السلام على الاخوه الاعضاء...
في جريده الرياضي كاتبه تدعي نوف الغامدي في عمودها اليومي في عدد اليوم تهجمت على الكابتن سامي الجابر وهذا نص المقال,,,
الله يسامحك يا سامي الجابر
يقولون ان الاعب سامي الجابر مترجما بالبرازيلي لمدرب الهلال الجديد باكيتا واقول عز الله ان سامي ذيب ويعرف من وين تتاكل الكتف وبالطبع راح يضبط اموره مع المدرب طالما هو المفوض من الاداره بالترجمه وياويلي لو عرف المدرب ان سامي الجابر كان احد اسباب اقاله المدرب السابق للهلال اديموس عز الله انه بيقول لسامي خذ الورقه وحط التشكيله .
بصراحه ماهي مهضومه ولا مقبوله ان لاعب اي لاعب يقوم بمهمة الترجمه للمدرب , لا .. وباللغه اللى مايفهما غير الاعب والمدرب وبقيه الاعبين زي الاطرش في الزفه اللى يقول لهم سامي عليه بيسووه والمدرب بيهز راسه يعنى موافق .
وبكل تاكيد ان اول شي بيسويه سامي انه يؤسس لنفسه موقعا في تشكيله الفريق والفرصه قدامه متاحه ان كان مو في الهجوم يمكن في الوسط وطبعا وسائل الاقناع يا كثرها واهمها انه لاعب خبره ولاعب الخبره مطلوب في اي فريق والشباب عليهم الانتظار او الباب كما يقول المثل يفوت جمل .
وياكثر اللي فوتهم الجابر من هذا الباب من لاعبين شبان موهوبين كان الهلال يعلق عليهم امالا كبيره . ما ادري تذكرون يوسف الحيائي يوم بدا في الهلال كان وقتها سامي بعيدا عن الفريق الوطني بسبب الاصابه .
ايامها كان الحيائي هداف الدوري وفي كل مباراه يا هدف يا هدفين وقلنا يومها ان هذا الاعب هديه الهلال للمنتخب لانه يجيد التسجيل بالراس والرجلين وكله نشاط وحيويه .
وين الحيائي الي غاب بعد اسبوع من عودة سامي لتشكيله الهلال . ضاع الحيائي وضاع بعده الجمعان الي ماينشط ويبدا يثبت وجوده حتي يختفى ووين حسين العلي الي يسجل في كل مباراه واللي كلف الهلاليين الملايين. واستمر يسجل حتي في الظروف الصعبه الي كان يلعب فيها لدقائق مع الفريق مانقدر نظلم سامي ونقول انه ما كان لاعبا , لا كان مهاجما وهدافا وبارزا لكن مايمكن ياخذ زمانه وزمن غيره هذا ماجد عبد الله اللي زي سامي عشره ترك الكره وودع الملاعب لما حس بانه مايمكن يا خذ زمنه وزمان غيره . ليش ماجد يمكن هذا يسبب حساسيه للهلاليين اقول شوفو الامبراطور اللي كان رمز الهلال والكره السعوديه صالح النعيمه اعتزل العب والكل يقولون تكفي ياصالح لاتعتزل وكان وقتها يمكن يستمر في الهلال والمنتخب .
النعيمه كان يدور في ملاعب الحواري يبحث عن الموهوبين لتقديمهم للهلال هذا الكابتن الصحيح مو الكابتن اللي يجتهد بس عشان يضمن خانه لنفسه حتي ولو كان منتهيا .
لاكن ليش نحط اللوم كله علي سامي ليش ما نلوم الاداره اللي احطت سامي كل هالصلاحيات وراها ما تعلمت من الاداره السابقه التي لم تتحدث عن سلبيات سامي الا بعد ما استقالت وبعد ما قال سامي في المدرب وفي سياستها اللي ما حد قاله .
تري الهلال موب نادي صغير في الدرجه الثانيه يدار بها السهوله الهلال زعيم والزعيم يحتاج لرجال كبار واصحاب قرار وماتنطلي عليهم الحيل والمثاليات الكاذبه وخرطي (الترجمه) يعني اللي خلاهم يجيبوا كل هذا الجهاز الطبي يعجزهم عن التعاقد مع مترجم معقوله وياخوفي لا تكتشفوا الغلطه الكبيره اللي طبو فيها متاخرين . تري الجابر لم يحرم الهلال من مهاجمين موهوبين المتمكنين تراه اقوى فقد استطاع ان يطيح بادموس اللي محد يقدر يطيح به من اصحاب الراى والمشوره وقبله طيح ناصر الجوهر وصار يقول له الشوره شورتك يا كابتن والراي رايك يا كابتن ويتحدى عليه في التصريحات حتى طاح وطاح معه لكن بعد ايه يا عيني بعد نكسه تاريخيه ومؤلمه للكره السعوديه وكله بسببك يا سامي الله يسامحك...
منقول
اقول وراك ما تروحون لمطبخك اصرف لك يا بعدي جايتلي تتكلم بالكوره،،،
<<< اجل انتي وش تسوين هاه >>
وما اقوول الا بربري وتكلمي من اليووم لبكرا وبربرتك ذي مارااح تااثر بالذيب
ارجو من محبين سامي الجابر الرد على هذه الصحفيه البائسه
تحياتي،،،،
المواضيع المتشابهه
العرض العادي
