دموع الفتاة أربع أربع

[(ملاذ الطير)]

[align=center]سلخير


وشلونكم وتسيف انتوا

باديء ذي بدء شسمك يا ذاك .. ربي يهب لك مُصيبة قل آمين <<وشرايكم اتقان
اولاً .. اشكر الجميع على صبرهم الدئوب علي بما اني كائن برمائي

ثانيآ ابارك للربع اللي تملكوا كم سهم بتعذيب مدري عذيب هالشركة الجديده جعل هالاسهم الماحق والله مافقرني الا هي .. ونصيحة اخو ماكلها لحد الارض : اكرشوها يالربع قبل تكرشكم



.. والله مدري وش ملاقي فيني واحد من ألأخوان يومنه يحبني ياحبني له والله هالاطخم ..
بس تبي الصراحه يا ......تصدق اني انا يا محاتسيك من تالي صرت اجفل منك حيا .. حتى اذا لديت رقمك بجوالي تجيني الغلقه وخطر علي ابتسي .. ويوم انك اتصلت آخر اتصال لك من رقم ثابت تراي ياللحية الغانمه يجيني رجفه يومني اشوف رقم غريب مادري ياوخيي وش هالبلا مع العلم اني كنت بالصناعية قاعد اخرط جنوط موتري، وطبيت لي بحفرة كبر قريح والبركة تعود للبلدية جعل ماهوب به وخرب علي جنطين .. واعتذر منك للمرة المليون وسبعطشر ووالله أني مقصّر في كتابة كم موضوع في الفترة الأخيرة لأني مشغول وخلها على ربك بس ..
وباذن الله اني لاابرد تسبدك الايام القادمه ((متعوب عليها القادمه ذي )) واقعد عظمن بحلدزك كل يوم بالمنتدى لين من تقول لي
( اذلف الله يرحم شيابك رح لاهلك ياخي تراك اشغلتنا )




نعود لسالفتنا الي بها بداية الموضوع لأن الموضوع مبين من عنوانه .. عنوان يقوطر غنج وتميلح !

وبيني وبينكم يالربع .. بهالوقت مايمشي معك إلا مثل هالعناوين المزركشة .. يعني عناوين على شاكلة نساء مترفات فوق صفيح ساخن) لاحد يسالني وش هالحتسي لاني مادري وش معناه

والا عناوين بيّاعين الطراطيع ( سبعة امور تبحر بك في عالم السعادة) .. هذي ماتنفع

وماراح يمشي سوقها مررررة .. مع ان بعض منتديات العربان دبلوا تسبودنا بحركة ( لحق آخر فضيحه )

نعنبوا ديار هذولي يعني ماحصلو الا الفضايح !


والا عنوان بخط عريض ( لاتفوتكم .. الفنانه ...مصوّرتن روحها وهي بغرفتها ولابسه من غير هدوم)
.. طيب بالله عليكم وبعدين .. انشالله لابسة مقوصر
.. يعني وش الفايده
.. وانا بعد وش بنستفيد من هالحتسي
.. شسمه الشي اللي يفقع المرارة ان فيه مخفات من بني يعرب مايمدية يشوف العنوان الا وهو حاط طرف ثوبه بفمه منطلدز يبي يسجل ويسجّلون عشان يشوفون وش العلم وتاليها موضوع ( وحدةٍ تقول انها شايفتن فنانه لابسه مقوصر بعرس فلانه )

.. بصراحه على ماقالو شرّ البلية مايُضحك بعيدن منكم .. ونصيحتي لنفسي قبلكم العين تزني وزناها النظر فيما حرمه الله
فراقبوا الله فيما تنظرون
فوالله انه مطلع على ماتخفيه الصدور
وتذكر ان الله سبحانه يشوفك يوم انك بهالوضع
الله لا يبلانا !!
واقول للي يمصعون هالمواضيع لخلق الله (وهم بعيد منكم وتكرمون) اقلهم يستحون على وجيههم شوي ويراقبون الله ويتركون المهايط عنهم الزايد لأن الهياط الزايد يجيب البواسير في عُمر متقدم .
ياجعلهم الماحق اللي يبلشون بطبه قولوا امين



المهم


نخش دغري بالماضوع << لاحووول توه يحمي الاخ



قبل فترة ماهيب بسيطه أسولف مع حبيبة قلبي الوالدة عن " بنت من بنات جيراننا " .. بنت عاقلة محتشمه وماتطلع ابد من بيتهم إلا في مرة بالسنه
.. حتى ان وخيتي تذكر عنها انها ماطلعت ابد تحتسي في الإذاعة المدرسية من من الحيا الزايد .. مقطّعها الحيا يادافع البلا
..شسمه وفي مرتن من المرارير قدر الله عليها وطلعت تقدم حديث بالاذاعة وهي (تهل العبيري) تبتسي وجاتها ام العبيد وقامت ركبها تصاك وهم يسدحونها في عربية حقت خلطه ويضفونها لغرفة المديرة وهي تجي مطوعه وهي تقرا عليها الين من راح البلا المهم ان المدرسات يمدحون هالبنية ماشالله ويثنون عليها بعيد من الاذاعة .. ومعروفه هالبنية بالكرم يقولون اذا جا دورها بالفطور الصباحي حق الفصول ضفت المطبخ كله ولاخلت حافظة جريش ولا مصابيع الا وضفتها.. وش ذا المزاج ياهالمدرسات ..بالله عليكم فيه احد يفطرجريش على صباح الله خير.. اخاف انهم بس يودونه لبيوتهم .



الوكـاد ان هالبنية.. تقدمت لها اكثر من 30 عايلة .. وماكتب الله لها نصيب..
محكّ الهرجه في هالماضوع عن اخر عايله جاتهم .. طبعا هالعايله اللي ماهيب محترمه ابداً ابداً اتصلت عليهم عقب المغربية .. وقالت اللي اتصلت لام هالبنيّه : يقولون ان عندكم بنت والله لو أنها طماط

: ايه عندي بنيّه وش حلاتها .. وهي تفك السبحه من الحماس ماخلت شي بتاريخها ..

اعرسوا من العام ، ووحده منهم جابت بنت يازينها زيناه!


قالت هاللي اتصلت ( وهي مكورة خشتها 3 متر فوق) باتسر نبي نمرّ عليكم ..


قالت : ابشـري حياكم الله .. وهي تروح تروكع وتصلي .. وتطلب الله التوفيق .. قلبها بيتقطع على بنيتها


وهي تروح هالبنيّه .. وهي تلصف في وجهها وتطق الشخص وام المكياج .. هل الحريِم يقدرون يتخلون عن المكياج ولو مرة وحدة بحياتهم كلها؟؟؟؟؟
سوعال من باب القلافه قصدي اللقافه:
الجواب طبعاً : أهــا بس واعقل من هالحتسي .. المكياج مفيد للبشره ويخليها تلمع ، وترا وقت الديرمه انقرض وتهالك وانتهى واحنا آلحين بزمن الماركات فرزاتشي وديور وطقتها يابتوع المرقب بالبطحاء

اهاه بس .. وش مرقبه ذا ؟

ويوم صلّوا المغرب والبنيّه خمتها الهواجيس وبغت تجيها سالفة الاذاعة مير ربك ستر وهي تحولتز وتطلب الله انه يكتب زوج صالح ..
خمسة وعشرين ناس يجون ومالله كتب نصيب
.. آخرتهم هذيك الهبلة اللي يوم جتها ذبت عليها كلمتن ماهيب زينه .. يوم قامت المسيكينه تجيب العصير وهي تقول المسيِره والضعيفه تسمع حتسيها وراكم ماتشترون سير لتخفيف الوزن للبنية ازين لها الا ياجعلها الماحق قلوا . آمين



المهم جا ولدهم هو وراسة موقف موترة ولاصخن بالباب.. يقال له راعي بيت.. وهي تنزل امه وخالته واخته وبنت اخته وبنت عمة اخته ومعهم محامية جارين عباتهم ومتزينين
تقل رايحين لعرس .. عما فهالاشكال .. يروحون دستة حريم عشان يشوفون بنيّه .. والله ياشيخ لوّهم بيروحون يشهدون بمحكمة على أرض بحي النظيم وبيمصعون صك ارث شايبهم !



رحّبت أم البنيّه بهم .. الام ثم الخاله ثم اخته .. مدري وش موقع اخته من الإعراب !
.. بس اتوقع ان محلها " منصوبة بخُبث وضميرها يعود على التميلح والترزز على حساب بنات خلق الله ..


دخلت البنت .. وهي تشقل تنورتها من ورى خوف(ن) من عيون (ن) تلاطم بكل زاوية من المجلس
، سلمت عليهم ثم جلست وهي تفهق عمرها شوي يوم ان امها غمزت لها ( يعني تعدلي خليك سنعه وصبّي القهوة لهم واطلقي حجاجك ولاتفشليني ) ..

البنت ماقصرت قامت بالواجب وزود .. حتى يوم انها قامت مانست تقول : عن اذنكم ابروح اقحن لي مويه تراي شرقت حدي!

عيون الدسته هالحين تلاطم فحصوا مندوبها يددققون فيها من راسها لعرقوبها وجمركوها وطلعوا قائمة بالعذاريب والبلاوي اللي لو مشوها على جهاز جمارك مطار الملك خالد مادروا عنها
أم الماخوذ هالمعرس " اللي الزين في جهه وهو في جهه ثانية" واللي عيارته عند اهل ديرته ((الحاشي)) وذلك لأن وجهه تقول دعامة دورية معترض على جنب - الله يحسن خلقنا -
.. أم الماخوذ هالمعرس قالت لام هالضعيِفه : تحروا العلم منًا !


يعني " ترو المواري طيبه " .. والضعيّفه مختبصة ولادرت أن هالكلمة صارت من تالي مثل اللوز على ماقالو الخرفان .. وان اللي تقول هالكلمه .. تقولها بس " سكاته لام البنت"
عشان ماتحسّف انها حاطتن لهم حلى من القبًاني.
يوم ، اسبوع ،اسبوعين .. والتلفون كل دق قامت الام تزحف له بكراعينها من التعب ، وهي تقول عساها بس للأسف .. الربع ماهم يمّها ابد ابد !

البنت .. لازالت تنتظر الفرج بزوج عاقل.. والام مابه الا ترفع يدها لربها عشان ان الله يسخر للبنية رجل صالح . وخواتنا في الله ( الدسته ) كل يوم يتقهون فنجال عند خلق الله والدعوى سايبه .. ومادروا أن فيه صدرو تأنّ من القهر كل يوم من حركات هالشله السقيمه العقيمه !


شسمه يالربع تراي احتسي عن شي مؤسف من واقعنا التعيس
شي يطق المرارة ويهيض التسبد .. أتكلم عن ( نموذج من حثالة المجتمع) واعذروني على هالكلمة
ماخذين اعراض خلق الله لعبة ومايعلمون أن الله سبحانه مُطلع على مافي صدورهم وانهم محاسبين عما يفعلون .

طمرة:

يابنية .. قدّامتس أمل والامل بيد الله .. لاتحوم تسبدتس أبداً .. والرجا في الوالي.
فلقه
اقول للي كحلهم يغبر له جمس واللي يرتزون في بيوت خلق الله.. ترى الدنيا دوارة
ومن ضحك بالثرمان يضحك بلا سن

المسودة:


باتسر العصر ام دحيم قصيرتنا عازمتن الوالده على فنجان قهوه .. والعالم الله ان ماخاب ظني انها تبي تشكي الحال بعد !

فمان الله ,,



فتكوا بعافية


وكالعادة لا حد يشره علي

يومني احتسي باللي يدور في بالي[/align]