كلنا نعرف المستشفى وكلنا صارت لنا حالات سواء طارئة او عاديه في هالمستشفى
ابي اقول لكم اللي صار معاي في مستشفى الخفجي العام ^_^
اول شي تسجيل المواعيد :
موظف واحد بس على تسجيل المواعيد والله ياجماعة الخير اليوم بعد الظهر انا واقف ماسك سرا واشوف العالم متجمعين
على هالموظف المسكين قلت والله لو إنه شيخ ويوزع شرهات ^_^
استقبال طويل عريض تقريباً فيه 4 مقاعد لموظفين لتسجيل المواعيد واللي نشوفه موظف واحد بس مسيكين وش يلحق حتى يلحق
والمشكله إن راتبه 1500 ولا مايستلمها بالوقت المحدد بعد مايستلمها إلا بالواسطات وبعد طلعة الروح (( يامسيكين ))
ثاني شي رجال الامن :
رجال الامن في مستشفى الخفجي العام صحيح إن عددهم قليل والمشرف بصراحه عن نفسي لي شهر اجيهم مواعيد وزحمه
مشرف الأمن ** وهل يخفى القمر ** تصدقون عاد ماعمري شفته خلال هالشهر إلا مرتين بس وين يروح مدري؟؟!!
أو إن دوامه كذا يداوم بالشهر مرتين وبس ؟ والله والسنع ^_^
وخلال هذا الشهر راجعت المستشفى آخر الليل للطوارئ طبعاً والله العظيم إني قاعد اتلوى قدام موظف الاستقبال عطيته اسمي وبياناتي
وقال لي تفضل استريح لين يجي الممرض (( سألته ليش وين راح الممرض ؟ )) قال الممرض راح يشتري اغراض وبيرجع الحين
المهم انا انتظرت تقريباً العشرين دقيقه وهذا الممرض دخل من باب الطوارئ المهم شايل بيده كيس مليان مشروبات غازيه ومشروبات الطاقه
بيبسي وكود رد وبايسن وبطاطس ليز (( بنكهة الخل والملح )) والله شي يفشل قسم بالله المهم الممرض بعد ماوزع المقسوم جآني قال لي انت فلان
قلت ايه يرحم والديك والله تعبان تكفى الحقني قال تعال على السرير المهم رحت للسرير انتظرت الدكتور الا جاني دكتور هندي بس والله العظيم
إنه حبيب وطيب جاني وعالجني سألته قلت له (( دكتور ليش الممرضين مايساعدونك ))
ضحك ضحكة غريبه وقال لي (( اساساً بالطوارئ كلها فيه ممرضين بس ـ و ـ واحد يغطي عن الثاني يعني يقسمون الدوام بينهم بالنص ))
المهم لما خلص الدكتور قال لي روح للصيدليه وانا بطريقي للصيدلية شفت منظر غريب وهو (( شفت 3 من رجال الأمن متجمعين ))
قلت الله يستر اكيد صاير شي ولما قربت منهم صرت اسمع ضحكاتهم تتعالى يوم قربت لهم أكثر سألني واحد معهم (( معاك جوال كاميرا ))
قلت ايه معاي قال (( تعال صور )) قلت خير شسالفه وقال وهو يضحك (( ههههههه ابد صايدين فار ))
رسالة إلى ...: سلم لي على الأمن إذا كانوا رجال امن المستشفى يصيدون فيران أو يكشون ذبان ؟؟
ماعلينا يمكن كل هالاشياء تتطوف لكن في يوم من الايام جيت المغرب للمستشفى اول مادخلت من الباب شميت ريحة
المهم يوم قربت للاستقبال واطالع عند الكمبيوتر حصلت ثلاث صحون ( واحد بيتزا والثاني لبنه والثالث زعتر )
لا والموظف ماكان موجود بعد على الاستقبال الضاهر انه كان رايح يوزع الاكل على الموظفين اللي معاه
بعدين تعالوا صحيح ؟؟؟
الحين كم مره سمعنا ان فيه حرمه كبيره بالسن او رجال كبير بالسن دخل هالمستشفى متعافي مافيه شي
داخلين يفحصون بس وبعد فترة نسمع إن هالحرمه او هالشايب متوفين ؟؟؟؟؟
هل الخلل في اجسامنا ؟؟؟ ولا الخلل بالدكاتره والا الخلل في طاقم الادارة الموقر
<< يرفع القبعه لمدير المستشفى ^_^
والله العظيم ياجماعة ماجبت شيء من عندي كل هذا موجود بمستشفى الخفجي العام
وبعدين في احد الايام والله العظيم اني جاي بالليل لما كانوا يسوون تعقيم للطوارئ كانوا ناقلين الطوارئ عند استقبال العيادات
المهم يوم جيت بدخل من الباب شفت الصيدلي الأخ يلعب كورة وقاعد ينقز فيها والله قعدت اطالع فيه يستاهل التجشيع
إذا مايدري نعلمه إن فيه نادي بالخفجي ^_^
<< يقف احتراماً وتقديراً لمدير المستشفى ^_^
ايه صح نسيت اقول لكم :
انتو شفتوا عيادات ( النساء والولادة ) ؟؟؟؟؟؟؟؟؟؟؟؟؟؟؟؟؟؟
والله العظيم إن الرجال يسابقون الحريم على الدخول للعياده ورجل الامن جالس بالاستقبال مايحرك ساكن
<< هالمرة يردد يالليل مطولك ؟؟
وانا عارف إن هالمنتدى صوته مسموع وإن شاء الله نشوف شي يتغير
والله العظيم ياجماعة الخير إنا ماجبت شي من عندي قسم بالله كل هالاشياء موجوده في مستشفى الخفجي العام
<< يرفع القبعه لمدير المستشفى ^_^
عزيزي مدير مستشفى الخفجي العام
بخصوص الكاميرات اللي في ممرات المستشفى وفي كل مكان بالمستشفى
هل هي زينه مثلاً؟
<< يقول الله يرحم آيام مستشفى الشركه كنا بنعمه والله العظيم
لكن أنا بذكر ماحصل لي في هذا المستشفى وكلمة الحق يجب أن تقال في هذا..
منذ أسبوعين تقريبا أصابني أنخفاض بالضغط فجئه لاأستطيع الوقف وأنما جالسا على سريري تارتا وعلى الأرض في غرفتي وأنزف عرقا ومرهق من التعب..
وجلست على هذه الحاله تقريبا في المنزل ساعتين وبعدها شعرت أن يومي قريب بسبب الحاله المفاجئه التي مررت بها والتعب فأخذني أحد أخوتي للمستشفى حينما شعروا بتعبي وبطلبي لهم الذهاب للمستشفى..
حتى أن دخلت باب الطواري قلت لأحد الدكاتره الطواري الذي صادفني الدكتور الهندي ألحقني يادكتور أنا تعبان وللأمانة أجتمع الدكتور الهندي وسعودي وشعرت بعيونهم الخوف هدفهم أنقاذي بعدما أقاسوا الضغط وبسرعه وضعوا المغذي بيدي وأبرا بوريدي وبعيونهم الخوف لأنقاذي ولرفع الضغط وجلست ساعتين وبعدما أستقرت حالتي خرجت من المستشفى ولله الحمد..
ولهذا أجد أن الدكاتره في قسم الطواري وللأمانة مؤدين عملهم بأكمل وجه وربما حاله عن حاله تفرق ..
وربما أخي هناك حالات قد تكون أعظم وأخطر.
ونود أن نشكر جميع العاملين في هذا المستشفى وأخص بالذكر جميع دكاترت قسم الطواري ورجال الأستقبال والسرعه في كتابة ورقة الدخول للعلاج للمرضى ممن لايستطيعون السير والوقوف من التعب..
فجزاهم الله الخير على هذه الجهود والأعمال الأنسانيه فهم يستحقون كل الأحترام والتقدير وبكل أمانة وصدق..
الله لايورينا مكروه يالغالي وبالنسبة لي كنسلت ملفي عند مستشفى الخفجي العام وصرت اروح اعلاج بمستشفى خاص احسن وازين وتشوفهم كلن يبي يخدمك تدري ليش (( لانك داخل بفلوسك )) ياحسرة مو مثل الخفجي العام قسم بالله العظيم قبل فتره في إحدى مراجعاتي لمستشفى الخفجي العام سجلت بياناتي عند الاستقبال وجا واحد معاه بنت صغيره (( بنته )) سجل بياناته وسأله الموظف انت من وين ؟ قال انا زاير للخفجي جاي من الدمام تكفى الله يخليك بنتي حرارتها مرتفعه دخلها الله يجزاك خير رد الموظف وقال له معليش استريح شوي وهم ينادون اسم بنتك^_^
يعني البنت تموت مثلاً وبعدين انا شايف شوف عيني قسم بالله العظيم إن مافيه احد قبل هالبنت المسيكينه / بعدين ياخوك اضاهر هالمشاكل هذي في كل المملكة / الموظف يترزز بكشخته وريحة عطره اللي من تدخل مع باب المستشفى تشم ريحة عطره والمواطن ينطق ولا يموت ولا بسلامته محد درا عنه وزارة الصحة نايمين لكن الشكوى للي ماتنام عينه
والله لا يوفق اللي كان هالسبب في توظيف هؤلاء اللي استلموا وظايف ماهم كفو لها
سواء من مدير المستشفى إلى الهندي عامل النظافه والله ياخوك ان مدير المستشفى مره راجعته علشان حالة وفاة لأحد جيراني والله العظيم يالغالي ان اخلاقه للاسف ماهي اخلاق مدير مستشفى.
إن شاء الله نشوف احد المسؤولين اللي يدخلون هالمنتدى ويشوفون إن شاء الله يكون فيهم
خير ويسون لو شي بسيط من تحسين اوضاع هالمستشفى واخلاق بعض موظفينه
بعدين تعال انا مستغرب من إدارة هالمنتدى لأن سياستهم المعروفه هي إنك تنتقد الشخص الانتقاد البناء وفي كلامي اللي فوق انا ذكرت اسماء راحوا امسحوها ليش مدري شي غريب والله المفروض مخلين الاسماء علشان يمكن اللي ذكرتهم انا يمكن يكونوا مايعرفون إنهم على خطا يمكن يشوفون أحد كتب عنهم ويحسون شوي ويمكن لو اطول في الكلام إدارة هالمنتدى توقف عضويتي أو تحذفها بس ليش كذا يادارة المنتدى المعروف عنكم
(( الديمقراطيه )) والمعروف في هذا المنتدى إنك تجي وتقول رأيك وإنك تنتقد الإنتقاد البناء والمعروف بعد حرية الرأي والتعبير بس ليش تحذفون الاسماء الموجوده : بس تدرون يلا ماصار شي عآآآدي بما انكم حذفتو الاسماء (( الناس كلها تعرف منو مدير المستشفى ويعرفون منو مشرف الأمن ))
<< هههههههه (( ضحكة استغراب وجا في باله اشياء يمكن تكون صحيحه ))
ياليتها وقفت على النظافه وبس عندك النظافه وعندك طريقة تعامل الموظفين / الموظف لما تجيه يقابلك بنفس شينه كأنه يذلك وش هالمستشفى اللي مانتعالج فيه الا بالترجي وحبة الخشم والراس والله مستشفى يبي له إعادة هيكلة من إدارة الموقره والمحترمه حتى عامل النظافه وحتى السواقين اللي فيه والله ياناس شي يقهر اجل حرمه كبيره بالسن دخلت للمستشفى تبي تفحص فحص عادي ( وتشيك على الظغط والسكر ) دخلت وتنومت أكثر من 3 شهور وبعدها سمعنا إن هالحرمة إنتقلت لرحمة الله (( الله يرحمها ويغفر لها )) بعدين تعالوا الحين اللي يمر على شارع الاصفر فيه قبل فتره صاير حادث والسياره ضاربه بجدار المستشفى انتو شفتو اللوحة اللي مغطين فيها الجدار المتكسر والله مدري شفيهم إدارة هالمستشفى يحسبوننا أغبياء ومانفهم بس تدرون يا إدارة المستشفى المحترم
ياخي ليش مستشفى النعيريه افضل ومستشفى الجبيل افضل ومستشفى الحفر افضل ومستشفيات الدمام افضل؟ تدرون ليش علشان إداراتهم من الدكاتره المميزين مو دكتور أي كلام والله انا لما طرحت الموضوع ابي الفايده للجميع لأهل الخفجي وبصراحه المستشفى يخص اهل الخفجي كثير لأننا كلنا نتعالج هنا في هالمستشفى بعدين ياخوي ترا هذي ارواح ماهي بلعبه إذا ماتقدر تعالجني ارسلني لأي مستشفى ياخي مو شرط ترسلني لبرا الخفجي حولني لمستشفى الشركه ولا مستشفى خاص وأنا اتكفل بكل شي والله العظيم ياخي ترا تعبنا وملينا وسمعه هالمستشفى للاسف في اسفل السافلين.
بعدين تعالوا لقسم الإشاعه ياخي والله العظيم شي يرفع الظغط وانا مستغرب من رجال الحسبة رجال الهيئة اللي يأمرون بالمعروف وينهون عن المنكر (( قسم الاشاعه )) في الفترة الصباحيه فيه موظف وموظفه الموظف سعودي طبعاً والموظفه فلبينيه لكن في الفترة المسائيه لو مرضت امي مثلاً (( الله يبعد عنها وعنكم كل مكروه )) و وديتها للمستشفى وطلب مني الدكتور اني اخذها لقسم الإشاعه علشان يسوون لها إشاعه : تدرون كم تحصلون موظف؟ راح تحصلون موظف واحد بس ولا رجال ليش مايحطون معاه موظفه ياخي انا مابي هالرجال هو اللي يفحص الوالده ولا يسوي لها إشاعه انا ابي إذا اهلي مريضين ابي اللي يفحصهم ممرضه ودكتوره مابي ممرض ومابي دكتور ياخي بعض الفحوصات لازم تكشف العوره والحرمه كلها عوره (( كلامي فيه شي من الغلط يا رجال الحسبه ))
ياخي مدري ليش هالمسؤولين مايطالبون ولا يسوون للمواطنين شي؟؟؟؟؟
ايه صح نسيت المسؤول يسرق عفواً يتسلف من خزينة الدوله ويروح يعالج عياله أو هو يعالج في البحرين ولا مصر ولا سوريا وحنا يالمواطنين خلونا ناكل هوا ونموت محد بيسأل عنا
اهم شي راحتكم يالمسؤولين وأهم شي سعادتكم ابد حنا نموت وانتم انبسطوا وفلوهـآ^_^
بصراحه الطوارئ ظلمهم حرام انا مره تعبت جتني حساسيه بجسمي طبعا حالتي اذا تأخروا بالعلاج احتمال يؤدي للوفاه يقولون كذا المهم في حرمه بجنبي مسخنه وهي قبلي وهما عارفين حالتها المهم ركضوا لاتجاهي وعالجوني لاني كنت بحاله لايعلمها الا الله واسرعوا بعلاجي الله يعطيهم العافيه وماتركوني الا لما تحسنت حالتي وتحسن لوني ورجعت مثل ماكنت الحمدلله وعيونهم مبين عليهم خايفين علي
اما الاقسام الثانيه بصراحه ماعندي خلفيه فيها هذا اللي حصل معاي علشان تكونون معاي بالصوره
المواضيع المتشابهه
العرض العادي
