يابنت لحظه مابقى غير يومين
......... وأشفي غليل النفس وأجمح هواها
لاني فقير ولا كنـزت الملايين
......... والحال ربي عالمٍ وش بـلاها
مسطول من شوف البنات المزايين
......... مفتون والدنيا عطتني قفاها
أمشى على البيدا بليّا موازين
......... حظي رقد يوم الخلايق تباها
يابنت لحظه لا تقولين بعدين
......... بعدين ماندري وش اللي وراها
أهل الهوى مثل اليتامى المساكين
......... اللي ظلام الليل يفضح بكاها
أما إرحميني لاتروحين تكفين
......... وألا إقتليني لاجحدتي دواها
ترى الهوى ماهوب لعبة وراعين
......... مثل الرحا لادار يطحن رحاها
يلعن جدف خامسك والناس واعين
......... ولو تجتمع كل القبايل غزاها
محمد يبكي وأكثر الناس سالين
......... قلبه نزف والعين يآكثر ماها
يبكي زمانٍ فات والناس لاهين
......... والورده الحمرا يساقي ثراها
المواضيع المتشابهه
العرض العادي
