكان ,,, وهذي نفس الكامري اللي اخـ
ابو سامي = ايه قاعدين يحترون خالد يطلع من مدرسته
انصدمت ,,, الكلاااااااب وش هالحقارة
حسبي الله ونعم الوكيل وشلون نسينا انهم يدلّون مدرسة خالد
ابو سامي = ابيك تطلع لهم وتحارشهم بس اسمع ,,, حارشهم وبس انت لا تبدا بالهواش مفهوم عشان تصير بداية الهوشة منهم هم ,,, مفهوم خالد .؟
انا = ان شاء الله ,,, طيب واذا سألوني عن خالد شاقول .؟
ابو سامي = خالد ماهو بالمدرسة الحين
التفتت لابو سامي متفاجئ
انا = اجل وينه .؟
ابو سامي = طلعناه من الباب الخلفي للمدرسة وقلتله يروح لبيت ابو عبد الله عشان يوهم خاله ان كل شي تمام ولا ينكبنا وهوعلى وصول الحين
ابتسمت الحمد الله
ابو سامي = خالد يوم طلعناه كان واضح عليه تعبان وصعب نكلفه بشي ,,, عشان كذا اتصلت عليك ,, حاول تحارشهم بسرعة قبل يجي خالد ,,, انا ابتصل فيه الحين اشوف وينه .؟
وطلع جواله ورفعه لاذنه شوي وجاه رد ,,, قطبت حواجبي معصب ,,, انا من اليوم اتصل فيه ولا يرد والحين يرد على ابو سامي
ابو سامي = وينك ,,, طيب طيب ( وسكر والتفت لي ) بسرعة رحلهم
طلعت من البقالة وتوجهت لسيارة خالد ولقيت اللي كان يدور حوالين السيارة جالس على كبوتها
مشيت لين وصلته
انا = وش قاعد تسوي ,,, ومن انت .؟
التفت وطالعني شوي وبعدها نزل من الكبوت وأشر على اللي بالكامري يعني تعالوا
التفتت ورا وشفت راكان ينزل من الكبوت بسرعة وحرك بالسيارة ووقف عندنا ونزل منها هو وعلي وعبد العزيز ,, التفتت مرة ثانية للي عندي
انا = انت بدر .؟
راكان = هلا هلا
التفتت لراكان اللي يهلي بسخرية
عبد العزيز = هذا اللي كان مع خالد
بدر = وهو على ما اذكر اسمه خالد بعد ههههههههه
جا علي ومسك ذراعي ,,, هذا شكله مغناطيس لذراعي كل ماشافني مسكني والمشكلة شوي ويدخل اظافره
علي = وين خالد .؟
انا = مالك دخل
بدر = هالخواف مزعجنا من امس والحين مندس بمدرسته ( وفك اللطمة عنه ) رح ناده
انا = الخوافين انتم ,,, جايين اربعتكم على واحد
علي = انت شكل الضرب اللي جاك مارباك
هذا اللي ابيه
انا = ايه مارباني ربني الحين
التفت علي لبدر
علي = وش نسويبه هذا الحين ,,,, ناخذه معنا والا نحتري الخواف خويلد
راكان = وهذا وش نبيبه ,,, انا ابي اللي مزعجنا امس ,,, شكله مشتهي طعنة ثانية
بدر = انا ماخليت فيه شي
عبد العزيز = خلصونا ملينا وحنا نحتري
بدر بعصبية = بتصل فيه اشوف وينه هالكلب ( وطلع جواله وراح مبتعد عنا يكلم )
علي بعصبية = ادخل المدرسة ورح هاته ( ودفعني )
انا بعصبية = ماني رايح ,,, تبي تروح رح انت
تلفت علي شوي يمين ويسار وبعدها طالعني بعصبية
علي = والله لو الناس مب حولنا كان تعاملت معك تعامل ثاني
انصدمت وشلون يعني ,,, ماحنا متهاوشين ,, تلفتت يمين ويسار وفعلا فيه شباب شويين اللي عند البوابه واللي عند سياراتهم يسولفون
جا بدر وهو معصب
بدر بعصبية = مايرد علي ,,, بس ارسل تو يقول عندي حصة اضافية ,, لا ويهدد يقول اذا كان فيكم خير احتروني ,,, وش نسوي الحين ,,, ذبحنا الحر
علي مستغرب = حصة اضافية ( والتفت للمدرسة ) كل الطلاب طلعوا ,, معقول فيها احد يدرس الى الحين .؟
راكان بضيق = واحد يروح يشوف
فجأة حسيت بضربة على راسي
بدر بصراخ = وين خاااااالد .؟
انا بعصبية = ماااااني قايل وورني وش بتسوي
مسك علي ذراعي مرة ثانية وقربني منه بعنف
علي بعصبية = انا حاس ان فيه شي ,, الطلاب كلهم طلعوا الا هو ,,, وييييييييينه .؟
راكان بعصبية = بتعلمنا وينـه والا وشلون .؟ ( وعطاني كف )
علي بعصبية = راكان اصبر اخاف احد يشوفنا ,,, اصبر شوي
تلفتت ولاحظت ان السيارات كلهن راحن ومابقي الا سيارة وحدة واظنها للحارس لأنه قاعد يطالعنا
اففف وشلون اخليهم يعصبون اكثر انا المشكلة ماعرفهم زين ولا اقدر ابدا وامد يدي على واحد منهم حتى ماتصير بداية الهوشة مني
راكان بضيق = ذبحنا الحر ,, وهذا ماطلع
علي = انتم مصدقين انه عنده حصة اضافية
شكل علي اذكاهم ,,, الله يستر اخاف يلاحظ على ابو سامي واللي معه
بدر = سيارته هنا ,,, وين بيروح يعني .؟
علي = هذا اللي مستغرب منه ( وضغط على يدي ) بتكلم والا وشلون .؟
انا = انتم وش تبون ,,, تبون هوشة .؟ يله وش تحترون
راكان بعصبية = نحتري خالد ,,, قلّنا وينه والا بكف الحين
عبد العزيز = شوفوا شوفوا ,, هذاك مو خالد .؟ ( وأشر بيده )
التفتت وشفت خالد نازل من سيارة مكسيما ومتوجه لنا ,, وعليه بنطلون جنز اسود وبلوزة سودا
قرب عندنا وعيونه علي ,, حسيته متفاجئ
علي مستغرب = من وين جاي هذا .؟ مو يقول عنده حصة اضافية .؟
بدر بعصبية = شفت الكذوووب
وراح لخالد قبل يوصل عندنا ومسك ذراعه وسحبه بعنف لين وقفوا عندنا
راكان = من وين جاي انت .؟ مو تقول عندك حصة اضافية .؟
خالد بغرور = ولعبت عليكم
فعلا مثل ماقال ابو سامي واضح عليه التعب وصدره يرتفع وينزل بسبب صعوبة تنفسه
عصب بدر من كلمته ولصقه بعنف على سيارة خالد قريب مني
بدر بعصبية = لاطعنا بالحر واخر شي تقول لعبت عليكم
علي بعصبية = بدر اصبر شوي البيوت لها درايش
اخذت نفس متضايق من علي هالداهية ,,, يقدر يمسك اعصابه بشكل رهيب مو مثل راكان وبدر
= ليه واقفين هنا ياعيال
التفتنا كلنا للحارس
علي = لا ابد ياخال ,,, قاعدين نسولف
راكان = وليه تسأل انت والا ممنوع .؟
بدر = يحسبنا قاعدين بمدرسته
طالعنا الشايب شوي وبعدها توجه لسيارته ومشى
جا راكان ومسك ياقة خالد ولصق جسمه بجسم خالد يرصه على السيارة اكثر
راكان بصراخ = مزعجنا امس بالاتصالات والرسايل ,,, والحين تسحب علينا وش شايفنا قدامك ,,
رفع خالد يديه ومسك راسه
خالد بألم = قصّر صوتك ,, اسمعك من دون ماتصارخ
شي طبيعي المصدع مايحب الاصوات العالية ,, كيف بخالد اللي يعاني من مرض براسه
سكت راكان شوي وبعدها قرب فمه من أذن خالد وصرخ باعلى صوت عنده
شهقت ,,, الحقيييييييييييييير
جلس خالد على الارض وهو ماسك راسه
خالد بألم = أأأه لاااااا ,,, رااااسي ,,, رااااااسي بينفجر
سحبت ذراعي من علي ودفعت راكان معصب
انا بعصبية = اسلوبك اسلوب بزارين يالتيس
جاني علي ومسك ذراعي مرة ثانية
علي = لاحق على الاسلوب اللي يحبه قلبك ,,, لاتستعجل
بدر = علي فكنا منه هالبزر ( وراح ومسك ذراع خالد وقوّمه ) انت وش ينفع معك ,,, تبيني اعيد معك اللي صار .؟
راكان = ايه صح بدر ذكرتني ( وقرب من خالد ) ورني اشوف ( ومسك بلوزة خالد يبي يفك الازارير )
مسك خالد بلوزته
خالد بتعب = وش تشوف .؟
بدر بسخرية = نبي نشوف تربيتنا فيك هي نفعت والا تبي بعد .؟
وتعاونوا بدر وراكان عليه وفكوا ازارير بلوزته غصب عنه ,, واول ماشافوا الخياطة اللي بصدره وهم يبدون بالاستهزاء والضحك
بدر = ههههههههه مرقعينه
راكان = كان طلبت منهم يحطون سحّاب احسن
وماتوا ضحك عليه حتى علي اللي حسبته اعقلهم
افففففففف ليه مايضربون ويبدون بالهواش ,, ذبحنا الشمس و الحر ,,, قاعدين يستهزؤن وبس ,, والمشكلة مانقدر نبدا
خالد = والله اللي يمد يده علي والا على خالد قسم لايشوف شي ماشافه
وجا بيزرر بلوزته بس راكان مسك يده اليمنى ولواها ورا ظهره
راكان بعصبية = انت يالخواف تهدد
قرب بدر من خالد وتحسس ذراعه اليسرى
بدر = راكان انت هذاك اليوم طعنت يده هذي صح .؟
راكان = نزّل بلوزته نشوف
وتعاونوا عليه مرة ثانية يحاولون ينزلون بلوزته بالكامل حاول خالد يمنعهم بس ماقدر عليهم وجردوه من بلوزته غصب عنه
خالد بعصبية = ياكلب هات بلوزتي بالشارع حنا
مسك راكان الجرح اللي بعضده
راكان = انت مزعجنا وماخليت كلمة الا وقلتها لنا ,,, تحمل اللي يجيك
خالد وهو يتلفت منحرج = هات بلوزتي تكفى بالشارع حنا
علي بصراخ = ياجماعة مب الحين ,,, البيوت لها درايش وش فيكم انتم ,, عطوه بلوزته وخلونا ناخذهم للبر وبعدين سووا اللي تبون
اوووه هذا بيخرب علينا
انا = انت اسكت ولا كلمة
ضرب علي راسي من ورا بقوة
علي بعصبية = انت اللي تسكت مب انا
عبد العزيز = الشارع فاضي علي وبعدين ماحد عارفنا
علي بعصبية = ماحد يعرفنا بس ياخذون لوحة سيارتنا
راكان بعصبية = علي صادق ( ولصق خالد بسيارته مرة ثانية ) عطني مفتاح سيارتك
خالد = ليه .؟
رص جسمه بجسم خالد اكثر وهو معصب وطلع المفتاح من بنطلون خالد غصب ,,, وخالد ساكت حتى مافتح فمه بكلمة
راكان بعصبية = يله امشوا خلصونا ( والتفت لبدر ) وانت عطه بلوزته ( وراح يفتح سيارة خالد )
حذف بدر البلوزة على خالد ولبسها بس مامداه يزرر ازاريره الا وراكان ساحبه من يده
راكان = يله اركب
خالد بعصبية = ماني راكب وورني وش بتسوي
راكان بملل = بدر عليك فيه
مسك بدر ذراع خالد اليسرى
بدر بعصبية = اركب خلصنا ذبحنا الحر
خالد = شكلكم ماتفهمون
بدر بعصبية = انا اللي ابفهمك
ومد يده وفرك الجرح اللي بصدر خالد بعنف
خالد بصراخ = آآآآآآآآآآآآآآه
شهقت بخوف ,,, وسحبت ذراعي من علي ودفعت بدر بقوة ابعده عن خالد والتفتت له
انا بخوف = خاااالد
حاط يديه على صدره وهو شوي ويبكي من الألم
جاني علي ولف يديه حوليني
علي بصراخ = انت اركب وانت ساكت
انا بعصبية = خلني ( وحاولت احرر نفسي منه )
بس تفاجأت بخالد يتساند علي وقرب وجهه من وجهي وهو الى الحين يتألم من حركة بدر وهمس
خالد بألم = لا تركب
علي بعصبية = يركب غصب عنك
دفعني بدر وهو معصب ورفع يده وعطى خالد كف
بدر= راكان خلنا نشيله ونركبه غصب
التفت خالد للبقالة وهو ماسك خده بمكان الصفعة وبعدها التفت لي وبعدها التفت لعلي وبحركة جريئة فاجئتنا
تفل بوجه علي
سكتوا شوي يستوعبون وباقل من الثانية تركني علي معصب وهجم على خالد وطرحه بالارض وركب فوقه وماقصر بدر جا وركب على خالد بعد
وانا ماسمع الا صراخ خالد
توجهت لهم وحاولت ابعدهم عنه بس دفعني احد من ورا وطحت عليهم فوق خالد وبعدها طحت بالارض وركب راكان فوقي ,,, وبدا يعطيني من هالكفوف وانا احاول ادافع عن نفسي
ما اقدر افتح عيوني من اشعة الشمس واضرب راكان بشكل عشوائي
فجأة سمعت صوت ابو سامي واللي معه يصارخون علينا ويطلبون منا نوقف وتجمعوا علينا
وقوموا راكان عني ,,, وبدر وعلي عن خالد
جلست والتفتت لخالد ولقيته متمدد وماسك صدره الكاشف ويئن
قربت منه وجلسته
انا = خالد لايكون تأذيت
خالد بألم = صدري صدري
ابعدت يده عن صدره وانصدمت ,, حسبي الله ونعم الوكيل ,, ينزف والله اعلم كم غرزة انفكت ( تنهدت ) شكل جروحك ياخالد ماراح تطيب
بدر بصراخ = لا تتدخلون بيننا
رفعت راسي اطالع بدر اللي يصارخ على الرجال
ابو سامي بعصبية = على كيف ابوك مانتدخل
علي = خلاص حصل خير
ابتسمت ابو سامي واللي معه لابسين مدني وهالشلة ماتدري انهم شرطة على بالهم جايين يفكون الهوشة وبس
ابو سامي بعصبية = حصل خير هاااه ,,, ليه الدنيا سايبة
رفع خالد راسه
خالد بتعب = يالضابط هذولي اللي اعتدوا علي وعلى خالد
راكان بصدمة = ضابط .؟
ابو سامي = يله شباب اخذوهم
علي بخوف = انا مالي دخل
بدر بغرور = يله نكيّف عندهم شوي ونطلع ,,, ماراح نطوّل عندهم لا تخافون
فجأة رفع ابوسامي يده وعطى بدر كف طيره الجهة الثانية
ومسكه ابوسامي وقعد يسحبه للمكسيما اللي جا خالد فيها
التفتت لخالد ولقيته ماسك راسه
انا بابتسامة = الحمد الله ,, الله فكنا منهم ,,, ماكنت متوقع اننا بنتخلص منهم بهالسهولة
التفت خالد لي والألم واضح بعيونه
خالد بتعب = انت خلصت بس انا ماخلصت ,,, اليوم لازم اروح للاستراحة
زفرت بضيق ,,, بتروح وانت حتى الجلوس ماتقدر تجلس غير احد يجلسك ,,, بس معه حق لازم يروح ويطلّع اللي بالاستراحة باسرع وقت
خالد بتعب = انت وش اللي جابك هنا .؟
انا = ابو سامي اتصل علي وقال تعال لمدرسة خالد ,,, وبعدين تعاااااال انا يوم اتصل عليك ماترد علي ويوم اتصل عليك ابو سامي رديت عليه على طول ,,, ليه مطنشني يالثوووور
خالد = مابيك تجي ,,, بس انت وراي وراي
= عاجبتكم الجلسة هنا انت واياه ,,, قوووووموووووا
نقزت متفاجئ من صراخ ابو سامي علينا ,,, صح اثرنا انا وخالد بعدنا جالسين بالارض
التفتت لخالد وقربت راسي له وهمست
انا = قم لا يسجننا هالعصبي
وقمت وساعدت خالد على الوقوف
ورحنا للمركز كلنا الا خالد اللي راح مع عسكري للمستشفى عشان يعيدون الخياطة اللي بصدره بأوامر من ابوسامي وبعد ثلاث ساعات رجعوا للمركز
والى أخر العصر وحنا بالمركز
ابو سامي = تقدرون تطلعون واذا استجد جديد نتصل عليكم
خالد = يعني خلاص
ابو سامي = لا ماهو خلاص ,,, ابوانهم بيجون ولازم تكونون موجودين بس هذا انا اذكرك مرة ثانية هات كل التقارير الاولى اللي طلبتها منك ,,, مفهوم ,, لاتنسى .؟
خالد = بس انا مضطر اسافر اليوم
ابو سامي = بتترك الموضوع معلق مرة ثانية
خالد = لا بس مضطر اسافر
ابو سامي = بس اولياء امورهم يمكن يحضرون بكرة او بعده لازم تصير موجود
خالد = تكفى يابو سامي تابعه بنفسك ,,, انا علمتك بكل شي ,,, انا مضطر اسافر
ابو سامي بتنهيدة = انا مستعد ومتعاون معك بس انا ماني قريبك حتى اتابع الموضوع عنك ,, خالد اذا كنت مشغول قل لابوك يتابع الموضوع عنك
تساند خالد على الكرسي بتعب والتفت لي وعيونه تحمل كل معاني الحيرة والضياع ,,, ضايع بين المشاكل هنا والمشاكل بالرياض ,, ومن نظراته لي كأنه يطلب مني اتدخل كأنه يقول انا تعبت تكلم معه انت
التفتت لابو سامي
انا = ابوه مسافر ,,, طيب عادي يوكل احد .؟
ابو سامي = عادي ,, الا ابو عبد الله لا يتدخل ,,, التفاهم مع ابو عبد الله الصراحة صعب ,, راسه يابس
ابتسمت والتفتت لخالد
انا = يله خالد امش
هز خالد راسه بتعب وقام
طلعنا من مكتب ابو سامي ومسكت خالد على جنب
انا = بتسافر اليوم للرياض .؟
خالد وهو يتساند على الجدار اللي وراه = ان شاء الله
انا = بتروح وانت شكلك كذا .؟
خالد = وش فيه شكلي
انا = انت حتى الوقوف مانت قادر توقف على طولك ,, متساند على الجدار
لف خالد وجهه عني بضيق وابعد ظهره عن الجدار
خالد بتعب = خالد والله ماني فاضيلك
انا = خالد ان لبدنك عليك حق ,,, انت توك جاي من المستشفى حتى مفعول البنج مايمديه راح عنك ,,, رح للبيت وارتاح وبكرة سو اللي تبي
خالد = خويلد وش دخل هذي في هذي البنج موضعي واقدر اسافر
ومشى عني
اففف عنييييييد ,,, لحقته ومشيت بجنبه
انا = ان سافرت للرياض اليوم باقول لخالك عن سالفة الاستراحة وانت بكيفك
التفت خالد لي معصب ودفعني على ورا ,,, بس دفعته كانت ضعيفة وماحسيت فيها
خالد بعصبية = يقالك ماسك علي شي الحين
قربت منه ولفيت ذراعي على كتفه وقربته مني زي ماكان يسوي فيني لما اكون متضايق
انا بابتسامة = والله انك غالي ,,, بس عنادك يخليني اتصرف معك تصرف ثاني ,,, بكرة يعني بكرة ,,, وان عرفت او سمعت انك سافرت اليوم وريتك الشغل ,,, مفهوم ياثور
يطالعني بنظرات معصبة وساكت
دفعته قدام شوي عشان نمشي
انا = وعلى فكرة رجلي على رجلك ,, روحة للرياض لحالك مافيه
خالد = هين ياخويلد مردودة
ابعدت ذراعي عنه
انا = هذا جزاتي اني خايف عليك ,,, صحيح ,,, افعل خيرا تجد شرا
خالد = انت مانت حاس بالنار اللي احس فيه ,,, انا مقهور ,, مقهور ياخالد
انا = افااا ياخالد كيف ماني حاس بالنار اللي تحس فيه ,,, لو اني ماني حاس كان ما اهتميت فيك ,,, كان ماتركت اخواني بالشقة لحالهم وسافرت معك
سكت خالد شوي
خالد بتنهيدة = اعذرني خالد ماكنت اقصد ,,, لاتاخذ بخاطرك ,,, انا منقهر ولا ادري وش اقول ,, الله مارزقني باخوان واحس الله عوضني فيك (التفت خالد لي وابتسم ) تصدق انت احلى جحش شفته بحياتي
ابتسمت فرحان يوم شفت ابتسامته ,,, فقدتها
انا بابتسامة = تسلم والله ماعليك زود
بعد صلاة المغرب
رجعنا انا وخالد لمدرسته عشان انا اخذ سيارة ابراهيم وخالد ياخذ سيارته وكل واحد راح لبيته
دخلت الشقة وانا تعباااان ونعسااان وجوعاااان
خلود = هلا خالد
ولاول مرة خلود تستقبلني عند الباب بالعادة تصير جالسة بالصالة والا بغرفتها ولا كأني جيت بس هالمرة مستقبلتني والغريب وجهها احمر وكأنها مستحية او متوترة مدري وش قصتها
انا مستغرب = هلا فيك
وجلست بالصالة على الارض بتعب افففف اليوم مانمت ابد على قومتي الفجر
انا = خلووووود ابي أي شي اكله جوعااااان مرة
خلود = ان شاء الله
طالعت خلود وهي رايحة للمطبخ مستغرب وش عندها هذي اليوم صايرة مؤدبة ,, والغريب ماسألتني عن شكلي ,, متبهذل قدامها وملابسي وسخة بالعادة تحقق معي لين اكره نفسي
جت خلود وحطت الصحن قدامي وجلست على الكنب وهي تلعب باصابعها متوترة
الله يستر وراها شي ,,, هدوئها ماهو طبيعي وراه شي
بسم الله
وبديت اكل وانا خايف من خلود وهدوئها المفاجئ
خلود = خااالد
بغيت اغص ,,, ايه انا ادري ,, وراها شي
انا = هاه
خلود = ان شاء الله عجبك الاكل
بالله ,,, كلها سندويشة وعصير حتى العصير حامض
انا = قولي اللي عندك اخلصي
خلود = ام ,, ام ,, آآآ ,, ام محمد وخالتي ام عبد الله جو عندي اليوم العصر وراحوا
انا = طيب واذا ,,, ماهي اول مرة يجونك
والتفتت لخلود ولقيت وجهها احمر مرة وتلعب باصابعها
انا مستغرب = خلود وشفيك .؟
خلود مستحية = ام محمد وخالتي ام عبد الله جايين يخطبوني لمحمد
فتحت فمي وطيرت عيوني فيها
انا بصدمة = ووووششش ,, محمد
ونزلت راسي منصدم ,,, محمد يخطب خلود ,,, محمد ماغيره اخو صالح ,, ضحكت غصب عني ,,, والله محمد رجال والنعم فيه ,,, متوظف وعايل نفسه وماعليه كلام
محمد يبي خلود اختي ,,, غريب ماعمره جاب لي سيره ,,, انا ادري ان اهله يدورون له على مرة مثل ماقال لي صالح بس وش معنى اختي
التفتت لخلود اللي منزله راسها بقوة شوي ويطيح بحظنها
انا = وانتي وش رديتي عليهم .؟
رفعت خلود راسها مستحية
خلود = انا استحيت مدري وش اسوي ,,,, انا اروح واتركهم والا اسكت والا ابـ
انا = يعني مارديتي عليهم بشي .؟
خلود = الا قلت راجعوا خالد
انا = وش راجعوا خالد وزارة هي ,,, الله يفشلك ووش قلتيلهم ان شاء الله راجعوا خالد بالدور الاول والا بالدور الثاني
خلود = لا شقتنا بالدور الرابع ,,, يعرفونها هم
انا = خلووووود
خلود وهي شوي وتبكي = مدري وش اقول
تنهدت وسكتت ,,, خلود اختي خطبها محمد ,, ياربي شسوي ماعرف هالسوالف انا
انا = طيب ماقالوا شي ثاني ,,, لا محمد ولا ابوه ولا حتى صالح قالوا لي شي
خلود = اخذت خالتي ام عبد الله رقم امي ,,, يقولون اول نبي رايك وراي اخوك وبعدين نجي نخطبك رسمي
انا = ووو,, وعلمتي امي .؟
خلود مسحية = لا ,, علمها انت ,,, انا استحي
ابتسمت وسكتت ههههه تقول علمها انت ,,, علمتني انا قبل تعلم امي ,, مع انه المفروض العكس ,, وش معناه هذا ,, معناه خلود تعتبرني اقرب لها من امي
طالعتها فرحان ,,, الله يوفقها ,,, خلود تستاهل
بعد صلاة العشا
طوال الصلاة وبالي مشغول والله اعلم وش قرا الامام ووش ماقرا
حنا مالنا غير خلود ,,, بس محمد رجال والنعم فيه ,,, ياربي وشلون اسوي الحين ماعرف ادبر شي ,,, وماعرف ارد عليهم ,,, ماعرف هالامور
غير اتصل على امي ,,, واتصل على عمي ,,, بس عمي ماني متصل عليه الا بعد موافقة خلود وموافقتي ,, مع انه اصلا عمي ماله دخل فينا بس الحين انا محتاجه
ان ماطاعك الزمن والا طيعه ,,, دايم اقول لايمكن ألجأ لعمي لو مهما يكون
والله محتار
دخلت الشقة وانا الى الحين اهوجس
محمد عمره 25 او 26 وخلود عمرها 16 ,, مو كبير بالنسبة لها .؟
صح ماراح تتزوج خلود الا بعد ماتخلص السنة هذي يعني بيصير عمرها 17 ,,, بس مادري ,, محتااااااار
بعد ماتعشينا دخلت غرفتي انام ,,, تعبااااان على قومتي الفجر هذا غير بكرة وراي سفر
صح على طاري السفر
طلعت من الغرفة ورحت لخلود ,,, الله يستر مالي خلق للهواش معها ,,, يوم اسافر اول مرة للرياض صارت هوشة وصراخ وزعل حتى عشا ماتعشيت هذاك اليوم الحمد الله اني تعشيت قبل شوي ,,, الحين مدري وشلون اقنعها اسافر
دخلت عليها غرفتها ولقيتها تحل واجباتها
انا = خلود بكرة بسافر للرياض
التفتت خلود لي مستغربة
خلود = ليه .؟
اخذت نفس الله يعين
انا = خالد مضطر يروح للرياض وانا ابخاويه
سكت خلود شوي
خلود = طيب بس عطني فلوس عشان ارسل سالم للبقالة ,, البيت ناقصه شوي اغراض
سكتت مستغرب ,,, ماعصبت ,,,
ابتسمت غصب عني صايرة عاقلة اليوم
انا بابتسامة = خلوووود انا ابعلم امي عن الخطبة ,, وان شاء الله يوم يومين وانا راجع ,,
حاولت مابتسم عشان ماحرجها بس غصب عني ابتسمت اكثر
شوي شوي تحول لون وجهها للاحمر
خلود بحرج = خاااااالد ( وغطت وجهها بالكتاب )
طلعت عنها وسكرت الباب وانا اضحك ,,, ورفعت يدي للسماء
انا = الله يجزاك خير يامحمد ,, عقلتها لي
**
بعد صلاة الفجر رجعت للشقة ومريت غرفة خلود عشان اقومها
خلود ماشاء الله عليها نومها خفيف بسرعة تقوم ,,, مسكينه تعودت على المسؤولية وهي صغيرة واهتمامها بمعاذ اللي يقومها باخر الليل خلاها تحس بأي حركة حتى لو هي نايمة
فتحت باب غرفتها بس وقفت بمكاني متفاجئ
لقيت خلود جالسة على سريرها وتبكي
انا منصدم = خلوووود
وجلست عندها على السرير
انا = وشفيك ليش تبكين .؟
تمسح دموعها بمنديل ومعاذ نايم بحظنها
خلود بصوت باكي = مافيني شي ,,, رح خلني لحالي
انا = خلود وشلون مافيك شي .؟ قوليلي ليش تبكين .؟
زاد بكاها اكثر
انا = خلوووود
خلود وهي تبكي = ابي امي ,,, خالد خلها تجي ,,, ليش انا دايم اسوي كل شي
تنهدت بحزن ,,, امي باعتنا برخيص ياخلود
انا بحزن = وش اللي جاب طاريها ,,, خلود امي تركتنا من سنة ,,, وش معنى الحين تبكين
خلود = امس انحرجت ماعرفت وش اسوي عند الحريم ,,, امس كنت محتاجتها مرة ,,, المفروض يكلمون امي مايكلموني انا ,,, بس انا ماعندي ام ,,, امي موجودة بس انا ماعندي ام ( والتفتت لي ودموعها على خدها ) خالد خل امي تجي ,,, مابي انحرج مرة ثانية قدامهم ,,, صعب ياخالد انا استحي اطلع لهم وهم جايين يخطبوني ,,, لو عندي اخت كبيرة كان خففت عني شوي ,,, انا مليت كل شي علي انا ,,, وشلون يعني اصير ام نفسي وانا عندي ام
وغطت وجهها بيديها وبكت اكثر
ضميتها وسندت خلود راسها على صدري ورفعت يدي امسح على شعرها ويدي الثانية ماسكه معاذ عشان مايطيح من حظنها
انا = هذي امي اللي تدافعين عنها ,,, خلود انا راح اتصل على امي واصر عليها تجي ,,, بس ماضمن ان تهتم فينا ,,, اللي تخلت عن معاذ وهو عمره سنة بتتخلى عنك وانتي عروس ,,, خلود انتي دايم متعودة على ام سعد ,,, ام سعد اقرب لك منـ
خلود بصوت باكي = بس ام سعد ماهي امي ,,, انا ابي امي امي
انا = خلاص خلود اهدي وانا اليوم ان شاء الله بتصل عليها ( وابعدتها عني ) يله قومي صلي والبسي وانا هالمرة اباخذ معاذ وسلمى اخليهم ببيت ابو سعد
هزت خلود راسها ,, وقمت وابتسمت لها احاول انسيها امي
انا بابتسامة = خلوووووود يعني افهم الحين انك موافقة على محمد
ماجد = انا لله ,, وبعدين معاكم انتم ,, خلاص كل واحد يروح لبيته فكونا
ابراهيم باستهبال = هيه ماجد تراك بحارتنا بيتك بالحارة الثانية
ماجد = هاه ,, ايه صح تصدق نسيت ههههههه
طلع ابراهيم جواله
ابراهيم = ابتصل على خالد يطلع ,,, يمكن بعض الناس تروح شياطينها ( وطالع صالح بطرف عينه )
صالح بعصبية = قصدك هو الشيطان بنفسه ,,, لا تتصل فيه خله يطس
ماجد = الا الا اتصل يمكن خالد ماكل حلاوته ومايبينا نعرف
ضحكت على ماجد و رحت لبيت ابو سعد واخذت اخواني ,, رجعت للشباب وانا اضحك على معاذ يدعك عيونه بيده ماهو متعود على الشمس لو ماني ماسك يده الثانية كان صدم بالجدران ,, لقيت الشباب واقفين عند بيت ابراهيم وخالد واقف معهم اما صالح ماشوفه
امي بفرح = محمد رجال بتزكرو منيح ,,, عطيني خلود اباركلها
انا بضيق = حنا ماوافقنا عليهم الى الحين
امي = وليش ماتوافئوا محمد شب منيح وامو كمان ست طيبي
انا = الراي الاول والاخير لي ولخلود
امي = وانا مالي راي
انا بضيق = لا ,,, رايي وراي خلود اهم من رايك
امي = شو هالحكي خالد ليش بتحكي معي هيك
انا = اسألي نفسك
امي = شووو خالد كل يوم يعني بنحكي بهالموزوع ,,, خالد حبيبي صدئني انا ئلبي وعئلي معكون
انا = اسمعي يمة ,,, خلود محتاجة لك الحين ,, انا حاس فيها وفاهمها اكثر منك ,, خلود تستحي تقابل الحريم وهم جايين يخطبونها وماهي قادرة ترد عليهم لازم يجي الرد على ام محمد من امها
امي = ماحدا اتصل عليي انا هلأ عرفت منك
انا = ادري ,,, هم يبون يعرفون رايي وراي خلود اول وبعدين يجون رسمي
امي = يعني خلود موافئة .؟
انا بعصبية = حنا ماعلينا نرد عليهم والا مانرد ,, يمه خلود تعبانة ومتضايقة تبيك ,,, يمة خلود محتاجة لك
امي = واحمد
انا بصراخ = كل ماقلت لك شي قلتي احمد واحمد ,,, اسمعي عاد اختاري واحد منا يأنا يااحمد ,,, ان ماجيتي هالاسبوع وطعتي احمد انسي ان لك ولد اسمه خالد ورقمي هذا انسيه
امي = لا لا خلاص حبيبي بئول لاحمد ,,, بس لاتحرمني منك
ياربي شسوات من وين اجيب غيرهن من وين اصرف على اخواني ,, والامتحانات قربت ومافيه وظيفة تقبلني ,,, وماعندي سيارة اكد ,,, ياربي افرجها من عندك ,,, عطيت خلود 500 وخليت معي 500 ,,, ورحت لغرفتي متضايق
الحمد الله اننا بشقة مدفوع اجارها مقدم والكهرباء والتلفون والماء وكل شي من ضمن الآجار ,,, الله يجزاك خير ياخالد فكيت ازمه ,,, لو اني في بيتنا الاول ,,, كان الحين شايل هم الكهرباء والتلفون
بس ولو لازم احصل على وظيفة اخواني يبون والشقة تبي اغراض ,, نزلت راسي على الطاولة بيأس ,,, شسوات لازم اطلع وادور بس الحين مواعد خالد اروح معه للرياض
= خاااالد
رفعت راسي لسلمى
سلمى = خالد عند الباب ( ونفخت صدرها بغرور ) وقلتله اطلق ,, شفت انا اعرف
انا مستغرب = اطلق ! وشو اطلق .؟
سلمى = اطلق عشان يدخل المجلس
ابتسمت
انا = اسمها اقلط مو اطلق
وقمت رايح للمجلس عند خالد اخذنا شوي وطلعنا من الشقة متوجهين للرياض
وطوال الطريق وانا ساكت ومهموم ,, هم الوظيفة اللي ماني قادر احصلها وهم امي اللي ماهي راضية تحس فينا ولو مرة ,,, ياليتها تجي على الاقل عشان خلود
خالد = تصدق هالعلاج احس صار ماله مفعول ,,, الصداع فيني فيني كان اكلتهم والا ماكلتهم ( وسكت يحتريني ارد )
سكتت ومارديت
خالد = مرة اكلت من المسكن ثلاث حبوب دفعة وحدة مع انه المفروض حبة وحدة عند اللزوم ( وسكت يحتريني ارد )
سكتت ومارديت
خالد = بس عادي ماصار لي شي ,,, احتري يغمى علي ,,, يعورني بطني ,,, يخف الصداع ,,, يصير أي شي ,,, بس شكلي تبلدت ماحسيت بأي شي ,, لا الصداع خف ولا اغمى علي ولا شي ( وسكت)
ما رديت
خالد = تصدق اني موزع علاجي بكل مكان ( وسكت يحتريني ارد )
ما رديت
خالد بتنهيدة = ببيت خالي ,,, وبسيارتي ,,, وببيت اهلي بالرياض ,,, باقي بيتك احط نسخة من علاجي ,, وش رايك ( وسكت )
ما رديت
خالد = تصدق ان خالي مايدري اني مسافر للرياض ,,, قلتله طالع للبر مع شباب ,,, عاد تخيل بر بعز الحر ماتجي صح .؟ ( وسكت )
مارديت
خالد = تصدق اني قاعد اكلم لوح الحين ( وسكت )
ما رديت
خالد = تصدق يعني انه وشفيك .؟
سكتت ولا رديت
خالد = يله عاد خالد ,, وشفيك اليوم ,, بالعادة تثرثر فوق راسي ,,, ليش ساكت
انا بضيق = خالد ممكن تبلع لسانك وتسكت
خالد = ماني قادر انوم سولف معي
انا = نام الحين باقي ساعة ,,, ساعة ونص ونوصل
خالد = لي يومين مانمت كيف تبيني انوم الحين ,,, علمني بس وشفيك ,, مانت طبيعي اليوم
انا = خويلد بتسكت والا وشلون
وسكت اخيرا ,, اعوذ بالله مابغى
بس المسكين طوال الطريق المتبقى وهو ماسك راسه بين يديه او يجر شعره ,, شوي يسدح المرتبة وشوي يرفعها وماسمع منه الا
أأأخ راسي ,,, صدااااااع ,, راسي بينفجر
وانا اسمعه وساكت
بعد ساعتين وصلنا الاستراحة قبل غروب الشمس بفترة
وقفت السيارة والتفتت لخالد
انا = العامل فيها .؟
خالد وهو ماسك راسه بألم = مدري ,, خلنا ننزل ,,, اااخ راسي
نزلت ونزل خالد ,,, اتصل خالد على صادق عامل الاستراحة
وفتح لنا البوابة واحد هندي والتفتت لخالد
صادق = بابا كالد كيف حال انته .؟
بس مارد عليه خالد ودخل الاستراحة على طول
التفتت لصادق وطلبت جواله رفض بالبداية بس غصبته واخذت الجوال منه ورحت الحق على خالد
وتوجهت للغرفة حسب اللي اذكره بالفيديو ,, لين وصلت الممر اللي يروح للغرفة وشفت خالد من بعيد واقف عند بابها
وماخلينا مكان مادورنا فيه ,, خالد من جهه وانا من جهه
حل الظلام علينا وحنا الى الحين ندور ومافيه شي غير طبيعي ,, كل شي عادي
حتى برا الاستراحة درنا فيها ,,, رجعت للغرفة مرة ثانية وانا وشوي واستخف معقول ,,, لو الصور بس قلنا مفربكة بس الفيديو وشلووووون
طلعت من الغرفة وجلست على الارض ومديت رجلي بتعب
أأأخ تعبت وانا امشي وادوووور كني مهبول
شفت خالد واقف بنص الاستراحة
انا بصوت عالي = خاااااااااااااالد
التفت لي وجا يترنح ووقف قدامي
خالد بتعب = ناصر بيضيعني
انا = خالد اهدى شوي ,,, مدام ان الاستراحة فاضية ,,, مايقدر يسوي شي
خالد بصراخ = الفيديو معه ,,, انا بضيييييع ,,, على الاقل لو لقينا شي اقدر اخذه للشرطة ويشوفون البصمات بس الحين لا ,,, الحين بيتهموني اني اخفيته ( وبكى ) ناصر بيضيعني ,,, ناصـ
انا بحيرة = خالد انت تعبان اجلس خلنا نعرف نفكر
مسك خالد راسه بين يديه ودموعه على خده
خالد = مابي امي تعرف ,,, انا مظلوووووم ,,, ناصر بيذلني ,, راسي يعورني راسي بينفجر
لاحظت عليه كل شوي يضعف ,,, ويترنح وهو واقف ,,, كأنه ماهو قادر يوقف اكثر ,, لا يكون بيغمى عليه ترا ماني فاضي
انا بخوف = هيييه خالد مو الحين
ومادريت فيه الا وهو يطيح علي ,,, مسكته وابعدته عني وجلست على ركبتي وانحنيت عليه
انا بخوف = خالد ماهو وقتك الحين ,,, قم ,,, خالد تسمعني
متمدد على الارض وهو شبه فاقد وعيه ,, ويهذي بكلام مو مفهوم
انا = خالد رد علي ( تنهدت ) ياربي شسوي
فكيت ازارير بلوزته اشوف العملية اذا تضررت من الطيحة والا لا ,,, بس لقيت عليها لزقة كبيرة ,, ايه صح امس خاطوا الجرح مرة ثانية
انا = خالد ,,, خالد رد علي
وضربت خده على خفيف
انا = خاااااالد
يهذي بكلام مافهمت منه شي ,,, لاهو اللي مغمى عليه ولا هو اللي صاحي
قمت وركضت لصادق يشيله معي نوديه للمستشفى
اول ماشافني العامل اركض قام خايف مني
صادق بخوف = بابا انا مافيه معلوم
مسكته وجريته معي ,, وشلنا خالد وحطيناه بالسيارة بمكان الراكب وانطلقت فيه للمستشفى
والمشكلة مادل شي بالرياض ,, وقفت اقرب سيارة وخليت راعيه يدلني على اقرب مستشفى وماقصر الرجال مشى قدامي بسيارته يدلني
توترت اكثر يوم شفت خالد بجنبي اغمى عليه قبل اوصل المستشفى
وصلت اخيرا ودخلناه الطواري وجلست بكراسي الانتظار احتري الطبيب يطلع من عنده
بعد حوالي ساعة جاني الدكتور
انا بخوف = هاااه دكتور
الدكتور = اضطرينا ندخله العناية المركزة لين تستقر حالته
شهقت وطيرت عيوني فيه
انا بصدمة = ووووششش العناية
الدكتور = المريض حالته متدهورة ,,, ممكن اعرف وش سبب العملية اللي بصدره .؟ جينا بنحط عليه تخطيط القلب لكن تفاجأنا بالعملية واضطرينا نشيل الضماد ونحط بداله التخطيط
الدكتور بعصبية = هذا تهور يأخ ,,, المريض بحاجة للعلاج والراحة ,,, والمناعة عنده ضعيفة جدا ,, عطني رقم أي قريب له وبلا كثرة حكي
انا = خالد مايبي احد يعرف
الدكتور = المريض لازم يبدا بالعلاج ,,, صحته ماتتحمل اكثر
سكتت مادري وش اقول ووش اسوي
الدكتور = اذا فاق من الغيبوبة لازم يوافق على الكيماوي ,,, الادوية اللي ياخده المريض مجرد مسكنات ,, لازم يبدا بالكيماوي مفهوم
وقعد يهاوشني كأني انا السبب ,,,
قاطعته
انا بصوت باكي = دكتور تكفى ابي اشوفه
الدكتور = الزيارة ممنوعة الحين ,,, اذا استقرت حالته وطلعناه من العناية تقدر تشوفه
انا = تكفى ابي اشوفه الحين
الدكتور = قلتلك ممنوع
ونشبت بحلقه لين وافق وطلبت منه بعد ارافق معه اذا طلعوه من العناية رفض اول شي وبعد الحاح واصرار وافق حسيته كره اليوم اللي صار فيه دكتور بسبب الحاحي عليه
لبست الملابس الخاصة لزوار العناية المركزة ودخلت على خالد
وشفته قدامي متمدد على السرير مكشوف الصدر وعليه تخطيط القلب وحوله الوايرات و الاجهزة ومحطوط على فمه كمامة الاكسجين وموب حاس باللي حوله
وصوت الجهاز يزن باذني
بكيت غصب عني وانا اشوف خوي الروح بالحالة هذي ,, قربت منه وحطيت يدي على راسه
من امس وهو تعبان ,, لا مو من امس من قبل امس من يوم كان يستدرج الشباب وهو تعبان وزاد عليه السفر وهم الاستراحة
انا بصوت باكي = خاالد
ماتحملت اكثر وطلعت من العناية وانا متضايق ,, وجلست على اقرب كرسي يارب اشفه ,,, قم ياخالد ,, قم انا احتريك
تذكرت اني ماصليت العشا والمغرب جمع وتقصير لاني مسافر
رحت لمكان اصلي فيه ورجعت اجلس على الكرسي قدام غرفة العناية وانا ادعي الله انه يقوم بالسلامة
ونمت وانا مادري عن نفسي من التعب
بغيت اطيح من الكرسي وقمت مفزوع ,, مدري كم مر علي من وقت وانا نايم ,, اخ يارقبتي
طلعت جوالي اشوف الساعة ,,, الله ,,, الساعة 2 في الليل
قمت بتعب وطليت على خالد من ورا نافذة الباب ,,, وشفته على حاله وممرضة ثانية غير عن الاولى تتابع حالته ,,, نزلت راسي بحزن ,,, جلوسي هنا ماينفع لازم اروح بس وين اروح وييييين
طلعت من المستشفى وركبت سيارة خالد ورحت للاستراحة ,,, الساعة الحين 2 بروح اتسلل على الاستراحة واراقب هالهندي يمكن كل المصايب منه ,,, والا وشلون ناصر يدخل الاستراحة على كيفه ,,, اكيد انه دخل البراميل وصور اللي صور وطلعهم واكيد العامل بيكون عنده علم ويمكن متفق معه بعد ,,, مانستبعد شي
وصلت ووقفت السيارة من ورا الاستراحة وركبت عليها وبعدها ركبت على الجدار
ظلام ماشوف الا نور غرفة العامل والحمام والمطبخ ,,, يانا يانت ياصادق راح اراقبك لين يذن الفجر ,,, ونشوف ( تنهدت ) الحمد الله اني اخذت جواله
وصرت على هالحال اراقب فوق الجدار كني بومه ,, وماشفت أي شي غريب على العامل يطلع من الغرفة ويروح الحمام والا طلع وراح للمطبخ ويرجع للغرفة مرة ثانية ,,, وماجاه احد من برا الاستراحة ولاهو اللي طلع ,,
الفجر
صليت باحد المساجد ورحت لخالد بالمستشفى ,,, ولقيته على حاله بالعناية سألت عنه والحمد الله طمنوني انه استقرت حالته بس ماصحى من الغيبوبة الى الحين
بشروني انه فاق من الغيبوبة وطلعوه من العناية ونقلوه لغرفة عادية ,,, دخلت عليه الغرفة كمرافق ووقفت عنده اتأمله
كان تحت تأثير مخدر ولاهو حاس فيني
طاحت عيني على الخياطة اللي بصدره ومررت اصبعي عليها وتذكرت كلامه امس وحنا بالطريق يوم كان يسولف فوق راسي وانا مطنشه ورجعلي كلامه يوم يقول سولف معي
انا بابتسامة = خالد قم ابسولف معك مثل ماتبي بس قم
يبدل الله من حال الى حال
بكيت غصب عني ,,, امس كنت بحال والحين بحال
جلست على السرير بجنبه وانحنيت عليه وضميته
انا بصوت باكي = خالد يااااشينك ,, قم عاد ,,, ماتشبع نوم انت ,,, من امس المغرب وانت ناااايم ,,, قم
مادري كم مر علي من وقت وقمت عنه سلمت على خده وخده الثاني وجبهته وطلعت رايح للاستراحة مرة ثانية ,,, لازم استمر واراقب هالصادق هذا ,,, عندي احساس انه بيجيه احد او هو بيروح لاي احد ,,, اكيد له يد بالموضوع براميل كبيرة تدخل الاستراحة وتطلع وهو يقول مافيه معلوم
وصلت الاستراحة ونفس الشي ركبت فوق الجدار بوضعية مايشوفني فيها العامل وصرت اراقبه لين اذن الظهر ولاشي جديد ,, لا طلع ولا جاه احد وماشفت عليه أي شي غريب
رجعت للمستشفى وانا تعبان مرررة بسبب الوضعية اللي كنت جالس فيها وفوق هذا جالس تحت الشمس
دخلت على خالد ولقيت عنده ممرض يغير المغذي ويتابعه وخالد الى الحين نايم وموب حاس باحد ,,, سألته عنه وطمني انه بخير وطلع الممرض
جلست على كرسي وحطيت راسي على السرير ,,, ودي انااااام تعباااااان
العصر
قومني من النوم رنين جوالي
القيت نظره عليه ( امي يتصل بك )
انا بتعب = الووووو
= اسمع ولييييييك
هذا موب صوت امي ,, هذا ,, هذا ,, هذا صوت النذل احمد
عصبت اول ماسمعت صوته النشااااز
انا بعصبية = وش تبي انت ووجهك
احمد = راح نيجي عنكون يومين لا اكتر بس من شان إمك ,, عم تفهم والا افهمك كمااان
انا = علمني خالد وش اسوي ,, خلود واخواني يبون امي ويومين مايكفون ,,,, انا بعد مشتاق لامي مرة ,,, بس امي باعتنا ,,, اختارت احمد وخلتنا ,,, تدري خالد انا ماراح اسامحها ,,, ولولا اخواني كان ماطلبت منها تجي ,,, ماراح اسامحها
قمت صليت بالغرفة وبعدها وقفت عند الباب اتفرج على الرايح والجاي وانا اتذكر ابوي وامي وحياتنا قبل وحياتنا الحين
شوي ودخلت الغرفة وانا متضايق ,,, خلني اتصل على خلود ,, جلست على الكرسي بجنب خالد ,, وطلعت جوالي بس حسيت بحركة ,,, رفعت راسي لخالد وفرحت لما شفته يفتح عيونه ويئن
انا بفرح = خاااالد
وقربت الكرسي منه اكثر
انا بفرح = اخييييييييرا قمت ياثور ياللي ماتستحي
يتلفت بعيونه على الغرفة يحاول يستوعب
انا بابتسامة = ابو خلّود حنا بالمستشفى الحين
التفتت لي وهو مقطب حواجبه مستغرب
خالد بهمس وتعب = وينه
انا مستغرب = وش اللي وينه .؟
خالد = لقيته
انا = وش تقول خالد ( وضربت خذه على خفيف ) اصحى خالد انت بالمستشفى الحين
سكت شوي يحاول يستوعب قمت وتركته ورحت انادي على الدكتور
جا الدكتور و فحصه شوي وتركناه ربع ساعة يصحصح
وبعدها بدا الدكتور يكلم خالد عن ضرورة التعالج بالكيماوي لكن تفاجأنا بخالد رافض وبشده العلاج بالكيمياوي ,, حاول فيه الدكتور لين مل وطلع
انا مستغرب = خالد ليش ماتبي تتعالج
خالد بعصبية = ليش جبتني المستشفى .؟
انا = كنت تعبان وش تبيني اسوي اجل .؟
خالد = مثل مادخلتني طلعني
انا = صاحي انت بتطلع الحين وانت بهالحال
خالد = ماعلي منك مثل مادخلتني طلعني
قربت منه وغطيت وجهه بيدي
انا بعصبية = نااام نااام ,, وش الي قومك
شهقت يوم عض على يدي
انا بعصبية = ااح يااااحمااار
خالد = طلعني ,,, لازم اطلع ,,, لازم اروح للاستراحة
انا بضيق = على طاري الاستراحة رحت لها امس واليوم وراقبت صادق ولاشفت عليه شي وامس مالقينا بالاستراحة شي ,,, فيه حل واحد بس ياخالد ,, ومن ورا خشمك توافق عليه
سكت خالد شوي
خالد مستغرب = وش .؟
انا = فاايز
خالد = وش فيه .؟
انا = فايز يعرف شباب يشتغلون بالهيئة ,, خلنا نروحله ونعلمه بكل شي ,, لازم تبلغ انت قبل يبلغ عليك ناصر
خالد بعصبية = تبيني ابلغ على نفسي ,,, وشفيك مجنون
انا = لا ,, اقصد تروح للهيئة وتعلمهم بكل شي وهم يتصرفون
خالد = مامعي شي يثبت اني مظلوم ,, والصور لاستراحتي
انا = خالد خلنا نحاول , السكوت كذا ماراح يفيدنا ,, بالعكس حتى لو عطيت ناصر اللي يبي ,,, بيذلك مرة ثانية
وقعدت اقنعه لين اخيرا وافق
ورحت الح على الدكتور لين رخصه بالخروج طبعا بعد ماوقع خالد انه على مسؤليته
ومسكنا الخط راجعين ,, رغم تعب خالد
وصلنا الشقة الساعة 11 في الليل وقررنا يبات خالد عندي في الشقة لأنه مايقدر يرجع لبيت خاله وهو قايل لابو عبد الله انه راح يرجع من البر يوم الجمعه واليوم الاربعاء
دخلنا الشقة ودخل خالد المجلس وعلى طول رحت لخلود وعلمتها ان امي راح تجي عندنا يومين
والاخت طارت من الفرحة ,, شوي وتصقع بالسقف
طلبت منها تسوي لنا عشا ومن فرحتها ماعارضت رغم تأخر الوقت
تعشينا انا وخالد واتصلنا بفايز يجي للشقة ضروري
وعلى الساعة 1 في الليل جا فايز عندي ,, وعلمناه بكللللل شي ووريناه الصور والفيديو وبعد ماستوعب خاصة انه انصدم لما عرف ان خالد عنده عيادة واستراحة وهو بهالعمر ,, وبعد ما حلفنا ان خالد مظلوم
فايز بعصبية = هذا اسمه ابتزاز
التفتت خالد لي وسألني
خالد مستغرب = وش معنى ابتزاز .؟
سكتت ,, حتى انا مدري وش معناه
انا بغباء = اول مرة اسمعها
فايز = الله يخلف هذا وانتم بثالث ثانوي ماتعرفون معنى ابتزاز ( كمل معصب ) ابتزاز يعني ناصر قاعد يستفز خالد ,, يعني قاعد يلوي يد خالد بالصور والفيديو
خالد = ماعلينا وش معنى ابتزاز ,, المهم وش نسوي
فايز = وهذي يبيلها سؤال من بكرة نروح انا وانت للهيئة ونعلمهم بكل شي ,, والباقي خله علي ,,, راح اتواصل مع هيئة الرياض ونراقب ناصر والعامل ( وقام والتفت لخالد ) انا بكرة عندي دوام مرني لمكان شغلي ونطلع انا وانت ونروح للهيئة وهات الصور والفيديو وجوال العامل ,, ( والتفت لي ) ليت خليت الجوال معه ياخالد وليتكم ماضربتوه بعد ( وتنهد ) ماينفع الكلام الحين ,,, فات ,, يله استاذن اشوفكم بكرة على خير
خالد = فايز تراك ماشفتني اليوم ,,, لاتعلم خالي اني جيت
التفت فايز لخالد وسكت شوي وبعدها ابتسم
فايز بابتسامة = ياااخي ماني مصدق ان لك عيادة
وطلع
الخميس
راح فايز وخالد للهيئة وعلى الساعة 11 الصباح جا خالد وعلمني ان فايز راح للرياض يتابع الموضوع هناك مع هيئة الرياض
وخالد طوال اليوم وهو جالس على اعصابه
المغرب
اتصل فيه فايز وعلمه ان الهيئة راح تراقب ناصر والعامل لمدة اسبوع او اسبوعين ,,, وعلى الله
الجمعة
رجع خالد لبيت خاله يقاله جاي من البر
بعد صلاة المغرب
تفاجأت بابو عبد الله جاي عندي بالشقة ,, دخلته المجلس وانا مستغرب زيارته المفاجأة ,,, وبعد ماضيفته
صدمني بالسبب اللي زارني عشانه ,,, صدمة عقدت لساني
انا بصدمة = ووووششش ,,, اختي خلوووود
ابو عبد الله بابتسامة = انا كنت ابي احتري العطلة الطويلة بس ام عبد الله الله يهديها خطبتها لولد اخوها محمد وانا مادري ,,, وانا من زمان ابي خلود لولدي خالد ,, وخفت انكم تردون على اهل محمد ,,, وانا والله من زمان ابيها لخالد وقلت لامه وماعندها مانع هي شافت خلود وتبيها لولدها ( وابتسم اكثر ) وحنا حاضرين باللي تبونه
نزلت راسي منصدم ,, وش الورطة هذي ,, خااالد ,,, خالد مريض ياااعم خالد معه سرطان ,,, تبيني ازوج اختي واحـ ( وتنهدت ) استغفر الله العظيم ,, خالد والله انه رجال والنعم فيه ,, ووقف معي بأحلك الضروف ,, بس
ابو عبدالله = انا جيتك اليوم قبل تردون على اهل محمد ,, فكروا وردوا لنا خبر ,,, والله يتمم على خير كان صارت لمحمد والا لخالد
رفعت راسي
انا مرتبك = آآآ ,,, مو المفروض يجي معك ياعم
ابو عبدالله = الا وهذا حقك والمفروض يجي بس خالد توه جاي من البر
انا = هذا مو بعذر ياعم ,, لا يكون مغصوب ولا يبينا
ابو عبد الله = لا والله ,, قلت له انا وماعارضني,,, خالد رضي الله يرضى عليه ,, بس هو يقول قل لخالد اذا وافقوا علي جيت ,, وبعدين انا ما اكفي والا لازم يجي خالد ( وابتسم )
انا بتنهيدة = انت الخير والبركة ,,, ياعم
ابو عبد الله = صح هو ماهو متوظف وتوه يدرس بس تراه عنده مستشفى باسمه حولها له ابوه قبل كم شهر ,, ويصرف على نفسه منها ,,, فكروا ياولدي وردوا لنا خبر
وقام وطلع من الشقة
رجعت للمجلس وانا الى الحين منصدم ,,, ياربي شسوي اخاف اذا رفضناه اخسر صداقته ,,, اصلا خلود ماتداني طاريه صح انها خفت بعد العمرة وصارت ماتتذمر لما يجينا بس الحين اجي واقولها خالد خطبك ,,, بتلفعني باقرب قدر
وش الورطة اللي انا فيها ياربي
طلعت جوالي واتصلت فيه
خالد = هلا خالد
سكتت ومارديت
خالد = ادري ادري احس انك الحين تقول عني وش هذا اللي وجهه لوح وجاي يخطب اختي
انا بتنهيدة = يعني داري ان خالك جاني اليوم
خالد = من يوم خالتي ام عبد الله خطبت اختك لمحمد وهو يكلمني بالموضوع ,,, خالي على باله اني طبيعي ,,, والصراحة ماقدرت اقوله شي واعلمه عن مرضي واللي زاد الطين بله انه مكلم امي من زمان ومخططين ثنيناتهم بتزوجيني وانا اخر من يعلم ( وتنهد ) كانوا يبون يتقدمون رسمي بالعطلة بس يوم عرفوا عن محمد خافوا تطير العروس مني وهم يبونها لي ,,, آسف خالد والله ماقدرت اقول أي شي ولا اعلمهم بأي شي
انا = يعني انت ماتبي تتزوج .؟
خالد = مافيه احد مايبي يتزوج ياخالد ,,, اكذب عليك اذا قلت مابي اتزوج ,,, انا ابي ,, بس المرض مايبي
انا بعصبية = يعني انت ماتبي اختي بالذات .؟
ساكت ومارد علي
انا = يعني عادي لو راحت منك .؟
ساكت ومارد
انا بصراخ = ليش ماترد .؟
انا = خاااااالد
خالد = معجب بتحملها مسؤولية اخوانها ,,, معجب باهتمامها بمعاذ وكيف كانت خايفة عليه حتى مني يوم كنا بمكة ,,, اذا كانت مثل اخوها باخلاقه اكيد ابيها ويسعدني اتزوجها ,,, بس السعادة بعيدة عني ياخالد
سكتت
خالد = من حقك وحقها ترفضوني ,,, خالد انا مريض ومالي حق اعيش زي الناس ,, انا كم يوم واودعكم
زفرت بضيق رجع على اليأس اللي عايش فيه
انا = وش هالكلام انت الثاني
خالد = انا مكاني المستشفى وبس ,,, واذا وينلي وناصر ماتركوني بحالي بيصير مكاني السجن ( وتغير صوته ) الله يوفقها اختك مع محمد
وسكر بوجهي
نزلت راسي بألم ,,, خالد يااائس بالمرة ,,, واذا رفضته بيزيد يائسه اكثر
انا اميل لخالد اكثر من محمد وابي خلود تصير لخالد ,,, خالد غااالي وطيب وحنون
تذكرت حبه لاخواته وكيف كان يضمهن ويقبلهن ويداعبهن ,, انت حنون ياخالد ,,, يارب اشفه ,,, لازم يتعالج عسى الله يكتب له الشفا
وانا بمعمعة افكاري وهواجيسي وبالورطة اللي ورطتها والطلب اللي طلبه ابو عبد الله احس راسي ثقيل ,,, ياربي شسوي ,,, ماراح القى احسن لخلود من خالد بحنانه وطيبته ,, انا شفت قدام عيني وهو يحن على اخواته ,,, واللي حنون على اخواته اكيد بيكون حنون على زوجته ,,, محمد رجال بس مادري كيف تعامله مع اهل بيته
يوم كنا ببيتنا الاول ,,, كنت اشوف محمد يركب اخواته معه السيارة ويروحون ,,, بس هذا مايعني انه حنون عليهم ,, كل الشباب يودون اخواتهم مو بس محمد وخالد اعرفه اكثر من محمد
خالد معي اربع وعشرين ساعة ,,, لو اللي خطبها صالح مو محمد اهون ,,, صالح اعرف كيف يفكر بس محمد لا
قمت وطلعت من الشقة رايح للمسجد اصلي العشا ,,, بس محمد وابوه ماجابوا لي سيرة ولا كلموني ,, المفروض يكلموني انا او على الاقل يكلمون عمي البخيل
لا يكون خلود فاهمة غلط ,,, يمكن ام محمد وام عبدالله يدعون لها بالزوج مثل الحريم الكبار وخلود فهمتهم غلط
طلعت من المسجد وانا ماسك الجوال بيدي ابتصل بامي يمكن كلمتها ام محمد اكثر رسميه من خلود ,, اتصلت بس رد علي زوجها النذل احمد ,,, افففف فاضيله هذا ,,, سكرت الجوال بوجهه وانا اكره اسمع صوته
ياربي وشلون الحين ,,, خالد مريض وشلون ازوج اختي لواحد عنده السرطان وانا عارف انه عنده السرطان
وشلون اصرف ابوعبدالله وولد اخته وشلوووون والاهم وشلون اصرف خالد من دون ماجرحه ومن دون مايأثر على علاقتنا
اتصلت على ابو عبدالله قبل ادخل العمارة
ابوعبدالله = الووو
انا مرتبك = السلام عليكم
ابوعبدالله = هلا خالد وعليكم السلام وشلونك وانا عمك .؟
انا مرتبك = اقول عمي ماتشوف انه بدري على خالد واختي ,,, خالد توه يدرس واختي بعد
ابو عبدالله = انا قلتلك اني كنت ابي اكلمك بالعطلة الطويلة يعني بعد مايتخرج خالد ,,, وقلتلك اني انا من زمان ابيها لخالد وكلمت امه وابوه يعني حنا مفكرين فيها من زمان وكنا نحتري العطلة بس ,, وحنا ماحنا مستعجلين ,, لو يتزوجون بعد سنة سنتين ,,, انا بس ابي اضمن ان خالد لاختك واختك لخالد
ابتسمت كذا حلو يكون خلود تخرجت من الثانوي بس تجري الرياح بما لا تشتهي السفن ,,, خالد مريض
انا = انت ياعم داري ان اهل محمد خطبوها لمحمد .؟
ابو عبدالله بعصبية = الله يلعن الشيطان ,, ام عبدالله تصرفت من دون ماتقولي هي عارفة اني ابيها لخالد بس هي همها عيال اخوها وبس ومايهمها ولدي خالد ,, وراحت من دون مادري لاختك وكلمتها قبلنا مع انها عارفة اني ابيها لخالد ,,, انا ياولدي ضربتها على تصرفها ,, ولو ماني مستحي من اخوها كان طلقتها
افففف والله بلشنا بابو عبدالله ومرته كل واحد همه مصلحة ولد اخوه ويعاندون بعض علشان عيال موب عيالهم ,,, فقدانهم لعيالهم الحقيقيين خلاهم يتعلقون بعيال موب لهم ,,, هذا مفكر بخلود من زمان لولد اخته وهذي تقدمت لخلود قبل زوجها وخطبتها لولد اخوها ,, كل واحد همه مصلحة ولد اخوه وبس واللي اكلها انا
ابوعبدالله = الوووو
انتبهت لابو عبدالله
انا مرتبك = آآآآ ,,, معك ,, بس يابو عبدالله الراي الاول والاخير لاختي واسمحلي اذا وافقت هي على اللي تقدملها قبل ولدك ,, واقولها لك من قلب خالد صديق وعزيز علي وماراح القى لاختي احسن منه ,,, بس اهل محمد سبقوكم
ابوعبدالله = شاور اختك والله يوفقها كانت لمحمد والا للغالي ,, مع السلامة
وماصدقت اني سكرت عنه ,,, دخلت الشقة ولقيت خلود جالسة بالصالة ,,, جلست بجنبها ناوي اكلمها بالموضوع قبل تجي امي ,,, الراي الاول والاخير لي ولخلود امي مالها دخل فيه
انا = آآآ ,, خلود مر اكثر من يومين على زيارة ام عبدالله وام محمد وماعلمتيني برايك ,,, يمديك فكرتي ,, صح .؟
حمر وجه خلود ونزلت راسها بقوة من الحيا
انا = هااه خلود وش رايك بمحمد .؟
منزلها راسها وتلعب باصابعها ,, انا بنفسي منحرج اتكلم معها بموضوع زي كذا ,,, ياليت ابوي موجود كان انا ارتحت
انا منحرج = خلود اكلمك انا
خلود وهي منزلة راسها = مثل ماتبي
انا منحرج = انت اللي وش تبين ,,, موافقة بمحمد والا لا .؟ قولي ايه والا لا .؟
نزلت خلود راسها اقوى ,,, شوي وتنكسر رقبتها
انا = ارفعي راسك وكلميني
خلود = ان شاء الله
انا = وش اللي ان شاء الله خلود .؟
رفعت راسها شوي
خلود بحيا = موافقة ( وسكتت شوي وبعدها كملت ) يعني فرصة اريّحك
قطبت حواجبي ماني فاهم شي
انا مستغرب = تريحيني .؟
نزلت راسها
خلود = اساعدك بمصروف البيت واريّحك من مصروفي ومصروف اخواني وان شاء الله بمهري اشتري لك سيارة وانا ابشتري لاب توب ( والتفتت لي ووجها احمر ) وبيت محمد قريب عندنا ابجيكم كل يوم واسوي الغدا والعشاء لكم
فتحت فمي منصدم
انا منصدم = تشترين لي سيارة .؟
خلود = ايه بمهري اقدر اشتري سيارة لك واشتري لاب توب واخليه هنا عندنا واشتري كلللللل شي نبيه
انا بحزن = يعني انتي موافقة على محمد بس عشان كذا
تلعب باصابعها
خلود بخجل = وش اسوي انت ماتقدر
جرحتني تبي تطلع من عندي عشان محمد يصرف عليها احسن مني ,,,, تبي تطلع من عندي بس عشان تشتري الاب توب اللي كانت تطلبه مني من زمان وانا رافض لانه مامعي
نزلت راسي بألم ومنجرح ,,, خلود طلباتها لنفسها قليلة وعلى قلها مالبيته لها
قمت بألم ورحت غرفتي وسكرت على نفسي ,,, انا بصعوبة اوفر طلبات الاكل والشرب والمدارس واهملت احتياجات اخواني الثانية ,,, خلود بنفسها متى اخر مرة شرت لبس جديد ,,, بالعيد اللي فات ماشرت ولا اخواني شروا ولا حتى انا ,,, بس انا كلها ثوب ابيض ومايميزون الناس هو جديد والا قديم بس خلود بنت ولبسها يختلف عنا ,,, وخلود بسبب حاجتها لحريم اكبرها منها صارت اجتماعيه وتشوف البنات
جلست على السرير وانا اتذكر يوم كنا ببيتنا الاول ,,, جتني خلود مرة وقالت ابي مكياج مدري مناكير مدري وش المهم شي تافه وخاص فيها انا يومها كنت شايل هم الكهربا والتلفون وعييت وماشريت لها اللي تبي وبعدها خلود صارت ماتطلب مني الا اغراض للبيت ,,, واثرها بنفسها الى الحين ,,, ايه وليه مايصير بنفسها ماهي تشوف بنات واكيد تشوف لبسهن واهتمامهن بنفسهم هذا غير صديقتها المتزوجه اكيد تشوف منها وتسمع
انسدحت على السرير ابي انام ابي اهرب من هالهموم ,,, خلود تبي تطلع من عندي وتفتك من العيشة اللي انا حارمها منها
خلود تبي تتزوج عشان تعيش ,, بكيت غصب عني ,,, تعيش .؟
تبين تتزوجين ياخلود بأي احد بس عشان تعيشين حياتك ,,, تبين تسوين مثل البنات ,,, تبين واحد يصرف عليك احسن مني ,, تبين واحد يشتري لك الاب توب اللي انا معيي عليه ,,, بس والله ياخلود مامعي ,, مامعي
انا بعد محروم ,,, ليش ياخلود ليش ,,, قمت ومسحت وجهي بيدي بعصبية ورحت لخلود بالصالة بس مالقيتها هناك ,,, ورحت لغرفتها ولقيتها جالسة على سريرها
انا بعصبية = خلود الى الحين تبين تتزوجين محمد .؟
نزلت خلود راسها بقوة مستحية ,,, فاضي لحياها هذي
رحت لها ومسكت شعرها وشديته عشان ترفع راسها وتطالعني
انا بعصبية = تبين محمد يصرف عليك ,,,, تبين لاب توب ياخلود ,,, طيب بشتري اللي تبينه ,,, بس زواج مافيه ,,, لا من محمد ولا من غيره ,,, سامعة ( وهزيت شعرها ) لا من محمد ولامن غيره ,,, ان اتصلت فيك ام محمد والا ام عبدالله قولي خالد عيا تسمعين والا اعيد .؟
وطلعت من الشقة معصب ,, مدري وين اروح ,,, جرحتني خلود ,,, اختي انا تبي تطلع من عندي باي طريقة
هه شكلها ماصدقت انها انخطبت ,, اكيد قالت فرصة اتخلص من خالد وبخله ,, واكيد اخواني مثل تفكيرها ,, وليش مايصيرون مثلها ,,, سالم من متى ماشريت له ملابس ,, وسلمى ومعاذ ,,, كلهم يبون يفتكون مني يبون يرتاحون مني ,,, ياخسارة والله ياخلود ياخسارة
اتصلت بابراهيم واخذت سيارته ,, ابروح اكد ,,, واكد واكد واكد واكد لين اجمع قيمة الاب توب واسد فم خلود فيه وارجع اكد واكد واشتري احتياجات اخواني الباقية ,,, اخواني يشوفون اقرانهم واكيد يصير بنفسهم ,,, سالم كم مرة طلب مني سيكل وكنت اعيي يأما اهاوشه والا احاول اقنعه بانه مامعي ,, وسلمى بعد ,,, انا كنت اهتم بالاكل والشرب وطلبات المدارس واغراض البيت المهمة ,,, الاشياء الصغيرة اللي يحتاجونها احرمها منهم ,,, بس والله غصب عني ,,, يعني هو على كيفي ياخلود
يوم السبت
رجعت الشقة الفجر وانا هلكان وتعبان طوال الليل وانا افرفر بالشوارع اروح لمحطة الباصات واروح اوصل من هالمسافرين ,,, ولحسن الحظ ان امس الجمعه واكثر المسافرين جايين من مكة واروح اوصلهم لبيوتهم وارجع مرة ثانية للمحطة واوصل غيرهم ,,, بس قيمة اللي وصلتهم ماتجيب اقل من ربع الاب توب ,,,
دخلت غرفتي من دون مامر غرفة خلود ,,, قومت سالم وانسدحت على سريري ونمت
= خالد خالد
افففف حتى من النوم محروم ,,, فتحت عيوني وشفت خلود قدامي وعلى طول تذكرت رايها فيني
خلود مستغربة = خالد مانت رايح للمدرسة اليوم .؟
انا بعصبية = مالك دخل فيني ,,, اذلفي روحي لمدرستك وخذي اخواني وارميهم عند جارتك
خلود بزعل = خالد وش فيك ,,, امس طلعت معصب ,,, ونمت انا وانت مارجعت ,,, واتصلت عليك ولا ترد
جلست ودفعتها بيدي
انا بعصبية = كلامي امس وصليه لامي وخليها تتصل بام محمد وتقولها خالد رافض ,, تسمعين والا بكف يطيرك الحين
خلود شوي وتصيح = طيب وشوله معصب علي ,,, وش سويت انا .؟ امس عورتني بشعري والحين تهاوشني ,, خلاص انت رافض وش دخلني انا تعصب علي
انا بصراخ = اذلفي
طلعت خلود من غرفتي ورجعت انا انسدح على سريري وانا اجاهد دمعتي ,,, وينك يبه ,,, محتاجك ,, شف خلود وين وصلت بتفكيرها بسبب الفقر والحاجة ,,, يبه خلود تبي ترتاح مني ,,, تبي احد يصرف عليها ويحسسها بانها مثل البنات العاديات
ليت خلود انطوائية ,, بس خلود بسبب حاجتها لام سعد ولجارتها صارت اجتماعيه واكيد تشوف ,,, هذا غير البنات اللي معها بالمدرسة
الساعة 9 الصباح طلعت من الشقة ورحت بسيارة ابراهيم اكد
بس بهالوقت مالقيت احد اوصله ,,, رحت للشركات والمستوصفات ادور على وظيفة بس كلهم يبون اقل شي ثانوي وكمبيوتر ,,, ياربي من وين من ويييين
رحت افرفر واي واحد اشوفه واقف بجنب الطريق اوصله ,, واذا ماشفت احد رحت للمطار عسى وربما فيه احد يبي توصيل
الساعة 10 في الليل
قررت ارجع للشقة واشوف اخواني ,,, طوال اليوم مامريت عليهم ولا تغديت ولا تعشيت معاهم ولا حتى اتصلت عليهم ,, خاصة خلود من المغرب وهي بس تتصل علي بس انا مطنشها
المشكلة سيارة ابراهيم من امس العشا الى الحين وهي معي ,,, مستحي منه لازم ارجعها له ,,, والمشكلة صالح مالي وجه اخذ سيارته وانا توني راد اخوه ,,, وسيارة خالد مرسيدس اخر موديل ماتصلح للمكدة ,,, وييييين واحد معاه مرسيدس جديدة ويكد ماتجي ,,, غير كذا رديته ,,, ماعندي الا ماجد اباخذ سيارته يوم ,,, وبعدها اباخذ سيارة ابو سعد يوم ,,, وطيب وبعدين منين لي سيارة اكد ,,, ليت عندي سيارة لي انا وبس
تذكرت كلمة خلود (بمهري اقدر اشتري سيارة لك ) تنهدت بحزن ماعمري شكيتلها ليش فكرت بهالشي ليييييش ,,, يااارب افرجها علي ,,, ابي احصل وظيفة ,,, بس من وين
رجعت سيارة ابراهيم له ورحت لماجد واخذت سيارته ورجعت لاخواني
دخلت الشقة ووقفت بمكاني منصدم ,,, امي وزوجها جالسين بالصالة
امي حاضنة خلود وعلى ملاحمهم آثار الصياح
انا منصدم = يمه
قامت امي وهي تبكي ,, وانا مطير عيوني فيها ,,, امي تغيرت ,,, تغيرت مرة نحفانه اكثر من قبل ,,, وجهها ماهو الوجه اللي راحت من عندنا
امي = ياحبيبي يابنيي ,, يسلملي هالطول يسلملي هالوش ماحلاه
طلعت دموعي غصب عني ,,, ذكرتني بحياتنا قبل ,,, ذكرتني بابوي ذكرتني بحياتي يوم كانت بدون هموم
ضمتني امي وهي تقبلني وترصني لحظنها ,,, لفيت يديني حوليها وانا ابكي ,,, ابي اشكيلها همي ,,, آآآه يمه حرمتيني من حظنك سنة كاملة ,,, ليه رحتي وخليتينا ,,, يمة فهمي خلود فهمي اخواني فهميهم قولي لهم كل شي غصب عني
امي وهي تبكي = ليه تأخرت تؤبرني ,, عم اتصل عليك مابترد ,, خفت عليك كتير
انا بحزن = انتي خليتيني سنة كاملة يعني ماخفت علي الا الحين
زاد بكا امي اكثر
امي = ليش مابدك تفهم عليي
ابتعدت عن امي شوي والتفتت للرجال الجالس ,, لابس بنطلون وكرشته قدامه ويطالعنا
احمد = وهي امكون اجيت لعنكون ( وقام ومد يده لي ) كيفك خالد .؟
صافحته شوي وسحبت يدي على طول ,,, كارهه وكاره شوفته
مسكت امي يدي وجلسنا ,, وسالم وسلمى جالسين مؤدبين وماسمعت صوتهم ابد ماهم على خبري ومعاذ جالس بحظن سالم ويطالع بالحرمة الغريبة
يوم الاحد
رجعت من المسجد الفجر ورحت لغرفتي واخذت مفتاح سيارة ماجد وطلعت من الشقة قبل يشوفني احد ,,, ابرجع اكد ,,, اللي مثلي مايستحقون الدراسة ولا اعلى الشهادات
رحت اهيم على وجهي بالشوارع وهالمرة وصلت زباين خارج المدينة المهم احصل فلوس وبس
المغرب قررت ارجع للشقة ,, امي بتصير عندنا يومين ,,, المفروض اجلس معها خاصة انها تتصل علي طوال اليوم ارد عليها واقولها مشغول تاخذ ساعة ساعتين وترجع تتصل علي مرة ثانية واقولها الحين اجي تاخذ ساعة ساعتين وترجع تتصل ,, اتصل علي ابراهيم وكعادته يسأل عني اذا غبت عن المدرسة واجد ,,,
القيت نظرة على جوالي ,,, الا خالد ماتصل علي ,,, هذا اللي خايف منه ,,, علاقتنا تتأثر بعد الخطبة ,,, من يوم الجمعة الى الحين ماتصل علي ولا جاني
بالعادة يتصل علي باليوم اكثر من عشر مرات ويجي عندي بالشقة ويسهر معي او نطلع نتمشى ,,, حتى انا مالي وجه اتصل عليه او اشوفه وانا ابرده ياربي وشلون ارده بلباقة ومن دون اجرحه ,,, وشلون افهمه تفكير اختي الغبي ,,, خلود ماتصلح تتزوج الحين ,,, ( تنهدت ) مع ان ابو عبدالله قال ماهم مستعجلين يعني تبقى سنة سنتين لين يكبر عقلها ,,, مع اني ماعتقد انه بيكبر ,, حتى لو كبر ,,, خالد مريض ,,, مرض الله اعلم وحده هو بيشفى منه والا لا
دخلت الشقة ,,, وجا بوجهي النذل
احمد = شوووو جيييت ,,, انت هيك بتترك ضيوفك يوم كامل .؟
انا بكره = مالك دخل
دخلت غرفتي وانا متضايق بس لاحظت على غرفتي مرتبة وسريري مرتب ,,, رفعت حواجبي مستغرب خلود ماعمرها رتبت غرفتي ,,, جلست على السرير وانا تعبان
شوي ودخلت علي امي
امي بفرح = اشتئتلك كتير حبيبي ,,, ليش مااجيت تتغدا معنا ,,, بدكياني احطلك اكل هلأ
انا بحزن = مابي منك شي
سكت امي شوي وبعدها راحت وسكرت الباب وجلست بجنبي على السرير
امي بصوت باكي = قسوتك معي عم يئتلني ,,, خالد واللهي لا ليلي ليل ولا نهاري نهار عم ابكي بدل الدمع دم عليكون
سكتت عنها ومارديت
امي = خالد صدئني انا كل يوم بئول لاحمد بدي اشوف اولادي بس هوا دايم بيئول بعدين بعدين ,,, ولما جينا للسعوديي بالشرئية طلبت منو مليون مرة اني اشوفكون ولو من بعيد لبعيد بس كان عنا مشكلة السكن ولهلأ مالئينا سكن ,, السكن بالدمام اسعارها مرتفعه وبالاخير سكنا مع واحد صاحبو هوا ومرتو
انا بسخرية = تصطفلي منك إلوه
سكت امي شوي بعدها غطت وجهها بيديها وبكت
ابكي يمه ياما حنا بكينا
مدري كم مر على امي وهي على هالحال
انا = علمتك خلود برايي بموضوع زواجها .؟
حاولت امي تهدا شوي وبعد محاولات ردت علي
امي بحزن = ليه مابدكياها تتزوج محمد ,,, محمد شب منيح حرام تفوت عليها فرصة هيك
انا = رايك مو مهم
امي بصوت باكي = ليش خالد انا إمها ( وبكت )
انا = والام تترك بنتها سنة كامله
امي بصراخ = ليش مابدك تفهم ليش
انا = يمة ردي على ام محمد وقولي لهم رايي
امي = شو ذنبها خلود من شان ترفض هيك شب منيح
انا = يكون بعلمك تقدم لها واحد غير محمد واحسن منه بعد وانا رافضه
امي بصدمة = شووووو ,,, مين ,,, وليه رافضو كمان .؟
انا = كذا مزاج
امي بصوت باكي = خالد حرام عليك اختك شو ذنبها يضيع مستئبلها هيك
انا = خلود اجتماعية واهتمامها فينا خلا الناس يعجبون فيها يعني مستقبلها ماراح يضيع ان شاء الله
امي = ولنـ
انا بضيق = يمه ردي على الناس وبس
امي = فهمني ليه ,, شـ
انا بعصبية = ردي على الناس وبس
امي بحزن = مثل مابدك تؤبرني ,, المهم رضاك عليي ,, واختك إلها الله
التفتت لامي
انا بحزن = يمه انتي ماتعرفين خلود ,,, ماتعرفينها اكثر مني ,,, يمه خلود محرومة وتبي بأي طريقة ترتاح مني وتعيش حياتها
ماقدرت امنع دموعي ورميت نفسي بحضن امي ابكي الهم ,,, ابكي الحرمان
انا بصوت باكي = يمه انا تعباااان
مر وقت لين هديت وبعدها طلعت من الغرفة بعد ماجبت لامي التلفون عشان تتصل على ام محمد
وجلست بالصالة اللي كان فيها النذل يتفرج على التلفزيون
احمد = شووو وين قناة سوريا .؟
انا = مشفره وان شاء الله اشفرك انت
التفت لي
احمد = خالد هاي الشقة ملك والا مستاجرها
انا = مالك دخل
احمد = الصراحة انتو يالسعوديين مايصعب عليكون شي ,,, كيف ئدرت تشتريها .؟
انا بعصبية = ياخي انت تفهم والا ماتفهم ,,, قلتلك مالك دخل يالتيس
سكت وعيونه تدور على الشقة
الاثنين
طوال النهار وانا اكد خارج وداخل المدينة ومارجعت الا العشا
دخلت الشقة ودخلت المطبخ عشان اشرب ماء ولقيت خلود بالمطبخ
خلود = خالد امي تسـ
ودفعتها بيدي قبل تكمل كلامها
انا بعصبية = ابعدي عن وجهي
وفتحت الثلاجة وشربت ماء وطلعت من المطبخ ,,, وعيون خلود تتبعني وساكته
جلست بالصالة وانا محتار مدري وشلون ارد على ابو عبدالله برايي ,,, اروح له لبيته والا اتصل فيه ,,, ياربي منحرج منه ,,, اخاف يزعل مني وهو بمثابة ابوي واعزه
والا اروح له بالمسجد ,,, لا وش بالمسجد فيه احد يتكلم بمواضيع مثل هذي بالمسجد
والا اخلي احمد يرد عليه ,,, عشان اذا زعل ابو عبدالله تجي الفلعة على احمد
افففف والله مدري وش اسوي ,,, طيب اتصل وش اقول ,,, ولدك معه السرطان ,,, والا اقول خلود موافقة على الزواج بأي احد عشان تشتري لي سيارة والا اقول له خلود موافقه عشان تشتري لاب توب
( تنهدت ) حسبي الله على اللي اخترع الاب توب بس ,,, لو اعرف منهو ,,, كان علقته بالمروحه واشغلها على اعلى شي واخليه يفر يفر يفر لين يدوخ عشان مرة ثانية مايخترع شي
دخل احمد الشقة جاي من برا
احمد = شوووو جييييت
انا بعصبية = وانت كل ماشفتني قلت شووو جيت ,,, وانت وش عليك جيت والا رحـ
وسكتت فجأة ,, صح هذا وشلون دخل الشقة بدون مايطق الباب
انا مستغرب = هييييه انت تعال ,, كيف دخلت الشقة من دون ماتطق الباب
احمد = بالمفتاح شو يعني
انا مستغرب = من وين لك المفتاح
احمد = افوت واطلع زي مابدي
انا بصراخ = على كيف ابوك هو
احمد بسخرية = لأه على كيفي انا ( وجلس على الكنب )
انا بعصبية = انت مو تقول بتاخذون يومين بس ,,, اشوفك طولت ,,, السبت والاحد والاثنين ثلاث ايام مروا عليكم
احمد = وغيرت رايي بمزاجي ,,, بدنا نطول اكتر ,,, شووو مابدك إمك تبئى معكون
انا = امي حياها الله بس انت لا حياك الله ,,, هات المفتاح ,,, الشرهة مو عليك الشرهة على اللي عطاك المفتاح
احمد بغرور = شئة امكون شئتي ,,, وعم افكر نسكن هون احسن ,, هونيك الاجارات غالية كتير
قمت معصب
انا = نعم .؟
احمد ببرود = أيي الشئة حلوة كتير صح ضيئة وصغيرة بس حلوة ,,, واذا كان على شغلي ,,, انا مدرس انجليزي والمدارس الاهلية هون كتير
عصبت اكثر ببروده وهجمت عليه وحاولت اخذ المفتاح منه
وانا اقوووول ليش يسألني امس عن الشقة اثره طمعان فيها ,,, يوم مالقى شقة هناك جاي طمعان بشقتنا ياخذها جاهزة مجهزة
انا بصراخ = هات المفتاح ياكلب
قعدت اضربه على صلعته وانا راكب فوقه وهو يضربني على وجهي ,,, وقعدنا نتهاوش لين تدخلت امي وخلود بينا
احمد بعصبية = شووو ئلة الادب هااي ,,, بدك مين يربيك
انا بصراخ = تبي كل شي جاهز ,, حارمنا من امي سنة ياتيس والحين يوم شفت المصلحة عندنا جيت ,,, اطلع وخذ مرتك معك مابي اشوف رقعة وجهك
خلود بصوت باكي = خالد
امي بصوت باكي = خالد مستعدة اشتغل خدامة عنكون بس لا تألعني من هون ,,, انا ماصدئت اني شفتكون
احمد بعصبية = اذا طلعت انا بحرمكون من امكون طول العمر
انا بصراخ = قصر الله عمرك ( وهجمت عليه مرة ثانية )
وبصعوبة فرقوا بينا امي وخلود
وبدل مانتعشا راح ليلنا كله على الهواش بيني وبين هالنذل ,,, طلعت من الشقة معصب واخذت سيارة ماجد وصرت اهيم بالشوارع ,,, متضايق ,, وجوالي ماسكت من اتصالات امي بس انا مطنشها ,,, احس اني وحيد ,, احس اني ضايع ,, ابي ارتاح ( وقفت السيارة ورا احد المكتبات ونزلت راسي على الدركسون ) امي شخصيتها ضعيفة ومالها كلمة وخلود انا زعلان عليها وصاير ماكلمها ,,, احس ابي اشكي لاحد ,, احس ابنفجر ,,, خالد اقرب صديق لي تأثرت علاقتي معه بسبب الخطبة ,,, احس ابي افضفضله ,,, ليش صار مايتصل علي ,,, ليش صار مايمرني الشقة مثل دايم ,,, انا ماقدر اروح او اتصل عليه ماقدر ,, ابي اشكيله ,,
رفعت راسي وطلعت جوالي ابتصل على ابو عبدالله وافتك من هالسالفة ,,, خربانة خربانة ,,, يكفيني هم المصروف ,,, يكفيني تركت دراستي بسبب اخواني ,, ماني فاضي اشيل هم ابو عبدالله وزعله اتصل عليه وافكت من هالسالفة احسن
شوي وجاني صوت ابو عبدالله
انا بحزن = الووو السلام عليكم
ابو عبدالله = هلا هلا وعليكم السلام ,,, هلا بخالد ,, وشلونك وشلون اخوانك .؟
انا = طيبين وشلونك ياعم
ابو عبدالله = طيب جعلك طيب
سكتت شوي مدري وشلون ابدا معه بالكلام
انا مرتبك = آآآ ,,, عم ( وسكتت )
ابو عبدالله = هلا خالد
انا مرتبك = اسمحلي ياعم بس بغيت اكلمك بالموضوع اللي جيتني عشانه ( وسكتت)
سكت ابو عبدالله يحتريني اكمل
انا مرتبك = آآآ ,,, البنت تبي تكمل دراستها ياعم وماهي مستعدة للزواج الحين
ابو عبدالله = وانا قلتلك ماحنا مستعجلين ,, بس خطبة والزواج بعد سنة سنتين ,, انا بس ابي اضمنها لولدي
تنهدت مدري وشلون اصرفه ,,, بعد سنة سنتين مناسب تصير خلود تخرجت وعقلت عن تفكيرها الزفت بس خالد مريض ,,, ولدك مريض يابو عبدالله
انا مرتبك = آآآ ,,, البنت الحين ,,, آآآ ,,, ممـ ,,, ماهي مستعدة وووو ,, وبعد سنة سنتين لها ألف حلال ياعم
ابو عبدالله = اخاف تنخطب قبلنا مثل ماصار لنا مع اهل محمد
والله البلشة ,, وشلون افهمه ان لا خلود ولا خالد مستعدين للزواج الحين
انا = لا اتطمن ياعم
سكت ابو عبدالله شوي ,,
ابو عبدالله = الله يكتب اللي فيه الخير ياولدي ,,, مع السلامة
انا = مع السلامة
وسكرت عنه ,, مدري ليه حسيت انه زعل علي ,,, او انا صاير حساس بزيادة
القت نظرة على جوالي وفتحته على اسم خالد وصرت اطالعه ,,, مدري ليه احس صداقتي بخالد انتهت
الساعة 1 في الليل
رجعت السيارة لماجد وبعد ماسلمته المفتاح
ماجد = خالد لك تقريبا اسبوع غايب عن المدرسة ,, ليه فيه شي .؟
نزلت راسي بألم
انا بحزن = ابفصل عن الدراسة ماني مكمل
ماجد بصدمة = وش ,, صاحي انت قربت الامتحانات وماباقي الا ترم ونتخرج
انا بتنهيدة = مع السلامة
ماجد = اصبر خالد صحيح بتخلي المدرسة .؟
انا بحزن = ماجد انا مشغول مع السلامة
ورحت وخليته وانا افكر كيف اخذ سيارة ابو سعد ,,, بس انا تعبان لي اكثر من ثلاث ايام وانا افرفر بالشوارع بدون راحة ودي ارتاح من الفرفرة لو يوم ,,, الحين الوقت متأخر اطلب من ابو سعد السيارة بكرة ان شاء الله ,,, الله يعين
يوم الثلاثاء
قمت على همهمات امي ومسحها على شعري
امي = حبيبي تعبت وانا عم اصحيك ,,, ئوم حبيبي لا تتاخر عن مدرستك
انا = موب رايح
امي = ليش تؤبرني ,, تعبان .؟
انا = لا بس مالي نفس
امي = زي مابدك حبيبي
وطلعت من غرفتي ,,, قمت ورحت للصالة ولقيتها مجهزة الفطور لاخواني قبل يروحون لمدارسهم ,,, ابتسمت ماحنا متعودين على الفطور
رجعت للسريري وانسدحت بس تفاجأت بامي تدخل علي وجلست على السرير وهي ساكته وكأن بنفسها كلام
انا = تبين شي يمه .؟
امي = سلامتك حبيبي بس ,,, آآآ ,, ( وسكتت )
انا = بس وش .؟
امي = خالد اختك عم تشتكي منك تئول صار خالد مايحب يشوفني ,, ( ومسكت يدي ) حبيبي اختك مالها غيرك
انا = وانا من لي .؟ اذا كانت خلود تعبانة انا تعبان بعد
امي = من شو تعبان تؤبرني احكيلي
اخذت نفس وغطيت نفسي باللحاف
انا بحزن = يمه اطلعي ابي انام
سكتت امي شوي وبعدها طلعت منكسرة
العصر
كنت جالس بالصالة واتهاوش مع احمد على التلفزيون هو يبي على قناة وانا ابي على قناة ثانية عناد له ,,,, اليوم ماطلعت عشان اكد وماقمت من النوم الا الظهر مظطر اروح بعد المغرب لابو سعد واخذ سيارته
رن جوالي والقيت نظرة عليه ( ابراهيم يتصل بك )
حطيت الريموت تحتي عشان ماياخذه احمدوه
انا = هلا ابراهيم
ابراهيم = حنا عند الباب افتح
تفاجئت
انا مستغرب = طيب ثواني ( واخذت الريموت ورميته على احمد ) لا تجي المجلس وتفشلني
احمد بعصبية = شو افشلك مافشلك هاي .؟
فتحت الباب لابراهيم وتفاجئت بصالح وماجد معه
سلموا علي وبعد ماسلم علي صالح همس باذني
صالح بهمس = لما رديت اخوي زعلت بس بعد مارديت خالد رضيت
ضربت ظهره على خفيف وهمست باذنه
انا بهمس = مدري متى بتعقل انت
جلسوا الشباب بالمجلس
رحت للمطبخ وقلت لامي تسوي القهوة للشباب ورجعت وجلست عندهم بالمجلس وانا متضايق ,,, ليش خالد ماهو معهم ,,, وينه ,,, اكيد ابو عبدالله علمه بردي واكيد زعل وشال بخاطره مني
تنهدت بحزن ,,, اكيد بيشيل بخاطره صديقه رد قربه ,,, أي واحد بيزعل اذا احد رده كيف عاد اذا جا الرد من اقرب صديق
ياربي وش النذالة اللي فيني ,, بدل ماوقف معه وارفع معنوياته وخفف عليه مرضه ,,, اقوم ازيده ,,, اقوم احبطه اكثر ,,, يكفي انه يائس ,,, معقول انتهت الصداقة خلاص ,,, رفعت راسي لصالح وانا اجاهد دمعتي
انا بحزن = ليه خالد ماجا معكم .؟
ابراهيم = افااااا هذا وانا اقول انتوا احلا ثنائي ,,, المفروض حنا نسألك عنه
تلعثمت مدري وش اقول بس اشوى تدخل صالح بالوقت المناسب
صالح = آآآ ,, خالد طلع مشوار من الساعة 2 الظهر والى الحين ماجا
ابراهيم = خالد صحيح اللي قاله ماجد .؟
ماجد بعصبية مزح = هيييه ابراهيمووووه افهم من سؤالك انك مكذبني
انا بحزن = ظروف ماقدر اكمل
صالح = خالد ماباقي شي كيف تخليها بهالوقت
ماجد = خالد علمنا السبب اللي تخلي مدرستك عشانها يمكن نقدر نساعدك
ابراهيم = عشان الوظيفة صح .؟
هزيت راسي باية
ماجد = ولقيت .؟
هزيت راسي بلا وانا شوي وابكي
ابراهيم = خالد الرزق عند الله وتركك للمدرسة ماراح تفيدك بالعكس تضرك
صالح = ارجع ارجع بس لشوتك
ماجد = والله لـ
ودخل احمد علينا المجلس
تفاجئوا الشباب منه خاصة انه سوري وجاي من داخل البيت
انا بحزن = هذا زوج امي احمد
سلموا عليه الشباب وانا اطالع احمد بحقد ,,, قلت له لا يجي المجلس وجا عناد لي ,,, بسيطة ياحمدوه
جاملوه الشباب شوي وسولفوا معه بس احمد وجهه لوح عيا يروح ويخلينا براحتنا ,,, وانا احس بالشباب ودهم يتكلمون معي ويحترون احمد يطلع ,,, لين اذن المغرب وهو ماطلع بالاخير استاذنوا الشباب وطلعوا
بعد صلاة العشا بفترة بسيطة
احمد كل شوي ويسألني عن الشباب ,, هذا مين وهذاك شو اسمو ,, على قولته يبي يتعرف على الشباب السعودي عن قرب
انا بكره = مالك دخل ياخي ولا تسأل بشي مايعنيك ,, وان شفتك دخلت المجلس والشباب عندي ,,, وريـ
احمد بعصبية = واذا دخلت عليكون شو بتساوي يعني .؟
انا بصراخ = بطردك من شقتي ,,, ولا بارك الله فيك وباللي اخـ
وانتبهت لنفسي قبل اكمل والتفتت لامي
امي بحزن = وباللي اخدتوه
سكتت متضايق
فجأة رن جوالي ,,, القيت نظرة عليه ( خالد يتصل بك )
طالعت اسمه الظاهر بجوالي وابتسمت بفرح ,,, اخيرا خالد اتصل علي ,,, من زمان عنه ولا ادري وش اخباره
انا بفرح = هلا والله
خالد = هلا فيك ,,, السلام عليكم
انا = وعليكم السلام والرحمة ,,, عاش من سمع صوتك يالقاطع
خالد = عاشت ايامك يالواصل
ابتسمت قالها بلوم ,,, معه حق انا بعد قاطع
خالد = يقولون بتخلي المدرسة
انا = من علمك .؟
خالد = انزل تحت انا عند العمارة
انا = وليش ماتجي للشقة .؟
خالد = هاااه لا لا انت انزل
بالعادة مادري عنه والا وهو يطق باب شقتي ,,, الحين ليه مايبي يجي
خالد = يله خالد انزل احتريك
انا بتردد = مانت زعلان مني .؟
خالد = الا زعلان ومعي عجرا عشان كذا اقولك انزل ودي ادبجك
تنهدت انا اكلمه جد و هو يمزح
انا = يله ثواني
وسكرت عنه ,,, وقمت
امي = شووو بتطلع هلأ .؟
انا = انا سنة كاملة وانا حر بطلعاتي ,, رجاء لا تسألين مرة ثاانية
نزلت امي راسها بانكسار
وصلت عند الباب ,,, بس سمعت احمد يكلم امي
احمد = هادا خالد اللي بتحكيلي عنو ,,, اشوفو ماعم يحترمك
رجعت للصالة معصب
انا بعصبية = وهذا احمد اللي فضلتيه علينا ( والتفتت لاحمد ) اذا ماعجبك اسلوبي اطلع من شقتنا
وطلعت من الشقة وامي تتراجني ماطلع وانا معصب
نزلت وشفت خالد يحتريني بسيارته ولما شافني نزل ,,, لابس جنز وبلوزة زيتيه
انا بفرح = هلا خالد
خالد بابتسامة = هلا فيك
وسلمت عليه وبعد ما اصر علي ركبت بمكان الراكب رايحين للمطعم ,,, اخذنا نص الطريق وحنا ساكتين
خالد = خالد صحيح اللي سمعت ,, ليش تبي تترك المدرسة ,,, ماباقي شي
كنت عارف انه ماجا عندي الا عشان هالموضوع
انا = ابوعبدالله علمك بردي عليه .؟
سكت خالد شوي
خالد = ايه علمني امس
انا = خالد انت رجال والنعم فيك ,,, والرفض والله لاسباب ثانية ( والتفتت له )
خالد بحزن = ومرضي احد الاسباب
وشلون افهمه تفكير خلود وشلون افهمه ان خلود تبي تتزوج بس عشان ترتاح مني ومن بخلي عليهم
انا = خالد لا تفهم الرفض غلط ,,, صدقني فيه اسباب ثانية
ابتسم خالد ابتسامة جانبية
خالد = اسباب ثانية ,,, يعني مرضي السبب الاول
انا بحزن = يعني انت زعلان .؟
حرك خالد اكتافه وهو يسوق
خالد = زعلت بس بعد ماتذكرت اني ناقص قلت خالد معذور وشوله ازعل
تنهدت بألم ,,, يائس وانا زدته يأس على يأس
انا بحزن = خالد انت مانت ناقص صـ
خالد بعصبية = المرض نقص ,,, ماني بزر عشان تاخذني على قد عقلي ( واخذ نفس يهدي نفسه ) المهم انزل وصلنا المطعم ( ونزل )
نزلت معه وانا متضايق ,, هذا اللي كنت خايف منه ,,, نفسيته تتعب اكثر وبسببي انا ,,,
صح انا مارديته هو وبس رديت حتى محمد ( لحقت خالد قبل يدخل المطعم ومسكت يده ) وابتسمت كأني لقيت حبل نجاه
انا بابتسامة = انا رديت محمد بعد مارديتك انت بس
خالد وهو يهز راسه بايه = ادري
انا = هذا دليل ان عندي اسباب ثانية ,,, مو بسبب مرضك بس
خالد = خالد قلتلك لا تاخذني على قد عقلي ,,, وصدقني انا ماني زعلان منك واي واحد بمكانك بيسوي مثلك ( وحط يده على كتفي ) ورفع الله مرء عرف قدر نفسه ,,, وقدري اقل من اني اتزوج
انا بضيق = ليش تبي تقلل قدرك غصب
طالعني خالد شوي وبعدها دخل المطعم وتركني
وحنا نتعشى
خالد = خالد ماقلتلي ليش خليت مدرستك
انا = اللي علمك اكيد علمك بالسبب
خالد = ايه ابراهيم قال عشان وظيفة ومدري ايش ,,, بس ياخي اشوفه سبب تافه والا وش رايك .؟
رفعت راسي وانا رافع حاجب واحد
انا = سبب تافه .؟ ليه تشوف الوظيفة سبب تافه
خالد = ايه لأنك اذا خليت المدرسة وماحصلت على شهادة الثانوي بتظل على حالك طول عمرك ,,, وماراح تحصل على وظيفة
نزلت راسي بحزن
انا = وش تبيني اسوي ,,, غصب عني ماهو على كيفي
خالد = طيب وين مكان شغلك الحين .؟
انا = مالقيت شغل الى الحين
طير خالد عيونه فيني
خالد = وشلون مالقيت شغل وانت تقول تركت المدرسة عشان الوظيفة .؟ وين الوظيفة اللي تركت المدرسة عشانها
انا بحزن = اكد من الفجر الى اخر الليل
خالد = اسمع خالد وخل عني خبالك على جنب ,,, تذكر يوم اقولك وش رايك تجرب التجارة وانا بساعدك ,,, خالد انا عند وعدي ,,, بس انشغلت بمشاكلي وانت عارفها
انا بألم = خالد لا تتطنز علي ,,, وشلون تبيني اجرب التجارة وانا مامعي شي
خالد = وماحد طلب منك شي ,,, محل صغير نفتحه انا وانت ونحط لنا اقرب عامل وصلى الله وبارك
انا بزعل = انت مانت محتاج للمحل الصغير على قولتك ,, تتصدق علي ياخالد
لف بوجهه عني بضيق
خالد = لا إله إلا الله ,,, ان جيناه يمين جانا يسار وان جيناه يسار جانا يمين ( والتفت لي ) صح انا ماني محتاج للمحل بس ماني مخليه لك لحالك ,,, النص بالنص ,,, انا افتح المحل واجهزه وانت عليك ادارته
انا بزعل = الحين انت اللي تاخذني على قد عقلي ,, وشلون تقول علي ادارته وانت تقول بنحط عامل
عصب خالد ونزل نظره على الطاولة واخذ الملعقة ورفعها علي بتهديد
خالد بعصبية = عز الله ربحنا ,,, ياخي تبينا نخلي العامل يسرح ويمرح بالمحل لحاله اكيد لازم واحد يتابعه ويشرف عليه ,,, واللي بيتابعه انت مو انا ,, فهمت والا بالملعقة الحين
ابتسمت ونزلت راسي
والله لولا الحاجة كان ماقبلت
انا بحزن = مشكور خالد قسم بالله ماستاهلك ,,, انا اردك وانت توقف معي
خالد = اول شي انا وعدتك من زمان اني اساعدك بالتجارة ,, ثاني شي انت معذور بردك لي ,,, وماحد يقدر يلومك ,,, وماحد يبي يرمل اخته بعز شبابها ,, انا لو اني بمكانك وجاني واحد يخطب اختي وانا اعرف انه عنده السرطان ,,, رديته وشتّه برا بيتي بعد ,,, انت على الاقل ماشتّني ( وابتسم )
انا بصدق = قسم بالله ماراح القى لاختي واحد احسن منك
ابتسم خالد برضى
خالد بابتسامة = تسلم ( وسكت شوي كأنه يفكر ) اقول خالد
انا مستغرب = هلا
خالد = بنفسي سؤال ومستحي منك ,,, هو الصراحة فضول بس اذا كنت ماتبي تجاوبني عادي
انا = افااا عليك خالد وليش ماجاوبك ,,, وش تبي تسأل عنه .؟
خالد = آآآ ,,, احم ,,, يعني اسمحلي على هالسؤال ( وطالعني ) ليش رديت محمد .؟ ادري مايحق لي اسأل بس مجرد فضول
نزلت راسي وسكتت ,, اقوله خلود تبي تتزوج بس عشان تلقى احد يصرف عليها احسن مني والا اقوله خلود تبي تتزوج عشان هي تصرف علي وتشتري لي سيارة ويمكن اخواني الباقين مثلها يحترون اليوم اللي يرتاحون مني فيه
انا بحزن = اصعب شي يوم تشوف اقرب الناس لك وهم يتمنون بعدك بسبب فقرك
ماسمعت رد من خالد ورفعت راسي له ولقيته يطالعني وهو مستغرب
خالد = اقرب الناس لك اخوانك ,, واخوانك باقي صغار,,, تقصد اختك .؟
لفيت وجهي عنه وسكتت ,,, تهورت ياليتني ماقلتله ,,, مادريت اني شفاف لهالدرجة
ماكرر خالد سؤاله وقام وطلعنا من المطعم
وحنا راجعين للشقة ,, التفتت لخالد اللي قاعد يسوق
انا = خالد وش صار على ناصر .؟
خالد = يقول فايز بعدهم يراقبونه يقولون كل ماطلع من دوامه راح لعيادتي
انا مستغرب = ليش .؟
خالد = يقولون يروح لمدير العيادة اللي هو وينلي يقعد عنده شوي ويروح ,,, تصدق انا الصراحة عفت العيادة بسبب وينلي والمشاكل اللي فيها بس عناد لناصر ماني مخليها له ياخذها جاهزة واذا مرة مرة غلبني ابحط على العيادة ديوووون وبعدها اسلمها له عشان يتورط فيها هههههههه تفكير غبي صح .؟
انا = ووش صار على رواتب الموظفين .؟
خالد = اقنعني سلطان امشي رواتبهم ومشيتها
انا = ووش صار على بدر وربعه .؟
خالد = رحت لابو سامي يوم الاحد ويقول راح يحكم عليهم سنه مع التعهد
انا = ماشاء الله اليوم علومك تسر ,,, بس ماتلاحظ ان سنة سجن شوي ,,, ابو خلّود اخاف اذا انتهت السنة يتعرضون لك مرة ثانية
خالد = ماندري يمكن اموت قبل تنتهي السنة
انا بضيق = اففففففف انت لو الله يفكنا من اليائس اللي انت عايش فيه ( وكملت بعصبية ) كلنا ماندري حنا نعيش لبعد سنة والا بعد مية سنة ,,, ياااخي انا اللي مافيني شي يمكن اموت قبلك وش رايك
خالد = موت احد ماسكك
انا = طالع ,,, انا اقصد ان الاعمار بيد الله
خالد = وانا قايل غير كذا
انا = ايييييييه ياااخي اقصد وشوله هالتشائم اللي انت عايش فيه
خالد = حتى انت قبل شوي تشائمت وقلت يمكن اموت قبلك
مديت يدي وضربت راسه من ورا
انا بعصبية = سق وانت ساكت ,,, اصلا الكلام معك ضايع
وصلني خالد للشقة ونزلت
خالد = بكرة رح لمدرستك ,,, ترا ابسأل ابراهيم اشوف انت رحت والا لا .؟
انا بعصبية = وش شافني عندك بزر تكلمني بهالطريقة
خالد بابتسامة = ايه ,,, ولا تنسى فرش اسنانك قبل تنوم ( وريوس بالسيارة وراح )
ابتسمت وانا اطالعه من بعيد الله يشفيه ,, طلعت من الشقة وانا الدنيا صغيرة بعيني من الهم ورجعت وانا مرتاح ومتطمن ,,, ماحس بالراحة الا معه ,,, ليتني اقدر ارد لك الجميل ياغالي
دخلت الشقة وانا مستانس ولقيت امي جالسة بالصالة لحالها وتحتريني
انا مستغرب = يمه
امي = كنت عم انتزرك ,,, طلعت من عنا معصب وخفت عليك
تلفتت
انا = وين احمدوووه .؟
امي = راح ينام
جلست بجنب امي
انا = يمه بنفسي شي ودي اقوله لك
التفتت امي لي وهي فرحانه اني ابسولف معها
امي بفرح = ئول حبيبي انا كلي إلك عم اسمعك
انا = يمه فيه واحد عزيز علي وقف معي باصعب الظروف ,,, بالوقت اللي انتي تخليتي عني وعمي ابو مشعل تخلا عني ,,, بس هو الوحيد اللي وقف معي وساندي ,,, الشقة هذي هو اللي استاجرها ,,, ستر علي وعلى اخواتي ,,, ساعدني بطلبات اخواني والعابهم ,,, والحين يبي يستاجر محل عشان القى رزقي ورزق اخواني ,,, يمه انا صرت ماحس بالامان الا معه ,,, تصدقين مر اربع ايام بس ماشفته فيهن ولا سمعت صوته ,,, حسيت بالاربع الايام هذي اني ضايع حسيت اني محتاجه وابي افضفضله مع انه هو غارق بمشاكله ,,, بس هو ماهو اناني مثلكم الى الحين يساندي ويساعدني مع اني رفضته يتزوج اختي
امي = وليش رفضتو يابنيي
نزلت راسه = لاني نذل يمه
امي = شو
انا بصوت باكي = لأن عنده السرطان يمه
شهقت امي وحطت يدها على صدرها
امي = الله يشفيه ويصبر امو
انا بتأنيب ضمير = هو يوقف معي وانا اخذله ,,, يمه تكفين ادعيله يمكن الله يستجيب دعاك
امي = الله يشفيه ويصبرو ,,, شو اسمو .؟
انا بحزن = خالد
مر اسبوعين وانا وخالد نطلع العصر شبه يومي ندور على محل مناسب لين اخيرا لقينا وقررنا يكون نشاط المحل ( لزينة السيارات ) لانه هو اكثر شي نفهم فيه ,,, ومر اسبوع ثالث على استخراج الترخيص وطبعا المحل باسم خالد وقضينا اسبوعين ثانيات نجهز المحل بالديكور والاغراض مع العامل ,,, طبعا العامل كان من عمال خالد اللي يشتغلون بالعيادة منظفين ,, جابه خالد مؤقت من الرياض لين يلقى عامل مناسب ومتفرغ ,,,
لكن طوال الشهر اللي كنا نجهز المحل وانا احس بشيئين يضايقني ويحزنني بشكل مؤلم
الشئ الاول خالد طوال الشهر اللي فات مادخل شقتي ولا طبها ,,, يوصلني بعض الاحيان ويروح ,,, حاولت معه مليون مرة ينزل ويعيي ,,, ترجيته ولافاد قلت له اخواني مشتاقين له ويقول مرة ثانية ,,, كنت احس برفضه انه الى الحين زعلان ومانسى و اذا سألته ليش ماتبي تدخل شقتي ,,, بعدك زعلان .؟
يقول لا بس تعبان وابي ارتاح
وانا اسكت عنه لانه فعلا شكله تعبان ولا اصر عليه مع ان نفسي يرجع خالد الاول ويسهر معي في الشقة مثل دايم
ومن ضمن محاولاتي له عشان يدخل ,, علمته باحمد زوج امي انه الى الحين مسنتر عندنا ,,, استغرب خالد بالبداية خاصة انه كان يعتقد ان امي مصرية وتفاجئ يوم عرف ان امي سورية ,,, طلبت يدخل ونهبل باحمد كمحاولة مني عشان يدخل شقتي بس بائت محاولتي بالفشل وعيا
الشي الثاني وهو الاهم واللي كان طوال الشهر يحزني بشكل مؤلم جدا هو مرضه اللي احس انه يزيد يوم بعد يوم ,,, خالد صار مايتحمل شي بالمرة ,,, الوقوف مايتحمله واذا كنا بالمحل ونتناقش بالديكور وغيره مايتحمل يصير واقف ويظطر يجيب له كرسي ويجلس عليه مع انه بعز شبابه ,,, ودايم يحس بالبرد مع اننا بعز الحر ,,, ونظره ضعف اكثر ,,, عدة مرات كان بيصدم فينا واذا قلتله بعصبية وش فيك ماتشوف .؟
يقول نظري ضعف ياخالد اشوف كل شي ضباب قدامي
بالاخير منعته عن السواقه وتكفلت انا بالسواقه عنه اذا كنت معه
وما اسلمه السيارة الا اذا نزلت عند شقتي ,,, ينزل هو و ياخذ السيارة ويروح لبيته مع اني عدة مرات حاولت معه اوصله لبيته وانا اروح لشقتي مشي بس خالد طول عمره عنيد
حاولت معه مرة اوصله بنفسي لمدرسته وبعدها اروح انا لمدرستي
بس رد علي رد مثل وجهه
خالد = لا انا اروح لمدرستي بنفسي مايحتاج احد يوصلني
انا = من زين شوفك عاد ,,, بتصدم عند اول دوار
خالد = احسن عشان اموت
وقتها سكتت عنه ,,, دايم هذي كلمته عند كل سالفة
وخلال الشهر اللي فات طاح بفراشه ثلاث ايام بسبب الحمى ,,, واكثر الاحيان اتابع موضوع المحل لحالي بسبب اغمائاته الكثيرة ,,, قبل كان يغمى عليه بالشهر على الاقل مرة ,,, اما خلال الشهر اللي فات اغمى عليه اكثر من ثلاث مرات ,,,
واذا قلت له تعالج لا تهمل نفسك يقول انا مالي علاج
حتى صار يشتكي من آلام ثانية غير الم راسه والصداع
حتى الشباب لاحظوا التعب الواضح عليه واذا سألوه يقول صداع عادي والا بطني يعورني والا يجيب أي عذر معقول ,,, وابو عبدالله ملاحظ التعب الواضح على خالد بعد ,,, مرة اتصل علي وطلب مني اقنع خالد يروح للمستشفى
انا = ليش ماتقنعه انت ياعم
ابوعبدالله = حاولت فيه بس يقول مايحتاج ,,,, اقنعه وانا عمك يروح للمستشفى يمكن يسمع منك
مسكين ابو عبدالله مدري وش بيصير فيه لو يعرف عن مرض خالد
علمت خالد بطلب ابو عبدالله ,,, بس سكت عني وقتها وسرح بعيد بافكاره
اما مشاكله مع ناصر ,,, الهيئة راقبته اسبوعين كاملات ولا شافوا عليه أي شي غريب ,, ونفس الشي لصادق راقبوه ولا شافوا عليه شي مريب ,,, بالاخير طلبوا من خالد يرجع الجوال له عشان يراقبون اتصالاته ,,, والى الحين يراقبونه بس نفس الشي ماعمره اتصل على ناصر ولا ناصر اتصل عليه
والشي اللي زاد بشكوكنا وشكوك الهيئة ,,, مرة اتصل صادق على خالد وقال انه يبي يسافر للابد ,,, بس الهيئة طلبت من خالد مايسفره ,,, والحين خالد اذا بغى يتعامل مع صادق باي شي لازم اول شي يتصل على الهيئة ويعطيهم خبر ,,, بس الغريب انه طوال المدة اللي راحت ماشافوا شي على الاثنين
وخالد الحين خايف تنلقب الامور ضده اذا استمر الوضع كذا
خلال الشهر اللي راح اتصل ناصر علي مرة بعد مانتهت المهلة اللي عطاها لخالد
ناصر = عطيتكم وقت بما فيه الكفاية ,, هاااه خالد تركي يبي يبيع علي العيادة والا اسلم الصور والفيديو للهئية والشرطة .؟
انا = ايه يبي يبيعه لك بس فيه مشكلة بالعيادة ,,, انت تدري ان العيادة مشتركة بين خالد واخته ( قلت كذا حسب اوامر الهيئة قالوا لي ولخالد اذا اتصل عليكم وابتزكم نقول له هالكذبه عشان يصير فيه وقت اكثر يراقبونه )
ناصر = اللي اعرفه ان العيادة باسم خالد بس .؟
انا = ايه بالاوراق باسم خالد بس ,,, بس بالاصل مشتركة ( طبعا كله كذب العيادة كلها باسم خالد لا مشتركة ولا شي )
ناصر = ماهي مشكلتي ,,, هو واخته يتفاهمون ,,, قلتوا لي اصبر اسبوعين وصبرنا ,,, وانا مستعد ادفع المبلغ اللي هو يبيه
انا = ايه بس اخته ماهي موافقه تبيع وخالد موافق ,, وخالد الحين يحاول يقنعها .؟
ناصر بعصبية = خلاص ابعطيه ثلاث ايام يقنع اخته وبس
انا = لا اصبر شوي ,,, ثلاث ايام مايكفون تعرف انت البنات مايقتنعن بسرعة ,,, ياخي انت وش فيك مستعجل ,,, وبيني وبينك خالد عاف العيادة ومايبيها ,,, يعني اطمئن هي بتصير لك ,,, بس انت اصبر عليهم يبيلهم شهر شهرين
سكت ناصر شوي وبعدها سكر بوجهي ,, لا ويقول دكتور وهذي تصرفاته ,, الحمد الله والشكر بس
والى الحين يتصل علينا ويبتزنا بالصور والفيديو بس نحط الحره باخت خالد ونكذب عليه بانها عيت تقتنع
طبعا ناصر مايقدر يتعامل مع اخت خالد ,,, واذا هدد خالد بالصور وانه ماعليه منه ومن اخته يجيه خالد باللين ويقول اصبر الى الحين احاول اقنعها بالبيع ( طبعا تصرفات خالد باللين كله حسب اوامر الهيئة والا خالد دايم عصبي معه )
هذا مواقفي مع خوي الروح ومشاكله
اما مواقفي مع اهلي بالشهر اللي فات
خلود انا رضيت عليها بس مابينت لها ,,, حلت لي السالفة الصراحة ,,, حلو لما ارفع ضغطها
خلود تغيرت بعد ماجت امي صارت شوي دلوعة وقل اهتمامها باخواني وبمعاذ ,,, والمطبخ شالت يدها منه ,,, بس احسن طبخ خلود مو حلو ,,, امي احسن طبخ منها ,,, احس نفسية خلود صارت احسن اشوفها تهتم بدروسها اكثر وكل مادخلت اشوفها تذاكر ,,, قبل تجي امي كان ماتحل ولا تذاكر الا اذا جت تنام ,,,
وانا مثلها صرت احس باكثر راحة وانا اعرف ا ن امي موجوده عندنا بالبيت ,,, قبل نشيل هم سلمى ومعاذ ونحس اننا ضايقنا على الناس من كثر مانحطهم عندهم ,, الحين لا ,,, نروح للمدرسة وهم نايمين بفراشهم مثل الاطفال العاديين
وقبل كنا نشيل هم سالم بوقت الظهر ,, هو بالعادة يطلع من مدرسته قبلي وقبل خلود ولأنه دايم يضيع منه مفتاح الشقة اللي نعطيه اياه يضطر هو المسكين يجلس بالشارع لين اجي انا او خلود ونفتح له الباب ,,, الحين لا ,, يدخل ويلقى امي قدامه
اما احمد طوال الشهر اللي فات وبشعور الراحة اللي احس فيه بوجود امي ,,, وخوفي اني اذا طردته ويحرمنا من الراحة النفسية اللي اخيرا ذقناها انا وخلود ويرجع ياخذ امي منا ويحرمنا من الراحة النفسية هذي ,,, بالتالي سكتت عنه شوي
بس طبعا مايجلس بطالي كذا
اجار الشقة خلاص مدفوع ,, دفع قيمته خالد الغالي ,,, وانا لا يمكن اخلي احمد يسكن معنا بالشقة من دون مايساعدني على التكاليف
انا = تبي تسكن معنا بالشقة لازم تتحمل وتاخذ عني بعض الامور وانت تتكفل فيها
احمد = شو يعني مافهمت .؟
انا = ايه اجل تبي تسكن عندنا من دون ماتدفع شي ,,, اسمع انت عليك توفر مستلزمات المطبخ الاكل والشرب وغيره
احمد بعصبية = شوووو .؟ وانتا شو عليك ,,, والا انتو يالسعوديين تعودتو على الخمول ومابدكوا تساوو شي
هالانسان الله اعلم انه عنده مرض نفسي واسم هالمرض ( السعوديين ) ,, كل ماقلت له شي او شاف شي وعجبه او ماعجبه قال انتو يالسعوديين وانتو يالسعوديين
انا = احمدووووه اجل تبي تسكن بالشقة وانت مرتاح وانا يصير علي كل شي ,,, انت على الاقل متوظف اما انا لا
احمد = بدك تضحك عليي والمحل اللي بتفتحوه انتا وصاحبك ,,, لا لا حبيبي انتو يالسعوديين مايصعب عليكو شي ,, وانا هلأ مالي متوزف زي ماتئول
احمد دار على المدارس الاهلية عشان يتوظف فيها بس كلهم يقولون تعال لنا عند عودة المدارس بالنصف الثاني
انا = راح تتوظف قريب ان شاء الله ,,, و مستحاقاتك من المدرسة اللي بالدمام اللي خليتها توك ماخذها ,, ادري فيك تبي كل شي علي وانت اصلا عندك
احمد بعصبية = شوووو ماعندي شي
انا = خلاص اجل ,,, اطلع من شقتي وارجع للدمام ,,, ماني مستعد اصرف عليك وعلى زوجتك
احمد بعصبية = زوجتي إمك
انا =- وامي متزوجه ,,, مو معقول اصرف عليها وزوجها موجود ,,, المهم تكفل بالاكل والشرب والا شف لك شقة ثانية
احمد بضيق = لا لا ,,, اخسر مصاريف اكل وشرب احسن من اني اخسر اجار شئة ,, خلص زي مابدك ,, بس ئول انته شو عليك .؟
انا = مالك دخل ,,, لا تنسى انك ساكن بالشقة ببلاش
سكت احمد وقتها وانا ادعي لخالد انه فك ازمه
بس الى الحين اعاند احمد واتهاوش معه واكثر الاحيان بامور تافه
مرة تهاوشت معه عشان ملعقة ومرة عشان اخذت مكانه بالصالة ,,, كذا بس تعودت ارفع ضغطه ,, بس بعض الاحيان اذا سألني بشي يجهله او ارسلني اطيعه ,, مابي اطفشه مرة وياخذ امي منا ,,, يعني اتهاوش معه اوقات واوقات ثانية اتساهل معه
وسالم وسلمى ومعاذ تعودوا على امي اصلا معاذ من اول ماشاف امي اخذ عليها بسرعة معاذ تعود على الناس الغرب ,,, ينام بفراشه ويلقى نفسه الصباح ببيت ابو سعد او ببيت صديقة خلود ,,, بس ثلاثتهم طوال الشهر اللي خالد مادخل شقتي فيها وهم يسألون عنه خاصة سالم اللي تعود على خالد
اما مدرستي رجعت لها بنفس الاسبوع اللي كلمني خالد عن المحل ,,, ولراحتي النفسية قدرت اعوض اهمالي بالواجبات والدروس
اما شباب الحارة بعد ماعرفوا عن المحل ,,, صار كل واحد يعطينا من افكاره واقتراحاته وابراهيم بعض الاحيان يجي ويتابع معنا المحل بنفسه ويروح يختار الاغراض بنفسه بعد ,,, خاصة اذا كان خالد مغمى عليه او تعبان هو يروح يتابع امور المحل معي
ولاحظت على صالح بالشهر اللي فات انه خف على خالد شوي
جت الامتحانات قبل نفتتح المحل وكل واحد انشغل بامتحاناته
يوم الثلاثاء ,, اخر يوم من الامتحانات النصفية
وقفت مع ابراهيم وصالح عند بيت ابراهيم ,, اليوم الثلاثاء اخر يوم من امتحانات خالد ,, انا وابراهيم وصالح وماجد انتهت امتحاناتنا قبله بيوم ,,, حنا شرعي وهو طبيعي
وانا الحين احتريه يطلع من بيت خاله
انا بملل = صويلح ياخي رح شوف خالد وينه ,,, من اليوم قاعد احتريه
صالح باستهبال= قاعد والا واقف هاهاهاها
انا بضيق = ماصل
صالح = ماصل والا فاصل
انا = رح بس ناده خله يطلع
صالح = يطلع والا يدخل
انا بعصبية = ياخي وش فيك اليوم .؟
صالح = اليوم والا امس
دفعته على ورا معصب ,,, وطلعت جوالي
انا = مافيك خير
صالح = خير والا شر
ابراهيم = ماعليك منه خالد ملحوس مخه من الامتحانات ويبيله وقت يرجع طبيعي
ابتسمت على تعليق ابراهيم والجوال باذني بس خالد مارد علي
انا = افففف وين راح هذا ,, الظهر قال تعال ,,, وهذا انا جيت وماطلع
صالح = قل سحب علي وطنشني ,,, لا تنكر ( والتفت على ابراهيم ) ابراهيم اضحك اضحك سحب عليه
انا = شكله صدق ملحوس مخك
طلع خالد من البيت بسرعة وركبت سيارته على طول ,,, استغربت شكله معصب
التفتت لابراهيم وصالح باستغراب وبعدها رحنا عنده وركبت بمكان الراكب وابراهيم وقف عند دريشة خالد وصويلح واقف عند دريشتي
انا مستغرب = خالد وش فيك .؟
خالد بضيق = مافيني شي ( والتفت لابراهيم اللي متركي على دريشته ) ممكن توخر شوي عشان احرك
ابراهيم = وش فيك معصب ,,, ماحليت زين اليوم
خالد بعصبية = ايه ماحليت زين ,,, وخر
طالعنا بعض انا وابراهيم مستغربين ,,, وبعدها وخر ابراهيم عن الدريشة بصمت
وحرك خالد السيارة رايحين للمحل
انا مستغرب = وش فيك خالد .؟ عسى ماشر
حرك يده بضيق
خالد بعصبية = مالك دخل
رفعت حواجبي مستغرب وطالعت قدام
انا = مالي دخل مالي دخل بس وقف لا تصدم فينا ,,, وقف انا بسوق
خالد = ليه خايف تموت
انا = وقف وقف بس
وقف خالد على جانب الطريق وتبادلنا الاماكن
قربنا نوصل للمحل وحنا ساكتين
انا = خالد وش فيك ,,, المفروض تستانس اليوم اخر يوم لك
تنهد خالد وسكت
انا = ماني ساكت عنك لين تعلمني وش فيك
خالد = خالي
انا مستغرب = وش فيه .؟
التفت خالد لي
خالد = يبي يزوجني ,,, ياخي انا مابي اتزوج غصب هو
تضايقت لايكون بيرجع ابو عبدالله يطلب اختي لخالد بعد ,,, هو قال ماهم مستعجلين ,,, على قولته يبي يضمن اختي لخالد
انا = بس مامر على السالفة الاولى الا شهر ,,, وانت توك ماتخرجت ,,, وشفيه خالك مستعجل عليك كذا
خالد بضيق = انا ادري عنه ,, يقول انت الولد الوحيد في العايلة ونبي نفرح فيك ومادري ايش ,,, خالد ,, خالي بيرجع يخطب اختك لي مرة ثانية
التفتت له متفاجئ
انا = وش ,,,, بس مامر على خطبتكم لاختي الا شهر ,,, وهو يقول ماحنا مستعجلين لو يكون الزواج بعد سنه سنتين ,,, والحين مستعجل .؟ ,,, ابو عبدالله الصراحة مدري وشلون يفكر
خالد = يقول المرة الاولى يمكن رفضتوا عشان محمد لأنها صارت خطبتين
انا = انا قلت له ان البنت تبي تكمل دراستها
خالد = خالد المشكلة مو هنا
انا بضيق = وش بعد .؟
خالد بزعل = المشكلة يقول خالي اول شي بنخطب اختك واذا عيتوا بيروح يخطب لي اخت صالح ,,, تخيل عاد انا اخذ اخت صالح ,,, انا ماني متحمل صالح تجيني اخته
سكت شوي استوعب وبعدها انفجرت بالضحك
انا = هههههههههههههههههههههههههههههههههههههههههههههههههه هههههههههه
خالد = انا الحين ببيت عمته ومطلع ريحتي ,,, وشلون لو اخذ اخته
انا = بيقول هذا بيت اختي وش تبي ببيتنا اطلع ههههههههههههههههههههههههههههه
عجزت لامسك نفسي عن الضحك اتخيل صالح ببيت خالد ويقول له اطلع وش تبي ببيت اختي
خالد بضيق = ايه اضحك وش عليك
انا باستهبال = واذا جبتوا عيال ,,, بياخذ العيال منك و انت تركض وراه وتقول هات عيالي عاد صالح يقول هذولي عيال اختي اطلع برااااا ههههههههههههههههههههههههههههههههههههههههههههههه الصراحة انت وصالح شييييييييي هههههههههههههههههههههههه
ابتسم خالد
خالد بابتسامة = هذا اذا جبت عيال ,,, والا تبي عيالي يتيتمون من بدري
سكتت واخذت نفس ,,, خالد صاير غثيث
انا بضيق = ابو عبدالله يبي يعوض فقدان عياله فيك
خالد = ياسلام وانا اللي آكلها
انا = تدري لو عيال خالك حيين الحين ,,, كان ثنين منهم او ثلاثة متزوجين وجايبين عيال بعد ,,, ابو عبدالله يبي يمارس الابوة فيك وتصرفاته هذي يمكن من الحرمان اللي يحس فيه ,,, شف ابو صالح ساكت عن صالح مع انه كبرك ,, وشف ابو ابراهيم ساكت عن ابراهيم مع ان اخوه فايز متزوج والدور الحين على ابراهيم ,,, بس ابوه ساكت عنه لأنه ماهو محروم ,,, رجال كبير وفرح بولده فايز والحين ماهو مستعجل على ابراهيم وساكت عنه ,,, خالد ابو عبدالله قالي بنفسه انه ماهو مستعجل وشف الحين ماصار عند كلمته بسبب الحرمان اللي يحس فيه ,,, يبي ولد يفرح فيه ويزوجه
خالد بتنهيدة = انا عادي عندي اتزوج بس انا ماصلح وانت تعرف ,,, خالد دبرني
مارديت
خالد = ماقدر اقول لخالي انا مريض ,,, ومابي اظلم بنت الناس واخدعها واخدع اهلها ,,, خالد اهلها مايدرون اني مريض ماهو مثلك ,,, انت رفضتني لأنك عارف بكل شي ,,, بس اهل صالح يمكن يوافقون علي ,,, خالد تكفى دبرني ,,, علمني وش اسوي .؟
انا بتنهيدة = انا مارفضتك
خالد = دبرني ,,, وش اسوي.؟ انا ماصلح للزواج
انا = قل لخالك ماتبي تتزوج
خالد = قلتله ,, يقول انت وش ناقصك ,,, تحتري وظيفة والا تحتري بيت ,,, يقول عندك كلهن
انا مستغرب = وشلون عندك كلهن ,,, انت مانت متوظف
خالد بعصبية = يقصد العيادة ياااخي ,,, العيادة تدخل علي اكثر من راتب الموظف اضعاف اضعاف
انا بتنهيدة = قل توني صغير
خالد بزعل = قلتله ,, يقول اللي كبرك جابوا عيال الحين وقعد يعددلي شف فلان وشف علان ويقول انا يوم تزوجت وعمري 19 مدري 18 مدري كم قال ( تنهد ) حاولت فيه من كل الجهات ماخليت شي انا
انا = عشان كذا طلعت معصب من البيت
خالد = ايه ,,, بس خالي راسه يابس
انا = يحلها الله ,,, انت خل الامور تمشي زي مايبي خالك وجاره على قد عقله واذا جاني يخطب اختي ذيك الساعة لها آلف حلال
خالد = واذا راح لاهل صالح ,,, صالح واخوانه مايدرون اني مريض وماقدر اعلم احد
انا = انت ليه ماتتعالج
خالد = مالي علاج
انا = ياخي جرب ماتدري يمكن الله يكتب لك الشفا ,,
سكت خالد عني ,,, شوي ووصلنا عند المحل
الساعة عشر في الليل
رجعنا انا وخالد اللي من المغرب وهو مصدع وكل شوي ياكل من المهدئات
المغرب اكل وحدة وبعد صلاة العشا اكل وحده والحين فاتح الدرج اللي قدامه وبياكل وحده ,,, هالغبي بيقضي على نفسي ,,, ثلاث حبوب باوقات متقاربه المغرب والعشا والساعة عشر الحين
التفتت له وانا معصب
انا بعصبية = ياخبل بس من هالحبوب اللي تبلعها ,,, ارحم نفسك ياخي
خالد = ادري تبي وحدة بس لا تحاول ماني معطيك ( وحط الحبة بفمه )
رفعت حواجبي
انا بسخرية = لا تكفى عطني
خالد بألم = آآآخ راسي ,,, ياخي هالمسكنات صارت ماتنفع ولا لها تأثير ابد
انا = اكيد جسمك تعود عليها
وصلنا شقتي ووقفت السيارة عند العمارة ولا نزلت ,,, اليوم يانا يانت ياخالد ,,, اليوم غصب عنك تدخل شقتي ونرجع مثل قبل
نزل خالد كالعادة عشان يجي بمكان السواق وياخذ السيارة ويرجع لبيته بس انا مانزلت ولا تحركت من مكاني
فتح خالد بابي
خالد = يله انزل ,,, ورح لإمك عم تحتريك
يبي يقولها بلهجة سورية
انا بسخرية = عم تحتريك .؟ ,,, والله من الدجة
خالد بابتسامة = ليه ماعرف اتكلم سوري ,,, المهم يله انزل
طفيت السيارة واخذت المفتاح ونزلت وقفلت السيارة
خالد مستغرب = هييييه ليش قفلتها
انا = قدامي اشوف ,,, اليوم بتسهر معي غصب عن خشمك
خالد = مرة ثانية ,,, عطني المفتاح
انا بعصبية = كل يوم تقولي مرة ثانية ,,, عيت تجي هالمرة الثانية هذي ,,, يله قدامي اشوف ,,, سالم مشتاقلك كل يوم يسألني عنك
خالد بابتسامة = ياحليله ,,, بس والله تعبان وابي انوم
انا بابتسامة = ماذكر انك دجاجة وتنام الساعة عشر ,,, ولا تنسى حنا بالعطلة الحين
ومسكت ذراعه وسحبته معي
وطوال وحنا بالمصعد وهو يحاول يجيب أي عذر بس بلهجة سورية
فتح المصعد بابه وخالد عيا يطلع منه
خالد = ئلتلك مرة سانية شو ماعم توحي
ضحكت عليه ,,, وجيت من وراه وحطيت يدي على فمه عشان يسكت ودفعته برا المصعد
انا بضحكة = حست ام الدنيا ,,, تدخل لهجة سورية بلهجة اهل الرياض ياخبل
فتحت باب شقتي ودخلت عشان اخذ لخالد درب
ولقيت امي وخلود بالصالة يسولفن وسالم وسلمى ومعاذ قدام التلفزيون ويلعبون بلاي ستيشن
امي بفرح = اهلين حبيبي جيييت
انا = اششششش يمه قصري صوتك خويي عند الباب ,, ( وقربت منها ) هلا فيك ,,, ادخلوا داخل عشان خالد يمر
خلود بصوت واطي = خله يمر حنا باخر الصالة مايقدر يشوفنا
مشكلة شقتنا ضيقة وصغيرة والغرف متداخله على بعض ,, واللي بالمجلس مثلا يسمعه اللي بالمطبخ والعكس ,,, طبعا اذا كان الصوت عالي
رجعت لخالد ودخلته الشقة واول ماشافوه اخواني وهم ينطون عليه وخاصة سالم ,,, لهم شهر ماشافوه
نزل خالد لمستواهم وسلم عليهم ودخلوا للمجلس ,,, رجعت لامي وخلود وانا مستانس
انا = احمدوووه وينه .؟
امي = بالحمام هلأ بيطلع ,,, خالد ساويت حلا من شانك ,,, اتزكرك كنت تحب الحلا كتير ,,, بدك اجهزو إلك ولصاحبك .؟
هزيت راسي بايه
راحت امي للمطبخ ( تنهدت ) ملاحظ على امي انها تحاول تتقرب مني
خلود = خالد ابي السوق فيه اشياء ضرورية وابيها
مارديت عليها وعطيتها ظهري ابرجع للمجلس ,,, بس مادريت الا بضربة على ظهري
التفتت معصب لخلود اللي ضربتني ,,, بس هي حطت رجلها وهجت للمطبخ
رحت للمطبخ معصب ولقيتها مندسه عند امي
انا بعصبية وبصوت واطي = والله لو ان الرجال ماهو بالمجلس الحين كان وريتك بس هين ,,, خلي لين الرجال يروح وتشوفين
خلود = يمه شوفيه ,,, كل ما اكلمه مايعطيني وجه
اخذت نفس اهدي نفسي ,,, مابي اتمادى معها عشان مايسمع صوتها خالد
التفتت لامي
انا = يمه احمد لا يجي عندنا نبي ناخذ راحتنا
ورجعت للمجلس
ولقيت سالم واقف ويهذر على خالد ببطولاته وانجازاته والفتوحات اللي سواها بغياب خالد عنه
وخالد معطيه جوه ومنصت له ويهز راسه باية ,,, ومعاذ جالس على فخذه وسلمى جالسه على فخذه الثاني ,,, ذكرني بطريقته باخواته
جلست قبالهم
انا بابتسامة = وش يهذر عليك هذا .؟
ضحك خالد
خالد = والله مافهمت عليه ,,, اقول ايه على الفاضي ( وضم معاذ وسلمى لصدره اكثر ) هاااه وانتو شفتوا ماما .؟
سالم = ايه صح انا سلمت على امك ,, انت تعال سلم على امي
انا بعصبية = سويلم ابلع لسانك واجلس
خالد بابتسامة = سلومي نجحت .؟
سالم بفرح = ايه ,,, بس قالوا ماتروح لثالث ,,, اذا نجحت مرة ثانية اروح
سالم يوم نجح اخذنا يوم كامل نفهمه انه باقي نصف ثاني ويروح لثالث ,,, يوم جا فرحان انه نجح على باله انه انتقل للصف ثالث
خالد = ايه طبعا سلومي ماتروح لثالث ,,, تونا باقي النصف الثاني ,,, سلومي بكرة انا وانت بنروح للسوق واشتري لك هدية وتختارها انت بنفسك خلاص
شهق سالم فرحان والتفت لي
نزلت راسي سالم يوم نجح طلب مني سيكل كعادته بس من وين لي اجيبله واحمد النذل يوم قاله سالم رد عليه احمد انه ماعليه الا توفير الاكل والشرب حسب اتفاقي معه ,, وطلب من امي بس مابيدها حيلة وماهي متوظفة وشكل احمد مايحط بيدها شي
رفعت راسي بحزن ولقيت سالم متعلق برقبة خالد ويسلم على خد خالد بعنف من زود فرحته ,,, وخالد يضحك ,,, قمت واخذت معاذ خايف عليه يطيح من حظن خالد بسبب دفاشة سويلم
سلمى = وانا بعد ابي اروح
خالد = ايه اكيد سلومتي انتي اول وحده ( وسلم على خدها وبعدها التفت لي ) ماني مستاذن منك واباخذهم بكرة غصب عنك
سالم = انا احبك مرررة ياليت انت اخوي
طالعت سالم بحزن ,,, جرحني بكلمته
انا بزعل = سويلم انت بعد ماتبيني
ونزلت راسي بألم ,, خلود تبي تتزوج وترتاح مني ,,, والحين سالم يتمنى اخو غيري ,,, ليش اخواني مايبوني ليييييييييييش وش سويت انا ليش مايبون يفهمون اني انا محروم مثلهم
خالد = خالد لا تشيل بخاطرك ,,, سالم بزر
سالم بغرور = انا رجال
رفعت راسي لخالد وسألته عشان اغير الموضوع لو اتمادى فيه يمكن اصيح
انا بحزن = مانت رايح لاهلك بالعطلة .؟
خالد = الا طبعا ,, ابروح اجيبهم يقضون العطلة هنا
انا = متى .؟
خالد = بكرة نفتتح المحل صح .؟
هزيت راسي بإيه
خالد = خلاص اجل اروح بعد بكرة
انا بتنهيدة = خالد ارحم نفسك ,,, وشلون بتسافر وانت ماتشوف
خالد = بالجية اسلام هو اللي بيسوق
انا = و بالروحة .؟
خالد = مايبيلها سؤال هذي ,,, انا طبعا
سالم مستغرب = خالد انت ماتشوف .؟
خالد = الا سلومي اشوف ,,, بس اخوك مخرف
انا = خلنـ
ودخل علينا احمد ,,, تضايقت انا قلت لا يجي ,,, ليه مايسمع الكلام هذا
قام خالد اللي اول مرة يشوفه وسلم عليه
وبعد السلام والكلام
احمد = امتى راح يبلش المحل .؟
خالد = بكرة ان شاء الله
احمد = بدي تزينوا سيارتي ببلاش لما اشتريها اتفئنا
خالد باستهبال = ايه انت اشترها الحين ويصير خير
احمد = جهزتو المحل بالكامل والا بئي شي .؟
خالد = باقي اشياء بسيطة ونفتتحه بكرة ان شاء الله
احمد = ماشاء الله عليكوووو نشيطين
خالد = افاااا عليك بيضات احنا
احمد مستغرب = بيضات .؟ شو يعني بيضات
التفتت لخالد متضايق الخبل يبي يتكلم بلهجة سورية وحاس الدنيا ,, يبي يقول ابضات قال بيضات ,,, بس سكتت ماصححتله وخل احمد يوّلي مو لازم يفهم عليه
خالد = بيضات يعني شقرديه ,, حنا نقول شقردية وانتم تقولون بيضات ,,, هذي لهجتكم عاد
التفت لي احمد مستغرب
احمد مستغرب = مالي فاهم على صاحبك شي ,,, شو يعني بيضات وشو يعني هاي الكلمة اللي ئالها
خالد = بيضات بيضات ,,, يعني ذيييييب ذييييييب
انا بعصبية وبصراخ = ابضااااااااااات ياغبي انت وايااااه
خالد = ايه ايه ابضاااات ابضااااات
سكت احمد شوي وبعدها انفجر بالضحك لين حمر وجه الابيض
قعد خالد ساعة وطلع ووقفنا عند المصعد شوي
خالد = اسمع خالد بكرة العصر بمرك وناخذ اخوانك وانزلك عند المحل وانا اباخذهم للسوق ,,, خلنا نخلص من المحل ونفتتحه ,, ماعندي وقت انا ,,, لازم اروح لاهلي هذا غير العيادة محتاجيني
انا = اخواني ماعليك منهم ,,, لا تتعب نفسك معاهم ,,, انت شف شكلك وشلون قايل تقول طالع من قبر ,,, ارتاح ياخي ارتاح ,,, ان لبدنك عليك حق
مد خالد يده وضرب خدي على خفيف
خالد = غيران من اخوانك ,,, لا تحاول ماني مشتريلك هدية
وخرت يده عني بضيق
انا = انزل انزل ورح لبيتك
ورحت وتركته ودخلت الشقة
مادري ليه يسوي بنفسه كذا ,,, ليه يحاول يضغط على نفسه ,,, ليه كاتم خبر مرضه عن اهله ليه مايبي يعلمهم ,,, اذا عرفوا بيضغطون عليه يرتاح ويتعالج ,,, خالد يوم عن يوم يضعف ,,, ياربي وش اسوي اعلم ابو عبدالله والا اسكت ,,, بعدين صعبة ,, وش اقوله بالله ( ولدك معه السرطان ) صعبة
الله يستر اخاف اذا دخل خالد الرياض مع زحمتها يسوي حادث ,,, هو بالديرة هذي وهي مافيها زحمة عدة مرات بغى يسوي فينا حادث وشلون لو دخل الرياض ,,, خالد صاير مايشوف ,,, ربي سترك مدري وش اسوي
يوم الاربعاء
كنت بالمحل اشرف على عامل يركب لوحة المحل بعد التعديل ,,, خالد اخذ سالم وسلمى وراح فيهم للسوق
بعد ساعة ونص جا خالد واخذ مكاني بالمحل وانا رحت اوصل اخواني للبيت بسيارة خالد
كنت معصب على اخواني احرجوني مع خالد ,,,
انا بضيق = سويلم ارتحت الحين ,,, طاب خاطرك ,, شريت اللي تبي .؟
و الخبل يحسب اني اسأله
سالم بفرح = ايه شريت سيكل ,,, يله بسرعة خالد ابي اوصل بسرعة عشان اوريه اصدقاي
انا بعصبية = ابلع لسانك لأهفّك الحين
التفت لي سالم مستغرب وسكت
سلمى = وانا شريت بيت فولا وشريت بعد عباة فولا
انا بصراخ = اسكتووووووووا ,,, قسم بالله اللي اسمع صوته لانزله واروح عنه
المغرب
رجعت للمحل بعد مانزلت اخواني بالشقة ,, بس استغربت لقيت المحل مسكر ,,, غريب وين خالد والعامل
تلفتت يمين ويسار وما اشوف ولا واحد منهم ,,, طلعت جوالي واتصلت على خالد بس مارد علي ,,, وقفت قدام المحل وانا اتلفت ادورهم
= فيه تيح وبعدين شيل
التفتت للباكستاني
انا مستغرب = هاه
الباكستاني = انته فيه يدور راعي محل هدا .؟ ( واشر للمحل )
انا مستغرب = كان فيه ثنين هنا وينهم .؟
باكستاني = مافيه عربي كويس
جا سعودي شكله راعي المحل اللي بجنبنا
وبعد السلام
السعودي = والله ياالحبيب قبل نص ساعة طاح السعودي راعي المحل هذا واتصلنا على الاسعاف وشاله
شهقت بصدمة
انا = وش ,,, تقصد خالد .؟
السعودي = والله ماعرف اسمه ,, المحل جديد ولا تعرفت عليه الى الحين ( ورفع نظره يقرا اللوحة وبعدها التفت لي ) ايه اسمه خالد
انا بخوف = والعامل وينه .؟
السعودي = راح معه ,, وانا قفلت المحل ,,, ان شاء الله انه طيب ,,, انت تعرفه
طلعت جوالي واتصلت على خالد بس على طول سكرته ,,, صدق اني غبي اتصل فيه وهو مغمى عليه اكيد ماراح يرد ,,, التفتت للرجال
انا = لأي مستشفى راحوا .؟
السعودي = مستشفى الملك فهد ,,, انت تعرف راعي المحل .؟
انا بخوف = خالد اخوي ( ومشيت مسرع بس الرجال مسكني قبل اتعداه )
السعودي = مدام انك اخوه ,,, خذ هذا مفتاح المحل ( وطلع المفتاح من جيبه ) والله يطمنكم عليه
انا = جزاك الله خير
وركبت السيارة مسرع وخلال نص ساعة وانا بالمستشفى ,,, سألت عنه
ورحت مسرع للدكتور المسؤول عنه
انا بخوف = دكتور طمني
الدكتور = انت اخوه .؟
اخاف اذا قلت لا ,, يقول عطني رقم قريبه مثل ماصار معي مع الدكتور اللي بالرياض
انا = ايه انا اخوه
الدكتور = والله مدري وش اقولك ,,, اظن تعرف ان اخوك عنده ورم .؟
انا بحزن = ايه ادري ,,, بالراس
الدكتور = بالدماغ ,,, طيب ليش ساكتين ,,, المرض منتشر بجسمه ويوم عن يوم يزيد المرض عنده وانتم ساكتين ,,, ليش اخوك الى الحين مابدا بالكيماوي .؟
سكتت ومارديت عليه
الدكتور = ليش اخوك الى الحين مابدا بالكيماوي .؟ المريض حالته خطيره بسبب الاهمال ,,, ممكن افهم ليش ماتعالجه .؟
مارديت عليه
الدكتور = هو الحين بالغيبوبة ودخلناه العناية قبل ربع ساعة بس حتى نتابع حالته
انا بحزن = طيب هو دايم يغمى عليه ماهي اول مرة ,,, ليش مكبر السالفة ومدخله العناية
رفع الدكتور حواجبي ممستغرب
الدكتور = انت اكيد اخوه .؟,,, ياخي انا اقولك المريض حالته خطيره تقول مكبر السالفة
وشلون الحين اخاف يطول بالعناية ومايطلع من المستشفى الا بعد بومين او اكثر ,,, وش اقول لابو عبدالله اذا سأل عنه ,,, لازم اشوف خالد لاااازم
انا = دكتور تكفى ابي اشوفه
الدكتور = مو الحين ,,, المريض يحتاج عمليه عاجلة ,, تعال معي لمكتبي ابيك توقع على الموافقة
انا بصدمة = وش عملية ,,, ليييييييييييه .؟
الدكتور بملل = ياخي اخوك حالته خطيرة والمرض منتشر بجسمه والعملية عشان استأصال الورم من الجهاز الهضمي
انا بصدمة = وش دخل الجهاز الهضمي والورم براسه
الدكتور = هذا بداية الورم كان بالدماغ ,,, وبسبب الاهمال انتشر المرض بجسمه ,,, تعال معي وقع ,,, أي تأخر ماهو من صالح المريض
ومشى قدامي بس انا ظليت واقف بمكاني ,, التفت لي الدكتور يوم شافني ماتبعته وجا
الدكتور = شكل المريض انت ماهو اخوك ,,, يابن الناس اقولك تعال اخوك حالته خطره واي تأخر ماهو من صالحه
انا ماني اخوه واخاف اذا طلعت بطاقتي يكتشف الكذبه ,, هذا غير ان خالد يمكن يرفض العملية مثل ماهو رافض العلاج بالكيماوي
انا وشوي واصيح = طيب اصبر لين خالد يقوم
الدكتور مستغرب = ليش .؟
انا = دكتور تكفى خالد معيي عن الكيماوي ويمكن يعيي عن العملية بعد ,, اصبر لين خالد يصحى
الدكتور = بسـ
انا = تكفى ,,,
وقعدت اترجاه لين اقتنع ,,, بس هالدكتور ازفت من الدكتور اللي بالرياض ,,, هذا عيا يخليني اشوف خالد ,,, ترجيته ونشبت بحلقه وماش عنييييييد
بالتالي رجعت للمحل بعد ماخذت العامل واخذت جوال خالد ومحفظته من الممرض
جوال خالد لازم يصير معي ,,, اخاف يتصل ابو عبدالله عليه ويرد احد الممرضين ويعرف
وصلت العامل للمحل ورجعت الشقة وانا متضايق ,,, صح خالد المفروض يروح بكرة لاهله بالرياض ,,, اكيد عندهم خبر ويحترونه ,,, ياربي وش اسوي
خالد يمكن يطول بالمستشفى ,,, اول راح يقعد بغيبوبة ومايصحى الى من بكرة ,,, وبعدها بيسوي عملية يعني ماراح يطلع من المستشفى الى بعد ثلاث ايام وش اقول لاهله
ربي سترك
وقفت السيارة ورا العمارة عشان اذا دوّر ابو عبدالله عن خالد مايشوف سيارته عندي ,,, ولقيت سالم بالشارع ويلعب بالسيكل مع اللي كبره ,,, هذا اللي يبيه سالم ,,, كل يوم اشوفه يشوف اخوياه معاهم سياكل الا هو واليوم تحققت امنيته
دخلت الشقة وجلست مع اهلي شوي وانا متضايق ومالي نفس لشي حتى العشا ماتعشيت ,, واللي زاد ضيقي ضيق امي فرحانه لفرح سالم وسلمى على هداياهم اللي شروها اليوم وكل شوي تمدح في خالد وتشكره وتوني انتبه انه شاري لمعاذ هديه وماشفتها الا الحين
ماصبرت اجلس عندهم اكثر ورحت لغرفتي احاول انام مع ان الساعة توها 11
جتني امي لغرفتي يوم حست بضيقي بس ماعلمتها عن خالد اخاف تعلم ام عبدالله وام عبدالله تعلم ابو عبدالله ويعرف ,,, افففف انا مادري ليش خالد مايعلم اهله ,,, صدق انه غبي
فجأة رن جوالي ,,, القيت نظره عليه ( ابراهيم يتصل بك )
انا بضيق = هلا ابراهيم
ابراهيم = هلا فيك ,,, ويييييينكم ماهو اليوم المفروض تفتتحون محلكم ,,, رحت انا والشباب بعد صلاة العشا ومالقينا احد ,, حتى العامل ماهوب فيه
تلعثمت مدري وش اقول ,,, صح انا نسيت المحل المفروض اروح اقابل المحل خاصة ان الشباب كلهم عارفين ان اليوم افتتاحه
انا مرتبك = آآآآ ,,, بكرة بكرة ان شاء الله
ابراهيم = ليش غيرتوا رايكم .؟
انا = لا ,,, مافيه شي ,,, بس تونا انتبهنا ان فيه اشياء ناقصة ,,, وخلاص كملناها ,, بكرة ان شاء الله ,,, يله ابراهيم مع السلامة ,,, اشوفك بكرة
سكت ابراهيم
ابراهيم = على خير ,, مع السلامة
وسكرت عنه
حاولت انام وعجزت ,,, مدري ليش متضايق ,,, عملية واهله مايدرون عنه ,,, وشلون اتصرف ,,, اعلم ابو عبد الله والا وش اسوي
حطيت جوال خالد على الصامت
وبعد ساعة من التفكير والهواجيس نمت
الخميس ,,, الفجر
القيت نظرة على جوال خالد ,, ولقيت مكالمات لم يرد عليها 23 ,,, ترددت افتحها بس توكلت على الله وفتحتها ,, و19 من ( الغالي ) ابو عبدالله والباقي من ( هذا بيت عمتي )
استغربت وش الرقم هذا اللي مخزنه خالد باسم ( هذا بيت عمتي )
فتحت الاسم عشان اشوف الرقم ,, وانفجرت بالضحك ههههههههه هذا رقم صالح مسكين خالد تعقد من صويلح لدرجة انه خزن رقمه بكلمة صويلح اللي دايم يقولها له ( هذا بيت عمتي ) هههههههههه
تنهدت بحزن مافقده الا اهل بيته ,,, شي طبيعي جا الفجر وهو الى الحين ماجاهم
القيت نظرة على جوالي ولقيت مكالمات من ابو عبدالله وصالح ,,, اشوى اني ماسمعته ,,, ياربي وش ارد عليه اذا سألوني عنه
الله يعيني ,,,, اكيد بيجوني ويسألوني عنه ,,, وش اقول وش ارد عليهم ,,, اقول خالد بالعناية وبعدها يعرفون عن مرضه وخالد الخبل مايبي احد يعرف
الساعة 10
اخذت لموزين ورحت للمستشفى ,,, طبعا ماقدر استخدم سيارة خالد اخاف احد يشوفها معي ويسألني عنه
وصلت المستشفى وتضايقت اكثر لما قالوا لي انه الى الحين بالغيبوبة ,,, ولا قدرت اروح للدكتور اخاف اذا شافني يغصبني اوقع على العملية وانا مدري وش راي خالد ,,, والمشكلة خالد لازم يروح لاهله بالرياض او على الاقل يصيرعندهم خبر انه ماراح يجيهم
جلست بالمستشفى لين اذن الظهر وبعدها رجعت للشقة,,, وجوال خالد ماوقف عن الاهتزاز
كل شوي يهتز بجيبي ,,, ماقدرت اخليه بالشقة اخاف يشوفه سالم والا سلمى او امي ويعرفون انه جوال خالد معي
العصر
قررت افتتح المحل وكأن خالد موجود والله يعيني اذا جا صالح وسأل عنه
وطوال العصر والمغرب وانا على اعصابي ودي اروح لخالد واتطمن عليه بس اخاف الشباب يجون الحين ومايلقوني وبعدين عاد وش يفكني من اسألتهم
ياربي مدري خالد صحى والا بعده ,,, سوا عملية والا بعده ,,, ودي ارووووح واتطمن
العشا
فعلا جو الشباب ,,, ابراهيم وصالح وماجد وهالمرة معهم فيصل
ويوم شاف صالح ان خالد ماهو معي
صالح مستغرب = هذا وين راح حتى بالمحل ماهو موجود ( والتفت لي ) خالد ماشفت خالد ,,, من طلعته العصر امس ماشفناه
تلعثمت مدري وش اقول
ابراهيم = حنا توقعنا نشوفه هنا ,,, ابو عبدالله بلّش صالح يبيه يدوره ,, ماشفته .؟
انا مرتبك = آآآ ,, لا ماشفته ( والتفتت لصالح ) خالد ماهو بزر ,,, متى مايبي يرجع البيت رجع ,, لا تخاف
صالح = ومن يفهّم عمي ابو عبدالله ( وكنه تذكر كلمتي وكمل بعصبية ) وبعدين من قالك اني خايف عليه
ابراهيم بضيق = خالد عليه طلعات ,,, تذكرون يوم يختفي ذيك المرة
ماجد = يمكن راح للرياض ,,, لاتنسون حنا بالعطله
صالح = لا ماهو بالرياض ,,, امه كل شوي تتصل على عمي وتسأل عنه ,,, ومايرد على اتصالاتنا
فيصل = شكل خويكم شايف نفسه
التفتت لفيصل وسكتت ,,, مدري ليه مايداني خالد ,,, خالد اصلا مايعرفه ولا عمره كلمه
اتصل علي ابو عبدالله وسأل عنه وقلت اني ماشفته ولا اعرف وينه ,,, حسيت اني نذل ,, واضح من صوت ابو عبدالله انه خايف عليه وانا اللي مافي قلبي رحمة ماعلمته ,,, ياربي شسوي
ابراهيم = خالد اتصل على خالد يمكن يرد عليك ,, كذا فجأة اختفى
انا مرتبك = انتم وش فيكم ,, خلاص هو رجال واعرف بنفسه منا ,, يمكن مشغول والا شي ,,, متى مابغى يرجع رجع
ابراهيم = ايه بس ابو عبدالله بلش صالح ,,, الصراحة انا بعد اخاف يجيني ويبلشني ,,, اتصل شفه وينه يمكن يرد عليك
اتصلت بخالد مجاراه لهم ,,, شوي واهتز جوال خالد بجيبي
انا مرتبك = مايرد
صالح مستغرب = غريب ,, وين ذلف هذا
جلسوا الشباب شوي وراحوا ,,, اخذت شوي وبعدها اخذت لموزين راجع للشقة
القيت نظره على جوال خالد اللي ماوقف عن الاهتزاز ابد
ولقيت مكالمات بالهبل لم يرد عليها ,, فتحتها
بعضها من الغالي ( ابو عبدالله ) وبعضها من ابراهيم وماجد وبعضها من هذا بيت عمتي ( صالح ) وبعضها من مامي ( ام خالد ) بس لفت نظري اسم غريب من بين المكالمات ( رنا )
استغربت من رنا هذي اللي تتصل عليه ,,, اول ماتعرفت على خالد قالي انه تاب عن المغازل ,,, طيب هذي وش ,, يمكن اخته ,,, وابتسمت الا صح يمكن اخته
رولا ,, رولين ,,, رند الرضيعة ,,, وهذي بحرف الراء
وهو له اربع اخوات
وضحكت مستانس على اكتشافي الذكي والخطير وعلى ربطي بالاسماء مع الاسم الجديد
اهتز الجوال بيدي مرة ثاني
( مامي يتصل بك ) ,,, مسكينه امه ,,, ياترا وش بيصير فيها لو تعرف عن ولدها وعن مرضه
شهقت ,,, صح اليوم الخميس المفروض اليوم وهو عندهم حسب ماقالي خالد ,,, وانا اقول ليش اكثر الاتصالات اليوم من امه اكيد خافت عليه ,,, واكيد هي على نار الحين ,, تخاف صار فيه شي بالطريق
والله حرام علي ليش ماعلمهم ,, وهم الحين على اعصابهم والله اني نذل ,, الله يسامحك ياخالد ليش تسوي باهلك كذا
ماقدرت ازوره العصر,,, مادري هو صحى والا لا ,,, هو وافق على العملية والا لا ,,, والمشكلة الحين الوقت متأخر وممنوعة الزيارة
الجمعة
استغربت اتصالات فايز الملحة بجوال خالد ,,, غريب وش يبي فايز والغريب فيه رقم مخزن بجوال خالد باسم ( حماة الفضيلة ) ,, هذي اكيد الهيئة
وكلهم يتصلون عليه بشكل ملح ,, وانا المشكلة ماقدر ارد ,,, ودي اعرف وش فيه
العصر رحت للمستشفى وعلى طول دخلت على الدكتور ,, ابشوف خالد ابشوفه وابن امه يمنعني ,, ذيك المرة نشبت بحلقه وعيا ,,, الحين يانا ياهو
انا = بشوف خالد
الدكتور = تقدر تشوفه
ايه خاف
الدكتور = بس اجلس لازم نتكلم اول
انا = وافق خالد على العملية .؟ ( وجلست )
الدكتور = قبل تشوفه لازم اقولك على شي ,,, واتمنى تعذرنا لأن مالقينا حل الا كذا
خوفني كلامه
انا بخوف = وش
الدكتور = اضطرينا نقيد يدين اخوك
شهقت متفاجئ
انا = وش ,,, ليه وش شايفه قدامك مجنون تربطه
الدكتور = يابن الناس اسمعني خلني اعلمك باسبابنا
سكتت احتريه يتكلم
الدكتور = خالد نفسيته دماااااار ,,, يائس كاره نفسه ,,, رفض العملية ورفض الكيماوي ,,, ماستجاب معنا بالعلاج ,,, نفسيته دمار دمااااار
نزلت راسي بيأس ,,, لا حول ولا قوة الا بالله
انا بحزن = طيب ماهو عذر تربطونه كنه كلب عندكم ,,, حرام عليكم
الدكتور = اربع مرات يشيل المغذي عنه ,,, نحطه له ويشيله ,,, وضرب احد الممرضات الفلبينيات ,,,, هذا غير انه حاول يهرب من المستشفى ,,, اسف اني اقول لك هالكلام عن اخوك بس وش نسوي اضطرينا نقيده والمشكلة امس ماحد زاره منكم حتى نعطيكم خبر
انا بحزن = امس الصبح زرته
الدكتور = الصباح امس كان بغيبوبة وماصحى الا العصر وعلى فكره ماجته حالته وصار يتصرف بالاسلوب هذا الا بعد ماستأذنته بالعملية ,,, فار وعصب وبعدها صار يتصرف تصرفات مجنونة
انا = خلني اشوفه تكفى
الدكتور = ان شاء الله ( وطلع ورقه من درج مكتبه ) بس اول ابيك توقع على العملية
انا مرتبك = هاااه ,,, بس انت تقول خالد رافض
الدكتور = اخوك بنفسيته التعبانة هذي اكيد بيرفض ,,, خالد نفسيته دمار ويائس من الحياة كلها ,,, انت اخوه وتقدر تاخذ هالقرار ,,, لازم توقع ,,, اسمك لو سمحت ورقم بطاقتك
هذا اللي خايف منه ,,, لا والمشكلة اسمي خالد بينهبل الدكتور اخوان واسمهم خالد
انا مرتبك = آآآآ ,,, طيب اصبر شوي خلني اشوف خالد واحاول اقنعه ( ووقفت ) يله استاذن
الدكتور = اصبر ياخ
بس طلعت بسرعة وخليته ,,, سألت عن غرفته ودخلت عليه
لقيته متمدد قدامي على السرير ومتلحف ,,, قربت منه ,,, نايم ولاف وجهه بالجهة الثانية وملامحه هادية وواضح عليه التعب ,, طالعت يديه ( تنهدت ) فعلا مربطينه ,, يده اليمنى مربطه بحديدة السرير الايمن ويده اليسرى مربطه بحديدة السرير الايسر وعليها المغذي ,,, حرام عليهم شكله ضعيف ,,, شكله مايقدر حتى يشيل مخده ,,, ليش يربطونه
انحنيت عليه وسلمت على خده ,,, حس فيني خالد وفتح عيونه والتفت لي وطالعني شوي وهو ساكت
انا بابتسامة = الحمد الله على سلامتك ( وسلمت على خده الثاني )
خالد بعصبية = طلعني
بسم الله الرحمن الرحيم توني اقول شكله ضعيف
خالد بصراخ = طلعني مثل مادخلتني طلعني
انا بعصبية = كل تبن ماهو انا اللي دخلتك
خالد = ماعلي ,,, طلعني طلعني
وقعد يحاول يحرر نفسه ويصارخ بصوت عالي ( طلعني )
حطيت يدي على فمه وقربت وجهي من وجهه
انا بعصبية = خالد وش فيك ,,, وشلون تبيهم يطلعونك وانت تتصرف كنك مجنون ( وابعدت يدي عن فمه )
خالد بتعب = طلعني تكفى خالد ,,, لازم اطلع ,,, انا مواعد اهلي اجيبهم الخميس ,,, تكفى خالد تكفى ,,, طلعني
حطيت يدي على راسه وابتسمت له
انا = طيب اليوم الجمعه ,, يوم واحد ماراح يضرهم
خالد = بس اكيد امي خايفه علي الحين ,,, وخالي بعد من يفكني منه
من ناحية امك وخالك الله يعينك ,,, حرقوا جوالك من الاتصالات
انا = اسمع ابو خلّود ,,, جوالك معي اضطريت اخذه ,,, وش رايك تكلمهم الحين ,,, ابو عبدالله قالب الدنيا عليك يدورك ,,, كلمه وكلم امك وطمنهم
خالد وهو يجاهد دمعته = غصب عني ,,, والله اني مواعد امي اجيبها الخميس بس والله غصب عني ,,, انا مريض مرييييييض ماصلح لشييييييي ( وبكى بصمت )
لا حول ولا قوة الا بالله
انحنيت عليه وضميته
انا = انت الغلطان ليش ماتعلمهم عن مرضك وتتعالج ,,, اللي تسويه بنفسك حراااام
خالد بصوت باكي = خاااايف ,,, خالي متعلق فيني ,,, وامي بعد مااابي اعلمهم ,,, مالهم غيري ,,, خلني اموت وهو مايدرون عني احسن ,,, ابي امووووت
ضميته بقوة
انا = بس خالد
خالد بصوت باكي = فكني خالد فكني
رفعت عنه
انا = ان شاء الله بس اوعدني ماتتصرف تصرفات مجنونة
خالد بصراخ = بطلع فكني بسررررررعة ,,, الحين وقت زيارة اقدر اطلع وماحد داري عني
انا = خااالد
خالد بصراخ = فكني فكني ,,, لازم اروح للرياض فكني
انا = كلم امك الحين واعتذر لها وسافر لها بكرة ,,, لا تتعب نفسك ,,, حرام اللي تسويه بنفسك ياخالد حراااام
خالد = فكني طيب ,,, وشلون اكلمها وانا مربط كذا
انا = ادري فيك تبي تهج ( وطلعت جواله من جيبي ) مخزن رقم امك تحت أي اسم .؟ واعذرني تراي فتحت المكالمات التي لم يرد عليها بجوالك
وخالد بعصبية = وليش تفتحها ياجحش
انا = مدري الصراحة ,,, وترا فايز والهيئة اليوم مدري وش عندهم كل شوي يتصلون عليك ,,, اخاف استجد جديد بموضوع ناصر
خالد = وليش مارديت .؟
انا = تبيني ارد وهو جوالك ,, بيسألوني عنك بعدين
خالد = انت ماعلمت احد عني .؟
انا = ايه
خالد بتعب = زين سويت ,,, مابي احد يعرف ,,, صدقني ماني قادر اعلمهم عن مرضي
انا = كلم امك الحين وطمنها عليك
خالد = فكني طيب
خالد ضعيف واقدر امنعه اذا بغى يهج ,, الله يهديه ليه مايبي يتعالج بس والله معذور كل شي فوق راسه ,,, امه من جهه وخاله من جهه وفوق هذا مايعرفون عن أي شي
فكيت رباط يديه واخذ خالد الجوال مني وجلس
خالد = ابتصل بامي اذا طلعت من المستشفى والحين ابطلع ,,, ماعلي منكم
انا = والعملية .؟
خالد = أي عملية
انا = ماقالك الدكتور انك محتاج عملية يستأصلون الورم من الجهاز الهضمي ,, خالد المرض انتشر بجسمك وانت مهمل نفسك
خالد = ويعني واذا استأصلوها يعني خلاص تشافيت ,,, انا ميت ميت
مديت يدي وضربت راسه
انا بعصبية = انا يوم من الايام باذبحك
خالد = احسن ,, ( وجا بيفك المغذي بس مسكت يده )
انا بعصبية = لا تخليني اربطك مرة ثانية ,,, تبي تطلع تقدر تطلع بدون ماتهج
خالد مستغرب = وشلون .؟
انا = خالد اوعدني اذا جبت اهلك من الرياض تدخل المستشفى وتسوي العملية ,, اوعدني خالد
خالد = صاحي انت ,, المرض براسي صح صرت احس بعوار ببطني بس المرض براسي ,,, يعني اذا استأصلوا الورم ماراح يستأصلونه من راسي ,,, يعني كذا والا كذا ميت ميت
انا بحزن = خالد ليش يائس ,,, الشـ
ورن جوال خالد
القى خالد نظره على جواله
خالد = هذا فايز ( ورد عليه ) هلا ,, وعليكم السلام ,, الحمد الله ,, آآآ ,,, لا ماختفيت بس ,, آآآآ ,,, المهم بغيت شي ,,, جوالي ماكان عندي ,, آمر فايز بغيت شي ,,, وش ,, الله 10 آلاف دفعه وحدة ,,, لا ,,, ايه متأكد ,,, راتبه بالشهر 800 ريال وما اسلمه يد بيد احوله لحسابه تعرف هو بالرياض وانا هنا وصعب اروح كل شهر واسلمه الراتب ,,, انا متأكد انه ناصر الكلب ,,, ايه مافيه غيره طبعا ,,, ايه خلهم ياخذون راحتهم ,,, خلهم يحققون معه ,,, صدق انه خاين واسم على غير مسمى ,,, تسلم فايز وماقصرت انت والهيئة ,, هاااه ,,, آآآ ,, ايه ان شاء الله برجع لخالي الحين ,,, لا بس ,,, آآ كنت ,,, ( والتفت لي ) كنت كاشت مع الربع ,,, ههههه عاد ,, تسلم ,, مع السلامة
انا = شسالفة .؟
خالد = يقول فايز ان الهيئة اليوم كشفوا حساب صادق ولقت محول للهند 10 ألاف دفعه وحدة
انا = عشر الاف مرة وحدة ,,, من وين له .؟
خالد = اكيد احد معطيه هالمبلغ واكيد نويصروووه
انا = يمكن هذا تجميع راتبه
خالد = لا ,,, يوم كشفوا الحساب شافوا كل شهر يحول للهند 600 ريال او 500 ريال وراتبه 800 ,,, الا باحد الشهور حول للهند 10 الاف دفعه وحدة ,, والله لو يطير ويوقع ماجمع بـ 800 عشر الاف خلال كم شهر ,,, هم الحين بيحققون معه ويشوفون من اللي عطاه هالمبلغ
ابتسمت
انا = الحمد الله قربت طيحت ناصر
وفرحت لما شفت ابتسامته بس ماطول بالابتسامة كشر بوجهي
خالد بعصبية = وانت قلي وشلون اطلع من دون ماهج ,, ابي اطلع الحين الحين
انا = بسم الله الرحمن الرحيم اللهم سكنهم مساكنهم ,, ياثور انت كل شي عندك بالقوة ,,, ناد الدكتور الحين وقل ابي اطلع على مسؤليتي وخلاص ,, صح اننا بنتعب وحنا نقنعه بس احسن من انك تهج
خالد = يووووووه
انا = اوعدني خويلد ترجع تسوي العملية
خالد = مايحتاج
انا = ترا اعلم ابو عبدالله عن مرضك
خالد بعصبية = وووشش ,, تهددني انت ووجهك
انا = جاك العلم
وطلعت انادي الدكتور ,,, وجلسنا انا وخالد نص ساعة وحنا نحاول فيه ,,, لين وقع خالد على الخروج على مسؤوليته
اخذ خالد بنطلونه وراح للحمام عشان يبدل ملابس المستشفى ,,, شوي وطلع وجا عند السرير واخذ فنيلته
طاحت عيني على مكان الجرح ,,, ابتسمت الحمد الله تشافت بشكل واضح بس الى الحين آثرها بارز بصدره
انا = تراك وعدتني ترجع للمستشفى وتسوي العملية
مارد علي خالد ولبس فنيلته بصمت
وحنا راجعين للحارة اتصل خالد بامه
خالد = هلا ,,, انا طيب ,, والله اني طيب ,,, يمـ ,, آآ ,,, كنــ ,,, قســ ,,, طيـ ( وسكت يسمعلها )
ابتسمت شكلها تهاوشه ليش مايرد عليها
خالد = هذا انا اكلمك قسم بالله اني طيب ,,, كــ ,,, طيب يالغالية خليني اتكلم ,,, اول شي جوالي كان آآآ ,,, كان آآآ ,, كان ضايع مني وتوني لقيته ( والتفت لي ) ثاني شي كنت ,,, آآآ ,,, اقصد كانت سيارتي متعطله وتوهم صلوحها ,, لا لا لا لا والله مب حادث ,,, يمه خلاص ان شاء الله الفجر وانا عندكم ,,,
مديت يدي وضربته مع كتفه بقوة
خالد = لا والله لا تعب ولا شي ,,, بعدين انا مواعدكم امس بس مدري السيارة خربت طيب تبين شي يالغالية ,,, لا بس عندي واحد نشبه ,, لا مب صالح ,, يله مع السلامة ,,, ان شاء الله مع السلامة
وسكر عنها والتفت لي معصب
خالد بعصبية = ليش تضرب .؟
انا بعصبية = وش قلت انا ,,, ماقلتلك ارتاح اليوم ولا تسافر الا بكرة
خالد = مالك دخل
انا بصراخ = انت نظرك ضعيف ,,, وشلون تسوق وانت ماتشوف
خالد = مالك دخل
انا بعصبية = وتوك طالع من المستشفى بعد
خالد = مالك دخل
اخذت نفس اهدي نفسي ,,, بيطلعني من طوري هالخبل
انا بعصبية = مالي دخل مالي دخل ,,, اذلف
وصلنا لشقتي اخذ خالد سيارته بس ماسمحت له يسوق ,,, خالد تعبان مرة كل شوي يتألم من راسه ,,, حتى لو كانت المسافة قصيرة شكله بيصدم على طول وهو على هالحال
ركبنا سيارته رايحين للحارة
انا بضيق = متى بتسافر للرياض انت ووجهك .؟
خالد بتعب = بعد صلاة العشا
انا مستغرب = بعد شوي بيذن العشا ,, يعني بتروح الحين .؟
خالد بتعب = لا اباخذ شوي واروح ,,, وبعدين انت وش دخلك ,,, كيفي انا اسوي اللي ابي
سكت عنه ودخلنا الحارة ,,, وبعدها رجعت مشي لشقتي وانا افكر
مدري وشلون امنعه يسافر
السبت
قمت من النوم الساعة 11 الصباح ,,, القيت نظرة على جوالي ولقيت رسالة من خالد
ونصها
( وصلت )
تنهدت ونزلت جوالي على الكومدينه
امس بعد ماوصلته لبيته وبعد مارجعت لشقتي ,,, غيرت رايي وصرفت التفكير عن وشلون امنعه
مرتين رحت معه للرياض بس عشانه ,,, ومرة منعناه انا وابراهيم يروح
احس نفسي نشبه من كثر مااحاول امنعه ,,, خالد رجال واعرف بنفسه
وامس سافر الساعة 2 في الليل وارسلت له يعلمني اذا وصل بالسلامة
الصراحة مدري وشلون يسوق ونظره ضعيف
العصر
اخذت سيارة ابو سعد عشان خلود وامي يروحون للسوق وبعد ماخلصن رجعت السيارة ورحت مع الشباب للكوفي
وابراهيم كل شوي يسألني وين لقيت خالد ,, اقوله كان كاشت مع ربعه بس ما يصدقني
انا بعصبية = ليش مانت مصدق انت ,,, اقولك كان كاشت ,,, اسأله بعد
ابراهيم = مدري الصراحة ,,, تبي الصدق خالد تركي غريب وتصرفاته غريبة ودي اعرف وش وراه ,,, شف كم مرة اختفى وبعد كم يوم يطلع حتى اهله مايدرون وين يروح
انا احس ابراهيم مثلي يهمه امر خالد ويحاول يكتشف غموضه ,,, ليتني اقدر اقول لابراهيم عن مرض خالد يمكن يقدر يقنعه يتعالج
ابراهيم = تصدق مرة سألته عن ابوه يوم كان مبتلش باخوياه بدر وربعه قلتله ليه ماتقول لأبوك يتدخل يقول انا ماشفت ابوي من شهور ,,, انهبلت وشلون ماشاف ابوه من شهور ,,, قلته ليش بس هو مارد علي ,,, الصراحة بديت اشك ان خالد عاق بابوه
سكتت ومارديت
ابراهيم = اشوفك ماستغربت ,,, شكلك داري
انا = داري بس وش تبيني اقول
ابراهيم = العقوق موب زين ياخالد ,,, عقـ
انا = خالد موب عاق
ابراهيم = وشلون موب عاق وهو يقول ماشاف ابوه من شهور ,,, المفروض نتدخل وننصحه
انا بضيق = ماندري عن الاسباب يمكن ابوه هو الغلطان
ابراهيم = حتى ولو ,,, هذا ابوه ,,, لازم نصلح بينهم
انا بسخرية = هذا اذا حصلت ابوه ,,, خالد بنفسه ماشاف ابوه من شهور بتشوفه انت ,,, ابو خالد لاهي بتجارته وصالح يقول اكثر شغله بكندا
التفت ابراهيم لصالح اللي يتلاسن مع ماجد وفيصل
ابراهيم = صويلح انت وصوتك اللي يلعلع ,,, ابـسألك عنـ
صالح بعصبية = قل ماشاء الله لا ينبح صوتي
ابتسمت
ابراهيم = ههههههههه ماشاء الله ماشاء الله ,,من زين صوتك عاد ,,, المهم صويلح ابسألك عن ابو خالد
صالح مستغرب = من ابو خالد .؟
ابراهيم = ابو خالد تركي
صالح مستغرب = وش فيه .؟
ابراهيم = وش يسوي بالخارج .؟
صالح = شغله بعد وش ,,, رجل اعمال هذا ,,, تحسبه مثل ابوي وابوك
ابراهيم = خل عنك بس
انا = متى اخر مرة جا للرياض .؟
صالح = جا أيام الامتحانات قعد يومين ورجع
انصدمت ,,, ماعلمني خالد
انا صرت اتحاشى اسأل خالد عن ابوه بعد أخر مرة
ابراهيم = بس يومين ,,, طيب وش سوا خالد ماراح يسلم على ابوه .؟
صالح = لا ,,, ايام الامتحانات ماقدر يروح ,,, واصلا ابوه ماقعد الا يومين,,, موب فاضي لمهايطة خالد ,, ليش تسأل .؟
ابراهيم = لا ,,, بس مجرد سؤال
صالح = الا فيه شي ليه تسأل ,,, علمني والا الحين اصقعك براس فيصل
فيصل = هييييه وش دخلني انا
ابراهيم = لا بس مستغرب ,, مرة قالي خالد انه ماشاف ابوه من شهور
فيصل بسخرية = هه جاكم كلامي .؟ ,,, يوم اقول خويكم هذا شايف نفسه ومارتحت له ,,, ماصدقتوني
صالح يوجه كلامه لابراهيم
صالح = وانت مصدقه ,,, ابو خالد كل شهر يجي للسعودية ,,, اكيد شافه
التفت لي ابراهيم وقرب راسه لي وكلمني بهمس
ابراهيم = شفت شكله عاق ,,, لازم ننصحه ونصلح بينهم وابيك تصير معي ,,, صالح ماينفع الا للهواش ,,, وماجد ماينفع الا للسيارات والكورة ,,, وفيصل خلقة مايداني خالد ,,, مافيه الا انت
سكتت ومارديت
ابراهيم ملاحظاته وتفكيره قريبة من افكاري وملاحظاتي ,,, لاحظ مثلي ان فيصل مايداني خالد ,,, وملاحظ على غرابة خالد وتصرفاته ,,,
يوم الاحد
طلعت نتايجنا حق النصف الاول ,,, دخلت غرفتي متضايق مرررررة
وش هالحظ الزفت
80 % بس
وشلون بانجح واجيب نسبه بالنصف الثاني
ابراهيم وماجد وفيصل جابوا بالتسعين ,, و صالح جاب بالثمانين بس اعلى مني
بس عادي عنده ومستانس الاخ
انتبهت لامي تدخل علي
امي = خلص خالد ان شاء الله تئدر تعوضها بالترم التاني
انا بعصبية = انتي السبب رحتي وخليتنا وحنا كنا محتاجينك بس انتي انانية همك نفسك وبس
= بدك تحط اللوم على إمك هلأ
التفتت لاحمد اللي واقف عند الباب
انا بعصبية = انت لا تتدخل وخلك بعيييييد
احمد = نسبتك الخايسة اللي جبتها من اهمالك انته مو من إمك
انا بصراخ = قلتلك لا تتدخل واطلع برا
احمد = السعوديين هيـ
قمت منقهر منه
انا = تراك اذيتنا ,, اذا كان ماهو عاجبك السعودي ليش ساكن عندهم .؟ ,,, فارق اطلع من الشقة اذا كنت ولد ابوك
التفت احمد لامي معصب
احمد = ماعمري شفت بحياتي وقح زي ابنك
وطلع
التفتت لامي معصب
انا = انتي بعد اطلعي خليني بحالي
نزلت امي راسها وطلعت منكسرة
كل اللي انا فيه بسببها هي ,, لو كانت عندنا واهتمت فينا ماكان هذا حالنا
العصر ماطلعت من الشقة ,,, من المسجد ارجع على طول للشقة
المغرب
اتصل علي ابراهيم
انا بكسل = الووووه
ابراهيم = خالد جا من الرياض تعال
انا مستغرب = اجي وش اسوي
سكت ابراهيم شوي
ابراهيم = وشفيك نسيت ,,, ماقلتلك امس نبي نصلح خالد بابوه
انا بضيق = اوووووه ابراهيم ,,, حنا ماندري عن الاسباب
ابراهيم = حتى لو فيه مليون سبب هذا ابوه ,,, ياخي المفروض مايعق بابوه بهالشكل ,,, لولا ابوه ماكان عنده احسن السيارات ويدخل احسن المدارس ,,, قلّي هذا مايشفع له عند ابوه حتى لو كان غلطان .؟
تنهدت وسكتت ,,, انا احاول اتحاشى خالد عن موضوع ابوه ,, ذيك المرة يوم سألته عنه تضايق
ابراهيم = يله تعال ,,, هو جا العصر وجاب اهله معه والحين صالح طلع مع ماجد فرصة نكلمه
انا = طيب يله جاي
سكرت عن ابراهيم وانا متضايق منه ,, ابراهيم اذا حط براسه شي لازم يسويه
رحت للحارة ولقيت ابراهيم واقف بالشارع يحتريني
بس شد انتباهي سيارة خالد ,,, اللمبة الامامية مكسورة ,, وبدل ماروح لابراهيم وقفت عن سيارة خالد
جاني ابراهيم ووقف عندي
ابراهيم = يله خالد
انا = شف ( واشرت على اللمبة )
ابراهيم = ايه شفتها ويوم سألته يقول صدمت بس شكلها صدمة خفيفة ,,, يله امش
اكيد بيصدم نظره ضعيف وزين انها جت خفيفة بعد
رحت وضربت الباب وطلعت لنا رولين
ابراهيم = روحي نادي خالد
راحت رولين تركض
شوي وجانا خالد لابس بنطلونه الاسود وفنيلته الرمادية
سلمنا عليه و حسيت خده حار بس ماعلقت ,,, طالعته شكله مثل العادة تعباااان
خالد بابتسامة = هلا ( وفسح لنا الطريق ) حياكم الله
جا خالد بيدخلنا المجلس بس اقترح ابراهيم ندخل غرفته ودخلناها
جلس ابراهيم على السرير وجلست بجنبه وخالد جالس قبالنا على الكرسي
انا = وشلونك .؟
خالد بابتسامة = طيب طاب حالك
ابراهيم = وابوك وشلونه .؟
خالد مستغرب = ابوي .؟ ( التفت لي ورجع التفت لابراهيم مستغرب ) الحمد الله بخير
ابراهيم = الصراحة حنا جاينك بموضوع ابوك
قطب خالد حواجبه وسكت
ابراهيم = خالد كلمتك يوم تقول انك ماشفت ابوك من شهور مانسيتها ,,, خالد العقوق موب زين ,,, والحياة ماتسوى تقطع ابوك
انا = خالد رحتله انت يوم جا للرياض .؟ ,,, اظنها فرصتك تشوفه بعد كل هالشهور
طالعنا خالد شوي وهو ساكت
ابراهيم = مهما كان وغلط عليك هذا ابوك وله حق عليك وانت اكيد تحتاجه مافيه احد مايحتاج ابوه
التفت خالد لي
خالد = وانت .؟
انا مستغرب = انا وش .؟
خالد = تحتاج ابوك .؟
شهقت وسكتت ,, يبي يجرحني هذا والا أيش
ابراهيم = خالد وش قاعد تقول انت .؟ خالد ابوه اللـ
قام خالد معصب
خالد بعصبية = وانا اعتبر نفسي مثل خالد ,,, عن اذنكم شوي
وطلع ,,, التفتت لابراهيم وسكتت
ابراهيم = شكل حالته مستعصية ,,, كاره ابوه وبقوة
شوي وجا خالد ومعه الضيافة
خالد بابتسامة = حياكم الله ,,, الحمد الله ان صالح مو موجود ,,, اقدر اخذ راحتي بالبيت هههههه
قام ابراهيم
ابراهيم = يله استاذن انا
رفعت راسي لابراهيم مستغرب
انا مستغرب = وين رايح تونا جينا
ابراهيم = آآآ ,,, تذكرت حاجة ولازم اروح
خالد = يارجااال أجلها واقعد خلنا نسولف
ابراهيم = مرة ثانية ( وطالعني واشر بيده لي من دون مايشوفه خالد وطلع)
,,, مافهمت من حركته شي بس اظن انه يبيني اكلم خالد عن ابوه واقنعه
جاني خالد بعد ماوصل ابراهيم وجلس بجنبي على السرير
خالد = اليوم عرفت من صالح انها طلعت نتايجكم ,,, هاااه بشر .؟
لفيت وجهي عنه متضايق
انا بضيق = لا تذكرني
خالد = افاااا ليش .؟ جبت العيد .؟
انا بضيق = 80
خالد بتنهيدة = يعين الله
انا = وانت ,,, طلعت نتايجكم .؟
خالد = ايه 94 ولو كان بالي ماهو مشغول بسالفة الاستراحة يمكن جبت اكثر
انا = اثرك دافور
خالد = افااا عليك اعجبك ( وضرب فخذي بقوة ) لا تتضايق ياخالد رب نسبة عالية قالت لصاحبها دعني ( وابتسم ابتسامة واسعة ) ,,, خويلد اكثر اللي بالجامعات نسبهم قليلة وبعدين انت عندك الترم الثاني ,,, تقدر تعوض ان شاء الله
يحاول يرفع معنوياتي
انا بضيق = امش أذن خلنا نطلع
بعد صلاة العشا
رجعنا انا وخالد من المسجد وهو كل شوي يقول برد ,, اااخ ,,, راسي
انا = الناس تبي تطلع من ثيابها وانت تقول برد
خالد = مدري اخاف ترتفع حرارتي مرة ثانية
انا = ايه يوم سلمت عليك خدك كان حار
خالد = بالله ( ورفع يده يتحسس خده وجبهته ) ايه والله حار
مرينا على سيارته
انا = اشوفك صادم بسيارتك
خالد = ايه يوم دخلت الرياض ماشفت السيارة اللي كانت واقفة قدامي عند الاشارة ,,, بس الحمد الله جت سليمة حتى راعي السيارة اللي صدمتها ماقالي شي ,, اصلا الحمد الله مافيه ضرر
انا = تراك وعدتني تسوي العملية
خالد = ومن قالك اني بسويها
التفتت له بسرعة
انا = هييييه مو حنا قلنا اذا جبت اهلك من الرياض تسوي العملية ,,, واذا كان عن المدرسة تراها تبدا بعد اسبوع وتقدر تغيب الاسبوع الاول من الدراسة يعني عندك اسبوعين ترتاح فيهن
خالد = ياااخي المرض هنا ( وأشر على راسه ) هنااااا وش دخل هضمي وما هضمي ,,, صااحي انت
انا = انتشر ياغبي تبيه ينتشر زوووود
خالد = اوووووه ,,, انا ميت ميت
عصبت عليه ,,, يوعدني وبعدين يخلف
انا بعصبية = هين انا اعرف وشلون اجيب راسك
= خاااااااااااالد
التفتت كلنا على اللي ينادي وكان فايز
وبعد السلام والسؤال التفت فايز لخالد
فايز = بكرة لازم تروح للرياض تراجع الهيئة هناك .؟
انا = استجد جدييييد .؟
فايز = مدري الصراحة ماعلموني بس يبون خالد يراجعهم وضروري
انا = بس خالد توه جاي من الرياض
خالد = عااادي اروح مرة ثانية المهم نفتك من هالسالفة
انا = فايز عادي يراجع هيئة القصيم .؟
سكت فايز شوي يفكر
فايز = لحظة ( وطلع جواله وراح يكلم بعيد عنا )
التفتت لخالد
انا بعصبية = قسم بالله ماعمري شفت ثور مثلك
هز خالد راسه باية وسكت
شوي وجا فايز
فايز = كلمت واحد اعرفه بالرياض يقول كلموا ابو عادل اللي عندكم ,, وش رايكم نروح له الحين
خالد = ابو عادل اللي عرفتني عليه ذيك المرة
فايز = ايه هو اللي يتابع موضوع الاستراحة مع هيئة الرياض
انا = طيب ماسألت خويك وش صار بالموضوع
فايز = لا عيا يعلمني بس يبون خالد ضروري
ركبنا سيارة خالد ورحنا لمركز الهيئة بس قالوا لنا ننتظر ربع ساعة بالكثير نستفسر من هيئة الرياض ويعرفون وش يبون من خالد
وبعد عشر دقايق من الانتظار
فايز = هااه يابو عادل بشر ان شاء الله اعترف عامل الاستراحة .؟
التفت ابو عادل لخالد
ابو عادل بابتسامة = ابشرك اعترف عاملك وقال ان فيه واحد اسمه ناصر هو اللي دفع له 10 ألاف واتفق معه ودخلوا البراميل وصوروا وطلعوها بنفس اليوم
ابتسمت بفرح والتفت لخالد ,,,
خالد = وناصر .؟
ابو عادل = قبضت الهيئة عليه ,,, هو بالبداية حاول ينفي التهمة عنه بس بعد ماحجروا له وبعد ما اثبت العامل اعترف والحين هيئة الرياض يبونك تتابع معهم
ابتسمت على شكل خالد ,,, المسكين مايدري هو يضحك والا يصيح ,,, شكله ماهو مصدق ,,, خاصة انه طوال الشهر اللي راح وهو خايف تنقلب الامور ضده
التفت خالد لي ورجع التفت لابو عادل
خالد = ووينلي .؟
ابو عادل مستغرب = نعم .؟
خالد = الدكتور وينلي اتلانتس مدير العيادة ,,, انا متأكد انه متفق مع ناصر
ابو عادل = ناصر ماجاب طاري مدير العيادة ,,, لا ناصر ولا صادق جابوا طاريه
سكت خالد وهو يطالع بوجه ابو عادل
انا = لا تخاف ياخالد مثل ماخلصك الله من ناصر قريب يخلصك من هالامريكي المهم مشكلة الاستراحة وخلصنا منها
خالد = يعني انا ماعلي شي ,,, الصور والفيديو برئ منها انا .؟
ضحكت على شكله
انا = الحمد الله
فايز = هههههههه خالد وش فيك يقولك عاملك وناصر اعترفوا ( وقام وتوجه لخالد ومسك ذراعه يقومه وسلم عليه ) الحمد الله ,,, تصدق يوم طولت السالفة شكوا الشباب فيك بس ماحبيت اخوفك
قمت وسلمت على خالد بس هو ضمني ولف يديه علي
خالد = ماني مصدق ,,, هم وانزاح عن صدري ,,, كنت خايف
انا = ههههههههههههه شفت كل مخاوفك طلعت على الفاضي ( ولفيت ذراعي حوليه )
خالد وهو شوي ويصيح = ماني مصدق اخيرا ارتحت منه ,,, عيشني بخوف
حاولت ابعده عني ,,, بس خالد شدني وضمني اكثر
خالد = ماني مصدق ( وغطى وجهه بكتفي )
ضحكت عليه وهمست باذنه
انا = ياخبل لا تصيح علينا وتفشلنا ( وضربت ظهره )
خالد = ماني مصدق اخيرا ارتحت
ابو عادل = حنا الصراحة بدينا نشك فيك بس فايز لمعرفته بك وتعاونك معنا واللي خلانا نصدق ببرائتك يوم طلب صادق منك يسافر,,, والحمد الله ,,, الله مايضيع عبيده
جا فايز وابعد خالد عني وذكره بشي كنا ناسينه
فايز = اسجد ياخالد شكر لله
اول ماخلص فايز كلمته ,,, خر خالد ساجد
اخذ شوي وبعدها جلس ورفع راسه لابو عادل
خالد = ذلوني ,,, كرهوني بعيشتي ,,, صـ
جا ابو عادل وقومه
ابو عادل = ثاني مرة انتبه على حلالك والحين باقي تروح للرياض وتراجعهم هناك
خالد = ان شاااااء الله ,,, ودي اشوف ناصر واشرب من دمه
فايز = خل عنك بس الهيئة تعرف شغلها ,,, انت بس راجعهم
نزلت راسي متضايق ,, مسكين خالد ماعنده فرصة يرتاح ,,, الولد عنده عملية ولازم يسويها والتعب مو زين له ,,, وهو توه جاي من الرياض ,, والطبيب قال انه يحتاج لعملية مستعجلة
رفعت راسي والتفتت لفايز ,,, طفح الكيل مثل ماخلفت وعدك ياخالد ابخلف وعدي وافشي سرك ,,,, الكتمان لموضوع مثل هذا فيه تهلكه لك ,,, وانا ابقول لفايز مو لابو عبدالله ,,,, وخالد كتم مرضه عشان خاله وامه ,, الى متى يهمل نفسه
انا = فايز
التفت فايز لي
فايز = هلا
انا = خالد عنده عمليه لو يكلف احد يروح للرياض ويتابع موضوع ناصر عنه
فايز مستغرب = عمليه .؟
شهق خالد والتفت لفايز بسرعه
خالد مرتبك = ماعليك منه ,,,, نسبته الشينه الي جابها لحست مخه ( والتفت لي معصب ) هيييييه انت خرفت .؟
طنشته والتفتت لفايز
انا بتحدي = خالد طلع عنده السرطان والطبيب قال يحتاج عملية مستعجلة
طير فايز عيونه والتفتت بسرعة لخالد مصدوم
فايز بصدمة = وش
ابو عادل = لا حول ولا قوة الا بالله
جا عندي خالد ومسك ذراعي معصب
خالد بعصبية = وش سوييييييييت
طنشته مرة ثانية والتفتت لفايز وابو عادل
انا = وازيدكم من الشعر بيت ,,, خالد رافض العملية والعلاج
ابو عادل مستغرب = ليه .؟
انا = يقول انا مالي علاج ,,, ياائس
ابو عادل = ان لله وانا إليه راجعون ( ورجع لمكتبه وجلس والتفت لخالد ) الله قال اسعى ياعبدي اسعى معاك ,,, اخذ انت بالاسباب وتعالج والباقي على الله
ابتسمت ,, خالد كل شوي يرص ذراعي باضافره ,,, سحبت ذراعي منه وجلست على الكرسي وجلس فايز بجنبي بصمت
انا = هو مايبي يتعالج عشان خاله وامه ,,, يقول مايبيهم يعرفون عن المرض
فايز = من متى ووشلون .؟
التفتت لفايز
انا = اسأله هذا هو قدامك
التفت فايز له وعاد سؤاله
جلس خالد قبالنا
خالد بعصبية = هين ياخالد مردودة ( والتفت لفايز ) لا تصدقه مخرف هذا
فايز = ابو عبدالله يدري
انا = لا
فايز = لا يكون الصداع اللي يجيـ
انا = ايه الصداع اللي يجيه بسببه
فايز = اعوذ بالله ,,, اذا كان خالك واهلك مايدرون من يدري اجل .؟
خالد بضيق = مااحد يدري الا هالجحش
فايز مستغرب = منهو الجحش .؟
ابتسمت ,,, دايم هذي كلمة خالد لي
انا = انا
ابو عادل = وليش ماتبي تتعالج ,,, ولا تلقوا بانفسكم الى التهلكة ,,, رفضك للعلاج والعملية تعتبر تهلكه
وبدا يعطيه من النصايح والمواعظ وفايز ساكت وخالد كل شوي يعطيني نظرة تهديد ويرجع يلتفت لابو عادل ويهز راسه
الساعة 11 رجعنا للحارة وطوال الطريق وفايز جالس بمكان الراكب و ساكت ما فتح فمه بكلمة ,,, وخالد جالس وراي وكل شوي يكفخني على راسي
خالد بعصبية = لسانك هذا بقصه
انا = اسكت بس اسكت ( والتفت لفايز ) فايز وش فيك ساكت .؟
فايز = خالد من متى المرض معك .؟
خالد = من سنه ( وضربني على راسي )
فايز = واهلك يدرون .؟
خالد = لا ,,, فايز تكفى لا تعلم خالي تكفى طلبتك
فايز = سو العملية ولا اعلمه .؟
ضحكت مستانس ,,, خالد مايداني هالاسلوب
انا = ههههههــــ
فجأة ضربني خالد على راسي وقطع ضحكتي
وصلنا الشقة ونزلت من السيارة ونزل خالد عشان ياخذ مكاني بالسواقة
همست باذنه قبل يركب وانا طاير من الفرح
انا بابتسامة = ابو خلّود الحين اظن تقدر تطرد وينلي شر طردة وانت متطمن
قطب خالد حواجبه وابعد وجهه عني يشوفني
خالد مستغرب = وشلون ومخالفين الانظمة بيبلغ علي
انا = اطرده الحين ومايقدر يسوي شي
خالد = تهقى .؟ طيب والمخالفات الثانية اللي يهددني فيها .؟
ابتسمت شكله من فرحته بطيحت ناصر قفل مخه
فايز بصراخ وهو داخل السيارة = يله وش قاعدين تسوون
انا بهمس = رح انت الحين لبيتك واشوفك بكرة
خالد = قلي اول وشلون .؟
انا = رح الحين لا يعصب عليك فايز,,, مع السلامة ( فتحت باب السواق ودفعته داخل السيارة )
يوم الاثنين
الساعة 10 الصباح رجعت من المحل بعد مااشرفت على العامل وانا مستانس ,,, الحمد الله العامل يقول اليومين اللي راحوا فيه زبون ,,, هذا وحنا ماسوينا اعلان عنه
الحمد الله بدت الدنيا تضحك لي ولاخواني ,,, احس براحة
وقفتك معاي ياخالد مانساها طول عمري ,,, بفضل الله ثم بوقوفك معي فتحت لي باب رزق ماكنت احلم فيه ,,, صار عندي امل بعد مايأست وغسلت يدي من الوظايف
والله مدري وش كنت ابسوي من دونك ,,, كل يوم تسوّد الدنيا بعيوني ومالقى قدامي يحسسني بالامان الا انت ,,, كل الحلول جاهزة عندك ,,, اول مشكلة السكن وبعدها الوظيفة وبعدها هالمحل ,,, ابراهيم وصالح مايقصرون بس مايقدرون يسوون شي ,,, يمكن لأنهم عند ابوانهم ولا يقدرون يتخذون قرار مثل استأجار شقة وغيره ,,, خالد لا ,,, ابوه لاهي عنه بتجارته
طلعت جوالي ابتصل على الغالي ,,, اليوم الفجر لقيت اتصالات بالهبل منه ولأني كنت نايم ماسمعت ,,, انا اذا نمت خلاص حاسة السمع تنام معي
و يوم قمت الفجر لقيت رسالة منه يوم شافني مارديت عليه
( وينك ماترد علي
تراني على اعصابي
ماعلمتني وشلون اطرد وينلي وانا متطمن ؟ )
فتحت رسالته اللي جتني الفجر مرة ثانيه وانا اضحك ,,, وش فيه خالد مايشغل مخه
الحين يقدر يطرد وينلي بما ان ناصر انمسك
واكيد التهديدات اللي يقصدها وينلي هي براميل الخمر ,,, اكيد
صح هو ماقال وشي بالضبط بس اكيد هي ,,, الحين يقدر خالد يطرد المخالفين ويطرد وينلي معهم
اتصلت عليه بس مارد ,,, اتصلت عليه مرة ثانية ولا رد ,,, امر عليه بالبيت احسن
وصلت الحارة وضربت باب بيت ابو عبدالله
وطلع لي ابو عبدالله ومعه رولين ,,, سلمت عليه وسألته عن خالد
ابو عبدالله = خالد اليوم صحته ماش تعبان مرة وانا عمك ,,, حياك ادخل
ايه صح خالد امس كان حار
انا بتنهيدة = خلاص ياعم امره مرة ثانية
ابو عبدالله = لا ياولدي ادخل عنده ( ودخلني للحوش ) حياك
شفت رولا تطلع من الملحق ويوم شافتني كأنها شايفه جني تراجعت بخوف ودخلت الملحق مرة ثانية
الحمد الله والشكر ,,, وش فيها هذي,,,, احس فيها نفسية ,,, سبحان الله ماهي مثل رولين مرحه ,,, مالت عليها
دخلنا الملحق ولقيت خالد منسدح على سريره ورولا جالسة بجنبه على السرير ولاصقه فيه ويوم شافتني لصقت باخوها اكثر
تضايقت ,,, معقول خايفة مني بسبب الهواش اللي صار بيني وبين اخوها ,,, ماسويت لها شي انا
جا بيقوم خالد يوم شافني بس منعه ابو عبدالله
ابو عبدالله = خلّك ,, خالد ماهو غريب ( والتفت لي ) انا عندي مشوار ابخليكم مانت غريب ياولدي
وطلع وطلعت رولين وراه ناشبه فيه تبي تروح معه ,,, التفتت لخالد المنسدح على سريره بتعب وهو ماسك راسه بين يديه
خالد بألم = راااااسي بينفجر ( والتفت لي بتعب ) ليش ماترد علي
جلست على السرير بجنبه وانا متضايق من تصرفات رولا ,,, لصقت بخالد اكثر يوم شافتني جلست ,,, مالت عليها وعلى دلعها شوي وتجلس فوقه وماسكة ذراعه بخوف وعيونها علي ,,, حتى خالد تضايق منها ومن تقيدها لذراعه بهالشكل
معقول كل هذا خوف مني ,,, وش سويت باخوها انا ,, كلها كم كف والسلام ,,, ماله داعي هالخوف ,,, دلع
انا = كنت نايم ,,, واتصلت عليك قبل شوي ولا رديت ,,, وش فيك خالد شكلك تعبان ( وحطيت يدي على راسه وتفاجئت ) خالد انت شاب ضو ,,, قم اوديك للمستشفى
خالد = ماقدرت انوم ,,, راااسي راسي ( وكمل بهمس ) احس ابفقد وعيي الحين ( وغمض عيونه وجر شعره بألم )
انا = قم اوديك
خالد = لا
انا = وش اللي لا ,, قم بلا خبال
مارد علي يغمض عيونه بقوة ويئن
انا = يله
خالد بألم = هناك مسكن هاتلي حبه بسرعة ,,, ماني اتحمل آآآآه راسي
لاحظت عليه كل شوي يضعف ,, قمت بخوف لا يكون بيغمى عليه صدق
انا بخوف = خل عنك المسكنات الحين ,,, قم اوديك للمستشفى
خالد بهمس = راااسي
انحنيت عليه وضربت خده على خفيف
انا بخوف = خالد ماهو وقتك الحين ,,, قم
دفع يدي
خالد بألم = مابي ارووووح ,,, من الفجر وانا مصدع ,,,, احس راسي ثقيل ,,, راااااااسي
انا بعصبية = قم ياثور اوديك للمستشفى قم
مارد علي ,,, مال راسه على جنب وتمددت يديه على السرير بضعف ,, وبدا يهذي بالكلام
انا بخوف = خالد ( ومسكت اكتافه اهزه ) خاااالد
ركضت للطاولة ادور المسكن ,,, بس المشكلة لقيت حبوب كثيرة
انا مرتبك = خالد ,, ايهم المسكن .؟
ماسمعت منه رد والتفتت له ,, يهذي بالكلام
رجعت له ومسكت اكتافه اهزه
انا = خالد
اخذ شوي وهو يهذي بالكلام لين سكت
انصدمت ,,, لايكون اغمى عليه ,,, مغمض عيونه كنه نايم ,,, وملامحه هاديه ,,,
انحنيت عليه ورفعت راسه احاول اجلسه بس يتمايل معي بالتالي سدحته واعتدلت واقف
وش هالورطة ,,, هذا وقته ,,, وش اسوي الحين
التفتت لرولا ,,, طالعتني و بعدها التفتت لاخوها وبرطمت
رولا = خالد ,,, انا خايفة قوووم ,,, ( وجلست على ركبها وانحنت على اخوها تهزه ) خالد قووم ( وطالعتني بخوف وبكت )
مدري هي فاهمه ان خالد مغمى عليه والا تحسبه نايم والا متعودة على هالوضع ,,, بس البنت خايفة مني
انا مرتبك = احم ,,, آآآ ,,, رولا ,,, خـ ,,, خالد نايم ,, روحي ادخلي داخل ( ومديت يدي لها ابي ابعدها بس هي صاحت باعلى صوتها )
رولا وهي تبكي = خاااااااااااالد ( وانكمشت على نفسها بجنب اخوها وهي لاصقه فيه وماسكه ذراعه بقوة خايفة مني )
انا لله وش هالبلشة ,,, انا وش اللي جابني ,,,
انا متربك = رولا بس بس اسكتي ,,, ماني بقايل شي بس اسكتي
وش اسوي الحين اتصل على ابو عبدالله ,,, مو حلوة اقعد ببيته لحالي واهله داخل ,,, المشكلة يحسب خالد صاحي ,,, شسوات انسحب واطلع بسكات والا وش اسوي ,,,
التفتت لخالد ,,, اللي مو حاس باحد ,,,مغمض عيونه كنه نايم وراسه مايل لجهتي
انحنيت عليه وحطيت يدي على خده ,,, يالله حاااااار ,, شاب ضو ,,, حرارته مرتفعه
المشكلة ابو عبدالله توه طالع وانا ببيت الناس ,,, لو اطلع احسن
فتحت باب الملحق ابطلع
بس لحظة ,,,
خالد وقف معي باحلك الضروف اقوم انسحب من عنده كني عامل عمله ,,, المفروض اوديه للمسشفى ,,, اهله اذا شافوا حرارته مرتفعه بيظنون انها حرارة عادية ,,, وخالد تعبان مرة ومحتاج عملية مستعجلة ,,, مو حلوة بحقي اتركه وانا عارف وش عنده
المشكلة مافيه احد اقوله يساعدني يشيله معي ,, لازم نوديه للمستشفى ويسوي العملية باسرع وقت ,,, حرارته مرتفعه مرة ,,, واكيد خاله على باله تعبان تعب عادي مايدري المسكين عن حقيقة تعبه ,,, ياربي شسوي
فايز
مالي الا فايز ,, هو الوحيد اللي يدري ,,, ابتصل عليه يشيله معي
سكرت باب الملحق والتفت على رولا هالنشبة
انا = رولا روحي داخل يله
داسه وجهها بذراع اخوها وتبكي
تنهدت ليت رولين هنا ,,, يقدر الواحد يتفاهم معها وتسمع الكلام مو مثل هذي
اخاف امد يدي وتصيح باعلى صوتها
رجعت للسرير ومديت يدي بحذر احاول اطمنها
اول ماحطيت يدي على شعرها وهي تصيح
رولا = خااااااااااالد ,,, مااااااامااااااا ( وحطت يدها على صدر اخوها ومسكت فنيلته وقعدت تهزه بقوة ويدها الثانية ماسكه ذراعه ) خاااالد قووووم انا خاااايفة قووووم
ابتعدت شوي عن السرير ,, واتصلت على فايز ,,, شوي ورد
انا بضيق = الوووووو ,,, فايز
فايز = هلا خالد
انا = فايز يرحم والديك تعال ,,, خالد اغمى عليه وحرارته مرتفعه مرة وابو عبدالله ماهو موجود ,,, تعال شيله معي
فايز = وانتوا وين .؟
انا = انا ببيت ابو عبدالله تعال
فايز = بس انا ماني قريب ,,,, اصبر ابتصل على ابراهيم
انا = لا فايــ
بس سكر قبل اكمل ,,,, اذا وداه ابراهيم معي للمستشفى اكيد بيدري عن مرض خالد
تنهدت ,,, مو مهم ,,, الى متى يعني الكتمان
التفتت لخالد ورولا
ولقيت النشبة مغطيه وجهها بصدر اخوها وتبكي
مسكينه تدور الامان بواحد مغمى عليه ومايدري عنها
شسوات الحين مابيها تشوفنا وحنا نشيل اخوها قدامها
انا = رولا خالد نايم ,,, روحي داخل
مغطيه وجهها وتبكي ,, اضربها هذي واخليها صدق تخاف مني والا وش اسويبها
رجعت للسرير وجلست ,,,
انا = رولا ترا بكف الحين روحي لماما يله
رفعت راسها تشوف وجه خالد وهي تبكي
رولا = خالد ( وحطت يدها الصغيرة على خد اخوها ولفت وجهه لها ) خاااالد قووووم ( واول ما ابعدت يدها عن خده مال وجهه مرة ثانية ,,, ويوم شافت مارد عليها غطت وجهها على صدره وبكت اكثر )
تنهدت ,,, كسرت خاطري رولا
فجأة رن جوالي ,,, القيت نظرة عليه ( ابراهيم يتصل بك )
اخييرا
انا = الوووووه ,,, ابراهيم تعال
ابراهيم = انا عند الباب ,,, شسالفة مافهمني فايـ
سكرت بوجهه ,,, ورحت ركض لباب الشارع
رجعنا انا وابراهيم للملحق ورولا على وضعها
اشوا ان اللي معي ابراهيم ماهو صالح والا خافت منا اكثر
رحت لها ولقيتها متشبثه برقبة خالد وتبكي
ماباليد حيله لازم ابعدها عنه غصب ,,, صاحت والا ماصاحت
شلتها بالقوة وبصعوبة فكيت يديها عن رقبته وطلعتها بالحوش واول مانزلتها بالارض وهي تحط رجلها وتدخل البيت
رجعت لابراهيم بسرعة اخاف تجي ام خالد والا عمة صالح ونبتلش اكثر
شلنا خالد وركبناه بسيارة ابراهيم بمكان الراكب وانطلق ابراهيم مسرع
الظهر
كنا انا وابراهيم بالمستشفى بعد ماشافه الدكتور ,,, والمشكلة الدكتور اللي فحصه اليوم هو نفسه الدكتور اللي كذبت عليه وقلت ان خالد اخوي ,,, وابراهيم من يوم عرف عن مرض خالد من الدكتور وهو يهاوشني عشان ماعلمناه طوال هالمدة
مادري وش فيهم علي كله يهاوشوني انا ,,, كأني انا سبب المرض
اول شي هاوشني الدكتور اللي بالرياض وبعدين الدكتور هذا والحين ابراهيم
ابراهيم بعصبية = وانا أخر من يعلم ,,, كل يوم معكم ليه ماعلمتوني ,, وبعدين وش معنى يعلمك انت ولا يعلمني انا ,,, مع اني كل يوم اسأله واخر شي مايعلم الا انت
رن جوالي والقيت نظره عليه ( امي تتصل بك )
طنشت ابراهيم وقمت مبتعد عن ابراهيم عشان ارد على امي
انا = هلا
امي = خالد وينك تأخرت من طلعتك الصبح لهلأ ماجيت
انا بتنهيدة = يمه تغدوا لا تحتروني ,,, خالد تعبان وانا الحين عنده بالمستشفى
امي = اووووه ,, ربي يشفيه ويئومو بالسلامة
سكرت عن امي ورجعت لابراهيم
رن جوالي مرة ثانية والقيت نظرة عليه ( ابو عبدالله يتصل بك )
اووووه هذا ثالث مرة يتصل علي من يوم شلنا خالد ,, اكيد رولا علمتهم ,,,
توكلت على الله ورديت عليه وعلمته ان خالد بالمستشفى وسكرت عنه وانا متضايق الحين بيجي ويعرف عن مرض خالد ,,,
بس احسن خله يعرف يمكن يقدر يلين راس خالد اليابس ويقنعه يتعالج ,,, الغبي انتشر المرض بجسمه ,, ومن سنه وهو كاتم الخبر الى متى يعني ,, مدري وش السبب اللي خلاه يكتم المرض عن اهله
خالد غريب وغامض عجزت افهم عليه
ولأني مابي اشوف ابو عبدالله ,,, طلعنا انا وابراهيم من المستشفى بعد مامرينا الدكتور مرة ثانية يطمنا على خالد بس الدكتور ماطمنا ,,, حالته خطره والمرض متأخر معه
واصر علي اوقع موافقة على العملية بالاخير اضطريت اعترف له اني ماني اخوه وخاله بعد بيجي
بعد يومين
يوم الخميس
اليومين اللي راحوا ماقدرت امر خالد ,,, اهله مسنترين عنده بكل اوقات الزيارة
كنت اتصل عليه واخذ اخباره بالجوال ,,, صوته مايبشر بخير متضايق انه اهله عرفوا ,,, تعبان نفسي وجسدي
صالح يقول ابو عبدالله من يوم عرف عن مرض خالد لا ليله ليل ولا نهاره نهار وام خالد اشد ,,,
والصراحة ماشفت أعند من خالد ,,, الى الحين رافض العملية بس مع الحاح امه وخاله رضى بالكيماوي ,,, وامس قالي ان صبح الخميس اللي هو اليوم بياخذ اول جرعه
لازم ازوره ودي اشوفه واتطمن
اتصلت على صالح اسأله عن اهل خالد هم بيزورونه العصر والا لا ,,, وعلمني ان الصباح لاهله والعصر للي يبي يزوره
العصر
رحت للمستشفى وصعدت الدور الثالث رايح لغرفته ,, بس شد انتباهي رجال اول مرة اشوفه جالس على الكراسي قدام الغرفة وكأن كل هموم الدنيا على راسه ,,, منزل راسه وحاطه بين يديه وجالس بشكل حزين ,,,
غريب ليش جالس قدام الغرفة ,, ياما يدخل والا يروح ,,, صدق ناس غريبة
دخلت على خالد ولقيت عنده ابو عبدالله ومحمد وابوه
ابو عبدالله جالس على كرسي ويمسح على شعر خالد ويكلمه بصوت واطي
سلمت على الموجودين وانحنيت على خالد اسلم عليه بس تفاجأت بعيونه حمر كأنه توه باكي ووجه احمر ,,,
انا مستغرب = كيف حالك .؟ ( وسلمت على خده )
مارد علي ,,, يجاهد دمعته وساكت
ابو عبدالله بحزن = اللي تبيه بيصير ياولدي المهم راحتك
ماني فاهم شي ,,, التفتت لمحمد ابيه يفهمني ,,, بس لقيته يطالع خالد وساكت
ابو محمد = الرجال يحتري وتوه جاي من سفر
رفع خالد يده يمسح دمعته اللي نزلت
خالد بصوت باكي = يرجع من حيث ماجا ,,,, ماااابي اشوفه
محمد = ابوك اول ماجا مطار الرياض على طول لمطار القصيم ومن المطار جا للمستشفى على طول من دون حتى مايرتاح ,,, كله يبي يشوفك
فرحت ابو خالد هنا ,,, زين والله ,,, اخيرا ترك تجارته وحس بولده
خالد بصراخ = ماااااابي اشوفه مااابي اشوفه ( وتكتف كنه بردان وهمس ) آآآآه جسمي ينهشني ,,, تعباااااان ,,, آآآآه
التفت محمد لبو عبدالله
محمد = خلاص عمي خله الحين ,,, اليوم ماخذ كيماوي وتعبان
رحت لمحمد وهمست باذنه
انا = شسالفة .؟
قرب محمد راسه مني وهمس
محمد = ابو خالد دخل قبل شوي بس خالد ماخلاه يسلم عليه لين طلعه الدكتور ,, ومن اليوم حنا نحاول بخالد يسمح لبوه يشوفه ,,, خالد مجنون رسمي
اهااا شكله فاتني ,, كنت اتمنى اشوف ابوه
ابو محمد = خالد الله يصلحك تــ
خالد بصوت باكي = مااااابي اسمع شي ,,, خلوه يرجع ,,, عشر سنين وهو ماعمره سأل عني ,,, توه يسأل توه يذكرني ( وبكى )
رجعت لسريره وحطيت يدي على راسه
انا = خلك احسن منـ
خالد بصراخ = خلوني بحااااااالي ,,, مااااابي اشوف احد
طلعنا من عنده وابو عبدالله يالله يمشي من همه
استغربت من الرجال اللي شفته قبل ادخل على خالد ,, الى الحين على وضعه ويوم شافنا وهو يقوم ويتوجه لنا
= هاااه طمنوني
ابو محمد = اذكر الله
= لا إله إلا الله ,,, طمنوني ياجماعة الخير
محمد = اصبر عليه ان شاء الله يلين ويسمحلك تدخل
التفت لابو عبدالله
= ولدي يابو عبدالله ,,, ليه ماعلمتوني الا الحين ,,, وحيدي
ماحد رد عليه
قطبت حواجبي مستنكر ,,, معقول هذا ابو خالد .؟
= انا وش سويت ,,, ليه مايبي يشوفني ,, اول ماعلمتوني خليت اللي بيدي وجيت ,,, ابي ادخل عليه ابي اشوفه
ابو محمد = استهد بالله ,,, الولد تعبان اكيد بتشوفه بس اصبر عليه شوي
جلس الرجال على الكرسي بحزن وحط راسه بين يديه
= ليه مايبي يشوفني
ابو عبدالله بحزن = انت السبب يابو خالد ,,, من يوم خالد صغير وهو يشكيلي من غيابك عنه ,,, سفراتك اللي ماتنتهي اشغلتك عن ولدك
رفع ابو خالد راسه لابو عبدالله
ابو خالد = وانا اشتغل لمن ,,, له ولاخواته ,,,, هذا جزاي يابو عبدالله ( والتفت لبو محمد ) انا اتعب واشقى لمن ياجماعة الخير ,,, اخر شي جزاي ولدي يطردني ( ونزل راسه وغطى وجه بشماغه )
توكلت على الله وتدخلت
انا = كره خالد لك بسبب مدير عيادتك الامريكي يابو خالد
رفع ابو خالد لي وعيونه حمر
انا = انا خوي خالد واعرف عنه اكثر منك ,,, ولدك يابو خالد عاش ايام سودا من تحت وينلي ,,, الامريكي اللي وثقت فيه وحملت ولدك حمل اثقل منه
ابو عبدالله مستغرب = وشلون يعني
علمتهم بكل شي ,,, وعلمتهم عن موضوع البراميل وعن تهديدات وينلي لخالد وعن المخالفات و المخالفين
وماخلصت من كلامي والا وابو خالد دموعه على خده ندماان
ابو خالد = اطرده واسفره واي شي يبيه خالد مني ابسويـ
انا = وش عقبه ,,, خالد يقولي انك تصدق وينلي وتكذبه
ابو خالد = ماكذبته ,,, اتلانتس عارف شغله مادريت انه مبهذل ولدي من وراي
انا = تخلص منه وريح ولدك
ابو خالد = ابسوي كل اللي يبيه خالد بس ابي اشوفه ابي اشوف ولدي ,,, ابوديه لاحسن المستشفيات ويتعالج عند احسن الاطباء لو اخسر تجارتي وحلالي المهم خالد مايضيع مني
ابتسمت وهذا ياخالد مشكلة وينلي وانحلت بكلمة من ابوك ,,, الله يهديك ياما قلتلك كلم ابوك بس عنادك وانشغال ابوك عنك من يوم كنت صغير كرهك بابوك
ثنيناتهم غلطانين
استاذنتهم ودخلت على خالد ابشره
التفت خالد لي اول ماشافني دخلت
انا بمزح = ماش انا لزقه مامني فكه تطردني وارجع
وجلست بكرسي ابو عبدالله
خالد بتعب = جسمي ينهشني ,,, الكيماوي تعبني ماريحني
انا بابتسامة = ابو خلّود ابشرك وينلي الله خلصك منه
خالد بألم = آآآه ( يحك في جسمه بألم وبعدها التفت لي بتعب ) وشلون .؟
انا = المهم ان الله خلصك منه ان شاء الله مو مهم وشلون
سكت خالد وهو يطالعني مستغرب وبعدها طالع السقف
خالد بتنهيدة = كنت اعاند يوم عرفت ان ناصر ووينلي طمعانين بالعيادة والحين انمسك ناصر ,,, ووينلي ابسفره حتى لو بلغ علي عن المخالفين ,,, العيادة الحين مابيها ,, ابرجعها لبوي والا وشوله ارجعها هي بترجع من كيفها
انا بعصبية = خالد تعوذ من الشيطان ,,, وان شاء الله تقوم بالسلامة
خالد بألم = امي ياخالد ,,, امي وخالي كنت كاتم مرضي عشانهم ,,, مـ ( وسكت يجاهد دمعته )
انا بحزن = خالد ان شاء الله بتشافى وابوك مستعد يوديك لاحسن المستشفيات وتتعالج
خالد بتعب = ندمااااااان ,,, ندمان اني ماحفظت القرآن ,,, ضاع عمري باللعب والاغاني والمغازل ,,, وبعد ماتبت انشغلت بالمشاكل ,,, ندماااان ليتني حفظت
انا = الوقت قدامك احفظ ,,, ان شاء الله بتتشافى وتصير إمام مسجد بعد ,,, لا تيأس
مد يده واخذ جواله ,,, ضغطه شوي وبعده مده لي يوريني
اخذته منه وشفته فاتح على الفيديو اللي شفته قبل كذا ( الفيديو اللي كان خالد يرقص مع شباب )
خالد بصوت باكي = هذا انا يوم كنت بصحتي ,,, ماعرفت الله بالرخاء ,, كنت لاهي ( وبكى )
انا بألم = خالد هذا بلاء ,, الله اذا احب عبدا ابتلاه ,,, لا تيأس
خالد وهو يبكي = خالد طلبتك
انا = آمر ياغالي باللي اقدر عليه
خالد = المحل ابكتبه باسمك اصرف على اخوانك الايتام منه تكفى ,,, عسى الله ينفعني به بعد مماتي ( وزاد بكاه )
انصدمت ,,, سكتت مدري وش اقول ,,, خالد شكله مايبشر بخير ,,, حاولت اتمالك نفسي
انا بحزن = ان شاء بتقوم بالسلامة وتتابع المحل معي ,,, تراني مالي غنا عنك ,,, خل عنـ
خالد بصوت باكي = تكفى خالد طلبتك ,,, الكل بينساني اذا مت مثل مانساني ابوي وانا حي ,,, خذ المحل واصرف على اخوانك منه تكفى ابيه ينفعني ابـ ( وبكى )
انا بصوت باكي = ماراح اردك ( وسكتت شوي ) بس سامح ابوك عطه فرصه
خالد = انا ميت ميت من وين اعطيه فرصه ,,, ابوي توه يتذكرني .؟
اذن المغرب وخالد رافض يسامح ابوه ,,, او يمكن سامحه بقلبه بس مايبي يشوفه ,,,
بعد 3 اسابيع
بدت المدارس من اسبوعين واحمد توظف باحدى المدارس الاهلية
وخالد طوال الثلاث اسابيع وهو بالمستشفى واهله الى الحين مارجعوا للرياض ,,, بعد أخر زيارة تعب خالد بعد اول جرعه وارتفعت حرارته وصارت ممنوعة الزيارة عنه باستثناء ام خالد
لكن سمحله الدكتور باستخدام الجوال وطوال الثلاث اسابيع اخذ اخباره بالجوال بس ,,,
خالد = مليييييييت ابي اطلع ,, ثلاث اسابيع وانا محبوس هنا
انا = استجيب مع الدكتور وان شاء الله تطلع ,,,, انت مشكلتك نفسيتك
خالد بتنهيده = تدري وشلون ,,, شكلي ابطلع من المستشفى على مسؤوليتي
انا = انهبلت انت ,,, الدكتور مانع الزيارة عنك عشان مناعتك ضعيفة ,,, والحين بتطلع ,,, صدق انك ثور
خالد = افففف
ابتسمت يا انا مشتاق له ,,, مشتاق لطلعاتنا ,,, مشتاق لسهراتنا ,, فعلا اففف
متى يطلعونه من المستشفى
اما ابو خالد بعد منع الزيارة عن خالد راح للرياض يصفي الحساب مع وينلي وانا مستانس انه ابوه بدا يحس فيه
بعد يومين
الثلاثاء
اليوم بالمدرسة اتصلت على خالد بس مارد ,,, اتصلت مرة ثانية ولا رد
جا الظهر
وانا مستمر بالاتصال عليه بس مايرد
غريب امس بعد اتصلت عليه ولا رد واليوم نفس الشي وين راح هذا ,,, خالد طوال الاسابيع الثلاث كل ما اتصل عليه يقول طفشان من حبس المستشفى ووده يطلع,,, ودايما اتصل عليه بالجوال اسليه
العصر
وانا جالس بالصالة مع امي جاني اتصال من رقم غريب
انا = هلا
= خالد .؟
انا = نعم معك خالد
= انا ابو خالد تركي
تفاجأت ,,, متصل علي انا ,,, ليش
انا مستغرب = هلا ابو خالد
ابو خالد = انت تقول تعرف عن خالد اكثر واحد ,,, ماعمر خالد قالك وش المخالفات اللي يقول عنها اتلانتس .؟
مافهمت شي
انا مستغرب = شسالفة يابو خالد .؟
ابو خالد = انت مو تقول تعرف عن خالد كل شي .؟ ,, اتلانتس ماسك على خالد اشياء يقول راح يضر ولدي اذا طردته انا ,,, وش الاشياء اللي ماسكها على خالد .؟ علمني عشان اعرف اتصرف
شكل وينلي هذا والله اعلم انه كان يشتغل بسجن ابو غريب تهديداته كلها تهديدات نفسية ,,, وش الاشياء اللي ماسكها انا متأكد انه ماهو ماسك شي,,, البراميل وافتكينا منها ,,, اكيد يكذب اكيد هذا كله تخويف بس
ابو خالد = الووو
انا = هلا معك ,,, طيب طردته والا لا .؟
ابو خالد = ماقدرت اطرده خفت على خالد منه ,,, اسألك انا الحين وش المخالفات اللي يقصدها ,,, علمني عشان اعرف اتصرف
انا = والله يابو خالد مافيه الا سالفة البراميل وانتهينا منها ,,, اطرده ماعليك منه هذا كله تهديد عشان يخوفكم
ابو خالد = اكيد .؟ بس اتلانتس يقول بيبلغ على ولدي وانا خايف عليه
انا = علمك وش المخالفات .؟
ابو خالد = لا ,,, عيا يعلم
انا = خلاص اجل ,,, اكيد كل تهديداته كذب ,,, اطرده وتخلصوا منه
سكرت عنه وانا متضايق من هالنشبة وينلي ,,, اعوذ بالله خلاص الناس استغنوا عن خدماتك ,,, ناشب لهم ليش
امي = مين هاد .؟
انا = هذا ابـ
ورن جوالي مرة ثانية رنه وحدة وانقطع فتحته ولقيته من ابراهيم
ابتسمت شكله اتصل علي بالغلط
التفتت لامي
انا = ايه اقولك هـ
ورن جوالي مرة ثانية رنة وحدة وانقطع ,, فتحته ونفس الشي من ابراهيم
استغربت وش فيه ذا مطفر ويبيني اتصل عليه والا وش ,, اتصلت عليه بس مارد ,, اتصلت مرة ثانية ولا رد عصبت هالحمار شكله فاضي
امي = شو فيه خالد مين هاد اللي عم يتصل عليك .؟
انا = ابراهيموه شكله فاضـي ,,,
شوي و جتني رساله بجوالي وفتحتها ولقيتها من ابراهيم ,,, قريت الرسالة وشهقت بقوة منصدم ,,, بغى قلبي يوقف من الصدمة
وش ,,,
عدت قراية الرسالة مرة ثانية
( خالد يطلبك الحل )
ارتعشت يدي وصارت انفاسي سريعه
انا بصوت باكي = لاااا ,,, مو معقول
امي بخوف = شوفيك خالد ,,, شوفيييييك
عدت اقرا الرسالة مرة ثانية ,,, لا اكيد ابراهيم غلطااان
( خالد يطلبك الحل )
انا بصدمة = خاااالد ( وتجمعت الدموع بعيوني والتفتت لامي ) يمه خــ ( وسكتت ماقدرت اكمل )
امي مستغربه = شووووو .؟
طلعت دموعي وانا اعيد الرسالة ( خالد يطلبك الحل )
خافت امي واخذت الجوال مني وقرته
قمت وطلعت من الشقة بسرعة ورحت للمستشفى ,,, يكذب ابراهيم يكذب قبل امس مكلم خالد ,,, انا متأكد ,,, لا مو معقول ,,, انا فقدت ابوي اللي احس بالامان معه مابي افقد خالد اللي هو الثاني يحسسني بالامان
ابراهيم اكيد غلطان ,,, ايه غلطان ,,, اصلا ابو خالد توه مكلمني وصوته عادي ,,, ايه ايه صح ,,, يمكن انا ماقريت الرسالة زين
دخلت يدي بجيبي ادور جوالي بس مالقيته ,, صح اثرني نسيته بالشقة ,,, لا لا ابراهيم غلطان
خالد مكلمني قبل امس ,,, صح صوته كان تعبان ,,, بس ماستغربت من صوته ,,, خالد دايم تعبان من يوم عرفته وهو تعبان
رحت للدور الثالث لغرفة خالد ,,, ووقف منصدم ,, لقيت صالح وابراهيم وابو محمد واقفين قدام الغرفة ووجيهم ماتبشر بخير ,,, التفت لي ابراهيم المتلثم بشماغه وجا عندي
ابراهيم وصوته متغير = خالد ودعنا من نص ساعة ,,, حاولت اكلمك بس عجزت وارسلتلك رسالة ,,, رح سلم عليه قبل يحطونه بالثلاجـ ( وبكى )
طالعته احاول ادور الكذب بعيونه بس هو بنفسه يبكي
التفتت لصالح المتلثم وجالس على الكرسي بجنب ابوه ,,, لا كذب خالد حي
رحت مسرع لغرفته ودخلتها ولقيت ابو عبدالله جالس على الكرسي ومغطي وجهه بشماغه ويبكي
التفتت بخوف لخالد بس لقيته مغطى بالكامل بشرشف المستشفى الابيض ,,,
شهقت ,,, لااااا
رحت وكشفت اللحاف عنه ,,, وشهقت
طيرت عيوني بوجهه اللي تحول للون ازرق خفيف ,,, ملامحه مافيها حياه ,,, وين ابتسامته ,,, وين أنينه اللي دايم اسمعها منه ,,,
انا = خالد
مديت يدي ومسكت اكتافه بس ابعدتها بسرعة وبخوف ,,, بااااااارد ,,, معقول ,,,
لا لا اكيد المكيف بارد ,,, خالد مامات
مديت يدي اللي ترتعش وحطيتها على صدره الكاشف ,,, دموعي غطت عني الرؤية ,, باااارد ,,, ليه ,,,
انا بصوت باكي = خالد قم ,,, لا تخليني ,, لمن تبيني اشكي ,,, خلك معي
مسكت اكتافه وهزيته
انا بصوت باكي = خاااالد
مارد علي
انحنيت عليه وضميته لصدري بقوة وبكيت
انا = خااااالد بعد ماتعودت عليك تروووح ,,, ليش جيت من الرياض ليش ,,, ليش خليتني اتعرف عليك ,,, ليش عودتني عليك ليش ,,,
رفعت راسي اطالع وجهه ,, كنه نايم بس بدون نفس بدون أثر للحياة ,,, مديت يدي وضربت خده
انا = لا خالد ,,, محتاجك ,,, لا تسوي مثل ابوي وتخليني
مارد علي ,,, ليش مايرد ,,, معقووول ,,, آآآه ياخالد
غطيت وجهي بوجهه البارد وانا ارص صدره بصدري
انا = لا ياغالي لا تخليني ( وبكيت اكثر )
حسيت بيد على ظهري
ابو محمد = اذكر الله وادعله بالرحمة
سلمت على خده وخده الثاني وضميته مرة ثانية وانا ابكي
جو ممرضين يبون ينقولنه
ابو محمد = خالد اللي تسويه ماهو زين ,,, ادعله بالرحمة ,,, ووخر عنه خلهم يحطونه بالثلاجة لين يجي ابوه
انا بألم = لا ,, خلوه ,,, خالد مايبي ابووووووه ( ورصيته بين يدي اكثر ,,, مابي افقده ,,, لااا )
وخروني عنه غصب وانا اشوفهم يغطونه مرة ثانية وطلعوني انا و ابو عبدالله من الغرفة
شفت صالح الى الحين جالس على كرسيه
انا بصوت باكي = ارتحت الحين ,,, هذا هو خالد ترك بيت عمتك لك ,,, اشبع فيه
وجلست على الارض ابكي اليتم مرة ثانية
خالد اخوي ,,, اخوي اللي وقف معي ,,, عمي وهو عمي تركني ,, مالي غيرك ياغااااالي آآآآآه
جت ممرضة ومعها اغراضه وعطته ابو محمد وراحت
تذكرت كلمته (هذا انا يوم كنت بصحتي ,,, ماعرفت الله بالرخاء ,, كنت لاهي )
جواله فيه الفيديو ,, مابي احد يشوفه ويسبه
قمت وطلبت الجوال من ابو محمد ,,, استغرب بس ماعارض
ابو محمد مستغرب = زي ماتبي ,,, حنا والله الى الحين ماوصلنا الخبر لابوه
لا تجيب طاريه قدامي يابو محمد تكفى ,,, سكتت عنه وواخذت الجوال جلست على الكرسي بحزن
جا فايز ومحمد وابو فايز ,,, وسلموا على خالد وراحو يواسون ابو عبدالله اللي حالته ماتسر لا صديق ولا عدو
اذن العشا وانا بالمستشفى وجوال خالد بيدي ,, جالس قدام ثلاجة الاموات ماني مصدق
مابي اطلع بدون خالد ,,,
تذكرت اول موقف بيني وبينه
((()))((()))
انا = بأي سنه تدرس .؟
التفت لي
خالد = بثالث ثانوي ,,, مع السلامة
ودخل بيت خاله ,,, استغربت وش فيه ذا ,,, معقول زعل لأني اخذت اخواني منه
يوّلي ,,, مو مرتاحله اصلا
((()))((()))
آآآآه مارتحت لواحد كثرك ياغالي ,,, ليش رحت وخليتي
قمت وانا الدنيا مسودة بعيوني ,,, وطلعت من المستشفى ومواقفه كل شوي تمر ببالي
((()))((()))
انا بحزن = مشكور خالد قسم بالله ماستاهلك ,,, انا اردك وانت توقف معي
خالد = اول شي انا وعدتك من زمان اني اساعدك بالتجارة ,, ثاني شي انت معذور بردك لي ,,, وماحد يقدر يلومك ,,, وماحد يبي يرمل اخته بعز شبابها ,, انا لو اني بمكانك وجاني واحد يخطب اختي وانا اعرف انه عنده السرطان ,,, رديته وشتّه برا بيتي بعد ,,, انت على الاقل ماشتّني ( وابتسم )
انا بصدق = قسم بالله ماراح القى لاختي واحد احسن منك
ابتسم خالد برضى
خالد بابتسامة = تسلم
((()))((()))
بكيت ,,, ياليتني فرّحت قلبك
دخلت الشقة ودمعتي مانشفت كل يوم اذكر موقف معه
لقيت احمد وامي جالسين بالصالة وسلمى بحضن امي ,,, اول ماشافتني امي وهي تقوم
امي = خالد خوفتني عليك
انا بصوت باكي = يمه خالد راااااح
احمد = ادعيلو هوا هلأ محتاج لدعواتنا
تذكرت كلمة خالد
( المحل ابكتبه باسمك اصرف على اخوانك الايتام منه تكفى ,,, عسى الله ينفعني به بعد مماتي )
بكيت اكثر ,,, يبي المحل صدقة جارية له وهذا هو مات قبل يسوي اللي يبيه ويكتب المحل باسمي فعلا خالد محتاج لدعواتنا ,,, خالد محتاج لشي ينفعه بعد موته ,,, واخذه الموت قبل يسوي أي شي
رحت لغرفتي وانا اجر رجولي جر ولقيت سالم منبطح على سريره ويبكي
رفع راسه اول ماشافني وقعد يطالعني وهو يبكي ,,, جلست على سريري بحزن ,,, راح ياسالم راااح
جاني سالم ووقف قدامي
سالم وهو يبكي = امي تقول خالد مات ,,, ابي خاااالد ( وارتمي بحضني )
ضميته زي ماكان يضمه خالد ,,, راح ياسالم ,,, راح الحنون ,,, راح اللي يحن عليك اكثر مني ,,, انا ماعمري ضميتكم بصدري ,,, هو ضمكم اكثر مني
الاربعاء
جت الساعة 10 وانا جالس على سريري ومنزل راسي على ركبي واتذكر خالد
امي = خلص خالد ,, ئطعت ئلبي عليك ,,, ادعولو بالرحمة ,, انته مااكلت شي من انبارح
رفعت راسي لامي
انا بحزن = ماشتهي ,, يمه تكفين خليني بحالي
امي بتنهيدة = مدري شو صارلكون حتى اخواتك مو راضين يهدوا ,,, انا ابعرف انو كان الله يرحمو وئف معكون كتير بس مو هيك تساوو بنفسكون
مارديت عليها وقفت امي شوي و طلعت
طاحت عيني على جواله ,,, مديت يدي واخذته ,,, انا مافتحته من يوم اخذته من ابو محمد
لقيت مكالمات لم يرد عليها ,, فتحتها وكان اكثر الاتصالات مني ,,, امس وقبل امس كنت اتصل عليه ومايرد ,,
مادريت انه ماراح يرد علي للابد
ولقيت مكالمات من رنا ومن مامي ومن ابراهيم بس اكثر المكالمات التي لم يرد عليها مني ,,, آآآه اشتقت لك
فتحت الاستديو ولقيت فيدو كنت ناسيه ,, وابتسمت على الذكرى
خالد مصورني فيديو يوم كنا بعرفة
شفت نفسي على قمة جبل عرفة وخالد مصورني من اسفل الجبل وسمعت نفسي اسأله من فوق
انا = وش تسوي .؟
وسمعت صوته بالفيديو يرد علي
خالد = انقز ابصورك فيديو
آآآآه يازين صوته ,,, له وقع ثاني ,,, ماكان يشدني صوته بهالشكل ,,, الحين صوته حلو ,,
سمعت نفسي ارد عليه من فوق وانا اضحك
انا = هههههههههههه وش بيفيدني تصويرك اذا تكسرت
وشفت نفسي اختفي من فوق الجبل ,,,
سمعته صوته الحلو مرة ثانية
خالد = ماش مانقز
ابتسمت ,,, وقتها يوم كنت بعرفة ماسمعته يقول هالكلمة ,,, شفت خالد يكمل تصوير شوي وانقطع الفيديو
آآآآه ياغلاتك
عدت الفيديو ابي اسمع صوته ,, وارسلت الفيديو لجوالي
رحت لفيديو يومنه يرقص مع الشباب وارسلته لجوالي ومسحت الفيديو من جواله ,,, جواله اكيد بيرجع لاهله مابيهم يشوفون هالمقطع
وشفت فيديو ثالث ماعمري شفته بس شكله توه جديد
شفته يصور صالح فيديو
شكله بغرفته وجالس على سريره ,, ما اشوف الا رجليه متمدد ويصور صالح اللي قاعد يفتش بطاولته معصب
صالح بعصبية = وييييييينه ,,, طلعه وينه
سمعت صوت الغالي يكلم صالح وهو مروّق
خالد = ماني معلمك
التفت صالح للكاميرا معصب
صالح بعصبية = وشوله قاعد تصور انت الحين ,,, علمني وين حطيته .؟
خالد = هه اصورك اثبات على جرايمك البشعه ,,, الحين وشوله تفتش بطاولتي قلتلك ماهو عندي
صالح بصراخ = اخر مرة شفته معك
خالد = انت تبي تهاوش وبس هذي غرفتي قدامك مافيها شي ,,, يله خذ راحتك ودوّر وانا ابصورك عشان اوريه خالي ويعـ
شفت صالح يهجم عليه
بس ماشفت وش صار بعدها ,,, طاح الجوال من على السرير وكل شي صار اسود شوي وانتهى المقطع
ابتسمت بحزن ,, دايم يتهاوشون ,,,
قطع علي رنين جوالي ,, القيت نظرة عليه ( صالح يتصل بك )
وش يبي هذا شكله مالقى احد يتهاوش معه واتصل علي
انا بحزن = نعم
سمعت صوته هادي
صالح = الجنازة بتجي الساعة 11 اذا كنت تبي تشارك بتغسيله تعال
بكيت ,,, جنازة .؟
بصعوبة تمالك نفسي ورديت
انا بصوت باكي = ابجي الحين
ارسلت الفيديو الاخير وكل صوره وصوري اللي بجواله لجوالي
طلعت من غرفتي وانا اجر رجولي جر ولقيت امي بالصالة وتحاول بسالم ياكل
انا = يمه وين احمد .؟
امي = راح لدوامو تعال كول حبيبي
انا = ماشتهي ,,, خليه يصلي بجامع الـ .... ,,, ويحضر صلاة الجنـ ( وطلعت دموعي غصب ) الجنازة
هزت امي راسها وسكتت
رحت للجامع اللي فيه المغسله ولقيت هناك صالح واخوانه عدا محمد وابراهيم وماجد
علمني صالح ان اهل خالد راحوا له اليوم وسلموا عليه بالمسشتفى وابوه الحين داخل بغرفة انتظار الرجال ينتظر جنازة ولده ,,, اما ابو عبدالله تعب عليهم وماقدر يجي
مدري كم مر من وقت وحنا نحتري لين شفت محمد وفايز وسعد وواحد رابع ماعرفه يشيلون خالد ويدخلونه المغسلة
اصريت ادخل واغسله بنفسي
انا بصوت باكي = كلها ساعة وانحرم من شوفته للابد انا ابدخل مع ابوه واغسله ,,, تكفووون
دخلت انا وابوه المغسلة ولقيت المغسل مجهز خالد المتمدد على سرير غريب مستور العورة
قربت منه وانا ابكي
مديت يدي ومسحت على شعره
انا بهمس = الدنيا مالها طعم من بعدك
سمعت المغسل يعلمنا وش علينا نسوي وحنا ننفذ ,,, وانا اسمع ابوه يبكي بصمت
المغسل = حركوه حتى يلين شوي وبعدها نعصر بطنه بخفه ونصب عليه الماء
نفذنا وانا عيني على الجرح القديم اللي كان بصدره ,,, لا شعوريا مررت اصبعي على الجرح مثل ماكنت اسويه فيه دايم ( وتذكرت يوم يستنجد فيني وينادي باسمي )
المغسل = الحين ينجى ويوضئ كوضوئه للصلاة
انتبهت على المغسل ,,, وابتعدت شوي عن ابوه ينفذ الكلام
المغسل = الحين نغسل راسه برغوة السدر وجسمه بالسدر ثلاث مرات وفي الاخيرة نغسله بالكافور حتى يطرد الحشرات عنه
نفذت هالمرة كلامه بمساعدة المغسل ودموعي على خدي ,,
اشوف خالد بين يدي بلا حركة ,,, آآآه ياخالد ياما اغمى عليك وحركتك بين يدي لكن هالمرة صعب ,,, صعب ياخالد
راح المغسل يجهز الكفن بسرير ثاني غريب ( ثلاث اكفان ) طيبها بالبخور وحط عليها الحنوط
نقلنا خالد للسرير الثاني ولفيناه بالكفن وابقينا وجهه لين يسلمون عليه الشباب
انحنيت عليه وضميته بقوة
انا بصوت باكي = خليتني اذوق اليتم مرة ثانية
سلمت على خده وخده الثاني ورجعت اسلم مرة ثانية على خده
ورصيته بصدري اكثر
ابعدني المغسل عشان ابوه يسلم عليه شوي وجو الشباب
سلم ابراهيم وفايز ومحمد والبقية اما صالح سمعته يكلمه وهو يسلم عليه
صالح بصوت باكي = سامحني ( وضمه مرة ثانية )
صلينا عليه بعد صلاة الظهر وانا ادعي له من قلبي ربي يرحمه
شفت ابو سامي بالجامع واحمد وابو عادل وفيصل ,,
آآآه يافيصل خلاص راح خوينا وتركنا ,,, جاني فيصل وسلم علي وراح من دون أي كلمة
شيعناه للمقبرة وهناك نزلت انا ومحمد لقبره
وحطيناه باللحد ,,, سمعت محمد يقول
محمد بهمس = بسم الله وعلى سنة رسول الله
وقلت مثله بصعوبة ,,,
وحطينا اللبن وطلعنا وبدا كل واحد يحث على قبره ثلاث حثيات
انا بصوت باكي = يعني خلاااااص ,,, ماراح اشوفه ,,, ابيه من لي غيــ
حسيت بيد على كتفي وانا جالس
فايز = ادعله بالرحمة ,,, هو محتاجك الحين
راحوا وانا بقيت جالس بمكاني ,,, حاول فيني ابراهيم نرجع بس مارديت عليه بالتالي جلس معي
اخذت ساعة وانا ابكي عند قبره وادعي الله يثبته عند السؤال
وصلني ابراهيم للشقة ودخلتها وانا كل شوي يرجع لي موقف مع خالد
لقيت خلود وامي جالسين بالصالة
طالعت خلود وانا ساكت وتذكرت كيف كانت ماتداني طاريه
((()))((()))
خلود بصراخ = خالد خالد خالد ,,, متى نفتك من خالد هذا ,,, اففففففف اذانا ,,, وصلت حتى تتهاوش مع شباب ,,, ولا ,,, يبون خالد مايبونك انت ,,, وش عليك منهم ان شاء الله يذبحونه ,,, انت لا تتدخل فيهم
التفت لها معصب
انا بعصبية = خالد وش اذاك فيه .؟ ,,, هو ماهو على راسك ,,, هذا بدل ماتدعين له يطلع من المستشفى بالسلامة تقولين ان شاء الله يذبحونه ,,, وفارقي عن وجهي تراها واصلة معي
خلود بعصبية = ان شاء الله مايقوم ابببببببببد ,,, الله ياخذه ونفتك منه
((()))((()))
انا بحزن = هذا هو ماقام ابد ياخلود
رحت لغرفتي وجلست على سريري بتعب ,,, شوي ودخلت علي خلود
حسيتها مترددة تبي تقول شي بس طلعت دموعها بصمت وطلعت من غرفتي من دون أي كلمة
العصر
رحت انا واحمد اعزي ابو عبدالله مع اني انا محتاج من يعزيني
دخلت بيت ابو عبدالله وطاحت عيني على الملحق ,,, وماقدرت امسك نفسي وبكيت
ياما سولفنا هنا وياما دخلت عنده ,,, دخلت المجلس وانحنيت اسلم على راس ابو عبدالله الجالس
انا بصوت باكي = عظم الله اجـ ,,, أجرك
مارد علي يبكي
شفت ابو خالد جالس بحزن بس ماسلمت عليه
((()))((()))
خالد بصوت باكي = يرجع من حيث ماجا ,,,, ماااابي اشوفه
محمد = ابوك اول ماجا مطار الرياض سافر على طول لمطار القصيم ومن المطار جا للمستشفى على طول من دون حتى مايرتاح ,,, كله يبي يشوفك
خالد بصراخ = ماااااابي اشوفه مااابي اشوفه ( وتكتف كنه بردان وهمس ) آآآآه جسمي ينهشني ,,, تعباااااان ,,, آآآآه
((()))((()))
ماتحملت ابقى وطلعت من المجلس بعد ما ناديت صالح
صالح = آمر
انا بحزن = تكفى هاتلي رولا ورولين ابي اسلم عليهم
استغرب بس ماعلق ,,
صالح = الحين اقول لعمتي تجيبهم
ووقفت بالحوش احتريهم
شوي وجا صالح ومعه رولين بس ,,, تأملتها ,, وجهها شاحب وعيونها حمرا كأنها توها باكيه و
صالح = رولا عيت تجي
التفتت لصالح وانا اتذكر كلمة خالد
( رولا محرومة من حنان ابوها تبيني احرمها من حنان اخوها بعد ,,, جربت الحرمان ومابي اخواتي يجربونه )
جلست على ركبتي وضميت رولين لصدري
انا بصوت باكي = انحرمت رولا من اخوها ,,, خالد اخوي رااااح ( وبكيت اكثر ) خلاني لحااااالي
ابعدت رولين عني وطالعتها
انا بصوت باكي = انا اخوك يارولين ,,, انا اسمي خالد يعني انا اخوك بعد
صالح وصوته متغير = خالد
قمت والتفتت له بصمت
صالح بحزن = خالد قال لامه يوم كانت الزيارة ممنوعه عنه انه يبي يكتب المحل باسمك ,,, قالتلي عمتي اوصلك الخبر وامه الحين مصره انك تقبل المحل ,,, بعد ماتهدا الامور تروحون وتحولونه لاسمك ( والتفت لرولين ومسك يدها وراح داخل البيت )
طلعت من البيت ورحت للمقبرة
السلام عليكم دار قوم مؤمنين وإنا إن شاء الله بكم لاحقون
جلست عند قبره وانا اتذكر مواقفه وطلعاتنا وتمشياتنا ومشاكله وحبه لاخواته ولاخواني ومزحه وضحكه وصراخه وهوشاته
مديت يدي ومسحت على قبره
انا = اشتقتلك ,,, الدنيا سودا من بعدك
اذن المغرب وانا الى الحين عنده
رجعت للشقة وانا اعيد الانشودة اللي بجوالي
ياصديقي عقب موتك دمعتي صارت عذاب
مدري حزني محتويني او انا اللي محتويه
صرت اجاوب لسألوني كيف حالك يوم غاب
دمعة(ن) تخنق عيوني وعبرة تصرخ ابيه
كل شي(ن) حولي يسأل ينتظر رد الجواب
حتى آهاتي تحيّر دمعتي تصرخ بــ ليه
يابلا قلبي ياليت القبر محفور(ن) بباب
افتحه لاضاق صدري وان تولهنا اجيه
آه و آه وكل آهاتي مثل دمعي عذاب
مدري حزني محتويني أو أنا اللي محتويه
,,, لتحميل الانشودة ,,,
4shared.com - online file sharing and storage - download ط§ظ„ط®ظ€ظ€ظ€ط§ظ„ط¯ط§ظ†.mp3
العرض العادي
