بسم الله الرحمن الرحيم
.
السلام عليكم ورحمة الله وبركاته
.
رحلتنا اليـوم
.
مـع شاعرة كبيرة ، وفي نفس الوقت غامضة
.
ولكن مبدعة هي الشاعرهـ عابرة سبيل
( رحمها الله )
.
لا يعرف عنها إلا أنها من البادية ومن سكان الكويت وهذا ظاهر في أبياتها
.
بينما كنت أتصفح ديوانها أحببت أن أشرككم على بعض القصائد اللتي أعجبتني
.
هذي القصيدة تبين أنها حريصها على تغطيتها على نفسها بإسم ( عابرة سبيل )
وأنها ما تريد أن يعرف اسمها الحقيقي
.
( عابرة )
أهلي يدرون إني شاعرة
بس ما يدرون في جرح الليال
يمنعوني من كتابة خاطرة
ما دروا اني من زمان بهالمجال
آه .. لو يدرون إني (( عابرة ))
عندهم بتصير موتتنا .. حلال
.
وعرفت بنفسها في تعريفها ببطاقتها الشخصية
.
البطاقة الشخصية
.
أنا عجوز مطلقة وأم ورعان
وأيضاً مدام وبنت وآنس وعانس
أنا بدوية وعايشة عند حضران
وبنت البحر وابوي زارع وغارس
أمية ما تعرف حروف والوان
وتلميذة دشت جميع المدارس
ظفرة وخبلة ، عاقلة ، في نقصان
شرود وانطح لي ثمانين فارس
خلونِ .. أعيش العابرة دون عنوان
طيفٍ يمر بلا رقابه وحارس .. !
وتبين للقارئ علاقتها الوطيده مع الشعر بهذه الأبيات
.
خوية الذات
.
أنا آسفة يا قصيدة وابعدي عني
الوقت كله عطيته لامتحاناتي
حتى حبيبي بطيفه لادنى مني
للغرفة الثانية لملمت حاجاتي
الوقت ضيق وانا دروسي يهمني
خليني اختمها مسك آخر محطاتي
ما انكر جميلك علي يا مخففة عني
قصة شقاي وعناي وكل ضيقاتي
أدري أنا منك وانتي قطعة مني
لكن صراحة ثقيلة بعض الأوقاتي
خوية الذات لا ..لا تزعلي مني
العمر قدام .. وانتي مرصد آهاتي
.
.
لم تظهر من هويتها إلا أنها ( بدوية )
رسالة من بدوية
.
تعال بشرح لك أنا كل مغلوق
تعال شاهدني مع ذكرياتي
لا .. لا يغرك لبس موضة ومسحوق
إنفض غبار الوقت تلقى صفاتي
قرب وطالع ، معّن الشوف بحدوق
وزيف التطور جرده من حياتي
بتشوف في وجهي من الماضي اطروق
أخذت من بطن الصحاري صفاتي
طفلة بثوب مخيطينه ومفتوق
تنطر جديد الثوب بالعيد ياتي
سمعت أطراف أخبار عن كلمة السوق
وتاخذ وتسأل !!..هو وجوده ثباتي ؟
طفلة سحبها الوقت للهم برفوق
حتى انها صارت من العاشقاتي
وجار الزمن وعرض الحب للعوق
شرق ركايبها وهم مشملاتي
واتلا عهدها فيه يركض ورا نوق
مسرود جيب وفي يدينه عصاتي
ويصد ، لكن يلتفت لي من الشوق
عجلان يلخصني بعين تحاتي
وقفى وخطواته يتلن معلوق
وخلاني ما تنقل عظامي عباتي
ودار الزمان ولا مشى الحظ بوفوق
وما زلت أخفي بالظلام اعبراتي
ولا زلت أنا ألعب له على كل طاروق
حتى يجيب الله موعد وفاتي
.
وقصيد عابرة سبيل أكثره غزلي
.
أحب ثاني
.
أنتم تحبوني وأنا أحب ثاني
واللي أحبه باغي ٍ ناس ثانين
هذا ابتلى فيني وهذا بلاني
واللي بلى مبلي وباليه مسكين
أنا ترجيته وغيره رجاني
والمشكلة ما ينقل القلب حبين
سهوم تجمع بين قاصي وداني
ياليت لسهوم المحبة قوانين
هذا ينوح وذا جريح يعاني
هذا قتل هذا ولا هم دارين
وهذا كتم سره وهذا علاني
الله أكبر يا جهاد المحبين
.
هذاك ...
.
هذاك لو قال الشتا صيف ، عرقت
ولو قال صيفي برد ، شبيت ناري
هذاك لو قال الجمل طير ، صدقت
أقول ريشة بعثرته الصحاري
هذاك لو قال المطر كذب ، وافقت
وادور الأعذار حق الخباري
هذاك لو قال القمر طاح ، صفقت
أقول مللته كثير المساري
هذاك لو قال النظر عيب ، دنقت
يصير لي كف على اللمس ضاري
هذاك لو ينفي وجودي ، توهقت
ما عاد ليه حل .. غير انتحاري
.
.
المشكلة
.
المشكلة ما هيب هذي ولا ذيك
المشكلة لا حبت العين طايش
تزعل ويضحك وان تبسمت يبكيك
الموت جاك وهو بالأفراح عايش
تناقشه يزعل ، تداريه يشقيك
ترقع شروخ ويطلعن لك درايش
ما ينتراضى وبالزعل ما يراضيك
والصبر يثر بالقلوب الهشايش
المواضيع المتشابهه
العرض العادي
