[align=center]بســم اللــه الرحمــن الرحيــم
مطلق شاب على نياته . يدرس في صف ثالث ثانوي علمي . عمره سبع طعش . إنسان يحب التاريخ حب الله لا يوريكم . يعتبر أفضل مثال للشاب البار بوالديه . وأمه يا خنة حيلي يا هي تخاف عليه خوف هالمسيكينة بزعمها أنه توّه طالعن على هالدنيا . وما أخفيكم .. أنه كان متفوق في دراسته . في ذاك الصبح وبالتحديد في الساعة سبع ونص يعني في وقت الطابور الصباحي مسك مدير المدرسة المكرفون بعد الإذاعة الصباحية (( السلام عليكم .. بإسمي وبإسم منسوبي المدرسة نفتتح الفصل الدراسي الثاني سوياً وأثرت إلا أن أحرّصكم على التحصيل العلمي لأنه هو اللبنة الأساسية لكل طالب ... إلخ من هالكلام اللي كنا نسمعه في كل صبحية )) انصرفوا الطلاب للفصول . بعضهم يضحك على اللي قاله المدير بزعمهم أن الدفارة عيب والرّجة و الخبال أمر لابد منه و البعض قرر أنه يشد حيله .. مثل ما قال المدير لكنهم نسبة قليلة اللي فكرت في هالشيء وتبون الصدز محد جاب خبر هالمدير . راح مطلق لـ فصله ومثل العادة جلس في الصف اللي قدام في النص << يعني عند طاولة المدرس . تأخر مدرس الفيزياء عنهم . دخل مدرس التاريخ واتضح أن هذيك الحصّة (( حصّة إنتظار )) . (( السلام عليكم )) ردو الطلاب بصوت خافت (( وعليكم السلام )) . (( معكم مدرس التاريخ الاستاذ عبده لي اربع سنين في هالمدرسة وألحين نبي نتعرف عليكم بالدور )) أشرّ هالمدرس بـ أصبعه على الطالب اللي جالس عند الباب تسنه يقول له وش اسمك . بدو الطلاب بذكر أساميهم بالدور . خلصوا . لحظة صمت لمدة خمس دقايق . المدرس حب أنه يلطف الجو (( هاه ... وش تبون نتكلم عنه يا شباب ؟؟ )) . الصف الأخير والصف اللي قبله كلهم عن بكرة أبيهم طاقين اللطم .. وصافقينها نومة . وتبون الصدز محد رد على سؤال هالمدرس الضعّيف . في هاللحظة وتقدير من مطلق لـ هالمدرس الواقف قدامه رد (( أستاذ .. تكلم بالله عن الحضارات وخصوصاً الحضارة العربية و الأسلامية ومن هالكلام الله لا يهينك )) . استانس هالمدرس بسؤال مطلق (( اهااااا .. قلت الحضارة العربية و الأسلامية و العصور القديمة يا مطلق .. الكلام في هالجانب يطول لكن اللي أقدر أقول أن الإسلام يا مطلق رفع من قدر العلم والعلماء وحث على طلب العلم . يا مطلق .. اكيد انك سمعت عن البيروني و ابن سينا وابن الهيثم وابن رشد .. ابن الهيثم يا مطلق الأجانب كانوا يترجمون كتبه لـ لغاتهم . فـ حضارتنا يحق لنا الفخر فيها فحنا ناس عندها تراث له معنى يا مطلق . في العصور القديمة كان المسلمين لهم الكلمة في هالعالم يا مطلق . في العصور القديمة كانوا المسلمين مراجع في العلوم بكل مجالاتها . في العصور القديمة كان الأدب العربي مفخرة لنا كـ مسلمين . في العصور القديمة كان الشعر فعلاً شعر مهوب زي ألحين كله مدح ودراسيع(ن) مالها سنع . ويا مطلق الصدز اني ما أقدر أعطيك معلومات وافيه في هالحصة بس . لكن اللي أقدر اسويه أني اعطيك أسماء كتب تقراها .. والشي اللي يضيق الصدر أنك لو تروح لـ أسبانيا وتشوف التراث اللي هناك تنغبن .. كله تراث إسلامي وألحين بيديهم هالأجانب الكفرة )) .. (( اسبانيا ؟؟!! )) .. (( أيه أسبانيا يا مطلق .. فـ اسبانيا هذي اللي أنت تشوفها ألحين كانت تحت حكم المسلمين وألحين الله يخلف على الاثار الأسلامية )) .. استانس مطلق من كلام المدرس لانه يحب التاريخ وتبون الجد دخلت براسه الروحة لـ أسبانيا لكن وراه الشايب والله لو يقوله أنه بيروح لها ان تسان شلّخ رجوله تشليخ . راحت ذيك الحصة كلها في الحضارة العربية و الاسلامية . طلع مدرس التاريخ وجو بعده المدرسين ومطلق داخل(ن) في عالم(ن) ثاني مهوب يمهم . طاقها هواجيس في أسبانيا .
في ذيك العصرية صحى مطلق من (( القيلولة اليومية )) . طق التكميلة وذيك الكنادر اللي شاريها بذيك العدّة . طلع من البيت رايح للملعب اللي ورا بيتهم هو ويا عيال الحارة . وكالعادة يمسك مطلق الصفّارة عشان يصفّر << لا يا شيخ أجل ليش ماسكها .. عشان يعلّم اللعيّبة أن وقت التسخين وتفكيك العضلات انتهى << يالنصاب .. ذولاً وش عرفهم بـ التسخين .. وهذا هو حال مطلق . في كل عصرية الكورة شي أساسي مع العلم أنه من جنبها بس أسم انه يلعب . انتهت مدة التدريب اليومية من هنا وأذان المغرب يرتفع من هنا . صلّو الشباب . راح كل واحد لبيتهم . وفي رجعة مطلق للبيت ألاّ و (( صنهات )) جالس على عتبة بيتهم . ما أخفيكم أن هالصنهات داشر تسلاب و كان منبوذ من ذيك الحارة لعلمهم التام أن دشارته خارجة عن القانون وبدون مبالاة مرّ مطلق من صنهات ولا كأن أحد موجود (( ياهوه .. يا ثقل .. ياخي سّلم .. السلام سنة )) استمر مطلق وكأنه ما سمع حرف واحد من هالصنهات ألا في هاللحظة تذّكر مقولة الشايب (( حب راس بليس .. ولا تمشي مع صنهات )) إستمر مطلق في طريقه وبلمحة لـ صنهات ألاّ وهو يمزمز زقارة الحشيش ومطلق هالضعيّف ما كان يدري وشو هالحشيش فـ اخر ما توصل له في (( سفاسف العصر الحديث )) هو (( الدخّان )) وفي وجهة نظره الشخصية أن قمّة الدشارة هي التدخين . وصل مطلق للبيت وكذا يعتبر ان جدوله اليومي انتهى . دخل مطلق الصالة ألا وأبوه وامه جالسين يتقهوون . جلس معهم يتقهوا لين أذن العشا . صلو . رجع مطلق للبيت هو ويا ابوه . دخل المطبخ (( يمّة .. تكفين واللي يرحم والديتس فكينا من المكرونة اللي تسوونها كل يوم تراكم أذيتونا بها )) ابتسمت امه وبنظره عاطفية لولدها (( ابشر يا ظنيني أنت أشّر بس .. امر وش بغيت )) . (( اللي تبينه .. المهم ما نبي مكرونه )) . دخل للمقلط ألا وابوه متسمر عند التلفزيون ومشغل الجزيرة . جلس معه لين جا العشا << مهوب مكرونة أبشركم .. الظاهر انه شوربة << الظاهر ؟؟ الله من زين الكاتب .. المهم .. رقى مطلق لغرفته . انسدح على السرير . تذّكر الحصة الأولى في المدرسة وكلام الاستاذ عبده عن أسبانيا . قعد يهوجس هالمطلق فيها واثارها (( وشلون أروح لها ؟؟ )) .. (( وشلون أفتح مع الشايب الموضوع ؟؟ )) .. (( وشلون أقنع الوالدة ؟؟ )) ومن هالاسئلة . قعد على حيله . راح للكمبيوتر . فتح قوقل . كتب (( اثار اسبانيا )) وطلعت له الصور وقعد يقلب فيها لين الساعة ثنتين و يمحط راسه على الكيبورد ويرقد << ما تعود على السهر ..
بدايـة علاقـة .. !!
مرت الأيام وسالفة أسبانيا واثارها نساها مطلق . ذاك اليوم وبين عشوين بالتحديد (( مطلق .. رح للبقالة واشتر لنا ماجي )) . (( إن شاء الله يمه .. خليني بس أتقهوى وابشري أجيب لتس الماجي واللي تبينه )) . خلص من القهوة مطلق . طلع من بيتهم رايح للبقالة اللي عندهم . (( السلام عليكم .. شفيع )) . (( وعليكم السلام )) . (( ألا يا شفيع عندك ماجي ؟؟ )) . (( لا ما فيه )) . طلع مطلق من هالبقالة متجه لذيك البقالة البعيدة . طبعاً مطلق رايح رجليه . دخل البقالة (( فيه ماجي ؟؟ )) . (( فيه ماجي )) . خذ مطلق الماجي وجا عند المحاسب (( ألا بكم ؟؟ )) . (( بـ 18 )) . دخل مطلق يده في مخباته وصار ما معه ألا عشرة ريال (( محمد مافي مشكلة ادفع ألحين عشرة ريال وبعدين جيب باقي ؟؟ )) . (( لا لا صديق ما يجي .. كفيل سوي مشكلة )) . توهق مطلق في هاللحظة و وقتها سمع صوت يحوم التسبد (( وش دعوة يالجار الناس للناس .. خذ يا محمد ثمانية ريال )) وألتفت مطلق ألا وصنهات يمد الفلوس لـ العامل . ما أخفيكم أن مطلق ما أبرمها وسكت فترة بسيطة ثم قال (( الله يجزاك خير وماقصرت .. وبكرة ان شاء الله أردها لك )) . (( هههههههه .. وش دعوة يا مطلق والله لو اني ماد(ن) لك ألف تراها ثمانية ريال ما تستاهل وبعدين حنا جيران ياخوك ما بينا هالامور )) . طلع مطلق من البقالة رايح للبيت وفي هاللحظات قعد يفكر في اللي سواه صنهات معه . وتسنه بدا يعجبه صنهات << قايل(ن) لكم على نياته هالضعيّف .. دخل البيت . عطى امه الماجي . تعشوا . رقدوا . من بكرة ما طاب لـ مطلق خاطر ألا يودي هـ الثمانية ريال لـ صنهات . بعد صلاة العصر طلع مطلق للملعب وخذ معه الثمانية ريال خلص من اللعب وهو راجع مر من بيت صنهات وكالعادة لقاه تاكي على العتبة (( السلام عليكم .. صنهات )) . (( وعليكم السلااااااام .. هلا .. هلا بالغالي ولد الغالي )) . (( ما أطوّل عليك يا صنهات دوك )) ويمد الثمانية ريال لـ صنهات (( أفا ... استح يا مطلق وش هالكلام الله يهديك .. ردها .. ردها لمخباتك والله ما اخذها )) . (( يا صنهات .. الحق حق وهذا حقك خذا ياخي )) . (( يابن الحلال .. أقولك ردها لمخباتك بس .. المراد اقعد خن ناخذ علومك )) . وللأسف قعد مطلق مع صنهات ومن هنا بدت علاقتهم (( و وقع مطلق في شباك صنهات )) . وصار كل عصرية مطلق بدال ما يروح للملعب يروح لـ صنهات ويسولف معه . بس للأمانه ما كان يحشش مطلق ولا كان يدخن بس سواليف صنهات جايزة(ن) له . واستمرت الصداقة بينهم وصار مطلق يقعد بين عشوين مع صنهات . بدال ما يتقهوى مع أهله . لكن ما كان يعلمهم أنه جالس(ن) مع صنهات وكانت تصريفته أنه هو والشباب اللي يلعبون كورة يقعدون بين العشوين في الملعب وكل يوم القهوة على واحد . وكان ابوه مصدقه لعلمه التام بان ولده عاقل . مرت الايام . وجا وقت الأختبارات الشهرية وصار (( ما لم يكن بالحسبان )) مطلق مستواه انخفض عن قبل . استغربوا اهله هالمستوى المتوسط اللي ما تعودوا عليه . (( مطلق .. وش هالنتيجة اللي تحوم التسبد ؟؟ )) . (( أدري يبه .. انا غلطان ولا ذاكرت زي الناس لكن ان شاء الله اني بـ اشد حيلي واتفوق في الإختبارات النهائية )) . (( الله يوفقك .. لكن ترى وضعك ما جاز لي .. اسمع من اليوم ورايح المغرب أشوفك في البيت لا أشوفك طالع )) . (( أبشر يبة )) . ويوم جا عصر باتسر ولا مطلق تاكي عند صنهات (( ألا أقول يا صنهات ... أبوي منعني من طلعة المغرب ولا سمح لي ألا العصر )) . (( هههههههههههههههههه وانت بزر يمنعك من الطلعة )) تضايق مطلق من كلام صنهات وتسنه أيّده . مرت الايام وصار مطلق يروح لـ صنهات بعد ما ينامون أهله وصار يسهر عنده لـ اخر الليل . وفي ذيك الليلة (( ألا أقول يا مطلق .. انا انسان ودي أسافر .. ودي أطلع أغير جو .. تخاويني ؟؟ )) . (( خخخخخخخخخخخ .. تستهبل أنت أنا ألحين يالله أقدر اطلع اخر الليل وتقولي أسافر )) . (( هههههههههههه الله يرجك .. يابن الحلال انا أدور لي خوي وقلت بـ اشوف وش تقول انت أطيب من غيرك )) . وكذا صار حال مطلق . كل يوم والداشر صنهات يفتح مخه على أشياء ما كان يدري عنها ..
وحصلت الطـامة .. وجت الإختبارات النهائية وطلعت نسبة مطلق 80 % ..
(( مطلق .. مطلق و وجع )) . (( سم .. سم يبه )) . (( حوّل حالت رجولك )) . نزل مطلق لـ ابوه وهو مطمن راسه (( ألا وش هالنسبة ؟؟ اللي تسنها وجهك .. ألحين كل السنين اللي راحت متفوق ويوم جت السنة اللي عليها الكلام تدج يالداج ياللي ما تستحي )) . ما تكلم مطلق وبقى ساكت وابوه قعد يهوش عليه . دخلت الام وشافت الموقف وراحت وظمت ولدها وهو يصيح << الله من زين الوصف يا كاتب الموضوع .. مرت الأيام وجا وقت التقاديم للجامعات . وللأسف ولا جامعة تفتح النفس قبلت مطلق . بعدها قرر ابو مطلق أن يرسل ولده للخارج في البعثات . راح مطلق وابوه يقدمون على البعثات وهم يقرون أسامي الدول قرى مطلق اسبانيا (( يبه .. أبي اروح لـ اسبانيا تراهم يمدحونها )) . (( أقول اقطع واخس .. انا ادرى بـ مصلحتك )) . كلم أبو مطلق واحد(ن) يعرفه هناك (( يعني واسطة )) ودبّر مطلق .. وطلع أسمه مع اللي بيروحون لـ أسبانيا . استانس مطلق باللي صار . وتذكر كلام الاستاذ عبده عن اسبانيا ومهما صار لمطلق من تغير ألا انه ما تغير حبه للتاريخ وهالسوالف .
صنهات و مطلق و السفر لـ (( أسبانيــا )) .. !!
ذيك العصرية وكان مطلق جالسن مع صنهات (( ألا أقول يا صنهات .. أنا عندي بعثة لـ أسبانيا بعد شهرين ورا ما تخاويني لها .. أنا أدرس وأنت تتمشى وتغير جو على قولتك وترجع متى ما بغيت )) . (( كفو يالذيب .. خلاص تم خلني بس أدبر أموري .. مير ما يمديني أخلص أوراقي قبل ما تروح أنت رح وأنا اذا خلصت أموري جيتك هناك )) . مرت الشهرين وسافر مطلق لـ أسبانيا هو واثنين معه تعرف عليهم . هناك سكن عند عايله . وتبون الصدز حرام أسميها عايلة . ما غير حرمة و بنتها بس . جلس مطلق عندهم اسبوع وماش الوضع ما جاز له . مرة(ن) يدخل الغرفة ولا كلبهم ( الله يعزكم ) جالس(ن) على سريره ومرة ينزل للصالة ولا القطوة تطامر عليه . ومطلق إنسان ما يواطن الحيوانات . وقتها قرر مطلق يكلم (( حرمة البيت )) .. (( اسمعيني .. انا إنسان ما أواطن الحيوانات و كلبكم و قطوتكم مسببين لي أزمة .. يعني يا أنا يا هم )) << يقولها بـ الانقليزي .. (( والله مدري وش اقولك يا مطلق .. لكن .. هم أهم منك والله يستر عليك )) <<< برضوه قالتها بالانقليزي .. طلع من عندهم مطلق وقرر انه يسكن في شقة وبالفعل سكن في شقة لحاله في هالفترة دق عليه صنهات . (( ألو .. هلا مطلق أسمعني أنا اليوم رحلتي لـ أسبانيا نشوفك خلاص ؟؟ )) . (( اوك .. الوعد المطار )) . (( جا صنهات وسكن عند مطلق )) اللي سواه صنهات في اسبانيا المخرج منع طرحه في هالقصة . لكن خلوني أقولكم سالفتهم يوم راحو للمتحف .
فـي المتحـف .. !!
(( صنهات .. اليوم بـ اوديك لمكان بتنهبل عليه )) . (( ألا يالخسيس .. وين بـ توديني في هالعصرية ؟؟ ذوليك ما يفتحون ألا اخر الليل )) . (( لا ما عليك .. انت ألبس ثيابك ولا عليك )) . لبسوا ثيابهم . ركبوا مع التكسي . اتجهوا للمتحف . وصلوا . (( وش ذا يا مطلق ؟ )) . (( هذا المتحف )) . (( وشو .. أقول أركد .. صدز وش هالمكان ؟؟ )) . (( ايوالله أنه متحف .. تعال تعال )) . حامت تسبد صنهات . دخلوا المتحف وقعدوا يتمشون وصنهات ماله خلق و مطلق منبهر باللي يشوفه ويتذكر كلام عبده عن اسبانيا وفعلاً كلامه صحيح .. كل الاثار اللي شافها اثار واضح انه إسلامية )) وهم يدورون في المتحف . ومن غرفة في غرفة ألا وذيك اللوحة الكبيرة اللي ماخذه مساحة من السقف لحد الارض تهتز (( مطلق .. أنت تشوف اللي أشوفه ؟؟ )) مطلق في هاللحظة بلّم ولا قدر يحتسي . وألتفت صنهات على مطلق وقعد يهزه (( مطلق .. مطلق وش فيك ؟؟ )) . (( لا لا لا مافيني شي .. يالله مشينا )) وألتفت صنهات ألا وهاللوحة تطيح ويطلع من وراها واحد(ن) لابس(ن) مشلح وعمامة تسنه واحد(ن) من هاللي يجون في المسلسلات الدينية . في هاللحظة . كلهم جتهم أم الركب (( السلام عليكم .. يا إخوة .. من أنتما ؟؟ )) . ما حتسوا الشباب لإنهم ما استوعبوا الوضع . صنهات قدر يلتفت عشان يشوف كان أحد حولهم . وللأسف ما لقى أحد حولهم . (( أخواني في الله من أنتما ؟؟ تحدثا )) . ردو بصوت خافت << أخفت من صوت الطلاب يوم يدخل عليهم مدرس التاريخ عبده .. (( وعليكم السلام )) . تجرأ صنهات (( من أنت يالشيخ ؟؟ ولا في اسبانيا وتحتسي عربي بعد )) . (( أخي الحبيب .. لم أستطع فهم ما تقوله بالضبط .. ولكن انا الوليد بن سعيد .. )) . (( وش أنت من لحية .. ؟؟ الوليد مين ؟؟ )) . (( أأنتما عربيان ؟ )) . ردوا كلهم (( أيه .. وسعوديين بعد )) . (( سعوديين ؟؟ ماذا تعني هذه الكلمة ؟؟ )) . رد صنهات (( ألا يالهيس .. ما تعرف السعودية .. السعودية هي أرض الحرمين )) . (( اهمممم .. تقصد جزيرة العرب )) . (( ايييييه عليك نور .. ألا أنت من تكون و وش سالفتك ؟؟ )) . (( انا الوليد .. ببساطة من الدولة الأموية )) هنا رد مطلق (( وشو .. الدولة الاموية .. عسى ما شر يابو شارب شي أنت ؟؟ )) . (( ماذا تقصد بكلامك ؟؟ )) . (( ياخوي حنا ألحين في عام 1429 وتقولي الدولة الاموية )) . (( ماذا تقول ؟؟ أأنتم الان في عام 1429 ؟؟ ... يااااااه سنون مرت وأنا هنا لوحدي .. إخواني .. أنا على عجل ولكن سـ أسألكم عشرا .. ))
صنهات : تفضل
مطلق : تفضل
الاموي : أولاً .. ماذا حدث لـ الأندلس ؟؟
صنهات : الاندلس ؟؟ ياخي مار(ن) علي هالاسم .. لكم مدري وين .. بس أبشرك الحمد انها بخير ..
مطلق : الاندلس ؟؟ للأسف إسمها الان أسبانيا وهي الان ملك للكفار
الأموي : كيف ؟ الاندلس تحت حكم الكفار ؟؟ واسفــاه
الأموي : ثانيــاً .. كيف هو وضع المسلمون وكيف هو حال الفتوحات ؟
صنهات : خخخخخخخخخخخخ الله يرجك .. يابن الحلال أمس مباراة قطر وكلهم ما يعرفون السلام الوطني الشباب مجنسين ..
مطلق : المسلمين مهوب مثل أوّل ياخوك والان العالم كله تقسم لدول ..
الاموي : واسفــاه ..
الأموي : ثالثــاً .. أين هي عاصمــة الإسلام ..؟؟
صنهات : عاصمة الإسـلام ؟؟ اسمحلي أول مرة أسمع بهالاسم .
مطلق : مثل ما قلت لك .. العالم كله تقسم لدول ولا فيه عاصمة للأسلام كل دولة ولها عاصمة
الاموي : واسفــاه
الاموي : رابعــاً .. ماذا حل بـ الكوفة والبصرة ؟؟
صنهات : وش كوفته وبصرته الله يصلحك .. ألحين الدعوة محيوسة فوق حدر .. شيعة وسنة وامريكا لاعنة(ن) الطيب فيهم
مطلق : الان هي تحت مسمى واحد اللي هو العراق وهي ألحين شبه محتلة من قبل الكفار
الأموي : واسفــاه
الاموي : خامســاً .. ماذا حل بـ (( أدب )) المشرق العربي ؟؟
صنهات : خخخخخخ .. أجل تقول أدب ؟؟ ياخوك ألحين عندنا شي اسمه شاعر المليون .. ما غير سرق دراهم و رجّعوا العصبية القبلية من جديد .
مطلق : الأدب العربي .. قتل في العصر الحديث
الأموي : واسفــاه ..
الاموي : سادســاً .. ماذا حل بـ البيت الحرام ؟؟
صنهات : لا الحمد لله .. أبشرك الحرم على ما يرام وألحين قاعدين يتشاورن في توسعة الصفا والمروى والظاهر انهم مهوب متفقين
مطلق : الحمد لله .. البيت الحرام على أفضل حال والتطوارات تطوله في كل وقت
الأموي : الحمد لله ..
الأموي : سابعــاً .. ماذا حل بـ بيت المقدس ؟
صنهات : تقصد فلسطين ؟؟ ياخوك هذولا شعب الله يصبرهم له سنين وهم في حروب والظاهر انهم مهوب منفكين منها
مطلق : هو يقع في دولة تسمى فلسطين لها عشرات السنين وهي تحت الإحتلال اليهودي
الأموي : واسفــاه
الأموي : ثامنــاً .. ماذا حل بالعلوم .. هل يوجد علماء مسلمون ؟؟
صنهات : هههههههههه .. أخويانا جيدين في مسلسلات رمضان .. والله ياهم يبدعون في الاحداث لكن ان جا الصدز ما حولك أحد
مطلق : للأسف من بعد البيروني و ابن سينا وابن الهيثم وابن رشد ما جانا أحد .
الأموي : واسفــاه
الاموي : تاسعــاً .. ماذا حل بالوحدة الأســلامية ؟؟
صنهات : الوحدة أعرفه وهو نادي في مكة ويقولون أن التونسي لاعب(ن) عليهم وخذ دراهمهم ومشى لكن الوحدة الإسلامية ما أعرفها .
مطلق : للأسف أصبح المسلم في نظر الكافر (( إرهابي )) وظهرت لنا مشاكل قبل فترة تفجيرات ومن هالكلام .. لكن ابشرك الحكومة ما قصرت معهم ..
الأموي : ماذا تقصد بـ إرهابي ..؟ ولماذا لا يجاهدون هؤلاء في سبيل الله ؟
مطلق : المشكلة أنهم يعتقدون أن خبالهم في ديرتهم جهاد .
الأموي : واسفــاه ..
الأموي : عاشــراً .. سـ أسألكم بالله وأرجو أن تردوا على سؤالي بصراحة .. هل ظهر إسمي في صندوق التنمية العقاري ؟؟
صنهات : خخخخخخخخخخخخخ ياخوي جدي ما ظهر اسمه وتنشد عن اسمك والله انك ما تستحي ..
مطلق : وش جدك يالخبل .. ألحين الرجال من الدولة الاموية ..
لا ياخوي أسمك للأسف ما ظهر لإني أنا مقدم وأتابع لكن وعد مني أذا طلع علمتك ..
الأموي : واسفــاه
الأموي : عذراً أحبتي على الإطالة .. وياليتني لم أظهر لكما وأسمع ما قلتماه لي ..
صنهات : لا عادي يابن الحلال .. السوالف معك أبرك من التمشي في هالمتحف ..
مطلق : والله ياخوك هذا اللي صاير ولازدت عليك بحرف .. والله يعز الاسلام والمسلمين
الأموي : اللهم امين .. في امان الرحمن يا إخوة
النهــاية [/align]
المواضيع المتشابهه
العرض العادي
